Matta 12 - Ɓwaatiye New Testament

Nze da Ɓwaara nə həmɨ fərə piyatə

¹ A itɨngɨn fərə piyati da Yawude, Yesu a woyo ka lagbe dan a koɗə dɨ vor i gaashi. Myatə gə lagbe dan, təna tiya sər gyelkətɨ zumwe a posə ta tuuli.

² Imi dɨ vor Farise a naarən, təna ɗiyə Yesu atɨ, “Niyi! Lagbe dəw nee dɨ ɗa sa ɓashita Musa a kərdən a fərə piyatə.”

³ Yesu a luwa a sarən, “Hwunaa bəl sa Dawuda a ɗa ma, a ite ndi ka myee nda dɨ woyo kaarən, myatə a gərən?

⁴ Nda dɨ pɨrə vor hwoda Həmɨnpwa a nggur buroditɨ ɗəmɗəmte mya ɗa gə le da kɨsehəmyee dɨ lyenə vor hwoɗingɨn ɓəmbə, nda zɨmə ɓwaa ka myee nda woyo kaarən.

⁵ Naasə mgban hwunaa bələ a vor malɨmtɨ ɓashita Musa atɨ, kɨsehəmye da Həmɨnpwa 'ye dɨ lyenə Shafe a duwa ɓiya ɓashitə a fərə piyatɨ da Yawude, kat ka angɨn tənaa ɗwangashe?

⁶ Hɨnə dɨ boyownə atɨ ama a pɨrgə Shafe ka fukatə nə ganə.

⁷ Na hwun nda lee naarə ləməginə atɨ, ‘Puruti na dɨ mwo, aa hamati,’ hwunaa dɨ nda pa ɓwaare a ɓəltɨrən ɓaa ka ləməgye a myee aa ɗwangashe.

⁸ Hɨn Nze da Ɓwaara hɨnə həmɨ fərə piyatə.”

Yesu a gwadə ma tɨfəngɨn a mbɨrə

⁹ Də Yesu a ɗaka hangɨn, nda wudə a pɨrə vor vɨnə kəndəshe darən.

¹⁰ Ama nee də a hangɨn tɨfəngɨn a lɨɓɨkə. Farise nee də mgban a hangɨn dɨ ɨli gə təna ɗɨmgə Yesu le, təna ɗiyən atɨ, “Ɓashitə vədə humwatə atɨ mya gwadə ma a dɨmən də ootə a fərə piyatə ma?”

¹¹ Yesu a ɗiyərən atɨ, “Wonə a vorsəwnə a ma ka mbagatə kan, ngga fukəgən a gwe a fərə piyatə, ndaa dɨ kɨsatɨrə a nggɨradə gə gwe?

¹² Ɓə ɓwaara aa pɨrgə mbagatə ka fukatə ma? Gə ləngɨn ɓashitə mwa mya ɗa səfeme a fərə piyatə.”

¹³ Nda sa mangɨn atɨ, “Tɨddə tɨfanga.” Mangɨn a tɨddə tɨfəngɨn, tɨfəngɨn a mɨna pepe ɓətɨ arə hiɗə.

¹⁴ Shezə Farise a dɨmə a shalasə le gəkɨlə təna kɨt Yesu a ɓɨltən.

Kɨsaa Həmɨnpwa a nggɨlə

¹⁵ Ite Yesu a niyəshe, nda dɨmə a ɗaka hangɨn. Ɓwaare hananang a koɗən, nda gwadə myee ka sɨtɨ ootə kat a dɨmərən də ootɨngɨn gə sɨsərən.

¹⁶ Nda fyel-kwakingrən atɨ, ɓe tənaa boyə ɓwaare atɨ sɨnə wonə.

¹⁷ Gə-angɨn a naadə la mya boyo dɨ kwaamɨ kpale Ishaya atɨ,

¹⁸ “Kɨsaa de nə, a na nggɨlə, sɨnə ma na mwo, a haa dɨ nɨnyi kan. Hɨn ɓa ɗɨkən Pitɨ Ɗəmɗəmtɨ de, ndi ɓa hiwa vɨratə kat a nə ɓashitɨ diyale.

¹⁹ Ndaa dɨ nggələsə le ka ɓwaare, ndaa dɨ ɗaw-kwaame ɓaraw, myaa dɨ kɨla kormɨngɨn a wake hwoɗye.

²⁰ Nagi nda reka hyalak-hyalak nə, ndaa dɨ ɓiyan, tikɨla dɨ ləwi mbɨrɨp-mbɨrɨp, ndaa dɨ kpawan a mbɨran. Sə ndi ɓa ɗa ɓashitɨ dan ka diyale baa a zə kpawtə.

²¹ A vor kwakɨngɨn, bətɨ mi vɨratə kat ɓa nza ka bəə myentə.”

Yesu ka Belzabub

²² Də təna shi ka Yesu ka ama ka nzə-dwatə a sɨsən, mangɨn welə, ndaawa byelə. Yesu a gwadən a nggurəngə ootɨngɨn, nda tiya byele ka naa haa.

²³ Ɓwaare kat a ɗa ndəle, tən ta ɗiyəsə atɨ, “Hwuna saa nze da Dawuda nə a na?”

²⁴ Ite Farise a kɨl lə sa Yesu a ɗa, təna sa atɨ, “Ka gəta Belzabub həme da pɨle ji-dwatə ma kəwnə a dɨ dɨmdə pɨle ji-dwatə gə sɨtɨ ɓwaare.”

²⁵ Yesu ɓə lee la a hubosərən, nda sarən atɨ, “Kat həmna ndɨlkasə təki kpe, həmnəngɨn aa dɨ nza. Sə mgban vɨrate, naasə hwoɗyee kat ndɨlkasə təki kpe, tənaa dɨ kangə.

²⁶ Anda Shetan ndɨlka Shetan, angɨn ɓa shi ka təktə, ya həmne dan ɓa nza?

²⁷ Anda ka gəta Belzabub na dɨ dɨmdə pɨle ji-dwatə dɨ sɨtɨ ɓwaare, ɓə myee dəwnə mgban? Ka gəta wonə təna dɨ dɨmdə pɨle ji-dwatə dɨ sɨtɨ ɓwaare? Gə-angɨn, myee dəwnə 'ye dɨ dɨmdə pɨle ji-dwatə mgban ɓa ɓashiyəwnə a nə ləməgyee hwuna dɨ boyo.

²⁸ Anda ka gəta Pita Həmɨnpwa na dɨ dɨmdə pɨle ji-dwatə gə sɨtɨ ɓwaare, leyəm atɨ həmne da Həmɨnpwa shi hakəwnə.

²⁹ “Ɓə ya ɓwaara ɓa pɨrə vor hwoda gbinda, a ɓə porgən gɨnətɨ dan, a ndaa ɓwe həmɨ-hwoɗingɨn a mbəə? Də nda ɓə shea porgən gɨnətɨ dan.

³⁰ “Di ma kat tam ɓwaa ke nzə-kwo na nə, ma mgban aawa gwadi pedə shee a haa hiɗə, vyata mangɨn a dɨ vyatarən.

³¹ Səngɨn nə ɗa na dɨ boyownə atɨ, nagi ndo səhasə sharha kat a ɓwaara a ɗarən mye ɓa nggurəngə angɨn, shezə kɨɗa kwakɨ Pitɨ Ɗəmɗəmtə ka sharha myaa dɨ nggurəngə səhasəngɨn.

³² Ma kat bwelə hase a na hɨn Nze da Ɓwaara, mya nggurəngə səhasəngɨn, ma bwelə hase a nə Pitɨ Ɗəmɗəmtə myaa dɨ nggurən gən nagi a nzatɨnə ka ite ɓaga shi.

Kada ka mbosən

³³ “Ɗamdə kada, ndi ɓa vədə mbwotɨ pepetə, kadaa myaa ɗadən mgban, mbwosən aa dɨ wula. Mye ɓa lee kada dɨ mbwosən.

³⁴ Hwun rokonyi hashe, a je da səfwakshike, a hwun liya mi hashi, hwun ɓa nda ɗa ya hwuna ɓə bwelə feme? Di la a vor hubo ma nə nda dɨ dɨmaadən dɨ kwaamɨngɨn.

³⁵ Ɓwaara feme kat, nda dɨ dɨmaadə ləmə fema nda kəpdən dɨ səɗə-yedi pepeye. Ma hase mgban nda dɨ dɨmaadə ləmə hasa mgban nda kəpdən dɨ səɗə-yedi hashe dan.

³⁶ Diyalə na dɨ boyownə atɨ, a fərə ɓashitə, ɓwaare ɓa bwegə ləməgi ɓaye kat təna dɨ boyo.

³⁷ Gə dɨ ləməgyee dɨma dɨ kwaamɨnga hye ɓa zɨm ɓashitə, sə mgban dɨ ləməgyee dɨ dɨma dɨ kwaamɨnga mye ɓa ɓashiyu a lɨbada.”

Wule sɨgbəshe da Yunana

³⁸ Imi dɨ vor Farise ka ji-lee kəndə ɓashita Musa a sa Yesu atɨ, “Nzə-kəndəshe, hine dɨ mwi atɨ hye bɨlenə a sɨgbəshi hina nan.”

³⁹ Nda luwa a sarən atɨ, “Mi wanetɨnə mi hashi, ji-sharawnə, tənə dɨ ɨli gəkɨlə mya bɨlərən sɨgbəshe! Myaa dɨ bɨlərən asə som pɨrgə hɨnggə kpale Yunana.

⁴⁰ Ɓətɨya Yunana a bə fəre mwaakɨn, tukotə mwaakɨn a vor yedi vaaktɨ gbaktə, sə mgban hɨn Nze da Ɓwaara hɨn ɓa ɗa bətə mwaakɨn a taane.

⁴¹ Sə mgban a fərə ɓashitə, mi Nineva kana kangə kəwnə a humwa Həmɨnpwa, tən ɓa mbəwnə ka ɓashitə, gəkɨlə təna kɨl kormi Yunana a por-njiya ka səhase darən. Ɓəgəng ma pɨrgə Yunana ka fukatə nə kangə wakasəwnə.

⁴² A fərə ɓashitə, hwun mi wanetɨnə, hwun kana kangə humwa Həmɨnpwa ka həmte shi dɨ basa ɓayang, nggi ɓa mbəwnə ka ɓashitə gəkɨlə ngga nggura tɨfe ɓong-ɓong gələ ngga sɨ kɨl kormi lele da həmɨn Solomon. Supo ma pɨrgə həmɨn Solomon nə kangə wakasəwnə.

⁴³ “Pɨla nzə-dwatə kana dɨmgə sɨtɨ ɓwaara, nda dɨ pərəsə a vor ɓaawe ta ɨl haa ndi ɓa nza a piyadə, ndi kana ɨlə ndaa ɗɨmə.

⁴⁴ Nda sa nənəngɨn atɨ, ‘Ndɨka na mɨnə hwoɗyee a sɨtɨ ma na dɨmagən.’ Ndi kana mɨna asɨ pa hwoɗingɨn mye fegərən ɗadərən pepe taa asə a vorsərən,

⁴⁵ pɨla nzə-dwatɨngɨn ɓa mɨnə a dɨ pwara i pɨle ji-dwati tukolukpe 'ye hashi pɨrgən, təna pɨrə kat a nza sɨtɨ mangɨn. Kpawtɨ nzata mangɨn ɓa hasə a pɨrgə i kwamətə. Sə mgban ɓa gə kəwnə a hwun mi hashi vɨraa wanetɨnə.”

Nuwogə Yesu ka mwaafengɨn

⁴⁶ Ite Yesu nee a vor byele ka ɓwaare, nuwogən kat ka mwafengɨn a kangə haa bwange a dɨ mwo byele kan.

⁴⁷ Ama a san atɨ, “Nuwogu ka mwafenga nee kangə haa bwange dɨ mwo byele kəw.”

⁴⁸ Nda luwa a san, “Wonə nuwogi, yə wonə mwafe mgban?”

⁴⁹ Nda ɗifə lagbe dan a sa, “Minə, tənə yə nuwogi ka yə mwafe.

⁵⁰ Gəkɨlə nagi ndo ma a dɨ koddə sa Baagi arə a vor pwa a dɨ mwo, sɨnə mufa, ka mwafɨri, ka nuwogi.”