Luka 6 - Ɓwaatiye New Testament

Həmɨ fərə piyatə

¹ A mɨni a fərə piyati da Yawude, Yesu a woyo ka lagbe dan a koɗə dɨ vor i gaashi, lagbe dan a tiya sər gyelkətɨ zumwe a posə ta tuuli.

² Imi dɨ vor Farise a ɗiyə Yesu atɨ, “Mɨnə ɗa lagbe dəw a dɨ ɗa sa ɓashita Musa a kərdən a nə fərə piyatə?”

³ Yesu a ɗiyərən, “Hwunaa ndaga bəlshe a nə sa Dawuda ka myee nda dɨ woyo kaarən a ɗa, ite myatə a gərən?

⁴ Nda dɨ pɨrə vor hwoda Həmɨnpwa a nggur buroditɨ ɗəmɗəmte mya ɗa gə le da kɨsehəmyee dɨ lyenə vor hwoɗingɨn ɓəmbə, nda zɨmə ɓwaa ka myee nda woyo kaarən.”

⁵ Yesu a mɨna sarən, “Hɨn Nze da Ɓwaara hɨnə həmɨ fərə piyatə.”

⁶ A mɨni a fərə piyati, Yesu a pɨrə vɨnə kəndəshe da Yawude a tiya kəndəshe. Ama nee də a hangɨn tɨfəngɨn a lɨɓɨkə.

⁷ Imi dɨ vor ji-lee kəndə ɓashita Musa ka Farise a puk diingrən ta nidən ndəng ndi ɓa gwadə a nzə-ooti a fərə piyatɨ darən gə təna ɗɨmgən le.

⁸ Ɓə Yesu liya le la a yedingrən, ka ɗyangale darən. Gə-angɨn nda wa ma ka tɨfə mbɨrtɨngɨn a san, “Maɗa, wa kangə humwa ɓwaare.” Nda maɗa mgban a shi humwa a kangə.

⁹ Də a hangɨn Yesu a ɗiyərən, “Ɓə ndoɗinə ɓashitɨ dam a vədə humwatə a nəngɨn a fərə piyata: Ɗa səfeme nə ma, naasə mgban ɗa səhase na, gə mya mbədə myentɨ ɓwaara, naasə mgban mya kɨɗa myentɨ ɓwaara?”

¹⁰ Beetɨ ite ɓə nidərən kat mbəə, nda sa mangɨn atɨ, “Tɨddə tɨfanga.” Nda tɨddə tɨfəngɨn, tɨfəngɨn a mɨna pepe.

¹¹ Farise ka ji-lee kəndəshingɨn 'ye a hangɨn a naa pas ka muune, gələ angɨn təna tiya shalale a nə ɗate tən ɓa ɗa ka Yesu.

Yesu a nggɨl ɓwaare bəw a mbiɗi-kpe

¹² A vor bətɨngɨn, Yesu a dɨmə a zə dɨ gyengə itɨ nə moti gə nda ɗa hiwtə, nda ɗa Həmɨnpwa hiwtə tuko-tuko baa haa kɨɗatə.

¹³ Ka hakpite nda waga lagbe dan kat a nggɨl bəw a mbiɗi-kpe gə nda lyentɨrən tənə gəə kpe-lagbe.

¹⁴ Kwakingrən nə yang: Siman, a Yesu a ɗɨkən kwake atɨ Bitrus, ka mufəngɨn Andrawus, ka Yakubu, ka Yohana, ka Filibus, ka Batalamawus,

¹⁵ ka Matta, ka Tomas, ka Yakubu nze da Alfiyus, ka Siman a mya wa atɨ nzə-nyatə gə njiya,

¹⁶ ka Yawuda nze da Yakubu, ka Yawuda Iskariyoti, nzə-kwakpeya ɓa ɗərdə Yesu.

¹⁷ Nda janga gə nə motə ka lagbe dan a kangə njiya həlkəte, mbiɗitɨ lagbe dan ka təkə-təkətɨ ɓwaare hananang mgban dɨ Yawudiya, ka Urshelima, ka myee nza kwaka haɓye a Taya ka Sidon a shi hakan.

¹⁸ Mingɨn kat a paya a haka Yesu gə təna kɨl ləməgyee nda dɨ boyo, nda gwadərən a dɨmdə oote a sɨsərən. Myee ka pɨle ji-dwatə a sɨsərən mgban, Yesu a dɨmdə pɨlengɨn.

¹⁹ Ɓwaare kat, nagi ndo ma ta ɓəri ɓa pa Yesu, gəkɨlə gəte dɨ dɨmi dɨ sɨsən a dɨ dɨmdə oote a sɨsərən kat.

Gɨraha da Yesu a nə nzaa pepetə

²⁰ Yesu a nidə lagbe dan a sa, “Sə hanɨngti kəwnə, hwun myee a vor poritə, hɨnggəwnə nə həmne da Həmɨnpwa.

²¹ Sə hanɨngti kəwnə, hwun myee ji myati ɓəgəng, gə hwun ɓa hyaɓa. Sə hanɨngti kəwnə, hwun myee dɨ təwi ɓəgəng, gə hwun ɓa kyeɗəkə ka hanɨngtə.

²² Sə hanɨngti kəwnə, a ite mya kworəwnə baa mya dɨmdəwnə gə vor ɓwaare, mya shartəwnə, a kwo kwakingəwnə bətɨ mi hashi, gə le de hɨn Nze da Ɓwaara.

²³ “Wule shingɨn kana bəngrəwnə, kerəpəm ka hanɨngtə, gə moone dəwnə nee gbakai a pwa. Hwuna ɗyanga atɨ sə yə jigərən a ɗa kpalye da Həmɨnpwa kaaɗəng.

²⁴ “Ɓə mgban sə oti kəwnə, hwun myee ka gɨnətɨ vɨrangnə ɓəgəng, gə hwun luu moone dəwnə mbəə dɨ ɗa hanɨngtə.

²⁵ Sə oti kəwnə, hwun myee hyaɓa ɓəgəng, myatə ɓa gəwnə a humwa. Sə oti kəwnə, myee mgban dɨ kyeɗəki ɓəgəng, tənətə nee a humwa, hwun ɓaga təwo ta kehee.

²⁶ Sə oti kəwnə, hwun myee ɓwaare kat a dɨ humownə gəngnə, gə sə yə jigərən a ɗa ka kpali jeronye.

Bɨlə ji-nyaagu mwoha

²⁷ “Hɨnə dɨ səwnə hwun myee dɨ kɨlti, mwom ji-nyaagəwnə, ɗamə myee dɨ kworəwnə səfeme.

²⁸ Myee dɨ hiwdəwnə, nyisəmə Həmɨnpwa nda ɗarən pepetə. Myee dɨ ɗəwnə sɨmwarashe, hiwom gə le darən.

²⁹ Ma kana fɨlagu a bwakaa hiɗə, viriwdə bwakate mbiɗi vən. Ma kana lugu rukute, kpawa ɓarawte a voti vən.

³⁰ Ma nyisu se kat, vən səngɨn, na ama nggurgu se dəw, ɓe yə luwagən səngɨn.

³¹ Sa hwuna dɨ mwo atɨ ɓwaare a ɗəwnə, zə ɗamərən sə.

³² “Hwun kana dɨ mwo myee dɨ mworəwnə ɓəmbə, mɨnə wula də? Di sə nagi ji-ɗa səhase a dɨ mwo myee dɨ mwotɨrən.

³³ Na hwun ɓawa ɗa myee dɨ ɗəwnə səfeme ɓəmbə, mɨnə wula də? Nagi ji-ɗa səhase nə, sə təna dɨ ɗa.

³⁴ Hwun kana dɨ vədə kiire a haka myee ɓa mba kiire a mbwagən ɓəmbə, mɨnə wula də? Sə mgban ji-ɗa səhase a dɨ və ndeyingrən ji-ɗa səhasə, gə tən leyə atɨ mya mban mbwarən kat.

³⁵ Mwom ji-nyaagəwnə, ɗamərən səfeme, vəmərən kiire, ɓe hwunaa bəə myensəwnə atɨ tən ɓa mɨnəwnədən, gə hwun ɓa ɗɨm moone kaɓa kpan, hwun ɓa gəə je da Həmɨnpwa nə ndi həmɨ gətə kat. Gə Həmɨnpwa a dɨ gwadə myee aawa ɗan usəkətə, kat ka mi hashe.

³⁶ Ɗam purutɨ ɓwaare ɓətɨya Baagəwnə a dɨ ɗa purutə.

Ɓe hwun aa ɓashidə imi

³⁷ “Ɓe hwunaa ɓashidə imi, sə mgban myaa dɨ ɓashidəwnə. Ɓe hwunaa sa atɨ imi nə mi hashi, sə mgban myaa dɨ səwnə atɨ hwun mi hashi. Nggurəmə miye gə səhase darən, sə mgban mya nggurəwnəgə səhase dəwnə.

³⁸ Hwun ta həmi, sə mgban mye ɓa həmə kəwnə. Mye ɓa kənəwnə ka sə-kənshe, nda naa pas ta kəji. Gə ka sə-kənshe hwuna dɨ kənə ɓwaare shee, ka wule sə-kənshingɨn mye ɓa kənəwnə.”

³⁹ Nda ɗarən byelə səɗe mgban, nda sa, “Wele ɓa kɨsə wele kada ma? Aa dɨ ɗaasə gə tən dɨ kpeyə ɓa fokə gwe.

⁴⁰ Lagbaa dɨ ɗyegənshe aa dɨ pɨrgə həmɨ-hwodan a dɨ kənənshe. Kat ka angɨn ndi kana lee shee mya dɨ kənən, ndi ɓa gə ɓətɨ həmɨ-hwodan a dɨ kənənshe.

⁴¹ “Ɓə ya hye dɨ naa kiɗəte a diitɨ kpeyəsa, tee ɓə naa gbɨlə kada a diisa?

⁴² Hye ɓa ɗa ya hye sa kpeyəsa atɨ, ‘Nzə-nuwo, naa dɨɗəwgə kiɗəte a diisa,’ a hye tee naa gbɨlə kada a diisa? Hye nzə-kwakpeye, dɨɗagə gbɨlə kada a diisa mbəə, də hye ɓa shea naa haa pepe hye ɓə dɨɗagə kiɗəte a diitɨ kpeyəsa.

Kada ka mbosən

⁴³ “Taa ndəng kada pepeyə mbwosən ɓa gə ka kyanatə, kada hase mgban mbwosən aa dɨ ga wula.

⁴⁴ Mya dɨ lee kada dɨ mbwosən. Myaa dɨ tawa mbwotɨ nggwale, naasə mgban mbwotɨ nenge dɨ sɨtɨ kada hwole.

⁴⁵ Ɓwaara feme kat nda dɨ dɨmadə ləmə fema nda kəpdən dɨ səɗə-yedi pepeye. Ma hase mgban nda dɨ dɨmadə ləmə hasa mgban nda kəpdən dɨ səɗə-yedi hashe dan. Gələ sa a vor hubo ɓwaara nə kwaamɨngɨn ɓawa boyo.

⁴⁶ “Ɓə ya hwuna dɨ wari atɨ, ‘Həmɨmiye, Həmɨmiye,’ a hwunaawa koddə la na dɨ boyownə?

⁴⁷ Ma dɨ koɗi, dɨ kɨl kormi dɨ koddərən,

⁴⁸ sɨnə ɓətɨ nzə-nwoshi a ra gwe nda ɓə kwak mgba-vɨne a nə fara. Ite gbɨnuwe a naa, haɓye a shi mgba vɨnəngɨn, ndaa dɨ fukə, gə mye nwo pepe.

⁴⁹ Ma mgban dɨ kɨl le de ndaawa koddən, mya kanarən ka ma nwo vɨne a nə tiye, myaa kwak mgbangɨn pepe. Ite gbɨnuwe a naa, haɓye a shi mgba vɨnəngɨn, vɨnəngɨn a nzaa fukə a fələ nyatak-nyatak.”