Matta 15 - Ɓwaatiye New Testament

Sa dɨ takɨma ɓwaara

¹ Imi dɨ vor Farise, ka ji-lee kəndə ɓashita Musa a dɨma dɨ vor Urshelima, təna shi haka Yesu, a ɗiyən,

² “Mɨnə ɗa lagbe dəw aawa koɗə kwale da mi kpanye, ɓətɨ yə sɨnggəm, hɨnggərən təna dɨ zɨmshe tənaawa suɓwa tyefingrən?”

³ Yesu a luwa a ɗiyərən, “Mɨnə ɗa hwuna dɨ ɓiya gɨraha da Həmɨnpwa gə hwuna koddə kwale dəwna?

⁴ Gəkɨlə Həmɨnpwa a sa atɨ, ‘Hye ndukodə baagu ka nuwogu.’ Sə mgban, ‘Ma boyə baagən ka nuwogən lə hase a mya ɓɨl mangɨn.’

⁵ Hɨnggəwnə, hwuna sa atɨ, ma kana boyə baagən ka nuwogən atɨ, ‘Sa kana na nda vəwnə, hwun yə baagi ka nuwogi, hɨn və Həmɨnpwa, le mbəə,’

⁶ dɨ ha ɗatɨngɨn tənaa yə mɨna ndukodə yə sɨnggərən. Hwuna ɗongdə le da Həmɨnpwa gəkɨlə hwuna koɗə kwale dəwnə.

⁷ Hwun ji-kwakpeyə! Diyalə kpale Ishaya a boyo nəngəwnə atɨ,

⁸ “ ‘Minə a dɨ ndukodi ka kwaamɨngrən ɓəmbə, shezə vor hubosərən ndə ɓong-ɓong ke.

⁹ Təna dɨ kale-gbəətə a nə ɓaa, kat ka angɨn gɨrahaa ɓwaare a tusa nə təna dɨ kəndən, ɓətɨ gɨrahangɨn dɨ haka Həmɨnpwa nda dɨma.’ ”

¹⁰ Yesu a waga təkə-təkətɨ ɓwaare təna paya a hakan, nda sarən atɨ, “Samdə kwakingəwnə kɨləm, hwuna leyə.

¹¹ Sa kat pɨri dɨ kwaamɨ ɓwaara, aa dɨ gəədən nda gə takɨm. Sa dɨ dɨma dɨ kwaamɨ ɓwaara nə dɨ gəədən takɨm.”

¹² Də lagbe dan a shi, a ɗiyən, “Hye leyə atɨ haa aa nɨngə Farise ite təna kɨl ləməgyee hye boya?”

¹³ Yesu a luwa a sarən atɨ, “Kadaa kat Baagi arə a vor pwa aa ngguɓo, mya muggən kat ka kwirəngɨn.

¹⁴ Ɗakamərən tən weli, wele aa dɨ kɨsə wele kada gə tən dɨ kpeyə ɓa fokə gwe.”

¹⁵ Bitrus a san, “Boyenə naarə byelə səɗa.”

¹⁶ Yesu a ɗiyərən, “Baa ɓəgəng hwun taa lelə kəwna?

¹⁷ Hwunaa leyə atɨ sa kat pɨri dɨ kwaamɨ ɓwaara a dɨ pɨrə yedye, nda dɨ zə beetɨ-haa kan ma?

¹⁸ Shezə wule ləməgyee dɨ dɨma dɨ hubo ɓwaara shi kwaamɨngɨn, wule ingɨn nə dɨ gəədə ɓwaara takɨm.

¹⁹ Gəkɨlə dɨ hubo ɓwaara ɗyangalə hase a dɨ dɨmə ɓɨl we, sharawne, kadawe, hɨrtə, kər-jeronye ka sharha.

²⁰ Wule shinə tənə dɨ takɨma ma, sa ɓwaara a zɨmə ndaa suɓwa tyefingɨn, wule shingɨn aa dɨ takɨman.”

Mwadiyale da mete dɨ Kaana

²¹ Yesu a ɗaka hangɨn a muɗə vor njiya Taya ka Sidon.

²² Itɨ metɨ vɨra Kaanati, ite dɨ nza njiya Taya ka Sidon, ngga tuwo a warən atɨ, “Həmɨmiye, nze da Dawuda, zə ɗa purushi! Njishi ndə bə hwoɗye dɨ tənə kɨr-kɨr gəkɨlə nzə-dwate pɨrə sɨsə.”

²³ Yesu aa wunakarə. Lagbe dan a shi hakan a san atɨ, “Omtɨrə ngga muɗə, gə kote dɨ təwi dɨ koɗə miye.”

²⁴ Nda sarə atɨ, “A haka mbage kyepi a tən mi Israila nə ɓəmbə mya lyanari.”

²⁵ Metɨngɨn a shi a gyerə humwasən, a san atɨ, “Həmɨmiye, gwadi.”

²⁶ Yesu a luwa a sarə atɨ, “Aa kana mya nggur sɨzɨmta je a ɗongə sakye.”

²⁷ Metɨngɨn a luwa a san atɨ, “Sə gən, Həmɨmiye, shezə kat ka angɨn sakye mgban a duwa ɗəm mosəryi sɨzɨmta həmɨ-hwodarən 'ye kəji njiya a zɨmə.”

²⁸ Yesu a sarə atɨ, “Metə, mwadiyale dəw nə kpan! Mye vu sa hye dɨ mwo.” A hangɨn tee gbyel njisə a piyagə tənətɨngɨn.

Yesu a zɨmdə morye haru bəw laka fwat

²⁹ Yesu a ɗaka hangɨn a nggur wetə dɨ basa kwaka gərə Galili, a dɨ nggɨrə mwe a nza də.

³⁰ Ɓwaare hananang a paya a hakan ka myee ka ootɨ ndongtə, ka welye, ka gbəgərye, ka myee aawa byelə, ka mbiɗisərən. Təna pukdə ji-ootɨngɨn kat a mbwayingɨn. Nda dɨmərən də ootɨngɨn kat.

³¹ Ɓwaare a ndələ ite təna na myee aawa byelə nee dɨ byeli, gbəgərye nee dɨ woyi, myee ka ootɨ ndongtə mgban tən nyerə dwat, welye nee dɨ naa haa. Təna ndukodə kwakɨ Həmɨnpwata mi Israila.

³² Yesu a waga lagbe dan a hakan, nda sarən atɨ, “Lə minə paya-payatɨnə nee dɨ ori, gəkɨlə tənə ke ga bətə mwaakɨn taa asə kaarən tən ɓa zɨmə. Hɨn taa mwa na sarən atɨ a təna muɗə hwoɗye ka myatɨngɨn, ndəng təna mbərhe a nə tɨfe.”

³³ Lagbe dan a ɗiyən, “A ndo haa mye ɓa ɗɨm sɨzɨmte ɓa zɨmdə kaɓa təkə-təkətɨ ɓwaare nə a vor kaaka na?”

³⁴ Yesu a ɗiyərən, “Nda buroditə ya hwuna gə kaara?” Təna san, “Goɓoryi buroditə nə tukolukpe, ka vaakye ɓyeləng.”

³⁵ Nda sa ɓwaarengɨn atɨ a təna nza njiya.

³⁶ Ite nda luu goɓoryi buroditɨngɨn tukolukpe kat ka vaakingɨn, nda ɗa usəkətə, nda takarən a və lagbe dan gə təna ɓyana ɓwaare.

³⁷ Ɓwaare kat a zɨmshe a hyaɓa. Beetɨ angɨn lagbe dan a pedə mosəryi sɨzɨmte mbiɗi koni kpan-kpanye tukolukpe.

³⁸ Furo moryee zɨm shingɨn ɓa ɗa haru bəw laka fwat. Myaa bəl furo mandye ka jee zɨmshe.

³⁹ Ite Yesu a gə təkə-təkətɨ ɓwaare kwasatə təna muɗə, nda pɨrə vor koombotə a muɗə vor njiya Magadan.