Matta 14 - Ɓwaatiye New Testament

We da Yohana nzə-ɗa batisɨmatə

¹ A vor bətɨngɨn, ndi Hiridus hamaa njiya Galili a kɨl ləməgye a nə Yesu,

² nda sa myee nda nza kaarən atɨ, “Yohana nzə-ɗa batisɨmatə nə maggə taane ka myentə! Səngɨn ɗɨki nda ɗɨm gətɨ ɗa shikoshopye.”

³ Gə Hiridus liyaa kɨr Yohana ɓoyo ɗongə gbərəwe gə le da Hirodiya, metɨ jibiyəngɨn Filibus,

⁴ gəkɨlə fərə-fərə Yohana a dɨ boyə Hiridus atɨ, “Ɓashita Musa aa və humwatə hye luu metɨ jibiyanga a nza kaarə meti.”

⁵ Gə ləngɨn Hiridus a mwo atɨ nda ɓɨl Yohana, shezə kala ɓwaare a dɨ gən gəkɨlə ɓwaare nee gon Yohana ka sate atɨ ndi kpale da Həmɨnpwa nə.

⁶ A fərə sɨlangsətɨ mwasa həmɨn Hiridus, njita Hirodiya a dɨma a wuro humwaa omyee paya kat, hanɨngə Hiridus ka wure darə.

⁷ Nda gbə, a sa njitə atɨ, nagi mɨnə ngga nyisən ndi ɓa vərə.

⁸ Nuwogərə a boyərə lə sa nggi ɓa nyisən. Njitə a sa həmɨn atɨ, “Vi nə Yohana a papitə ɓəgəng.”

⁹ Le a hasə həmɨn kɨr-kɨr, gəkɨlə ɓə gbə a humwaa omyee nza kat. Taa itɨ ɗati də ndi ɓa ɗa nda kworə le, nda boyo atɨ a mya və njitɨngɨn sa ngga ɗiləngɨn.

¹⁰ Mya wudə vɨnə gbərəwe a dɨ banga nə Yohana.

¹¹ Mya shikan ka nəngɨn a papitə a və njitə ngga dɨ və nuwogərə.

¹² Lagbe da Yohana asɨ nggur kada sɨsən a dɨ ɗɨkə, təna zə a dɨ boyə Yesu ləngɨn.

Yesu a zɨmdə morye haru bəw laka tuf

¹³ Ite Yesu a kɨl lə sa ɗa, nda ɗaka hangɨn a pɨrə koombotə, a ɗaka ɓwaare a muɗə a haa dɨsərən. Ɓwaare ɓe kɨlə atɨ ndi muɗə, təna dɨmgə vɨre darən a koɗən ka mbwayingrən.

¹⁴ Ite Yesu a kpasə kwakatə, a nggɨragə koombotə, nda naa kaɓa təkə-təkətɨ ɓwaare, nda ɗa purusərən, a dɨmərən də oote a sɨtɨ ji-ootə.

¹⁵ Ite kaade nee dɨ ɗa, lagbe dan a shi hakan a san atɨ, “Vor kaakə hanə, kaade nee dɨ ɗa, ndɨka hye boyə ɓwaare təna təkəsə a muɗə ji-vɨre kur-kuryee a hangɨn gə təna ɗər sɨzɨmtə a zɨmə.”

¹⁶ Yesu a sarən atɨ, “Ɓe tənaa muɗə, hwunə ɓa vərən sɨzɨmtə təna zɨmə.”

¹⁷ Təna san atɨ, “Hinə ka goɓoryi buroditə tuf ka vaakye kpe ganə mba-mba.”

¹⁸ Yesu a sarən atɨ, “Wam kaarən ganə.”

¹⁹ Nda boyə ɓwaare kat atɨ a təna nza nə kaake. Ite nda luu buroditɨngɨn tuf ka vaakye kpe, nda maddə nəngɨn a pwa a ɗa usəkətə, nda taka buroditɨngɨn, nda və lagbe dan, təna ɓyana ɓwaare.

²⁰ Ɓwaare a zəmshe kat a hyaɓa. Lagbe dan a pedə mosəryee mbiɗi konye bəw a mbiɗi-kpe pas-pas.

²¹ Furo moryee zɨmshe ɓa ɗa haru bəw laka tuf, myaa bəl furo mandye ka je.

Yesu a woyə nə haɓye

²² Aa ɓongə Yesu a boyə lagbe dan atɨ təna pɨrə koombotə a lyembərə a nggɨrə itɨ ɓayati, nda kangə a gə ɓwaare kwasatə.

²³ Ite nda gərən kwasatə a mbəə, nda nggɨrə nə mwe dɨsərən a ɗa hiwtə. Kaade a ɗa sɨne a nə mwotə dɨsərən.

²⁴ Itɨngɨn mgban koombotə ndə a nə haɓye ɓong-ɓong ka kwakatə, ɗogoli hawe nee dɨ ɗyanggaradə koombotɨngɨn gəkɨlə hawa dɨ tawa.

²⁵ Ka haa kɨɗatə dung-dung, Yesu a shea dɨmə a zə hakarən, ndi ta woyə nə haɓi gərəngɨn.

²⁶ Ite lagbe dan a nan dɨ woyə nə gbɨnuwe, kala a gərən, təna gəəshe atɨ, “Kpiriti.”

²⁷ A hangɨn gbyel Yesu a sarən atɨ, “Mbam ɗəng, ɓe kala aa gəwnə, hɨnə!”

²⁸ Bitrus a luwa a san atɨ, “Həmɨmiye, anda hyenə, zə boyi na woyo a zə hakəw a nə haɓye.”

²⁹ Yesu a san atɨ, “Wa.” Bitrus a jenggə vor koombotə a tiya wetə a nə haɓye ta zə haka Yesu.

³⁰ Ite nda na ɗogoli hawa dɨ tawa a nə haɓye, kala a gən, nda tiya ɗimtə, nda gəəshe a sa Yesu, “Həmɨmiye, zə gwadi, mbədi.”

³¹ Yesu a ɗifdə tɨfəngɨn tan-tan a kɨsarən. Nda san atɨ, “Mwadiyale dəw nə ɓyeləng. Mɨnə ɗa hye ndəla?”

³² Ite təna pɨrə vor koombotə, hawe a saraa.

³³ Myee a vor koombotə a kalan-gbəətə, təna san atɨ, “Diyalə, hyenə nze da Həmɨnpwa.”

³⁴ Koombotə ɓe kpasə, təna nggɨrə vor vɨraa Jenisarat.

³⁵ Ite mi hangɨn a leyə atɨ Yesu nə, təna lyenəsə she a bətɨ njiyangɨn kat. Ɓwaare a payadə ji-ootə kat a hakan.

³⁶ Təna nyisən atɨ a nda mwa ji-ootə a pa baapa rukute dan. Sə mgban myee kat pan, təna piyagə ootɨ darən.