Markus 15 - Ɓwaatiye New Testament

Yesu a humwa Bilatus

¹ Ka haa kpit-kpite kɨsehəmi kpan-kpanye, ka ji-lee kəndə ɓashita Musa, ka mi kpanye a peyə ka ji-shalale darən a shalasə le a nzadən. Təna ɓwe Yesu a ləkədən a zəkan a haka Bilatus ndi ma sɨnə nggwamnatɨ Yawudiya.

² Bilatus a ɗiyən, “Hyenə həme da Yawude ma?” Yesu a luwa a san atɨ, “Hye boyo ka nənanga.”

³ Kɨsehəmi kpan-kpanye a maɗə ta ɗəmgən ləməgye som-som.

⁴ Bilatus ɓe kɨl ləməgyee mya dɨ boyə nə Yesu, nda mɨna sa Yesu atɨ, “Hye sa ka ləməgyee a shiya? Tee dɨ bwe le ma?”

⁵ Yesu aa wuna a bwe alə. Bilatus a ndələ ka ləngɨn.

⁶ Təne ka kwale a təna dɨ ɗarən, a fərə kwalə Lawuttə, ɓwaare a dɨ nyisə yə həmi njiya gə mya pararəngə ɓwaara hiɗə a ma mya ɗɨkə gbərəwe.

⁷ Ama nə də mya wa atɨ Barabas mya gbən a gbərəwe gəkɨlə sɨne hiɗə dɨ vor myee maddə mwanatə, mya peyə a nya a ɓɨl we.

⁸ Ite ɓwaare hananang a paya təna nyisə Bilatus atɨ nda koɗə kwala nda duwa ɗarən a fərə kwalə Lawuttə.

⁹ Bilatus a ɗiyərən, “Hwuna dɨ mwo atɨ na parəwnə Həme da Yawude ma?”

¹⁰ Bilatus a ɗiyərən sə gə ɓə leyə atɨ jiwnə ɗɨkdə kɨsehəmi kpan-kpanye təna ɓə kɨsa Yesu a shikan gə mya ɓɨlə.

¹¹ Shezə kɨsehəmingɨn nə ngama le, ɗɨkdə ɓwaare təna sa atɨ mya pararəngə Barabas.

¹² Bilatus a mɨna ɗiyərən atɨ, “Ɓə ya na ɗa ka manə hwuna dɨ wa atɨ Həme da Yawude?”

¹³ Tən kat təna maɗə ta gəəshe atɨ, “A mya ɓɨdɨmdən a gbaltən! A mya ɓɨdɨmdən a gbaltən!”

¹⁴ Bilatus a ɗiyərən atɨ, “Ɓə gəkɨlə mɨnə mya ɓɨltən? Ndawula səhasə nda ɗa?” Tənaa yə sardə kwakingrən, təna pɨrə humwa ka gəəshe ka kormingrən a pwa atɨ, “A mya ɓɨdɨmdən a gbaltən!”

¹⁵ Gəkɨlə Bilatus a dɨ mwo atɨ haa nɨngə ɓwaare, nda pararəngə Barabas a dɨmdən gə gbərəwe, nda vədə Yesu mya byengrən, nda shea vədən gə mya ɓɨdɨmdən a gbaltən a ɓɨlə.

Ji-gyelmbutə shar Yesu

¹⁶ Ji-gyelmbutə a ləkədə Yesu a pɨrə kan a vor voti ta Bilatus, mbiɗitɨ ji-pakawatɨ Roma a paya kat.

¹⁷ Təna kan wule rukute da həmye wule a ka ɗuwo gaaɗətə, təna tak mbulo hwole a ɗɨkən a nəngɨn.

¹⁸ Gə təna shartən, təna shea kalan-gbəətə ta san atɨ, “Naa həmne a gɨrə kwe Həme da Yawude!”

¹⁹ Tən ta lyebrən ka kada a nəngɨn, tən ta təfən nawye anəsə, anəsə. Təna gyerə njiya ta kalan-gbəətə.

²⁰ Ite təna shartən kat a mbəə, təna sɨɗan gə rukutəngɨn a kalan sɨɓwetɨ dan. Təna ləkədən a zəkan a haa tən ɓa ɓɨdɨmdən a gbaltən də.

Mya ɓɨdɨmdə Yesu

²¹ Ite tən dɨmə dɨ muɗi, təna peyə ka ama mya dɨ wa atɨ Siman a dɨ Sireni sɨnə baagə yə Alezanda ka Rufus, sɨne dɨ mɨnagə itɨ vɨrati, təna bɨlən mbamtə a ɗɨkdən nda nggur kada ɓɨdɨmta Yesu.

²² Təna ləkədə Yesu a zəkan a haa mgbənga mya wa atɨ Golgota. Naarə kwakɨngɨn nə Haa Kpəəkəne.

²³ A hangɨn təna vən vwo gbaanga mya pedən ka nggumo kwata mya dɨ wa atɨ mərtə, Yesu a kwo soptə.

²⁴ A haa mgbəngəngɨn təna ɓɨdɨmdə Yesu a gbaltən. A shea pa-bara gə təna lee sa nagi ndo ma ɓa ɗɨmə nə sɨɓwetɨ dan.

²⁵ Ite mya gbal Yesu, fəre nggɨra bai ka mbwayi fəre dombiɗətɨ hawure.

²⁶ Təna dorshe a galingə nə kada ɓɨdɨmta Yesu gəkɨlə ɓwaare a lee sa ɗa mya ɓə ɓɨltən. Shee mya doro a sa atɨ, həme da yawude.

²⁷ Təna gbal i ji-ɓodəkha kpe a haka Yesu, hiɗə a tɨfə zɨməngən, hiɗə mgban a tɨfə lyekɗəngən.

²⁹ Myee dɨ pɨri dɨ tɨfəngɨn a haa mya gbal Yesu də, a nidən a rikiyə a tiya ɗaasən, tən ta sa atɨ, “Ləngɨn nee! Ama sa atɨ ndi ɓa fala Shafe a mɨna nwogən a vor bətə mwaakɨn,

³⁰ zə mbədə nanga janga gə nə kada ɓɨdɨmtə!”

³¹ Sə mgban, kɨsehəmi kpan-kpanye kat ka ji-lee kəndə ɓashita Musa a shartən tən ta boyəsə atɨ, “Nda mbədə imi, ɓə ya ndaa mbədə nəngɨn?

³² Ɓə ndi ma sa atɨ sɨnə Ma Həmɨnpwa a Yaɓwarən a ndi Həme da mi Israila a janga ɓəgəng dɨ nə kada ɓɨdɨmtə gə hina nan a mwakan.” Tən ji-ɓodəkhangɨn 'ye mya gbaltɨrən ka Yesu mgban a ɗaasə kan.

Mbɨrta Yesu

³³ Itɨngɨn fəre nee bai, kulitə a nzaa kɨsə a gbəə haa kat baa a tɨlə mbwayi fəre mwaakɨn.

³⁴ Ka mbwayi fəre mwaakɨn, Yesu a waha ka korme kaɓa kpan ka kwaame darən, “Eloi, Eloi, lama sabaktani.” Naarə ləngɨn nə atɨ, “Həmɨnpwa de, Həmɨnpwa de, mɨnə ɗa hye ɓə ɗake dɨsəri?”

³⁵ Ite myee kangə hangɨn gbyel a kɨl ləngɨn, təna sa atɨ, “Kɨləm, sɨndə dɨ wa Iliya.”

³⁶ Ama a giɓa a nggur sɨbaashe a shipə vwa gbaanyi-gbaanyi a zuɓo kada a ɗifə Yesu gə nda soɓwo. Mangɨn a sa atɨ, “Ɗakamən ɗəng. Mya niyə anda Iliya ɓa shi asɨ jangadən.”

³⁷ Ite Yesu a maddə kormɨngɨn kaɓa kpan a waha, nda fuwa pitɨ kpawtɨ dan a shea mbɨrə.

³⁸ Də ɗəng səpate a vor Shafe a sɨra dɨ pwa a zə njiya, a təkə kpe.

³⁹ Ite gyana nyate kangə hangɨn gbyel a humwa Yesu ɓe naa sa ɗa a wule mbɨrte nda mbɨrə, nda sa atɨ, “Diyalə manə Nze da Həmɨnpwa nə!”

⁴⁰ I mandi a kangə ɓong-ɓong ta naa sa dɨ ɗa. A vor mandingɨn, Maryamu dɨ Magdala nə də, ka Maryamu nuwogə Yakubu nzə-swaɗe ka Yusufu, ɗɨkənə Salomi.

⁴¹ Dɨ vor njiya Galili mandingɨn a kwaɗa Yesu ta gwadən. I mandinə də hananang 'ye kwaɗan shi Urshelima.

Ɗɨk wo Yesu

⁴² Itɨngɨn myenə dɨ ran-sɨkwale, haa ɓa kɨɗa fərə piyatɨ da Yawude.

⁴³ Ama nə də kwakɨngɨn nə Yusufu, dɨ vɨra Aramatiya, sɨne hiɗə dɨ vor mi kpan-kpani peta ji-shalale, ndi ma ka nənəngɨn sɨne dɨ kula shita həmne da Həmɨnpwa. Ka kaadə fərəngɨn, nda mwamdiya a dɨmə bwang a zə haka Bilatus a nyisən gə nda ɗakan nda nggur wo Yesu a ɗɨkə.

⁴⁴ Ite Bilatus a kɨlə, le a ɓwan ka ite atɨ Yesu mbɨrə she gbyel. Nda wa gyana nyatə a ɗi le gə nda leyə anda Yesu mbɨrə.

⁴⁵ Ndi ta kɨli gyanangɨn san atɨ Yesu mbɨrə, Bilatus a ɗaka Yusufu atɨ nda nggur wongɨn a dɨ ɗɨkə.

⁴⁶ Də Yusufu a dɨ ɗara foowe asɨ jangadə wo Yesu gə nə kada ɓɨdɨmtə. Nda vut we ka foo-wongɨn, nda nggur wongɨn a ɗɨkə taana mya ɗa a gonggoro faratə. Nda mgbəngtəngdə farate mya ɗa pinglɨn gə gbəə kwaamɨ gwongɨn a gbən.

⁴⁷ Maryamu dɨ Magdala, ka Maryamu nuwogə Yusufu, a dɨ niyə kpəkəkə a dɨ naa haa mya bədə wo Yesu də.