Luka 8 - Ɓwaatiye New Testament

Mandyee dɨ koɗə Yesu

¹ Beetɨ anə, Yesu a woyo vɨre som-som ta hiwa ka ləmə feme a nə həmne da Həmɨnpwa. Lagbe dan bəw a mbiɗi-kpe nee ɓwaa kan,

² ka i mandi 'ye mya dɨmdə pɨle ji-dwatə dɨ sɨsərən, ka ootə som-som. Mate hiɗə dɨ vor mandingɨn nə Maryamu dɨ vɨraa Magdala ite mya dɨmdə pɨle ji-dwatə tukolukpe dɨ sɨsə.

³ I mandinə yə Juwana metɨ Kuza kpana da həmɨn Hiridus, ka Susana, ka mbiɗisərən furi-furi 'ye koɗə Yesu dɨ gwadən lyentə dɨ vor lyepye darən.

Byelə səɗe a nə nzə-ka daase

⁴ Ite kaɓa təkə-təkətɨ ɓwaare a paya dɨ hee som-som a shi haka Yesu, nda ɗarən byelə səɗe atɨ,

⁵ “A nzə-hawti a dɨmə a muɗə ɓa dɨ ka daase. Sɨne a vor ka daase, a daasə a kəji nə tɨfe, ɓwaare a woyo nəngɨn, ɓakarye a ɗəmgən kat.

⁶ A daasə a kəji nə fare, ite nda za, ta haa yimə a kworyingɨn, gə-angɨn nda lɨɓɨkə a kpamə.

⁷ A daasə a kəji waka hwole, ite daasəngɨn a za a kangə, hwoləngɨn a jiyə a zobrən kat.

⁸ Mɨni a daasə a fokə nə njiya feme, nda maɗə a gbyala, a ɗa nyemye ka daase haru hiɗə.” Ndi ɓe bwe le mbəə, nda maddə kormɨngɨn a sa, “Ma kat ka kwaki kɨl le, maa nda saa kwakingɨn a kɨlə.”

⁹ Lagbe dan a ɗiyən lə naarə zərgi ləngɨn.

¹⁰ Nda sarən, “Hwun, mye bɨləwnə bwang lə həmne da Həmɨnpwa a mya kyapan, imi na dɨ boyərən ləməgye ka byelə səɗe gəkɨlə, “ ‘Nagi təna sara diingrən a dɨ niyə, tənaa dɨ naa asə, nagiya təna kɨlə, tənaa dɨ takaləngɨn.’

¹¹ “Naarə lə səɗəngɨn nə yang: Daase nə ɓətɨ le da Həmɨnpwa.

¹² Daasa kəji pukə nə tɨfe, tənə myee dɨ kɨl le da Həmɨnpwa. Shetan mgban a dɨ shi nda porgə le da Həmɨnpwa gə hubosərən, gə ɓe tənaa mwaka ləngɨn a ɗɨm mbətə.

¹³ Daasa kəji nə fare, tənə myee dɨ kɨl le da Həmɨnpwa dɨ luwi ka hanɨngtə, shezə taa koryi kaarən. Mwadiyale darən aawa kanga. Səngɨn nə ɗa kadawe kana shikarən, təna fokə a mɨnə ka beesərən.

¹⁴ Daasa a wakaa hwole, tənə myee dɨ kɨl le da Həmɨnpwa, təna luwo. Aawa ɓongə wule mingɨn a dɨ pɨrə ɗyengle, ka vwakaha gə ɗɨm gɨnətɨ vɨratə, ka omshe som-som. Shingɨn kat a dɨ zob le da Həmɨnpwa a vor hubosərən, ləngɨn a yerə ɓaa.

¹⁵ Daasa a nə njiya pepeye nə myee dɨ kɨl le da Həmɨnpwa, təna kɨsə pepe ka diyale a hubosərən. Wule mingɨn nə dɨ pɨrə humwa, mbwosərən a naa.

Kəndəshe da Yesu a nə ɓɨrtə

¹⁶ “Ma aa dɨ kɨsadə tikɨle a mɨna kupən ka kpaa, sə mgban ma aa dɨ kɨsadə tikɨle a kangdən a pukə dingɨltə. Mya kangdə tikɨle a haa mgbənge, gə myee dɨ pɨra a vor hwoɗye a naa ɓɨrtə.

¹⁷ Taa asə də mya ɓodən, a sa myaa dɨ dɨmaadən a haa bwange, taa asə də mya kupən, a sa myaa dɨ ndɨlgən mya nan a haa bwange.

¹⁸ Gə-angɨn, səɗəm ka yedingəwnə ka wule ləməgyee hwuna dɨ kɨlə. Ma ka se kat, sɨnə mya mɨna ɗɨkən də. Ma kat taa asə kan mgban, nagi nzɨ a ɓyelənga nda gə kan nə, mya kpawan a lugən.”

Nuwogə Yesu ka mwaafengɨn

¹⁹ Nuwogə Yesu ka mwafengɨn a shi gə təna nan, tənaa mba tɨltə a hakan gə furo ɓwaare.

²⁰ Ama a boyən, “Yə nuwogu ka mwafenga nee kangə haa bwange dɨ mwo naasa.”

²¹ Nda luwa a sa, “Nuwogi ka mwafe nə myee dɨ kɨl le da Həmɨnpwa təna ɗa lyentə kan a koddən.”

Yesu a gɨra hawo ɓoole

²² A fərə, Yesu a sa lagbe dan atɨ, “Mya nggɨrəm dɨ ɓayatɨ gəre.” Təna pɨrə koombotə gə təna nggɨrə.

²³ Təne a vor lyembəre dɨ nggɨri, shintə a nggur Yesu. Hawe a nzaa tiya tawatə kɨr-kɨr ɓətɨ hawo ɓoolə, koombotə a tiya kɨnatə ɓa ɗimə.

²⁴ Lagbe dan a viɗiyan a san, “Həmɨ-hwoɗye, Həmɨ-hwoɗye! Hɨm nə dɨ ɗyeməm.” Yesu a maɗə a gɨra hawe ka ɗogoli hawa a nə haɓye. Hawe a sara, haa talə shetətət.

²⁵ Yesu a ɗiyərən, “A ndo haa gə mwadiyale dəwnə?” Kala a gə lagbe dan, təna ɗa ndəle, ta ɗiyəsə atɨ, “Ndawula ɓwaara anə? Nda dɨ gɨra hawe ka ɗogoli hawa a nə haɓye təna koddə kormingɨn.”

Yesu a dɨmdə pɨle ji-dwatə dɨ sɨtɨ ama a Garasa

²⁶ Təna lyembərə a nggɨrə njiya Garasa, a ite a ɓayatɨ kwa gərə Galili.

²⁷ Ite Yesu a lawuggə koombotə a nggɨrə haa kpamtə, də a hangɨn a ma dɨ vor vɨratɨngɨn ka pɨle ji-dwatə a sɨsən a dɨma təna peyə ka Yesu. Mangɨn nə dɨfuwa ndi ɓongə ndaa kala sɨɓwetə. Ndaawa nza hwoɗye, a vor kaake nda dɨ nza a gonggoryi faree mya dɨ ɗək wogye də.

²⁸ Mangɨn ɓe naa Yesu, nda wa kawahəme a fukə njiya a mbwayi Yesu, a maddə kormɨngɨn ta sa, “Yesu, Nze da Həmɨnpwa Həmɨ gətə kat, mɨnə pedi kəw? Hɨnə dɨ nyisu, ɓe tənəə di.”

²⁹ Ma ka pɨle ji-dwatɨngɨn a boyə Yesu ləngɨn, gəkɨlə Yesu a gɨra pɨle ji-dwatɨngɨn atɨ təna dɨmgə sɨtɨ mangɨn. Gə ɓə ɓongə, anəsə, mba-dɨ-mba, pɨle ji-dwatɨngɨn kana maɗə nəngɨn, nagi mya pukən gbərəwe a mbwayingɨn ka tyefingɨn a gbaltən, nda dɨ ɓeegə gbərəwongɨn. Pɨle ji-dwatɨngɨn a duwa kakan dɨ kaake.

³⁰ Yesu a ɗiyən, “Kwakɨnga a shiya?” Nda luwa a sa, “Kwaka nə Hananang,” gəkɨlə pɨle ji-dwate a sɨsən nə furi-furi.

³¹ Pɨle ji-dwatɨngɨn a nyisən anəsə-anəsə atɨ, ɓe ndaa dɨmdərən a omtɨrən a zə kaarən a gwa taa mbati kan.

³² Kaɓa doomo gusune nee a mbwara mote a hangɨn dɨ zəmi. Pɨle ji-dwatɨngɨn a nyisən atɨ nda mwarən təna pɨrə sɨtɨ gusunəngɨn. Yesu a mwarən.

³³ Ite pɨle ji-dwatɨngɨn a dɨmgə sɨtɨ mangɨn, təna wudə a pɨrə sɨtɨ gusune. Dooməngɨn a rɨfə ka taɗa a sargə zangtə a pɨrə haɓye a soɓwo a mbərə kat.

³⁴ Naya ji-nidə gusunəngɨn ɓe naa ləngɨn, təna pɨrə vor vɨratə ka mbiɗitɨ hee kat a boyə ɓwaare sa təna nan.

³⁵ Ɓwaare a dɨma kat asɨ naa shee ɗa, ite təna tɨla a haka Yesu, təna pa mangɨn pɨle ji-dwatə dɨmgə sɨsən, sɨne nza mbwayi Yesu. Təna pan ɓə kala sɨɓwetə ɓə mɨna a sɨsən, kala a gərən.

³⁶ Myee naa sa ɗa a boyə ɓwaare lə dɨmte mya dɨmdə pɨle ji-dwatə dɨ sɨtɨ mangɨn.

³⁷ Myee nza base Garasa a boyə Yesu atɨ a nda ɗaka haa darən a muɗə, gə kala a gərən ka sa təna nan. Gə ləngɨn nda pɨrə koombotə a muɗə.

³⁸ Ite Yesu aa nda nggɨrə koombotə, ndi ma mya dɨmdə pɨle ji-dwatə dɨ sɨsən a nyisə atɨ ndi ɓa koɗən. Yesu a kwo a san,

³⁹ “Wudə, mɨnə hwoɗye, hye boyə ɓwaare sə kpanaa Həmɨnpwa a ɗəw.” Nda muɗə mgban a fɨla ləngɨn ta hiwa a vɨrasən ka lə sə kpanaa Yesu a ɗan.

Yesu a maddə njita Yayirus gə we

⁴⁰ Ite Yesu a mɨna nggɨrə ɓayate nda dɨma sə, myee a hangɨn kat a wayadən pepe gə təne dɨ kularən.

⁴¹ Də a hangɨn, ma mya dɨ wa atɨ Yayirus, sɨnə makpanə a vɨnə kəndəshe da Yawude. Nda shi asɨ fukə mbwayi Yesu ta nyisən gə nda zə hwodan,

⁴² gəkɨlə njisən hiɗə kal-kal, ka kyawatə bəw a mbiɗi-kpe ndə bi ka ootə kɨr-kɨr, a kwa-we. Naya Yesu mwa maɗə dɨ koɗən, ɓwaare a furo a takadən ɓətɨ tən ɓa mwagən.

Yesu a gwadə mete zaambe a dɨ dɨmgərə

⁴³ A vor mi furingɨn, itɨ meti nee də ka ootɨ dɨmtɨ zaambe kyawatə bəw a mbiɗi-kpe, nggi kɨɗa gɨnətə kɨr-kɨr a nə nggomye, kat ka angɨn ootɨngɨn aa mbəə.

⁴⁴ Ngga kwaɗa beesən a shi a pa jiimə ɓarawtɨ dan, də a hangɨn gbyel dɨmtɨ zaambe a kangə.

⁴⁵ Yesu a ɗi le atɨ, “Wonə ma pee ya?” Tən kat təna sa, aa tənə. Bitrus a san, “Həmɨ-hwoɗye, hye leyə atɨ ɓwaare nə takada peyi, imi nə dɨ nggyeksə gə təna pa sɨsa.”

⁴⁶ Kat ka angɨn Yesu a sa, “Ama pee, gəkɨlə gətə dɨmə dɨ sɨshi.”

⁴⁷ Ite metɨngɨn ɓe leyə atɨ nggaa diyə mba ɓotə ɓodə nəngrə, ngga shi ka waratɨ sɨtə a gyerə humwa Yesu. Ngga boyə diitɨ ɓwaare kat sa ɗa ngga pan, ka kangte zaamba dɨ kəji dɨ sɨsə a kangə tan-tan, ngga dɨm piyatə gbyel.

⁴⁸ Də nda sarə, “Njishi, mwadiyale dəw mbəda, naa Həmɨnpwa a mɨnda jam ka ɗoltɨ dan.”

⁴⁹ Ite Yesu nee a vor byele, ama a shi dɨ hwoda Yayirus a boyən atɨ, “Njisa mbɨrə mbəə, ɓe yə mɨna ɓwadə nzə-kəndəshe ɓaa.”

⁵⁰ Naya Yesu ɓe kɨl ləngɨn, nda sa Yayirus atɨ, “Ɓe kala aa gu, zə mwake ɗəng, njisa ɓa mbə.”

⁵¹ Ite nda tɨlə vor hwoda Yayirus, ndaa mwa ama a koɗən a vor hwoɗye. Yə Bitrus ka Yohana ka Yakubu ka sɨnggə njitə nə ɓəmbə pɨri.

⁵² Təna pa ɓwaare a vor hwoɗye təne dɨ təwi dɨ kehee. Yesu a sarən, “Ɗakamə kawatə, nggaa mbɨrə, shinə ngga dɨ shinə.”

⁵³ Ɓwaaree a hangɨn a dɨttən ka kyeɗəke, gə tən leyə atɨ nggi mbɨrə.

⁵⁴ Yesu a kɨr tɨfə njitɨngɨn, a sarə, “Njishi, zə maɗi.”

⁵⁵ Myensə a mɨna a sɨsə, ngga maɗə tan-tan a kangə. Yesu a boyərən atɨ təna vərə sɨzɨmtə ngga zɨmə.

⁵⁶ Ləngɨn a pɨrgə maasə yə sɨnggə njitə ka ndəle. Yesu a fyel-kwakingrən atɨ ɓe tənaa boyə ama ləngɨn.