Matta 24 - Ɓwaatiye New Testament

Sɨgbəshi kpawtɨ vɨratə

¹ Yesu a dɨmgə Kwa-Shafe a muɗə, də lagbe dan a shi hakan ɓa bɨlən wule nwoshi Shafəngɨn.

² Yesu a sarən, “A hwun naa nwoshe kat, diyalə na dɨ boyownə atɨ, nagi hiɗə itɨ farati aa dɨ mbiɗi a kangə nə itə, kat mya ləkədərən a fəlgərən təna kəji njiya.”

³ Ite Yesu nee nza nə Motɨ Kade Zetun, lagbe dan a shi hakan a ɗiyən le kɨɗək-kɨɗək atɨ, “Boyenə pe, goɗinə shinə ɓa ɗa ya? Mɨnə sɨgbəshi mɨnasa ka mɨni i kpawtɨ vɨrata?”

⁴ Yesu a luwa a sarən, “Bəmdə myensəwnə gəkɨlə ɓe ama aa vwakarəwnə.

⁵ Gəkɨlə ɓwaare hananang ɓa shi hakəwnə a kwaka, imi ɓa səwnə atɨ, ‘Hɨnə Ma Həmɨnpwa a Yaɓwarən,’ tən ɓa vwaka ɓwaare furi-furi.

⁶ Mbak-mbak hwun ɓa kɨl lə pa-kawatə ka dɨk-dɨkə pa-kawatə, ɓe kala aa gəwnə. Wule shingɨn ɓa ɗa, shezə aa kpawtɨ vɨratə nə.

⁷ Ɓwaare dɨ njiya som-som ɓa markasə, həmye ɓa ndɨlkasə, myatə ɓa fuka, njiya ɓa humuro hee som-som.

⁸ Angɨn nə tiyatɨ tənəte ɓaga shi, ɓətɨ otɨ yedi mwasati.

⁹ “Mye ɓa kəttəwnə a vədəwnə gə mya tənəə dəwnə baa a ɓəltəwnə, vɨratə kat ɓa kworəwnə gə hwunə hɨnggi.

¹⁰ A fərəngɨn ɓwaare hananang ɓa viriwagə kottə, tən ɓa ndɨlə ta ɗərdəsə a kwonəsə.

¹¹ Kpali jeronye furi-furi ɓa dɨma a vwaka ɓwaare furi-furi.

¹² Səhase ɓa maɗə a furo a mbəgə hee kat, angɨn ɓa ɗɨkə mwoha da ɓwaare hananang a mbɨra.

¹³ Ma mbasɨsən kanyi kpəkəkə tɨlə kpawtə, mangɨn nə ɓa ɗɨm mbətə.

¹⁴ Mye ɓa hiwa ka ləmə feme a nə həmne a mbəgə vɨratə kat gəkɨlə ɓwaare a kɨlə, beetɨ angɨn nə kpawtɨ vɨratə.

¹⁵ “Gə ləngɨn hwun kana naa ‘Sə guname, a dɨ shi ka kɨɗashe’ mye kangdən a haa ɗəmɗəmə vor Shafe ɓətɨ kpale Daniyel a kpalə – ma dɨ bəli a nda lee naarə ləngɨn itɨngɨn –

¹⁶ myee a vor njiya Yawudiya a təna gyeɓə a nggɨrə mogye.

¹⁷ Ma a nə vɨne dan, ɓe ndaa janga a njiya a pɨrə vor hwodan atɨ ɓa nggur asə.

¹⁸ Ma mgban gaarə a gaashe dan, ɓe ndaa viriwa atɨ ɓa nggura ɓarawtɨ dan.

¹⁹ A fərəngɨn sə oti ka mandye ka wape, ka 'ye dɨ shəwdə je.

²⁰ Ɗam hiwtə gəkɨlə ɓe hwunaa gyeɓə vor ɓoole, naasə mgban a fərə piyatɨ da Yawude.

²¹ Gəkɨlə tənətə nə də kɨr-kɨr a fərəngɨn, a wule tənəte myaa ndaga ɗatɨrə dɨ fəra mya kwak vɨratə kan, baa dɨmə fəranə supo, myaa diyə ga naa wule tənətɨngɨn.

²² Anda aa gəkɨlə Həmɨnpwa a bənggə bətɨngɨn ngga mɨna gbɨlɨm, taa ndəng ma də ɓa nda mbə. Shezə gəkɨlə le da myee Həmɨnpwa a taɗə mye ɓa bənggə bətɨngɨn.

²³ A fərəngɨn ama kana səwnə atɨ, ‘Niyəm, Ma Həmɨnpwa a Yaɓwarən nə ga,’ naasə mgban ‘Sɨndə gaarə,’ ɓe hwunaa mwaka angɨn.

²⁴ Gə wule myee dɨ kər-jeronye atɨ tənə myee Həmɨnpwa a yaɓwatɨrən, ka kpali jeronye ɓa dɨma ta ɗa zərgi shikoshopye ka sɨndəle som-som gə təna vwaka myee Həmɨnpwa a taɗə, anda tən ɓa mba vwakatə vwaka mingɨn.

²⁵ Niyəm, hɨn səwnə ka haa-tan.

²⁶ “Ama kana səwnə atɨ, ‘Sɨndə gaarə a vor kaake,’ ɓe hwunaa wudə hangɨn, tən kana mɨna səwnə atɨ, ‘Sɨndə ɓo vor vɨne,’ ɓe hwunaa mwaka ləngɨn.

²⁷ Gəkɨlə ɓətɨya mgbaratə a dɨ wuɗila bwang ka ɓɨrtə dɨ basa pwa, a muɗə dɨ basa njiyan, sə mgban shitɨ de hɨn Nze da Ɓwaara ɓa gə.

²⁸ Haa wo duwe a bə də, a hangɨn mgban nzəkɨlikitə ɓa peyə.

²⁹ “Beetɨ tənətɨngɨn a fərəngɨn tee gbyel, “ ‘Fəre ɓa gə kulit, likɨtə aa diyə ɓɨrə, tyekəlye ɓa fwaka dɨ pwa, gəte a pwa ɓa humuro.’

³⁰ “Də mye ɓa naa sɨgbəshi shitɨ de hɨn Nze da Ɓwaara ɓa dɨma a pwa, mi vɨratə kat ɓa təwo a kehee. Tən ɓa ne hɨn Nze da Ɓwaara hɨnə dɨ janga dɨ vor pwa a nə pərɓye, ka gətə ka gbaktɨ fukatə.

³¹ Ka kormɨ ɓome kaɓa kpan hɨn ɓa lyana malyenye de, təna payadə myee Həmɨnpwa a taɗə dɨ takatɨ vɨratə kat.

³² “Ɗyegənəmshe dɨ haka kada nggwale. Basengɨn kana tiya twasatə ta mana jiba a sɨsən, hwun leyə atɨ ɓoole janga.

³³ Sə mgban hwun kana naa wule shingɨn kat, hwuna leyə atɨ sawtə tɨla a kwa-vɨnke.

³⁴ Diyalə na dɨ boyownə, imi a vɨra wanetɨnə aa dɨ mbərə a pɨrə ɓaa anda shinə na boyo kat aa ɗa.

³⁵ Pwa ka njiya ɓa pɨrə ɓaa, shezə ləməgye de aa dɨ ga pɨrə ɓaa.

Taa ndəng ma də lee fərəngɨn

³⁶ “Taa ndəng ma də lee fərəngɨn ka awatɨngɨn. Nagi malyenirə gaarə a vor pwa nə tənaa leyə, hɨn ka nəna hɨn Nze taa leyi, Baatə nə ɓəmbə leyi.

³⁷ Ɓətɨya a gə nzata Nuhu, sə mgban mɨnashi hɨn Nze da Ɓwaara a vɨratə ɓa gə.

³⁸ Gəkɨlə a vor nzata Nuhu, ite haɓye aa nda luu vɨratə kat, ɓwaare a pɨrə zəmshe ka soɓwe, tən ta ɗəməsə mandye baa tənaa yə lee fəra Nuhu a pɨrə koombote nda ɗa.

³⁹ Tənaa yə lee sa ɓa ɗa, baa haɓye a shi mgban a pɨrə kaarən kat. Sə mgban mɨnashi hɨn Nze da Ɓwaara ɓa gə.

⁴⁰ Morye kpe ɓa gə gaashe, mya nggur ma hiɗə a ɗaka ma hiɗə.

⁴¹ Mandye kpe ɓa pɨrə mgbe-təmye ta sɨda, mya nggur mate hiɗə a ɗaka mate hiɗə.

⁴² “Gəkɨlə ləngɨn, bəmdə myensəwnə, gəkɨlə hwunaa lee fəra Həmɨmiye dəwnə ɓa mɨnakan də.

⁴³ Zə leyəm atɨ, anda həmɨ-hwoɗye lee tukote mahɨre ɓa shi də, ndi ɓa nda nza ka diisən a gɨra gələ nda kərə mahɨre ɓiya haa.

⁴⁴ Gə-angɨn mgban nzam ka ɗaasɨtə gəkɨlə hwunaa lee awate hɨn Nze da Ɓwaara hɨn ɓa shi də.

Kɨsa twaye ka kɨsa ɓaye

⁴⁵ “Kɨsa twaya ka lele kan, sɨnə a həmɨ-hwodan a vən hwoɗye kat ka mbiɗitɨ lagbee a hwoɗingɨn gəkɨlə nda nidərən, ndi taawa vərən sɨzɨmtə fərə-fərə.

⁴⁶ Sə hanɨngti ka kɨsangɨn, həmɨ-hwodan kana mɨna asɨ pan sɨne dɨ ɗa lyentə ɓətɨya mya vən.

⁴⁷ Diyalə na dɨ boyownə, həmɨ-hwoɗingɨn ɓa pedə gɨnətɨ dan kat a ɗakarə a tɨfə kɨsangɨn.

⁴⁸ Shezə hye kana niyə mgban anda kɨsangɨn ma hasə, nda sa nəngɨn atɨ, ‘Həmɨ-hwode ɓa ɓwanga ndaa dɨ mɨna,’

⁴⁹ nda tiya lyeb ndeyingɨn kɨse, a tiya zɨmshe a peyə ka ji-sob vwe, tən ta soɓwi a kpashi.

⁵⁰ Həmɨ-hwoda kɨsangɨn ɓa mɨna a fəra ndaa leyə də, mye ɓa sɨ mgbɨmrən a awate ndaa leyə də.

⁵¹ Həmɨ-hwoda kɨsangɨn ɓa lyebə a ɗəkən ɓokye a sɨsən, nda shea pedən ka ji-kwakpeye, gaarə a hangɨn mye ɓa təwo ka tuula lintə.