Lyenta 28 - Ɓwaatiye New Testament

Bulus a Malta

¹ Ite hina nggəɗə a nggɨrə kwakatə kat a mbəə, hina ɓə shea leyə atɨ kwakɨ luutɨngɨn nə Malta.

² Myee hina parən nza nə luutɨngɨn a bɨlenə mwoha kɨr-kɨr. Təna lurenə a kɨsadə ɗiye gə le denə, gəkɨlə itɨngɨn ɓoole nee dɨ njima, tale nee dɨ gi.

³ Ite Bulus a gbawa kwashe a pukə ɗiye, mosowo ɗiye a pa a nzə-mgbəndi, nda nggɨragə kwashingɨn a lawa a tɨfə Bulus a arən.

⁴ Ite mi luutɨngɨn a naa rukuntə lawa a tɨfə Bulus kpaka də, təna boyəsə atɨ, “Ka diyale ma nzə-ɓəl wogi, gəkɨlə nagi ka ite atɨ nda mbəgə wo-haɓye, kat ka angɨn pɨlate ka ɓashitɨ diyale aa ɗakan nda mbə ka myentə.” Gəkɨlə tən lee rukuntɨngɨn ka kyanatɨ hattə.

⁵ Shezə Bulus a pwalgə rukunte a tɨfəngɨn a vor ɗiye, asə aa gən.

⁶ Myee kangə hangɨn nee dɨ kana atɨ tɨfə Bulus nə ɓa kɨlə nda fukə a mbɨrə. Tən ɓe kangə ɓongə asə aa gən, təna nggəddə byele atɨ, Bulus pɨla, aa ɓwaara.

⁷ Kaɓa i hwoɗi nə gbyel ka haa hina kangədə, hwoda həmə luutɨ Malta nə, mya wa mangɨn atɨ Pubiliyus. Nda lurenə pepe a hwodan, bətə mwaakɨn sɨne dɨ bɨlenə ɓwaarawne.

⁸ Itɨngɨn baagən ndi Pubiliyus nee bi ka ootɨ haɓi kpalamye kat ka ɓokə mgba. Bulus a pɨrə a pan a haa bətə, nda ɗan hiwtə a bən tɨfəngɨn, ootɨngɨn a dɨmgən nda piyagərə.

⁹ Ɓwaare ɓe naa gwate Bulus a gwadə baagə Pubiliyus, ji-oote a luutɨngɨn kat a paya mya gwadərən a dɨmərən də ootə.

¹⁰ Mi luutɨngɨn a bɨlenə ɓwaarawne a fukadenə. Ite hina jengə koombotə ɓa pɨrə a muɗə, təna gwadenə a həmə kenə ka shee hananang.

Bulus a tɨlə Roma

¹¹ Beetɨ lyekətye mwaakɨn, hina ɓə shea maggə hangɨn a pɨrə itɨ koomboti ite dɨma dɨ vɨra Alezandiriya. Koombotɨngɨn a kangə hangɨn a jengə hangɨratə a vor luutɨ Malta, a sɨtɨ koombotɨngɨn nə mya ɗa ɗuwo zaryi pɨlee mya wa atɨ Kasto ka Pollu.

¹² Hina koɗə nə gbɨnuwtɨ sɨkorən a tɨlə a kwa gərə a vɨraa Sirakus a ɗa bətə mwaakɨn a hangɨn.

¹³ Dɨ hangɨn hina gapə gyenge a taka a zə vɨra Rigiyum a kpasə də. Ite hina bə hangɨn haa kɨɗa, hawe a tiya tawatə dɨ basa ɓayang, kpeyə bətə hina tɨla a vɨra Putiyoli a kpasə də.

¹⁴ A hangɨn hina pa i ji-kotti, təna nyisenə atɨ hina nza hakarən a ɗa bətə tukolukpe. Dɨ hangɨn hina pɨrə a tɨlə gbyel ka vɨra Roma.

¹⁵ Ite ji-kotte a vor Roma a kɨlə atɨ hin tɨla a vor vɨratɨngɨn, təna muɗə baa vor nzɨ-vɨrate mya wa atɨ Lumo Apiyus, imi mgban baa nzɨ-vɨrate ka Vəni Jangatə Mwaakɨn gə təna kultenə. Ite Bulus a naa mingɨn kat, sɨsən a mɨnakan nda ɗa Həmɨnpwa usəkətə.

¹⁶ Ite hina tɨla a Roma mya ɗaka Bulus nda nza nənəngɨn ka nzə-pakawate ɓawa nidən.

Bulus a hiwa a Roma

¹⁷ Beetɨ bətə mwaakɨn, Bulus a waga mi kpan-kpanye da Yawudee a vor Roma. Ite təna paya kat, nda sarən atɨ, “Ji-nuwo, nagi a nə sate atɨ taa ɗa a səhasə, taa kɨɗa kwalə kotta yə sɨnggəm, kat ka angɨn mya kɨtti a ɓweri a vor Urshelima, a vədi a tɨfə mi Roma.

¹⁸ Ite yə nggwamnyi Roma a ɓashiyi, tənaa pee ka i ɗwangashi 'ye kəni mya ɓɨlti, təna mwo atɨ tən ɓa pare a dɨmdi gə gbərəwe na muɗə.

¹⁹ Shezə mi kpani Yawude dam 'ye a vor Urshelima a kwo le, angɨn a nzee mbak-mbak na pɨrdə ɓashitɨ de a haka Kaisar, aa atɨ gəkɨlə na dɨ mwo atɨ na kaadə myee dam.

²⁰ Gə ləngɨn na ɨl byele kəwnə supo, na boyownə sa ɗɨki na ɓə gəə nzə-gbərəwo, ka mɨni sate atɨ gəkɨlə na mwaka Nzə-mbəha a hɨm Yawude a dɨ kulam shisən.”

²¹ Təna luwa a san atɨ, “Hinaa ɗɨm i malɨmi dɨ haka ji-nuwogəm 'ye a Yawudiya 'ye bwe alə hasə a nanga. Tən myee shi dɨ Yawudiya mgban taa ndəng ma boyenə alə hashi-hashi a nanga.

²² Hinə dɨ mwi atɨ hina kɨlə dɨ kwaamɨnga, mɨnə hɨnggu a nə le da ji-pene, gəkɨlə hin kɨl ləməgi hashe hananang a nəngrən.”

²³ Təna bəng fəra tən ɓa mɨnakan a kɨl ləməgyee Bulus ɓa boyərən. A fərəngɨn, ɓwaare hananang a paya 'ye furi pɨrgə myee shi kwamətə a hwoɗyee Bulus a gə də. Ndi Bulus mgban nda tiya byele kaarən ka hawure baa a tɨlə kaade sɨne dɨ byeli. Ndi ta bɨlərən shee a nə həmne da Həmɨnpwa ta hiwarən dɨ vor ləməgi ɓashita Musa ka 'ye kpalye a boyə nə Yesu gə nda nggala hubosərən a shi haka Yesu.

²⁴ Imi a mwaka ləməgyee Bulus a boyo. Imi mgban hubosərən aa banga.

²⁵ Təna maɗə ta məntəmətə a wakasərən. Təna təkəsə a muɗə, a ite Bulus ɓe sa atɨ, “Diyalə Pitɨ Ɗəmɗəmtə a boyə nə yə sɨnggəwnə dɨ kwaamɨ kpale Ishaya atɨ,

²⁶ “ ‘Wudə haka minə hye sarən atɨ, “Nagi gə kɨltə, hwun ɓawa kɨlə, hwunaa dɨ lee kpəshi ləngɨn. Sə mgban, nagi hwuna sara diingəwnə, hwunaa dɨ naa asə.”

²⁷ Gə kwa-hubo mingɨn takə, tənaa yə mba alə a kɨlə ka kwakingrən, təna ɗyanga a vwata diingrən. Anda aa sə, tən ɓa nda naa haa ka diingrən, tən ɓa nda kɨl le ka kwakingrən, hubosərən a banga mgban, təna virwa a por-njiya, na gwadərən.’

²⁸ “Gə-angɨn hwuna leyə atɨ, Həmɨnpwa vədə mbəha dan a haka myee aa Yawude, tən ɓa luu ləngɨn.”

³⁰ Bulus a nza hangɨn kyawatə kpe a vor hwoɗyee nda kɨsə a dɨ mbwagərən. Myee dɨ paya kat gə təna nan, nda dɨ luutɨrən pepe.

³¹ Nda pɨrə humwa ta hiwa ka həmne da Həmɨnpwa a nə Həmɨmiye Yesu Ma Həmɨnpwa a Yaɓwarən ka gbənzɨmtə, taa ndəng ma kərən byele.