Markus 14 - Ɓwaatiye New Testament

Mya yaɓwa Yesu ka maarə ɨhɨng-ɨhɨnge a Betani

¹ Ite kwalə Lawuttə ɓwaa ka sɨlangsətɨ Zɨm Burodite taa maɗə də mbiɗi bətə kpe, kɨsehəmi kpan-kpanye kat ka ji-lee kəndə ɓashita darən a dɨ ɨl kwatɨfa ta koɗən ka kuta gə təna babɨra Yesu a kɨsa ɓɨlə.

² Shezə təna boyəsə atɨ, “Ɓe myaa ɗam shingɨn a kwalə Lawuttə naasə mwanate ɓa maɗə waka ɓwaare.”

³ Ite Yesu nee a vɨra Betani a vor hwoda Siman a ka dagde kɨnɨnɨng, nda dɨ nza a ɓɨdɨmə a dɨ zɨmshe. Itɨ meti a pɨra a hwoɗingɨn ka nzɨ-hubo maara ka pome ɨhɨng-ɨhɨng mya ɗa ka kada mya dɨ wa atɨ nad, sɨne kung ka taa kɨr-kɨr. Ngga wungə kwaamɨ hubo maarəngɨn a bwaɗagən a nə Yesu.

⁴ Imi dɨ vor myee nza hangɨn a tiya byele ka sə ta ɗa yedi-kɨttə tən ta sa atɨ, “Gəkɨlə mɨnə mya kɨɗa wule maarə ɨhɨng-ɨhɨnga ka taa kɨr-kɨr?

⁵ Ɓa ndawula mya ɗərdən ka taa ɓa pɨrgə taa lyentɨ kiwatə hiɗə, a ɓyana ji-poritə taangɨn.” Təna dɨkarə hashi-hashi.

⁶ Yesu a sarən atɨ, “Ɗakamərə ɗəng, ɓə gə mɨnə hwuna dɨ kɨɗa yedingrə? Sə pepeyə ngga ɗe.

⁷ Hwunə ka ji-poritə nagi ndo fərə a hakəwnə, nagi goɗi mgban hwuna mwo, hwun ɓa mba ɗatə ɗarən səfeme. Hɨnggi hɨn tam kəwnə fərə-fərə.

⁸ Ngga ɗa sa nggi ɓa mban a ɗa ngga ɓə yaɓwari ɓəgəng, gəkɨlə ngga ɗadə sɨshi gə we de nə dɨ shi gbyel, aa dɨ ɓongə hɨn ɓa mbɨrə mya ɗɨkri.

⁹ Diyalə na dɨ boyownə, nagi a ndo haa mye ɓa hiwa ka ləmə feməngɨn a vor vɨratə kat, sə mgban mye ɓawa bwelə sa ngga ɗa gə mye ta ɗyanga kaarə.”

¹⁰ Yawuda dɨ Iskariyoti hiɗə dɨ vor lagbengɨn bəw a mbiɗi-kpe a zə haka kɨsehəmi kpan-kpanye da Yawude gə nda ɗərdə Yesu a vədən a tɨfəngrən.

¹¹ Ite təna kɨl ləngɨn hanɨngərən təna mwan atɨ tən ɓa vən taa. Də mgban ndi Yawuda a tiya ɨl kwatəfəgi ɗate ndi ɓa ɗa gə nda vədə Yesu.

Yesu a zɨmshi kwalə Lawuttə ka lagbe dan

¹² A fərə kwamətɨ sɨlangsətɨ Zɨm Burodite taa maɗə də, a fəra mya duwa hama ka Nzə-mbaga də, lagbe da Yesu a ɗiyən, “A ndo haa hye dɨ mwo atɨ hina zə a ɗəwdə haa gəkɨlə zɨm sɨlangsətɨ Lawutta?”

¹³ Nda lyen kpe dɨ vor lagbe dan a sarən atɨ, “Pɨrəmə vor vɨratə hwun ɓa peyə ka ama ka kyeɗəwtɨ haɓye a nəngɨn. Koɗəmən a vor hwoɗye.

¹⁴ Hwun kana pɨrədə, hwuna ɗiyə Həmɨ-hwoɗingɨn atɨ, ‘Nzə-kəndəshe a dɨ ɗi le atɨ: A ndo haa vɨnə omye a gə, hɨn ɓa zɨmshi sɨlangsətɨ Lawuttə ka lagbe de?’

¹⁵ Ndi ɓa bɨləwnə kaɓa vɨne a vɨnə pwatə, mye ɗadə haa nzatə ka haa-zɨmshe. Ɗam sɨzɨmtə a hangɨn.”

¹⁶ Lagbengɨn a muɗə mgban a pɨrə vor vɨratɨngɨn a dɨ pa nagi ndo sə ɓətɨ Yesu a boyərən. Təna ɗa sɨzɨmtɨ kwaləngɨn də.

¹⁷ Ka kaade Yesu a tɨla ka lagbe dan kat bəw a mbiɗi-kpe.

¹⁸ Ite tən nza ɓɨdɨmə tiya zɨmshe, nda sarən atɨ, “Diyalə na dɨ boyownə, ɓwaara hiɗə dɨ vorsəwnə a na nza kan a dɨ zɨmshe ɓa vədi a ɗərdi.”

¹⁹ Təna ɗa yedi-kɨttə ka ləngɨn, nagi ndo ma a vorsərən ta ɗiyən atɨ, “Hɨnə ma?”

²⁰ Nda sarən atɨ, “Hiɗə a vorsəwnə hwun minə bəw a mbiɗi-kpetɨnə nza, mangɨn a ɓa ɗərdi nə na dɨ shipdə tɨfe kan a kpaa zɨmtə.

²¹ Hɨn Nze da Ɓwaara ɓa mbɨrə ɓətɨ mya doro nəngɨn a vor Malɨmtɨ Ɗəmɗəmtə a na. Shezə sə oti ka ma ɓa ɗərdi! Ɓa pɨrən ɓe myaa nda mwasarən a vɨratə.”

²² Təne a vor zɨm shingɨn Yesu a nggur buroditə nda ɗa hiwtə ka usəkətə a takarə, nda ɓyana lagbe dan a sarən atɨ, “Luwom zɨməm, sɨshi nə.”

²³ Nda mɨna nggur kpaa, nda ɗa usəkətə, nda vərən, təna soɓwo kat.

²⁴ Nda sarən atɨ, “Zaamba nə anə gəkɨlə kɨləsətə, a mya pukadən gə le da ɓwaare hananang.

²⁵ Diyalə na dɨ boyownə, taa diyə ga sop haɓi mbwotɨ kada inabitɨnə a vɨratə, zə fəra na sop a hwele kan a vor həmne da Həmɨnpwa.”

²⁶ Tən ta ga dimse, təna dɨmə a muɗə nə Motɨ Kade Zetun.

Yesu a kpalə nə məntəməta Bitrus a nəngɨn

²⁷ Yesu a sarən atɨ, “Hwun kat ɓa pawo a fokə, gə mye doro atɨ, “Həmɨnpwa a saa, ‘Hɨn ɓa ɓɨl majine, mbage kat ɓa gyeɓə a gbərə hyeɗə-hyeɗə.’ ”

²⁸ “Shezə beetɨ ite hɨn maggə taane, hɨn ɓa pɨrgəwnə a tɨlə vor njiya Galili.”

²⁹ Bitrus a san, “Nagi ɓwaare kat ɓa pawo a fokə, hɨn taa dɨ ɗakəw.”

³⁰ Yesu a luwa a san, “Diyalə na dɨ boyu, supo ka tukongnə ɗeke ta wa a laka kpe, hye ɓa məntəmə lee shi a laka mwaakɨn.”

³¹ Bitrus a mgbəngə a sa atɨ, “Nagi ɓə nza mbak-mbak na mbɨrə ɓwaa kəw, taa dɨ ga məntəmə sa.” Mbiɗitɨ lagbe dan kat a boyo sə mgban.

Yesu a hiwo Gesamani

³² Təna muɗə a haa mya dɨ wa atɨ Gesamani, kade zetuntə nə də hananang. Yesu a sa lagbe dan atɨ, “Nzam ganə a na dɨ ɗa hiwtə.”

³³ Nda wa Bitrus ka Yakubu ka Yohana təna koɗən a hangɨn, nda tiya ɗa yedi-kɨttə ka tənətə kɨr-kɨr a vor hubosən.

³⁴ Nda sarən, “Vor huboshi nə naa ka tənətə kɨr-kɨr ɓətɨ na mbɨrə. Nzam ganə ɓe hwunaa shenə.”

³⁵ Nda ɗaka yə Bitrus ka Yakubu ka Yohana a gɨsə humwa ɓyeləng a gyerə njiya, a ɗa hiwtə atɨ a mwotənə ɗɨmtə, tənətɨngɨn a pɨrə ɓe ndaa soɓwo.

³⁶ Nda ɗa hiwtə a waha atɨ, “Baa, nagi ndo sə sɨne pupuluk a hakəw hye ɓa mban a ɗa. A hye mwa nggurigə kpaa tənətɨnə nda pɨrgi. Kat ka angɨn myaa dɨ koɗə kanatɨ de a pɨrgə sa hye kana.”

³⁷ Nda mɨna a haka lagbengɨn dɨ mwaakɨnə a dɨ parən təne dɨ sheni, nda sa Bitrus atɨ, “Siman, hyene dɨ shini? Nagi ɓyeləng mgban tee dɨ kula a ɗa hiwta?

³⁸ Zə kangəm dwat ɗam hiwtə gəkɨlə ɓe hwunaa fokə vor kadawe ka kanaha da Shetan. Pitə mwa, sɨtə nə taa gəti kaarə.”

³⁹ Nda mɨna ɗakarən a mɨnə a dɨ ɗa wule hiwtɨngɨn.

⁴⁰ Ite nda mɨna a hakarən, nda parən baa ɓəgəng təne dɨ sheni gəkɨlə shintə naa pas a diingrən. Tənaa yə lee la tən ɓa boyən.

⁴¹ Ite nda mɨna a hakarən mɨna mwaakɨnətə dɨ ɗa hiwtə, nda sarən atɨ, “Hwunə puki dɨ sheni dɨ piya baa? Ɓə kənə shee! Fəre kənə. Niyəm, mye vədi hɨn Nze da Ɓwaara a tɨfə ji-ɗa səhase.

⁴² Maɗəm mya muɗəm! Niyəm ma ɗərdi vədi tɨla!”

Mya kɨt Yesu

⁴³ Sɨne a vor byele, Yawuda hiɗə dɨ vor lagbe dan bəw a mbiɗi-kpe a dɨma. Nda shi ka ɓwaare furi-furi ka sungwe ka gbɨlasakye dɨ haka kɨsehəmi kpan-kpanye ka ji-lee kəndə ɓashita Musa kat ka mi kpan-kpanye.

⁴⁴ Ndi Yawuda ma ɓa vədə Yesu, liya kɨləsə kaarən atɨ, “Səɓo ma na shawa bwakangɨn sɨnə mangɨn. Kɨsəmrən muɗəm kan.”

⁴⁵ Yawuda a gɨsə tan-tan a zə haka Yesu a san atɨ, “Rabi,” nda shawa bwaka Yesu.

⁴⁶ Mingɨn asɨ takadə Yesu a kɨsə.

⁴⁷ Hiɗə dɨ vor myee kangə hangɨn a dɨr sungwa dan a viriwdən dɨ haka kɨsa da Kɨsahəmə kpane a saggə kwakɨngɨn a dɨmdən vat.

⁴⁸ Yesu a ɗiyərən, “Ɓə ya hwuna ɓə shi ɓa kɨtti ka sungwe ka gbɨlasakye ɓətɨ hɨn makpanə da ji-ɗa sɨkpaki?

⁴⁹ A fərə-fərə, hɨne nza Kwa-Shafe dɨ kəndəshe, hwunaa kɨtti. Ɓəgəng la mya boyə vor Malɨmtɨ Ɗəmɗəmta Həmɨnpwa ɓa naa.”

⁵⁰ Də a hangɨn lagbe dan kat a gyeɓə a ɗakan.

⁵¹ A nzə-lagba nee də a hangɨn ndaa ɗɨkdə asə a sɨsən pɨrgə sɨ basa nda shapwa, sɨne dɨ koɗə beetɨ Yesu. Ite mingɨn a ɓərə ɓa kɨt nzə-lagbangɨn,

⁵² nda ɗakarən asɨ basa nda shapwa a giɓə a muɗə dɨ fuwa.

Yesu a humwaa peta ji-shalale da Yawude

⁵³ Təna muɗə ka Yesu a haka Kɨsahəmə kpane, kɨsehəmi kpan-kpanye ka mi kpan-kpanye darən kat ka ji-lee kəndə ɓashita Musa a paya.

⁵⁴ Bitrus mgban a koɗə beetɨ Yesu a haa ɓongətə ta kəsərən kaake baa nda tɨlə a pɨrə voti ta Kɨsahəmə kpane. Nda dɨ nza waka ji-gɨra Shafe a 'ye shi ka Yesu, ta yin ɗiye.

⁵⁵ Kɨsehəmi kpan-kpanye ka mbiɗitɨ ji-shalale a paya kat, tən ta ɨl tɨfa tən ɓa koɗən gə təna ɗɨmgə Yesu le a ɗan ɓashitɨ we a ɓɨlə, kat ka angɨn tənaa ɗɨmə.

⁵⁶ Imi hananang a dɨma ta takale a kəsən jeronye ɓaa, shezə ləməgye darən aa koɗəsə.

⁵⁷ Dɨ bee imi a dɨma a kangə a kəsən i jeronye. Təna sa atɨ,

⁵⁸ “Hin kɨlan sɨne dɨ boyi atɨ, ‘Hɨn ɓa fala Shafanə ɓwaare a nwo, a mɨna nwogən a vor bətə mwaakɨn, wule angɨn aa ɓwaara dɨ nwi.’ ”

⁵⁹ Kat ka angɨn baa ɓəgəng takale da mingɨn aa koɗəsə.

⁶⁰ Beetɨ ləməgingɨn kat, Kɨsahəmə kpane a maɗə a kangə humwaasərən kat, nda ɗiyə Yesu le atɨ, “Tee dɨ luwa le ma? A shiya hye sa ka ləməgyee myee kang kanga a dɨ boyə nanga?”

⁶¹ Kat ka angɨn Yesu a nza ɗəng ndaa bwe alə. Kɨsahəmə kpanəngɨn a mɨna ɗiyə Yesu le a san, “Hyenə Ma Həmɨnpwa a Yaɓwarən, Nze da Həmɨnpwa ma ka fukatə kat ma?”

⁶² Yesu a san atɨ, “Hɨnə. Hwun ɓa ne hɨn Nze da Ɓwaara nee nza tɨfə zɨməngə Həmɨnpwa ma ka gətə kat, sə mgban hwun ɓa ne dɨ janga dɨ pwa a vor pərɓye.”

⁶³ Kɨsahəmə kpanəngɨn a sara sɨɓwetɨ dan gə yedi-kɨttə a sa atɨ, “Hwun kat hwun kɨlə ka kwakingəwnə. Ɓə lə mɨnə mbiɗi ɓwaare ɓa takale a nəngɨn ɓə?

⁶⁴ Hwun kɨla kɨɗate nda kɨɗa kwakɨ Həmɨnpwa a shartən. A shiya hwuna sa?” Tən kat təna sa atɨ ɓə wula mya ɓɨltən.

⁶⁵ Imi a tiya ta təfən nawye, təna tak diingɨn ka sɨbaashe, təna mow tefingrən ta dolo nəngɨn, a san atɨ, “Zə kpali! Boyenə ma dolta.” Nggɨree kanyi dɨ gɨra mgban a kɨt lyebsən.

Bitrus a məntəmə lee Yesu

⁶⁶ Ite Bitrus nee a voti, itɨ nji-kɨsati dɨ vor kɨsee mandye da Kɨsahəmə kpane a shi ɓa pɨrə.

⁶⁷ Ngga naa Bitrus nee kanyi dɨ yin ɗiye, ngga nidən kpəkəkə a san atɨ, “Hye, hwune ɓwaa ka Yesu, nzə-Nazaratɨrə.”

⁶⁸ Bitrus a məntəmətə a sa atɨ, “Taa lee la hye dɨ boyo,” nda dɨmgə vor voti a kangə kwatɨfe. A hangɨn ɗeke a wa.

⁶⁹ Ite nji-kɨsatɨngɨn a mɨna nan kangə kwatɨfe, ngga mɨna sa myee kangə hangɨn atɨ, “Manə sɨne hiɗə dɨ vorsərən.”

⁷⁰ Bitrus a mɨna məntəmətə. Aa ɓongə myee kangə hangɨn a sa Bitrus atɨ, “Diyalə sə gən, hyenə hiɗə dɨ vorsərən, gəkɨlə hye nzə-Galiliti.”

⁷¹ A hangɨn Bitrus a kwo le a mɨna məntəmətə a tiya gbətə atɨ, “Taa lee mangɨn a hwuna dɨ bwe le a nəngɨn.”

⁷² Də a hangɨn ɗeke a mɨna wa, wa kpeyətə. Bitrus a ɗyanga ka la Yesu a boyən atɨ, “Ɗeke ta wa a laka kpe, hye ɓa məntəmə lee shi a laka mwaakɨn.” Bitrus a fɨlə ka kawatə.