Markus 4 - Ɓwaatiye New Testament

Byelə səɗe a nə nzə-ka daase

¹ Yesu a tiya kəndəshe a kwaka gərə Galili. Kaɓa təkə-təkətɨ ɓwaare a paya a hakan, taayə haa kangti kan, səngɨn ɗa nda pɨrə koombotə a nza vorsə. Mya dɨmdə koombotɨngɨn a vor haɓye, ɓwaare a kangə kwaka haɓye ta kɨl ləməgyee Yesu a dɨ boyo.

² Nda kənərən shee hananang ka byelə səɗe, nda sa atɨ,

³ “Samdə kwakingəwnə! A nzə-hawti a nggur daase a muɗə ɓa dɨ ka daase.

⁴ Ite sɨne dɨ kashe, a daasə a kəji nə tɨfe, ɓakarye mgban asɨ gwakə kat.

⁵ A daasə a leyə a pukə nə girɨnge. Nda za tan-tan a kangə, shezə gəkɨlə kworyingrən aa ɗɨm njiya a kangə pepe,

⁶ ite fəre a ɓɨrə, nda hinarən təna kpamə gə kworyingrən aa pɨrə njiya.

⁷ A daasə a kəji waka hwole, ite daasəngɨn a za a kangə, hwoləngɨn a jiyə a zobtɨrən kat, tənaa wula a ɗa daase.

⁸ A daasə mgban a fokə nə njiya pepeye, nda za a maɗə, a ɗa daase, a daasə bəwtə mwaakɨn, a mgban bəwtə tukoltaka, mɨni a mgban haru.”

⁹ Yesu a sarən, “Ma ka kwaki kɨl le, a nda saa kwakingɨn pepe a kɨlə.”

¹⁰ Ite Yesu a mɨna asɨ nza hiɗəsən ka lagbe dan bəw a mbiɗi-kpe ka imi 'ye nza takadən, təna ɗiyən lə naarə byelə səɗəngɨn.

¹¹ Nda sarən atɨ, “Hɨnggəwnə myaa ɓownə də asə a nə lə həmne da Həmɨnpwa. Mya mgbaarən bwang a hakəwnə. A haka mbiɗiti mi vɨratə, mya dɨ kənərən shee ka byelə səɗe.

¹² Gələ, “ ‘Nagi təna sara diingrən a dɨ niyə, tənaa dɨ naa asə, nagi təna wana kwakingrən a dɨ kɨl le, tənaa dɨ takaləngɨn, naasə tən ɓa nda virwa a por-njiya, Həmɨnpwa a nggurərəngə səhase darən!’”

¹³ Yesu a sarən, “Hwunaa lee byelə səɗa na dɨ ɗəwnə, ɓə ya hwun ɓa ɗa hwuna ɓə lee mbiɗitɨ zərgi ləməgyea?

¹⁴ Byelə səɗa na boyə nə yang: A nzə-hawti a ka daase, daasəngɨn nə le da Həmɨnpwa.

¹⁵ I ɓwaare nə ɓətɨ tɨfaa daase a fokə nəngɨn, wule mingɨn nə daasə le da Həmɨnpwa a kəji nəngrən. Tən kana luu le da Həmɨnpwa, Shetan a dɨ shi tan-tan a nggurgə ləngɨn a təna luwo vor hubosərən.

¹⁶ Imi mgban tənə ɓətɨ girɨnga daase a fokə nəngrən, tən kana kɨl le da Həmɨnpwa, təna dɨ luwo tan-tan ka hɨmne ka hanɨngtə.

¹⁷ Shezə gələ kworyingrən aa pɨrə njiya tənaawa ɓongə tɨfe da Həmɨnpwa. Tən kana pɨrə vor tənətə gəkɨlə le da Həmɨnpwa, təna dɨ mɨnə ka beesərən a ɗaka Həmɨnpwa tan-tan.

¹⁸ Imi mgban tənə ɓətɨ hwola daasa fokə waka hwole, sə mgban təna dɨ kɨl le da Həmɨnpwa.

¹⁹ Wule mingɨn a dɨ pɨrə ɗyengle, ka vwakaha gə ɗɨm gɨnətɨ vɨratə, ka omshe som-som. Shingɨn kat a dɨ zob le da Həmɨnpwa a vor hubosərən, ləngɨn a yerə ɓaa.

²⁰ Imi nə ɓətɨ njiya fema daase a pukə nəngɨn. Tənə wule myee dɨ kɨl le da Həmɨnpwa, təna luwo a ɗa lyentə kan, təna ɗa nyemye, 'ye bəwtə mwaakɨn, 'ye bəwtə tukoltaka, 'ye mgban haru.”

Byelə səɗe a nə tikɨle

²¹ Nda ɗiyərən, “Mya dɨ kɨsadə tikɨle a mbəə mya mɨna kupon ka kpaa maa, naasə mgban a pukə dingɨlta? A mya dɨ kangdən a haa mgbənge a pwa?

²² Nagi ndo sə a haa ɓotə, səngɨn ɓa dɨma a haa bwange, sa mya ɓodən mgban, mya mgbaarən ɓwaare a leyə.

²³ Ma ka kwaki kɨl le maa nda saa kwakingɨn a kɨlə.”

²⁴ Nda mɨna sarən atɨ, “A nagi ndo ma a səɗə ka yedingɨn a nə ləməgyee nda dɨ kɨlə, gə wule sə-kənshe hwuna dɨ kənə ɓwaare shee kan, ka wule sə-kənshingɨn mgban mye ɓa kənəwnə baa a saaɗə.

²⁵ Ma ka se kan kat, mya mɨna ɗɨkən a də. Ma mgban taa asə kan, nagi nzɨ a ɓyelənga nda gə kan nə, mya ɓa kpawan a lugən.”

Byelə səɗe anə daasa za

²⁶ Nda mɨna sarən, “Həmne da Həmɨnpwa nə yang: Sɨnə ɓətɨgə ma ka daase a gaashe.

²⁷ Nda mɨnə hwoɗye a dɨ nza, nda shinə a maɗə, tukotə ka fəre, daasəngɨn a za a maɗə, ndaa lee ɗate daasəngɨn a ɗa nda za.

²⁸ Njiyangɨn ka nənəngɨn a ɗɨkdə daase nda za a maɗə a ɗa jibe a dɨmdə nyemye ka daase.

²⁹ Ite daasə shingɨn a naa, nda nggur rokume gə shingɨn kən mati.”

Byelə səɗe a nə daasə bagale

³⁰ Nda mɨna sa, “Ka mɨnə hin ɓa kana həmne da Həmɨnpwa? Ndo wule byelə səɗə hin ɓa boyə gə hina bɨldə həmne da Həmɨnpwa?

³¹ Həmne da Həmɨnpwa nə ɓətɨ daasə bagalə, daasəngɨn nə kur-kur.

³² Kat ka angɨn ndi kana za, nda dɨ maɗə a la, a gbyala a kala base, a pɨrgə mbiɗitɨ kadee a kaanda kat, ɓakarye a dɨ sɨ ɗa vənye a basengɨn a nza də.”

³³ Ka byelə səɗə som-som nda kənərən shee, a wule shee tən ɓa mbarən a leyə.

³⁴ Ndaa kənərən asə som na aa ka byelə səɗe. Ndi kana shi a nza ka lagbe dan, də nda dɨ boyərən naarə nagi ndo sə.

Yesu a gɨra hawo ɓoole

³⁵ A fərəngɨn, ka kaade, nda sa lagbe dan atɨ, “Mya nggɨrəmə itɨ ɓayati.”

³⁶ Təna dɨ pɨra a vor koombote Yesu a nza də, təna lyembərə a ɗaka ɓwaare a haa təna kangədə a nggɨrə itɨ ɓayati. I koombi mgban a koɗərən.

³⁷ Dɨmsərən a vor haɓye nəle, hawe a nza maɗa, ɗogoli hawe a maɗa ka haɓye, koombotə ta kana ɓa ɗimə.

³⁸ Yesu ndə gaarə a bee a mgba koombotə ɓə bə nəngɨn a səbəne dɨ shini. Lagbe dan a dɨ maddən gə shintə, təna san atɨ, “Nzə-kəndəshe, se aa pɨrda də maa hina ɗyemə a soɓwa?”

³⁹ Nda viɗiya a maɗə a nza, nda gɨra hawe, nda sa hawe atɨ, “Kangyi!” Nda sa ɗogoli hawe mgban atɨ, “Bi ɗəng!” Hawa dɨ tawa kat, a sara a kɨsə, haa talə shetətət.

⁴⁰ Yesu a ɗiyərən, “Ɓə mɨnə ɗa kala aɓə gəwna? Baa ɓəgəng taa mwadiyalə kəwnə ma?”

⁴¹ Kala a gərən kɨr-kɨr, təna ɗiyəsə, “Ɓə ndawula ɓwaara anə? A hawe kat ka ɗogoli hawe a koddə kormingɨn!”