Markus 6 - Ɓwaatiye New Testament

Mya kwo Yesu a Nazarat

¹ Yesu a ɗaka hangɨn a mɨnə vɨrasən Nazarat tən kat ka lagbe dan.

² A fərə piyatɨ da Yawude, nda pɨrə vɨnə kəndəshe darən a tiya kəndəshe a vor vɨnəngɨn, ɓwaare hananang dɨ vor myee dɨ kɨl ləməgyee nda dɨ boyo a ɗa ndəle kɨr-kɨr. Təna ɗiyəsə, “A ndo haa nda lee ləməgyee kat? Nda ɗa ya nda lee wule shee kat? Ɓə səkushipe nda dɨ ɗa mgban wonə vən gətɨngɨn?

³ Aa sɨnə nze da nzə-gbalshe mya leyə gana? Aa nze da Maryamu nə a? Mwaafengɨn mgban kat a yə Yakubu ka Yusufu ka Yawuda ka Siman aa tənə mya leetɨrən gana? Mwaafengɨn i mandye mgban, aa tənə kam gana?” Səngɨn nə ɗa təna ɓə ushi Yesu, tənaa nggutən ka fukatə.

⁴ Yesu a luwa a sarən, “Diyalə mya mbadən səɗə atɨ, ‘A vɨrata kpale nə ɓəmbə taa fukati kan, nagi a waka myee dan, ka vor hwodan.’ ”

⁵ Yesu aa ɗa i shikoshopyi twayi a vɨrasən, ji-ootə ɓyeləng ɓəmbə nda gwadərən a parən ka tɨfəngɨn təna piyagə ootə.

⁶ Le a ɓwan kɨr-kɨr ka wule ɗongə mwadiyale darən! Dɨ hangɨn Yesu a woyo i vɨre som-som ta kənə ɓwaare le da Həmɨnpwa.

Yesu a lyen lagbe dan bəw a mbiɗi-kpe

⁷ Nda wa lagbe dan, tən bəw a mbiɗi-kpe, təna paya a hakan. Nda takarən a lyentɨrən kpe-kpe, nda vərən gətə a nə pɨle ji-dwatə.

⁸ Nda lama kaarən a sarən atɨ, “Na hwun ɓa dɨm omotɨngɨn, ɓe hwunaa nggur asə gə omotə a nə tɨfe, nagi sɨzɨmti, nagi zambɨramə, nagi taa a vor pititə, nggurəm gaaratə ɓəmbə.

⁹ Dəməm hwanyi omotə, ɓe hwunaa por sɨɓwete hwun ɓa nggəddərən.

¹⁰ Nagi a ndo hwoɗi hwuna pɨrə, nzamə vor hwoɗingɨn baa fəra hwun ɓa ɗaka vɨratɨngɨn də.

¹¹ Mye kanaa lurəwnə a haa hwuna zə də, myaa kɨl la hwuna zəkan, hwun kana ɓa ɗaka hangɨn a dɨmə, kpəwomgə bɨr-bɨrə mbwayingəwnə. Angɨn ɓa bɨlərən atɨ ɓashitɨ da Həmɨnpwa shi nəngrən.”

¹² Təna dɨmə a muɗə ta hiwa ɓwaare ta sarən atɨ a təna por-njiya ka səhase darən.

¹³ Təna dɨmdə pɨle ji-dwatə gə sɨtɨ ɓwaare, təna puk maare a nə ji-ootə a dɨmərən də ootə.

Mya bəng nə Yohana nzə-ɗa batisɨmatə

¹⁴ Hiridus hama Galili a kɨl lə shee kat Yesu a dɨ ɗa gəkɨlə kwakɨ Yesu a ngguro a mbəgə hee kat. Imi ta sa atɨ, “Yohana nzə-ɗa batisɨmatə nə maggə taane ka myentə, səngɨn ɗɨki nda ɗɨm gətɨ ɗa səkushipe.”

¹⁵ Imi a sa atɨ, “Iliya nə mɨna.” Imi mgban a sa atɨ, “Sɨnə hiɗə dɨ vor kpalyee kaaɗəng nda ɓə mɨna.”

¹⁶ Ite Hiridus a kɨl ləməgingɨn, nda sa atɨ, “Yohana a na ɗɨkə təna bənggə nəngɨn sɨnə mɨna ka myenta?”

¹⁷ Gə Hiridus nə kanənəngɨn ɗɨki atɨ a mya kɨt Yohana a ɗɨkə gbərəwe a gbən. Hiridus a ɗaasə gəkɨlə le da Hirodiya metɨ jibiyəngɨn Filibus ite nda luwo a nza kaarə.

¹⁸ Yohana a dɨ boyə Hiridus le anəsə-anəsə atɨ, “Ɓashita Musa aa və humwatə hye luu metɨ jibiyanga a nza kaarə meti.”

¹⁹ Hirodiya a dɨ bəə muunəngɨn gəkɨlə ləməgyee nda dɨ boyo. Gə ləngɨn ngga dɨ mwo atɨ ngga ɓɨl Yohana, nggaa ɓə lee ɗate nggi ɓa ɗa.

²⁰ Gəkɨlə Hiridus a dɨ gəə kala Yohana, nda dɨ gontən, ndaa mwo atɨ asə a gən, gəkɨlə ɓə leyə atɨ Yohana ma femə ɗəmɗəmə. Hiridus nee dɨ mwo kɨl kormi Yohana anəsə, nagi a nə sate atɨ le a dɨ ɓwan ka ləməgingɨn.

²¹ Fəre hiɗə, Hirodiya a ɗɨm humwatə ɓa ɗa Yohana se, gə kote dɨ bəə munəngɨn. A sɨlangsətɨ mwasa həmɨn Hiridus, nda ɗa sɨzɨmtə a waga ɓwaare, wule mi kpan-kpanyee a vor njiya dan, wule gyane ka kasalye ka həmyee a vor njiya Galili.

²² Ite njita Hirodiya a pɨra, ngga wuro, hanɨngə Hiridus kat ka omyee paya. Həmɨn Hiridus a gbə a sa njitə atɨ, “Ɗiyi lə sa kat hye dɨ mwo hɨn ɓa vu.”

²³ Nda gbə a sarə atɨ, “Nagi mɨnə hye nyishi hɨn ɓa vu səngɨn, nagi nda njiya de nə, hɨn ɓa takan kpe a vu gbɨle.”

²⁴ Njitɨngɨn a dɨmə a dɨ pa nuwogərə a ɗiyərə le atɨ, “Ɓə mɨnə hɨn ɓa nyisa?” Nuwogərə a sarə atɨ, “Boyən nda vu nə Yohana nzə-ɗa batisɨmatə.”

²⁵ Njitə a mɨnə haka həmɨn tan-tan a san atɨ, “Hɨnə dɨ mwi atɨ hye vi nə Yohana a nə papitɨnə ɓəgəng.”

²⁶ Ite həmɨn a kɨl ləngɨn, nda ɗa yedi-kɨttə kɨr-kɨr, shezə taa itɨ ɗati ndi ɓa ɗa, gə ɓə bwe le nzadən mbəə a humwa omyee nza, ndaa mwo atɨ nda mɨna ka beesən a kwo njitə le.

²⁷ A hangɨn nda lyen hiɗə dɨ vor ji-fwahumwatə dan tan-tan atɨ a nda wudə a bangagə nə Yohana a shikan. Mangɨn a muɗə mgban a dɨ banga nə Yohana dɨ vor gbərəwe,

²⁸ a shikan a nə papitə. Nda və njitɨngɨn, njitə a muɗə ka nəngɨn a dɨ və nuwogərə.

²⁹ Ite lagbe da Yohana ɓe kɨl ləngɨn, təna shi a nggur kada sɨsən a dɨ ɗɨkə.

Yesu a zɨmdə morye haru bəw laka tuf

³⁰ Ite kpe-lagbe da Yesu a mɨna dɨ hiwatə, təna paya a hakan a boyən lə shee kat təna ɗa.

³¹ Ɓwaare a maɗa ta shi haka Yesu ka lagbe dan anəsə, imi dɨ nee muɗi, imi dɨ nee shi, angɨn a ɗɨkə Yesu kat ka lagbe dan aa ɗɨm humwaa zɨmshe. Gə ləngɨn nda sarən atɨ, “Mya muɗəmə a haa som a haa taa ɓwaare də, gə mya kwa piyam ɓyeləng.”

³² Təna pɨrə koombotə a lyembərə a muɗə a haa som gə təna tawagə ɓwaare.

³³ Kat ka angɨn, imi hananang dɨ vɨre som-som 'ye naa mutsərən a leyə atɨ tənə, mingɨn a gyeɓə a pɨrgərən a humwa ka mbwayingrən baa a tɨlgə Yesu ka lagbe dan a hangɨn.

³⁴ Ite Yesu a janga gə koombotə, nda naa təkə-təkətɨ ɓwaare, ləngrən a orən gəkɨlə tənə ɓətɨ mbagee taa majinə kaarən. Gə ləngɨn nda tiya kəntə kənərən shee hananang a hangɨn.

³⁵ Ite fəre nee dɨ gəə kaadə, lagbe dan a shi hakan a san, “Fəre nee dɨ mbɨri, hanə vor kaakə, taa hwoɗi də ka ɓwaare.

³⁶ Ndɨka hye boyə ɓwaare təna təkəsə a muɗə vɨre kur-kuryee ka hee kat ɓwaare a gə də, gə təna ɗər sɨzɨmtə a zɨmə.”

³⁷ Yesu a sarən atɨ, “Zə vəmərən sɨzɨmtə a ta zɨmə.” Təna san atɨ, “Sa ɓa zɨmdə təkə-təkətɨ ɓwaare nə ɓa ɗa taa lyentɨ lyekətye fwa-fwat! Hinə ɓa ɗɨm wule taa ɓətɨ a, aɓə wudə a ɗara sɨzɨmtə kan asɨ vərən təna zɨma?”

³⁸ Yesu a ɗiyərən, “Nda goɓoryi buroditə ya hwuna gə kaarə? Wudəm, niyəm pee.” Ite təna wudə a niya, təna mɨna sɨ san, “Buroditə nə tuf ka vaakye kpe.”

³⁹ Yesu a sarən atɨ a təna boyə ɓwaare təna nza tərəng-tərəng a nə kaakə ɓak-ɓake.

⁴⁰ Ɓwaare a nza mgban mgbɨm-mgbɨm, imi a gbəwo haru, imi mgban a gbəwo bəwtə tuf-tuf.

⁴¹ Yesu a por goɓoryi buroditɨngɨn tuf ka vaakye kpe, nda maddə nəngɨn a pwa, nda ɗa Həmɨnpwa hiwtə ka usəkətə, nda taka buroditɨngɨn a və lagbe dan gə təna ɓyana ɓwaare. Sə mgban nda por vaakingɨn kpe a takarən a ɓyanarən kat.

⁴² Ɓwaare kat a zɨmshe a hyaɓa.

⁴³ Təna pedə mosəryi buroditə ka vaakye mbiɗi a poro konye pas-pas bəw a mbiɗi-kpe.

⁴⁴ Myee zɨm shingɨn, morye kat ɓa ɗa haru bəw laka tuf.

Yesu a woyo nə haɓye

⁴⁵ Aa ɓongə, Yesu a boyə lagbe dan atɨ a təna pɨrə koombotə a lyembərə a pɨrgən a humwa a lawuɗə vɨra Betesda, nda mbiɗi a bee gəkɨlə nda gə ɓwaare kwasatə təna təkəsə.

⁴⁶ Ite nda gərən kwasatə a mbəə, nda ɗakarən a nggɨrə nə mwe gə nda ɗa hiwtə.

⁴⁷ Ka harikatə lagbe dan lyembərə dɨmə vor haɓye a nə gərə Galili, sɨnə mbiɗi hiɗə a haa kpamtə a kwakatə.

⁴⁸ Nda niyə a naa lagbe dan ndə dɨ ɓwa ka lyembəre ndə dɨ tyenglənyi gə hawa dɨ tawa kaarən. Ka haa dung-dung, Yesu a dɨmə a zə hakarən ndi ta woyo nə haɓye. Nda woyo a ɗa ɓətɨ ndi ɓa pɨrgərən a muɗə a haa.

⁴⁹ Ite təna nan dɨ woyo nə haɓye, təna sa ndi kpiriti. Təna gəəshe,

⁵⁰ gəkɨlə təna nan kala a gərən kat. Gbyel a hangɨn nda boyərən le a sarən atɨ, “Mbam ɗəng! Hɨnə. Ɓe kala aa gəwnə!”

⁵¹ Nda pɨrə hakarən a vor koombotə, hawa dɨ təwi kat a kangə a bə ɗəng. Lagbe dan a gə kiw ka sa təna nan,

⁵² gə tənaa lee naarə zɨmte nda zɨmdə ɓwaare ka goɓoryi buroditə, kwa-hubosərən a takə.

⁵³ Koombotə ɓe kpasə, təna nggɨrə vor vɨraa Jenisarat a ɓwe koombotə a hangɨn.

⁵⁴ A hangɨn, aa ɓongə ite təna dɨmgə koombotə a dɨ nggɨrə haa kpamtə, ɓwaare a naa Yesu a leerən.

⁵⁵ Təna gyeɓə a pɨrə ji-vɨree a hangɨn a dɨ payadə ji-ootə a nə kəje, tən ta koɗən a hee kat təna kɨlə atɨ sɨne də.

⁵⁶ Nagi a ndo haa nda pɨrədə kat ka vɨre kur-kuryee, ka vɨre kpan-kpanye ka vor kaake, təna dɨ pukdə ji-ootə a heengɨn, kat ka vor lumotə. Tən ta nyisən atɨ nda ɗakarən təna pa nagi nda baapa rukute dan nə, myee mgban pan kat təna dɨ piyagə ootə darən.