Matta 16 - Ɓwaatiye New Testament

Farise a ɗilə sɨgbəshe

¹ Farise ka Saduke a shi haka Yesu a kanarən, təna ɗiyən atɨ, nda bɨlərən sɨgbəshe dɨ pwa.

² Nda luwa a sarən atɨ, “Fəre kana gəə kaadə hwuna dɨ sa atɨ, ‘Haa nə ɓa gə shəng-shəng, gəkɨlə pwanə kpalam,’

³ ka hawure hwuna dɨ sa atɨ, ‘Ɓoole nə ɓa njima, gəkɨlə mgba pwa ndə dɨ rika.’ Hwuna lee shee a nə gətɨ haa, shezə hwunaa lee sɨgbəshi shinə dɨ ɗa ɓəgəng.

⁴ Mi wanetɨnə mi hashi, a ji-ɗongə mwadiyale tənə dɨ ɨli gəkɨlə mya bɨlərən sɨgbəshe! Myaa dɨ bɨlərən asə som pɨrgə hɨnggə Yunana.” Yesu a ɗakarən a muɗə a haa som.

Maɗe da Farise ka hɨnggə Saduke

⁵ Ite təna nggɨra a ɓayatɨ gəre, myentɨ lagbe dan a nggurgə buroditə.

⁶ Yesu a sarən atɨ, “Bəmdə myensəwnə ka wule maɗe da Farise ka hɨnggə Saduke.”

⁷ Lagbe dan a ɗiyəsə le a wakasərən a sasə atɨ, “Gəkɨlə myaa shim ka buroditə səngɨn ɗa nda ɓə bwe le ma?”

⁸ Yesu a lee la təna dɨ ɗiyəsə a wakasərən, nda ɗiyərən atɨ, “Mwadiyale dəwnə nə ɓyeləng, ɓə mɨnə ɗa hwuna dɨ boyəsə le a nə burodite hwun tam kaara?

⁹ Baa ɓəgəng kwa-hubosəwnə aa banga ma? Hwunaa yə ɗyanga ka burodite tuf morye haru bəw laka tuf a zɨmə, nda konye ya mya pora?

¹⁰ Ɓə burodite tukolukpe mgban, a ite morye haru bəw laka fwat a zɨmə, nda konye ya mya pora?

¹¹ Mɨnə ɗa hwunaa leyə atɨ aa a nə buroditə na dɨ bwe le? Na səwnə atɨ, bəmdə myensəwnə ka wule maɗe da Farise ka Saduke.”

¹² Də lagbe dan a ɓə shea leyə atɨ aa a nə maɗa dɨ ɗɨkdə buroditə ngga hɨtɨka nda dɨ byelə, a nə wule kəndəshe da Farise ka Saduke nda dɨ byelə.

La Bitrus a boyə nə Yesu

¹³ Yesu ka lagbe dan a shi njiya Kesariyatɨ Filipi, nda ɗiyə lagbe dan atɨ, “Ɓwaare a dɨ sa ka hɨn Nze da Ɓwaara atɨ hɨnə wonə ya?”

¹⁴ Təna luwa a san atɨ, “Imi a dɨ sa atɨ hyenə Yohana nzə-ɗa batisɨmatə, imi a dɨ sa atɨ hyenə kpale Iliya, imi mgban a dɨ sa atɨ hyenə Jerimaya, naasə hiɗə dɨ vor kpalyee kaaɗəng.”

¹⁵ Nda ɗiyərən atɨ, “Ɓə hwun, hwuna sa ke atɨ hɨnə wonə?”

¹⁶ Siman Bitrus a luwa a san atɨ, “Hyenə Ma Həmɨnpwa a Yaɓwarən, a Nze da Həmɨnpwa ma ka myentə.”

¹⁷ Yesu a san atɨ, “Həmɨnpwa wulakəw hye Siman nze da Jona, gəkɨlə aa ɓwaara bɨlu la, shezə Baagi arə a vor pwanə.

¹⁸ Gəkɨlə ləngɨn na dɨ səw atɨ, hyenə Bitrus, a nə faratɨnə hɨn ɓa nwo vɨnə hiwtɨ de, a tən petɨ ji-kottɨ de, kwatɨfə vɨrata won aa dɨ mbarə.

¹⁹ Hɨn ɓa vu sə-wuna kwatɨfə həmnə pwa. Sa kat hye ɓoyə ganə a vɨratə mye ɓoyə gaarə a vor pwa, sa kat hye paran ganə a vɨratə mye paran a vor pwa.”

²⁰ Də Yesu a gɨra lagbe dan, a sarən atɨ ɓe tənaa boyə ama atɨ sɨnə Ma Həmɨnpwa a Yaɓwarən.

Yesu a bwe wule mbɨrte ndi ɓa mbɨrə

²¹ Dɨ fərəngɨn, Yesu a tiya bwetə ta boyə lagbe dan le atɨ, mbak-mbak ndi Nze da Ɓwaara ɓa wudə Urshelima ndi ɓa sop tənətə som-som a tɨfə mi kpan-kpanye ka kɨsehəmi kpan-kpanye ka ji-lee kəndə ɓashita Musa. Mye ɓa ɓɨltən, beetɨ bətə mwaakɨn ndi ɓa maggə we ka myentə.

²² Bitrus a warən a gyenge a tiya ta dɨkan atɨ, “Həmɨmiye, wule sa a dɨ ga bəngra!”

²³ Yesu a virwa a sa Bitrus atɨ, “Təkəsə ke kwe Shetan! Hyenə ɓa ɗɨkdi na pawo, teewa koɗə hɨnggə Həmɨnpwa, hɨnggə ɓwaara hye dɨ koɗən.”

²⁴ Də a hangɨn Yesu a sa lagbe dan atɨ, “Ma dɨ mwi atɨ nda kwaɗe, mbak-mbak mangɨn ɓa məntəmə nəngɨn, a nggur kada ɓɨdɨmtɨ dan a kwaɗe.

²⁵ Gə ma kat dɨ mwi atɨ ndi ɓa mbədə myensən ɓa ɗongərə, ma mgban ɗongə myensən gə le de, ndi ɓa ɗɨmtɨrə.

²⁶ Mɨnə wula də ka ite atɨ ɓwaara a pedə shi vɨratə kat a ɗɨmə, nda shea ɗongə myensən? Naasə mgban mɨnə ɓwaara ɓa vədən a kwaamɨ myensən?

²⁷ Gəkɨlə hɨn Nze da Ɓwaara hɨn ɓa shi a vor fukata Baagi kat ka malyenye de, hɨn ɓa mbwa nagi ndo ma moonə sa mangɨn a ɗa.

²⁸ Diyalə na dɨ boyownə, imi a vorsəwnə 'ye kanyi ganə ɓəgəng, aa dɨ kɨla we baa fəra tən ɓa naa Nze da Ɓwaara nee dɨ mɨna a vor həmne dan.”