Markus 3 - Ɓwaatiye New Testament

Yesu a gwadə ma tɨfəngɨn a mbɨrə a Kafanawum

¹ Ite Yesu nee a vɨra Kafanawum, nda mɨna pɨrə vor vɨnə kəndəshe da Yawude, nda pa ama a vor vɨnəngɨn ma tɨfəngɨn a mbɨrə.

² Fərəngɨn fərə piyati da Yawude, gə ləngɨn imi dɨ vor Farise a pukən diingrən ta nidən anda ndi ɓa gwadə mangɨn a fərə piyatɨ darən gə təna ɗɨmgən le.

³ Yesu a sa mangɨn atɨ, “Maɗi kangəə humwaa ɓwaare kat.”

⁴ Yesu a virwo haka mbiɗitɨ myee nza a ɗiyərən, “Ɓə ndoɗinə ɓashitə a boyə nə fərə piyata? Ɗa səfeme nə ma naasə mgban ɗa səhase na, a mya mbə myenta naasə mya kɨɗa myentɨ ɓwaara?” Tən kat təna nza ɗəng, ama aa wunakan.

⁵ Yesu a virwa a filakarən ka yedi-kɨttə, ləngrən a orən gə nyerəta hubosərən. Nda sa mangɨn atɨ, “Tɨddə tɨfanga.” Mangɨn a tɨddə tɨfəngɨn. Tɨfəngɨn a mɨna pepe.

⁶ Də a hangɨn Farise a dɨmə haa bwange a peyə ka myee da həmɨn Hiridus a shalasə le a nə ɗate tən ɓa ɗa gə təna kɨt Yesu a ɓɨlə.

Təkə-təkətɨ ɓwaare a koɗə Yesu

⁷ Yesu mgban ka lagbe dan a dɨmə a muɗə kwaka gərə Galili, ɓwaare hananang a dɨmə dɨ vor Galili a koɗən.

⁸ Ite ləmə shee Yesu a dɨ ɗa a ngguro a mbəgə hee kat, ɓwaare furi-furi a dɨma dɨ vor njiya Yawudiya ka vɨra Urshelima ka njiya Idumiya ka myee a ɓayatɨ gbɨnuwo Urdun ka myee dɨ vɨra Taya ka Sidon.

⁹ Gəkɨlə furo ɓwaare, nda sa lagbe dan atɨ a təna lɨkədə koombotə ngga gɨrgə kwakatə gə nda nza vorsə a tawagə ɓwaare.

¹⁰ Gə a itɨngɨn ɓə gwadə ɓwaare hananang tən piyagə sɨtɨ otə darən, səngɨn ɗa myee ka ootə kat a paya ta ləkədəsə gəkɨlə nagi ndo ma nee dɨ mwi atɨ nda pa sɨtɨ Yesu.

¹¹ Myee ka pɨle ji-dwatə a sɨsərən kat, kana naa Yesu, təna dɨ fokə njiya a humwasən ta mgbəngtənyi ta gəəshe atɨ, “Hyenə Nze da Həmɨnpwa.”

¹² Shezə nda dɨ gɨra ji-dwatɨngɨn ɓe tənaa bɨlə ama atɨ sɨnə wonə.

Yesu a nggɨl kpe-lagbe bəw a mbiɗi-kpe

¹³ Yesu a nggɨrə nə motə a waga myee ndi ɓa nggɨlə, təna zə hakan.

¹⁴ Dɨ vorsərən nda nggɨl ɓwaare bəw a mbiɗi-kpe, tənə myee gəə kpe-lagbe, tənə ndi ɓa lyentɨrən təna woyo a hiwa ka le da Həmɨnpwa.

¹⁵ Tənə mgban myee ndi ɓa vərən gətə gə təna dɨmdə pɨle ji-dwatə.

¹⁶ Kwaki kpe-lagbengɨn bəw a mbiɗi-kpe nə yang: Siman, a Yesu a warən atɨ Bitrus,

¹⁷ ka Yakubu nze da Zabadi ka mufəngɨn Yohana 'ye Yesu ka nənəngɨn a dɨ watɨrən atɨ Bonajis (naarəngɨn nə je da mgbaratə),

¹⁸ ka Andrawus, ka Filibus, ka Batalamawus, ka Matta, ka Tomas, ka Yakubu nze da Alfiyus, ka Siman nzə-nyatə gə njiya, ka Tadawus,

¹⁹ ka Yawuda Iskariyoti ma ɓaga ɗərdə Yesu.

Yesu ka Belzabub

²⁰ Ite Yesu a mɨna a vɨra Kafanawum asɨ pɨrə hwoɗyee nda duwa nza də, təkə-təkətɨ ɓwaare a peyə hakan, hwoɗye a naa pas, taayə humwaa zɨmshi kan tən kat ka lagbe dan.

²¹ Ite myee a sɨsən ɓətɨ yə ndewogən, ka mwafengɨn, ka mbiɗisərən ɓe naa ləngɨn, təna shi ɓa nggutən a muɗə kan a hwoɗye, gəkɨlə təna dɨ sa atɨ, “Ɓə tamdə a sombingɨn.”

²² Ji-lee kəndə ɓashita Musa 'ye shi dɨ Urshelima a sa atɨ, “Makpanə pɨla da ji-dwate mya dɨ wa atɨ Belzabub nə pɨrə sɨtɨ Yesu! Ka gəta Belzabub həme da pɨle ji-dwatə nda dɨ dɨmdə pɨle ji-dwatə gə sɨtɨ ɓwaare.”

²³ Yesu aɓə wagatɨrən a boyərən lə səɗe, nda sarən atɨ, “Ɓə ya Shetan ndi ma nzə-dwati ɓa mɨna dɨmdə nduwongɨn Shetanti gə sɨtɨ ɓwaare ɓə?

²⁴ Di həmne kana təkə kpe, həmnəngɨn aa dɨ kangaa, ndi ɓa fukə njiya a kɨɗə ɓaa.

²⁵ Sə mgban, hwoɗye kana təkə kpe, hwoɗingɨn aa dɨ kangaa, ta fukə a kɨɗə ɓaa.

²⁶ Shetan kana ndɨlə dɨ nya ka nəngɨn, a dɨ dɨmdə pɨle ji-dwatə dan, ndaa dɨ ɗɨm nyerətə a kangə, hɨnggən mbəə.

²⁷ Ka diyale, taa ama də ɓa mba pɨrtə a pɨrə hwoda gbinda a porgən shee a ndaa ɓwerən, nda ɓə porgən shi hwodan.

²⁸ Diyalə na dɨ boyownə, nagi ndo səhasə ɓwaara a ɗa, mye ɓa nggurəngə səhasəngɨn, nagi kɨɗa kwakə.

²⁹ Nagi ndo ma kɨɗa kwakɨ Pitɨ Ɗəmɗəmti ka sharha, angɨn myaawa ngguro ɓwaara gən. Shezə wule səhasəngɨn a dɨ nza nə ma kaaru-kaaru.”

³⁰ Yesu a boyə sə gəkɨlə təna dɨ sa atɨ, “Sɨne ka pɨle ji-dwatə a sɨsən.”

Nuwogə Yesu ka mwaafengɨn

³¹ Nuwogə Yesu ka mwafengɨn a shi asɨ kangə kwatɨfə hwoɗye. Təna lyen ama atɨ na mya warən nda shi.

³² Təkə-təkətɨ ɓwaare nee nza takadən kat a vor hwoɗye. Mya san atɨ, “Yə nuwogu ka mwafenga nee kangə haa bwange dɨ mwa təna nəw.”

³³ Nda ɗiyərən atɨ, “Nda yə nuwogi ka mwafe nə yə wonə?”

³⁴ Nda nidə myee nza takadən dɨ kɨltən a mbəə, nda ɓə shea sarən atɨ, “Minə nzaa nzatɨnə, tənə yə nuwogi ka mwafe!

³⁵ Ma kat dɨ koddə kanata Həmɨnpwa sɨnə nzə-mufa ka mwafɨri ka nuwogi.”