Matta 11 - Ɓwaatiye New Testament

Yesu ka Yohana nzə-ɗa batisɨmatə

¹ Ite Yesu a kənə lagbe dan tən bəw a mbiɗi-kpe shee kat a mbəə, nda ɗaka hangɨn a muɗə vor vɨre njiya Galili gə nda kəndəshe, nda hiwa ka le da Həmɨnpwa də.

² Itɨngɨn Yohana nee a gbərəwe, nda kɨl lə shee Ma Həmɨnpwa a Yaɓwarən a dɨ ɗa. Də nda lyen lagbe dan a haka Yesu,

³ gə təna ɗiyən le atɨ, “Hyenə ma hina dɨ kula a Ma Həmɨnpwa a Yaɓwarən ma, naasə mgban ama nee də som?”

⁴ Ite təna ɗiyən le a mbəə, Yesu a luwa a sarən, “Mɨnəmə haka Yohana, hwuna boyən ləməgyee hwuna kɨlə kat ka shee hwuna naarən.

⁵ Welye ɗɨm naa haa, gbəgərye nə dɨ woyi dwat, ji-dagde nə dɨ gi shet-shet, gbenye nə dɨ kɨl le. Myenə dɨ maddə wogye ka myentə, myenə dɨ hiwa ji-poritə ka ləmə feme da Həmɨnpwa.

⁶ Sə hanɨngti ka ma aa fukə gə le de.”

⁷ Ite lagbe da Yohana a virwo a dɨ muɗə, Yesu a tiya byele ka ɓwaare hananang a hangɨn a nə Yohana, nda ɗiyərən atɨ, “Mɨnə hwuna wudə vor kaake ɓa nan? Reka hawe a dɨ tawa a badən nə ma?

⁸ Naasə mɨnə hwuna wudə vor kaake ɓa nan? Ma kala sɨɓwetɨ fawne na? Aɓə mgban myee dɨ kala sɨɓwetɨ fawne a voti təna gə.

⁹ Ɓə mɨnə ɓwaa hwuna wudə ɓa nan yə? Kpalə hwuna zə ɓa nan? Diyalə na dɨ boyownə atɨ, fukata Yohana pɨrgə hɨnggə kpale.

¹⁰ Di sɨnə ma mya dorshe a nəngɨn atɨ, “ ‘Zə niyi hɨnə ɓa lyen malyene de, a sɨnə nzə-fwa humwatɨ dəw, sɨnə ma ɓa ɗəwdə tɨfe.’

¹¹ Diyalə na dɨ səwnə atɨ, a vor myee a mwasa a vɨratə kat, taa ndəng ma də pɨrgə Yohana nzə-ɗa batisɨmatə ka fukatə. Kat ka angɨn ma mya dɨ ngguro ɓətɨ aa ndi asə a vor həmnə pwa, mangɨn pɨrgə Yohana ka fukatə.

¹² Kɨsatə dɨ fəra Yohana nzə-ɗa batisɨmatə a tiya lyentə də, baa dɨmə fəranə supo, həmnə pwa nee pɨrə humwa ka maase kɨr-kɨr, ji-ɗa sɨmwarashe ɓərə luu həmnəngɨn ka maase mgban.

¹³ Gəkɨlə kpalye da Həmɨnpwa kat ka ɓashita Musa kpalə nə həmnəngɨn a ite Yohana aa nda shi baa dɨmə shisən.

¹⁴ Anda hwun mwa ɓa luu lanə, Yohana nə kpale Iliya a ɓaga shi.

¹⁵ Ma ka kwaki kɨl le maa nda kɨlə.

¹⁶ “Ka mɨnə na kana mi wanetɨnə ɓə? Tənə ɓətɨ jee nza vor lumotə dɨ waga ndeyingrən,

¹⁷ “ ‘Hina lyebəwnə fɨrɨmtə, hwuna kwo wure. Hina gəwnə dyemshi tuu we, hwunaa təwo a kehee.’

¹⁸ Zə niyəm pee, a Yohana a shi ndaawa zɨmshe hwuna dɨ zɨmə, ndaawa soɓwo, təna sa atɨ, ‘Sɨne ka pɨla nzə-dwatə a sɨsən.’

¹⁹ Hɨn Nze da Ɓwaara mgban na shi, a dɨ zɨmshe na soɓwo ɓətɨ mbiɗiti ɓwaare, təna sa atɨ, ‘Manə gɨluwa, nda dɨ soɓwo kɨr-kɨr, sɨnə ndewogə ji-luu taa shemtə ka tataryi ɓwaare.’ Shezə angɨn bɨldən atɨ lyentɨ dan i lelə.”

Sə oti ka vɨree aa por-njiya

²⁰ Yesu a tiya ta dɨka vɨre kpan-kpanyee nda ɗa hakpanə shikoshopye dan də, gəkɨlə tənaa por-njiya.

²¹ Nda sa, “Sə oti kəwnə kwe mi Korazin! Sə oti kəwnə kwe mi Betesda! Gəkɨlə wule shikoshopye mya ɗa a wakasəwnə, a mye nda ɗa wule shingɨn a vor Taya ka Sidon giɓa tən por-njiya kɨnɨnɨng ka shiyakɨshe ka fitə ɗiye a nəngrən.

²² Hɨnə dɨ boyownə atɨ, a fərə ɓashitə, ndɨka ɓashite a nə mi Taya ka Sidon a nə hɨnggəwnə.

²³ Ɓə hwun mi Kafanawum mgban, hwuna dɨ niyə ɓətɨ Həmɨnpwa ɓa fukadəwnə a pwa ma? Ə'ə! Di ndi ɓa jengdəwnə a vɨrata won. Səkushipa mya ɗəwnə, anda a Sodom mya ɗatɨrən, giɓa kote kanyi zə fəranə supo.

²⁴ Hɨnə dɨ boyownə atɨ, a fərə ɓashitə, ndɨka mi Sodom a nə hɨnggəwnə.”

Wam piyam a hake

²⁵ A itɨngɨn Yesu a sa, “Hɨnə dɨ nduko da kwe Baa, Həmɨmiye hye ma ɗa pwa ka njiya, gəkɨlə hye ɓodə shinə gə haka ji-lele ka myee ka kuta. Hye shea bɨlə myee aa lee asə ɓətɨ ji-kurkuryi.

²⁶ Sə gən kwe Baa, gəkɨlə mwosa nə.

²⁷ “Baagi ɗake a nagi ndo sə kat. Taa ndəng ma də lee nze, Baatə nə ɓəmbə leerən, taa ndəng ma də mgban lee Baatə, nze nə ɓəmbə leerən ka myee nze a nggɨltɨrən gə nda bɨlərən Baatə.

²⁸ “Wam a hake, hwun myee ka ɓwatə gə sɨtɨra kəwnə, hɨn ɓa vəwnə piyatə.

²⁹ Nggurəm sɨtɨre de a wurangəwnə, hwuna ɗyegənshe dɨ hake, gəkɨlə hɨne ɗəng ka hyatane, hwun ɓa ɗɨm piyatə.

³⁰ Shee na vəwnə hwuna ngguro wurangəwnə hwun ɓa mban, gə sɨtɨre de nə pupuluk.”