Luka 9 - Ɓwaatiye New Testament

Yesu a lyen lagbe dan

¹ Yesu a waga lagbe dan bəw a mbiɗi-kpe 'ye nda nggɨlə, nda vərən gətə ka nyerətə a nə pɨle ji-dwatə, təna mɨna piyadə ɓwaare gə ootə som-som.

² Nda lyentɨrən atɨ maa təna dɨmə a hiwa ɓwaare ləmə həmne da Həmɨnpwa, təna dɨmdə ootə gə sɨtɨ ɓwaare.

³ Nda sarən atɨ, “Ɓe hwunaa nggur asə gə omotə a nə tɨfe, nagi gaarati, nagi zambɨramə, nagi sɨzɨmti, nagi taa, nagi sɨɓwete hwun ɓa nggəddərən nə.

⁴ Nagi a ndo hwoɗi hwuna pɨrə, nzam də baa a dɨmə fəra hwun ɓa ɗaka vɨratɨngɨn də.

⁵ Vɨrate kat ɓwaare aa lurəwnə də, dɨməmgə vɨratɨngɨn, hwun kana ɓa dɨmə, hwuna kpəwgə bɨr-bɨrə mbwayingəwnə, angɨn ɓa bɨlə mingɨn atɨ ɓashita Həmɨnpwa ɓa shi nəngrən.”

⁶ Təna dɨmə a muɗə vɨre som-som ta bwe ləmə feme da Həmɨnpwa, tən ta dɨmdə ootə dɨ sɨtɨ ɓwaare a hee kat təna pɨrədə.

Le a ɓwa həmɨn Hiridus

⁷ Ite Hiridus hama Galili a kɨl ləmə sɨndəla Yesu ka lagbe dan a dɨ ɗa, nda ndələ kɨr-kɨr gələ imi nee dɨ sa atɨ Yohana nzə-ɗa batisɨmatə nə maggə taane.

⁸ Imi mgban atɨ kpala mya wa atɨ Iliya nə mɨna, naasə mgban hiɗə dɨ vor kpalyee kaaɗəng nə mɨna a vɨratə ka myentə.

⁹ Le a ɓwa Hiridus nda sa, “Aɓə mgban hɨn bənggə nə Yohana, ɓə pɨri wonə ma dɨ ɗa wule səkushipa na dɨ kɨla?” Gə-angɨn Hiridus a ɨlə gə nda naa Yesu.

Yesu a zɨmdə morye haru bəw laka tuf

¹⁰ Ite kpe-lagbe da Yesu a mɨna dɨ hiwatə, təna paya a hakan a boyən shee təna ɗa kat, nda portɨrən a ɓotə a muɗə kaarən a vɨrate mya wa atɨ Betesda gə təna ɗɨmə a piya a hangɨn.

¹¹ Kat ka angɨn, ɓwaare a ɨl hee a dɨmkarən a haa təna muɗə də. Nda luutɨrən a boyərən ləməgye a nə həmne da Həmɨnpwa, nda gwadə myee dɨ mwo gwadəha a dɨmərən də ootə som-som.

¹² Ka fərə kaade lagbe dan a shi hakan a san, “Ndɨka hye boyə ɓwaare təna pɨrə vɨre kur-kuryee ka hee kat ɓwaare a gə də gə təna ɨl sɨzɨmtə ka haa bətə, gə hanə hɨm a gəmdə pɨɗə, taa asə də.”

¹³ Yesu a sa lagbe dan, “Zə vəmərən sɨzɨmtə.” Təna luwa a san, “Ganə hinə ka goɓoryi buroditə tuf ka vaakye kpe ɓəmbə, anda myaa ɗara i sɨzɨmti, inə aa dɨ kənə wule furo minə.”

¹⁴ Moryee peyə hangɨn kat ɓa ɗa haru bəw laka tuf. Nda sa lagbe dan, “Boyəmə ɓwaare maa təna nza njiya gbəwtə tuf-tuf.”

¹⁵ Lagbe dan a ɗaasə, ɓwaare kat a nza njiya.

¹⁶ Yesu a luu goɓoryi buroditɨngɨn tuf ka vaakingɨn kpe, nda maddə nəngɨn a pwa, nda ɗa hiwtə ka usəkətə a nə sɨzɨmtɨngɨn. Nda taka buroditɨngɨn ka vaakye a və lagbe dan gə təna ɓyana ɓwaare.

¹⁷ Ɓwaare kat a zɨmshe a hyaɓa, lagbe dan a pedə mosərye konye bəw a mbiɗi-kpe.

La Bitrus a boyə nə Yesu

¹⁸ A fərə Yesu a kangə haa ɓotə ta ɗa hiwtə ka lagbe dan a gyenge. Nda ɗiyərən, “Ɓwaare a dɨ sa atɨ hɨnə wonə ɓə?”

¹⁹ Təna luwa a san, “Imi a dɨ sa atɨ hyenə Yohana nzə-ɗa batisɨmatə, imi atɨ hyenə kpale Iliya, imi mgban a dɨ sa atɨ ndəng hiɗə dɨ vor kpalyee kaaɗəng nə mɨna ka myentə.”

²⁰ Yesu a mɨna ɗiyərən, “Ɓə hwun mgban, hwuna sa hɨnə wonə?” Bitrus ɓa luwa nda san, “Hyenə Ma Həmɨnpwa a Yaɓwarən a Həmɨnpwa a lyana.”

²¹ Yesu a fyel-kwakingrən a gɨratɨrən kɨr-kɨr atɨ ɓe tənaa boyə a ma ləngɨn.

²² Nda sarən, “Hɨn Nze da Ɓwaara ɓə nza mbak-mbak na pɨrə tənətə hananang. Myee ka həmnə njiya Yawude, ka kɨsehəmi kpan-kpanye dam, ka ji-lee kəndə ɓashita Musa kat, tən ɓa kwori a ɓɨlti. A mwaakɨnə bətə hɨn ɓa maggə taane ka myentə.”

²³ Nda sarən kat atɨ, “Ma dɨ mwa atɨ nda koɗi a gəə lagba de, mbak-mbak nda məntəmə nəngɨn a nggur kada ɓɨdɨmtɨ dan, nagi ndo fərə a kwaɗe.

²⁴ Gə ma kat dɨ mwi atɨ nda mbədə myensən ɓa ɗongərə, ma mgban ɗongə myensən gə le de ɓa mbədə.

²⁵ Ndawulasə ɓwaara ɓa dɨmə ka sate atɨ nda pedə shi vɨratə kat a shea ɗongə myensən, nda kɨɗa nəngɨn ɓaa?

²⁶ Ma ɗa sopi ka ləməgye de, hɨn Nze da Ɓwaara mgban na ɗa sopi mangɨn a fəra na mɨnakan a vɨratə ka fukatɨ de, ka fukata Baagi ka hɨnggə malyeni ɗəmɗəmye dan.

²⁷ Diyalə, ka tikɨs na dɨ boyownə, imi a vorsəwnə 'ye kanyi ganə ɓəgəng, aa dɨ kɨla we baa fəra tən ɓa naa shita həmne da Həmɨnpwa.”

Nggətta sɨtɨ Yesu

²⁸ Bətə fwa-fwat a beetɨ ləməgingɨn, Yesu a nggɨl Bitrus ka Yohana ka Yakubu a nggɨrə kaarən a nə mwe gə təna hiwo.

²⁹ Ite sɨne a vor hiwtə, humwasən a nggəɗə, sɨɓwetɨ dan a nggəɗə a huɗa pwat-pwat ta ɓɨra.

³⁰ Də a hangɨn ɓwaare kpe, tən yə kpale Musa ka Iliya,

³¹ a ɗɨma a hakan ta byeli kan. Naasərən tənə ka fukatə, dɨ nggaara kɨr-kɨr. Təna pɨrə humwa ka byele ka Yesu a nə we dan a Urshelima gə nda naadə kanata Həmɨnpwa.

³² Bitrus ka mbiɗitɨ lagbe kpe pɨrə shentə. Ite təna maggə shintə, təna naa Yesu a vor ɓɨrtə ka fukatɨ dan, ka mi kpeyee dɨ byeli kan.

³³ Ite Bitrus a naa Musa ka Iliya nee dɨ ɗaka Yesu ɓa muɗə, nda sa, “Həmɨ-hwoɗye, shisenə ganə nə pepe. Ndɨka hina ɗa bolkye mwaakɨn, hiɗə hɨnggu, hiɗə hɨnggə kpale Musa, hiɗə mgban hɨnggə kpale Iliya.” Ndaa lee la nda dɨ boyo.

³⁴ Ite Bitrus nee a vor byele tee, pɨrɓatə a janga a gbərən, kala a gə lagbe dan.

³⁵ Təna kɨla korme dɨ vor pɨrɓatɨngɨn dɨ sa atɨ, “Nze de nə anə ma na nggɨlə, samdə kwakingəwnə kɨləmrən.”

³⁶ Beetɨ korme, tənaa yə na ama, Yesu nə ɓəmbə kanyi dɨsərən. Təna kɨt ləngɨn a hubosərən tənaa boyə ama sa təna nan.

Yesu a dɨmdə pɨla nzə-dwatə dɨ sɨtɨ a nzə

³⁷ Haa ɓe kɨɗa, Yesu ka lagbe dan a jenggə nə mwe, ɓwaare hananang asɨ pan.

³⁸ Də a hangɨn a murə a vor ɓwaare a maddə kormɨngɨn a tuwo Yesu atɨ, “Nzə-kəndəshe, na dɨ nyisu hye gwadə nze de, sɨnə ke hiɗə kal-kal!

³⁹ Pɨla nzə-dwatə a pɨrə sɨsən, nda dɨ nzaa gəəshe, nda dɨ mbərhe, pwapule ta dɨma dɨ kwaamɨngɨn, pɨlangɨn a dɨ byengdən haa, ta vən sɨtɨ otə, ɓə mbakan nee.

⁴⁰ Na nyisə lagbe dəw gə təna dɨmdə pɨla nzə-dwatɨngɨn, tənaa mban.”

⁴¹ Yesu a luwa a sarən atɨ, “Hii! Hwun ji-ɗongə mwadiyale, a ji mgbɨləha wanetɨnə! Baa goɗi na ɓə nza kəwna? Baa goɗi hɨn ɓa ɓwamosowa kəwna? Wemi ka nzəngɨn ganə.”

⁴² Ite mya kɨsa nzəngɨn a shikan, pɨla nzə-dwate a sɨsən a ɗongdən a njiya, ndi ta mbərhe ta mgbəngtənyi ta rwati. Yesu a gɨra pɨla nzə-dwatɨngɨn a dɨmdən, nze a piyagə ootə, nda mɨndə nze a və baagən.

⁴³ Tən kat təna ɗa ndəle ka wule gəte Həmɨnpwa a bɨldə. Təne a vor ndəle tee kat, Yesu a sa lagbe dan atɨ,

⁴⁴ “Samdə kwakingəwnə kɨləm, hwuna bəə myensəwnə ka la na boyownə. Hɨn Nze da Ɓwaara nə ama ɓa ɗərdi a tɨfə ɓwaare.”

⁴⁵ Shezə lagbe dan aa lee naarə la nda dɨ boyərən, ləngɨn a gərən ka kulitə, kala ɗi le a gərən.

Məntəmətə a nə kpanətə

⁴⁶ Lagbe dan a tiya məntəmətə a wakasərən a nə kpanətə, atɨ wonə pɨri kat ka kpanətə a vorsərən.

⁴⁷ Gəkɨlə Yesu lee la a yedingrən, nda nggura nzə-byelənge a kangdən a gyengəngɨn.

⁴⁸ Nda sarən, “Ma kat luu nzə-ɓyelənge gə le de, hɨnə nda luwo, ma kat luri mgban, Baagi a lyanari nə nda luwo. Gə a vorsəwnə ma mya ngguro atɨ sɨnə hyeti pɨri kat, sɨnə ma shee pɨri ka kpanətə.”

⁴⁹ Yohana a san, “Həmɨ-hwoɗye, hin naa ama dɨ dɨmdə pɨle ji-dwatə a vor kwakɨnga, hina ɓərə gə hina kərən gələ ɓə tam ɓwaa kam.”

⁵⁰ Yesu a san, “Ɓe hwunaa kərən, ma aa kwo nəngəwnə sɨne ɓwaa kəwnə.”

Mi Samariya a kwo luu Yesu

⁵¹ Ite bətə dan ɓa dɨ naa, ndi ɓa mɨnə pwa, nda wuldə nəngɨn kpəkəkə dɨ Urshelima ta muɗi sə.

⁵² Nda lyen imi atɨ a təna nda pɨrgən a humwa a itɨ vɨrati a njiya Samariya gə təna ɗandə haa sɨne dɨ zə.

⁵³ Mi vɨratɨngɨn a kwo luu myee Yesu a lyentɨrən, gə Yesu wuldə nəngɨn dɨ Urshelima ɓa muɗə də.

⁵⁴ Imi dɨ vor lagbe dan, ɓətɨ yə Yakubu ka Yohana ɓe niyəte təna sa Yesu, “Həmɨmiye, hye ɓa mwa hina wa ɗiye dɨ pwa nda hyanarən?”

⁵⁵ Yesu a virwo a gɨratɨrən.

⁵⁶ Də təna pɨrə a muɗə itɨ vɨrati.

Myee ɓa koɗə Yesu

⁵⁷ Təne a nə tɨfe dɨ muɗi, a ma a sa Yesu atɨ, “Hɨn ɓa koɗu, nagi a ndo haa hye ɓa wudə.”

⁵⁸ Yesu a san, “Botəlye nə ka goye darən, ɓakarye mgban tənə ka vəningrən, ɓə hɨn Nze da Ɓwaara taa haa nzati ke.”

⁵⁹ Yesu a sa ama, “Kwaɗe.” Mangɨn a luwa a san, “Həmɨmiye, zə ɗake a na kula baagi a mbɨrə na ɗɨk wongɨn a mbəə.”

⁶⁰ Yesu a san, “Ɗaka wogye a təna ɗək wogye darən. Hye, muɗə hiwatə ka həmne da Həmɨnpwa.”

⁶¹ Ama a mɨna sa Yesu atɨ, “Həmɨmiye hɨn ɓa koɗu, zə kula na mɨna dɨ gə mi hwode kwasatə.”

⁶² Yesu a luwa a san, “Ma kat nggur tɨfəngɨn bə ngyeɗə naakə hawtə nda mɨna ɓiya a dɨ nidə beesən, ndaa kənə nda lyenə həmne da Həmɨnpwa.”