Matta 13 - Ɓwaatiye New Testament

Byelə səɗe a nə nzə-ka daase

¹ A fərəngɨn Yesu a dɨmgə hwoɗye a dɨ nzaa kwaka gərə Galili.

² Kaɓa təkə-təkətɨ ɓwaare a takadən a peyə, də nda pɨrə vor koombotə a nza, mbiɗitɨ ɓwaare kat a kangə kwaka gəre.

³ Nda kənərən shee hananang ka byelə səɗe, nda sarən atɨ, “A nzə-hawti a dɨmə a muɗə ɓa dɨ ka daase.

⁴ Ite sɨne dɨ ka daase, a daasə a kəji nə tɨfe, ɓakarye a gwakə kat.

⁵ A daasə a leyə a pukə nə girɨnge. Nda za tan-tan a kangə, shezə gəkɨlə ndaa ɗɨm njiya pepeye a kangədə,

⁶ ite fəre a ɓɨrə, nda hinarən təna kpamə gə kworyingrən aa pɨrə njiya.

⁷ A daasə a kəji waka hwole, ite daasəngɨn a za a kangə, hwoləngɨn a jiyə a zobrən kat.

⁸ A daasə mgban a pukə nə njiya pepeye, daasəngɨn a za a kangə pepe, a ɗa daase haru hiɗə, a daasə bəwtə tukoltaka, a daasə mgban bəwtə mwaakɨn.

⁹ Ma ka kwaki kɨl le maa nda saa kwakingɨn a kɨlə.”

¹⁰ Lagbe dan a shi hakan a ɗiyən, “Mɨnə ɗa hye ɓə dɨ ɗa ɓwaare byelə səɗe?”

¹¹ Nda luwa a sarən, “Hɨnggəwnə mye bɨləwnə shee a ɓotə a nə həmnə pwa bwang, mbiɗitɨ ɓwaare kat myaa bɨlərən.

¹² Ma ka se kat, sɨnə mya mɨna ɗɨkən də gə nda ɗɨmə kpan. Ma kat taa asə kan mgban, nagi nzɨ a ɓyelənga nda gə kan nə, mya kpawan a lugən.

¹³ Səngɨn nə ɗa na dɨ boyərən ləməgye ka byelə səɗe: “Nagi təna sara diingrən a dɨ niyə, tənaa dɨ naa asə, nagi təna wana kwakingrən a dɨ kɨl le, tənaa dɨ takaləngɨn.

¹⁴ A nəngrən kpalta Ishaya a naa ite nda sarən atɨ, ‘Nagi gə kɨltə hwun ɓawa kɨlə, hwunaa dɨ lee kpəshi ləngɨn, sə mgban nagi hwuna sara diingəwnə, hwunaa dɨ naa asə.

¹⁵ Gə kwa-hubo mingɨn takə, tənaa yə mba alə a kɨlə ka kwakingrən, təna ɗyanga a vwata diingrən. Anda aa sə, tən ɓa nda naa haa ka diingrən, tən ɓa nda kɨl le ka kwakingrən, hubosərən a banga mgban, təna virwa a por-njiya, na gwadərən.’

¹⁶ Shezə Həmɨnpwa wuladəwnə ka wule sa diingəwnə a nan ka wule ləməgyee kwakingəwnə a kɨlə.

¹⁷ Diyalə na dɨ boyownə atɨ, kpalye hananang ka mi pepeye da Həmɨnpwa hɨma gəkɨlə təna naa sa hwuna dɨ nan gətɨnə, tənaa nan, tən hɨma mgban gəkɨlə təna kɨl la hwuna dɨ kɨlə, tənaa kɨlə.

¹⁸ “Kɨləm naarə byelə səɗa a nə nzə-ka daase:

¹⁹ Nagi ndo ma kat kɨl le a nə həmnə pwa, ndaa lee naarə ləngɨn, ma hase a dɨ shi nda hɨrgən ləngɨn a porgə daasa mya laga a vor hubo mangɨn. Sɨnə daasa pukə nə tɨfe.

²⁰ Daasa kəji nə girɨnge, sɨnə wule ma dɨ kɨl le da Həmɨnpwa nda luwo tan-tan ka hanɨngtə.

²¹ Wule mangɨn aawa kangə a ɓongə, gəkɨlə le da Həmɨnpwa aa za kworye kuɓuk a hubosən. Gə ləngɨn tənətə kana maɗa gə ləmə feməngɨn, nda dɨ fukə tan-tan.

²² Daasa pukə waka hwole, sɨnə wule mangɨn a dɨ kɨl le da Həmɨnpwa nda pɨrə ɗyengle a nə shi vɨratə, ka vwakaha gə ɗɨm gɨnətɨ vɨratə. Shingɨn kat a dɨ zob le da Həmɨnpwa a vor hubosən, ndaa yə ɗa daase.

²³ Shezə daasa pukə nə njiya pepeye, sɨnə ma dɨ kɨl le da Həmɨnpwa, nda le naarəngɨn. Wule mangɨn nə a dɨ ɗa daase haru hiɗə, ka daase bəwtə tukoltaka, naasə daase bəwtə mwaakɨn.”

Byelə səɗe a nə kwangaa a vor gaashe

²⁴ Yesu a mɨna ɗarən byelə səɗe atɨ, “Həmnə pwa nə ɓətɨ ma laga daasə shi-pepeye a vor gaashe dan.

²⁵ Ite ɓwaare ɓe shenə, nzə-nyaagən a shi a laga kwange a vor zumwe, a kɨt tɨfe a muɗə.

²⁶ Ite zumwe a maɗə a puka, kwange mgban a maɗə a puka.

²⁷ “Kɨse da həmɨ gaashingɨn a shi hakan a ɗiyən, ‘Həmɨ-hwoɗye, aa daasə femə hye laga a vor gaashe dəw ma? Ɓə dɨ ndo haa kwange a dɨma?’

²⁸ “Nda luwa a sarən atɨ, ‘Nzə-nyaagi nə ɗa shingɨn.’ “Kɨse dan a ɗiyən atɨ, ‘Hye ɓa mwenə hina wudə a moggə kwangəngɨn?’

²⁹ “Nda sarən atɨ, ‘Ə'ə! Ndəng hwun kana zə moggə kwange hwuna pedən kat ka zumwe.

³⁰ Ɗakamərən dɨ kpeyə, təna maɗə kat a kən ɗawti. A fərəngɨn hɨn ɓa boyə ji-ɗawshe təna tiya ka kwange, təna ɓoyo a gbəwdən gə mya hinan, zumwe mgban, mya pedən a pukə vor bongge de.’ ”

Byelə səɗe a nə daasə bagale ka maɗe

³¹ Nda mɨna ɗarən i byelə səɗe atɨ, “Həmnə pwa nə ɓətɨ daasə bagalə a ama a laga a vor kaanda dan.

³² Daasəngɨn nə kur-kur, kat ka angɨn ndi kana za a kangə, nda dɨ gbyala a pɨrgə mbiɗitɨ kadee a vor gaashe kat, nda gəə kada kpanə a ɓakarye ɓa ɗa vənye a basengɨn.”

³³ Nda mɨna boyərən alə ka byelə səɗe atɨ, “Həmnə pwa nə ɓətɨ maɗə a metə a ngguro a nggəmə ka humbotə kaɓa kpan, maɗəngɨn a ɗɨkdə humbotɨngɨn ngga hɨtɨka a naa pas.”

³⁴ Ləməginə kat Yesu a boyə təkə-təkətɨ ɓwaarengɨn ka byelə səɗe, ndaa boyərən alə aa ka byelə səɗe.

³⁵ Gəkɨlə la kpale a boyo a naa atɨ, “Hɨn ɓa tiya byelə səɗe. Hɨn ɓa bwe ləməgyee a haa ɓotə dɨ fəra mya kwak vɨratə də.”

Naarə byelə səɗa a nə kwange

³⁶ Nda ɗaka təkə-təkətɨ ɓwaare a pɨrə vor hwoɗye. Lagbe dan a koɗən a hwoɗye a san, “Kənenə naarə byelə səɗa hye boyo a nə kwanga a vor gaashe.”

³⁷ Yesu a sarən, “Ma laga daasə pepeye nə hɨn Nze da Ɓwaara.

³⁸ Gaashe mgban tənə vor vɨratɨnə, daasə pepeye nə myee a vor həmnə pwa, kwange mgban sɨnə myee da ma hase.

³⁹ Nzə-nyate laga kwangəngɨn nə Nzə-tɨmbɨrha ka nənəngɨn. Ɗawshe nə kpawtɨ vɨratə. Ji-ɗawshe mgban tənə malyenye da Həmɨnpwa.

⁴⁰ “Ɓətɨya mya mwoggə kwange a hinan ka ɗiye, sə ɓa gə mgban a mattɨ vɨratə.

⁴¹ Hɨn Nze da Ɓwaara hɨn ɓa lyen malyenye de, tən ɓa dɨmdə nagi ndo sə a dɨ shi ka səhase a vor həmne de kat ka ji-ɗa səhase.

⁴² Malyeningɨn ɓa ɗongdərən a vor ɗiyə kɨlate dɨ ləwi, a hangɨn tən ɓa təwo ka tuula lintə.

⁴³ Də mi pepeye ɓa maɗə ta ɓɨra ɓətɨ ɓɨrtɨ fərə a vor həmne da Baagərən. Ma ka kwaki kɨl le maa nda kɨlə.

Byelə səɗe a nə gɨnəte mya ɓodə ka i fare hal-halye

⁴⁴ “Həmnə pwa nə ɓətɨ gɨnəte myaa ɓodə a vor gaashe. Ama kana ɗɨmə, nda mɨna ɓodə, ka hanɨngtə nda muɗə a dɨ ɗərdə shee nda gə kaarən kat, nda mɨna asɨ ɗər gaashingɨn.

⁴⁵ “Mɨni ɓə həmnə pwa nə ɓətɨ nzə-nggalate dɨ woyi ɨl fare hal-halye.

⁴⁶ Ite nda ɗɨm a taangɨn a la kɨr-kɨr, nda muɗə a dɨ ɗərdə shee nda gə kaarən kat asɨ ɗərə.

Byelə səɗe a nə ndwambe

⁴⁷ “Mɨni ɓə, həmnə pwa nə ɓətɨ ndwamba mya ɗongə gəre a til zərgi vaakye som-som.

⁴⁸ Ite ndwambe a naa ka vaakye, ji-kəɗe a fuwa a nggɨra kan a kwakatə, təna nza a taggə vaaki pepeye a pukə konye, təna kəjidə i hashe.

⁴⁹ Sə mgban ɓa gə a kpawtɨ vɨratə. Malyenye ɓa shi a taka waka mi hashe ka ji-ɗa səfeme,

⁵⁰ mya ɗongdə mi hashe a vor ɗiyə kɨlate dɨ ləwi, a hangɨn tən ɓa təwo ka tuula lintə.”

⁵¹ Yesu a ɗiyərən, “Hwun lee naarə ləməginə kat?” Təna san atɨ, “Hin leyə.”

⁵² Yesu a mɨna sarən atɨ, “Angɨn nə ɓətɨ ji-lee kəndə ɓashita Musa 'ye mya kənərənshe a nə həmnə pwa, mingɨn nə ɓətɨ həmɨ-hwodyee dɨmaadə gɨnətɨ hweltə ka i iitə dɨ vor haa nda kəpdərən də.”

Kpale tam ka fukatə a hwodan

⁵³ Ite Yesu a kənərən shee ka byelə səɗe a mbəə kat, nda ɗaka hangɨn.

⁵⁴ Tɨlsən a vɨrate nda la də, nda tiya ta kənə ɓwaare shee a vəni kəndəshe da Yawude. Ɓwaare a ɗa ndəle ka wule kəndəshe dan, təna ɗiyəsə atɨ, “Dɨ ndo haa ma a ɗɨma wule lee shea? Ɓə wule gəte nda dɨ ɗa shikoshopye kaarə mgban, dɨ ndo haa nda ɗɨma gətɨngɨn?

⁵⁵ Aa nze da nzə-gbalshee nə a ma? Aa kwakɨ nuwogən nə Maryamu ma, ɓə mwafengɨn mgban aa tənə yə Yakubu ka Yusufu ka Siman ka Yawuda?

⁵⁶ Ɓə mwafengɨn i mandye mgban, aa tənə ga a hakam? Ɓə dɨ ndo haa ma a ɗyegən wule shee kat?”

⁵⁷ Səngɨn nə ɗa təna ɓə ushi Yesu, tənaa nggutən tikɨs. Shezə Yesu a sarən atɨ, “A vɨrata kpale nə ɓəmbə ka vor hwodan ndaawa gə ka fukatə.”

⁵⁸ Ndaa ɗa i shikoshopyi hananang a hangɨn gəkɨlə ɗongə mwadiyale darən.