Matta 1 - Ɓwaatiye New Testament

Kwirə mwasa Yesu

¹ Malɨmte mya doro a nə kwirə mwasa Yesu Ma Həmɨnpwa a Yaɓwarən. Sɨnə nze da Dawuda, nze da Ibɨraim.

² Ibɨraim nə baagə Ishaku, Ishaku nə baagə Yakubu, Yakubu nə baagə Yawuda kat ka yə zəbəyingɨn ka mwafengɨn.

³ Yawuda nə baagə Perez ka Zera, nuwogərən nə Tamar, Perez nə baagə Hezron, Hezron nə baagə Aram,

⁴ Aram nə baagə Aminadab, Aminadab nə baagə Nashon, Nashon nə baagə Salmon,

⁵ Salmon nə baagə Bowaz, nuwogə Bowaz nə Rahab, Bowaz nə baagə Obed, nuwogə Obed nə Rut, Obed nə baagə Jesi,

⁶ Jesi nə baagə həmɨn Dawuda. Dawuda nə baagə Solomon, nuwogə Solomon nə metɨ Uriya,

⁷ Solomon nə baagə Rehobowam, Rehobowam nə baagə Abija, Abija nə baagə Asa,

⁸ Asa nə baagə Jehoshafat, Jehoshafat nə baagə Joram, Joram nə baagə Uziya,

⁹ Uziya nə baagə Jotam, Jotam nə baagə Ahaz, Ahaz nə baagə Hezekiya,

¹⁰ Hezekiya nə baagə Manase, Manase nə baagə Amon, Amon nə baagə Josiya.

¹¹ Mɨni ɓə Josiya nə jigə Jekoniya ka zəbəyingɨn ka mwafengɨn kat, a ite mya ɗɨkdə Yawude ka maase təna muɗə njiya Babila a nza də.

¹² Beetɨ ite mya muɗə kaarən a njiya Babila: Jekoniya nə baagə Sheyaltiyel, Sheyaltiyel nə baagə Zerubabel,

¹³ Zerubabel nə baagə Abiud, Abiud nə baagə Eliyakim, Eliyakim nə baagə Azor,

¹⁴ Azor nə baagə Zadok, Zadok nə baagə Akim, Akim nə baagə Eliud,

¹⁵ Eliud nə baagə Eliyaza, Eliyaza nə baagə Mattan, Mattan nə baagə Yakubu,

¹⁶ Yakubu nə baagə Yusufu, murə Maryamu mate mwasa Yesu a mya wa atɨ Ma Həmɨnpwa a Yaɓwarən.

¹⁷ Gə-angɨn furo kwirə myee dɨ nzata Ibɨraim shi nzata Dawuda nə bəw a mbiɗi-fwat, furo kwirə myee dɨ nzata Dawuda shi fəra mya muɗə ka Yawude a njiya Babila nə bəw a mbiɗi-fwat. Dɨ fəra mya muɗə ka Yawude a njiya Babila də shi nzata Ma Həmɨnpwa a Yaɓwarən, furo kwirə mingɨn nə bəw a mbiɗi-fwat.

Mwasa Yesu

¹⁸ Yang mwasa Yesu Ma Həmɨnpwa a Yaɓwarən a gə. Ite Yusufu a tiyagə Maryamu ɓa ɗɨmə, ndaa nda leetɨrə meti, mya parə ka waptə dɨ haka Pitɨ Ɗəmɗəmtə.

¹⁹ Gə ndi Yusufu ɓwaara femə pepe, ndaa mwo atɨ nda vərə sopye, gə ləngɨn nda mwo atɨ nda kwotɨrə a vor ɓotə ɓe ɓwaare aa leyə.

²⁰ Sɨne a vor ɗyengləngɨn tee, malyene da Həmɨnpwa a dɨma kan a vor jiritə a san atɨ, “Yusufu, nze da Dawuda, ɓe kala aa gu ka ɗɨm Maryamu ngga gəə mesa, gəkɨlə wapte kaarə dɨ haka Pitɨ Ɗəmɗəmtə ngga ɗɨmə.

²¹ Nggi ɓa mwasa nzə-mure hye ɓa ɗɨkən kwake atɨ Yesu, gəkɨlə sɨnə ɓa mbədə myee dan kat gə səhase darən.”

²² Shingɨn kat a nzasə gəkɨlə kormi Həmɨmiye 'ye dɨma dɨ kwaamɨ kpale a naa atɨ,

²³ “Rikitɨngɨn ɓa ɗɨm waptə, ngga mwasa nze, tən ɓa ɗɨkən kwake a warən atɨ Imanuwel,” naarə ləngɨn nə “Həmɨnpwa nee ɓwaa kam.”

²⁴ Ite Yusufu a maggə shintə, nda koɗə kormi la malyene da Həmɨmiye a boyən, nda luu Maryamu ngga gəə mesən.

²⁵ Kat ka angɨn Yusufu aa leetɨrə meti zə fəra ngga mwasa nzəngrə də. Də Yusufu a ɗɨkən kwake Yesu.