Luka 5 - Ɓwaatiye New Testament

Yesu a tiya waga lagbe dan

¹ A fərə Yesu a kangə kwaka gərə Jenisarat, ndi ta kəndəshe, ɓwaare a paya a takadən ta kɨl le da Həmɨnpwa.

² Nda naa koombye kpe mye kpaddərən a kwa gəre taa asə a vorsərən, həmi koombingɨn nggɨrə dɨ suɓwa ndwambye darən.

³ Yesu a jengə a pɨrə koombote hiɗə, a hɨnggə Siman. Nda nyisə Siman atɨ a nda lyembərə a dɨmdə koombotə a vor haɓye. Nda shea nza vor koombotə ta kənə ɓwaare shee.

⁴ Ite nda byelə a mbəə, nda sa Siman, “Dɨmdə koombotə a vor haɓye a haa kuɓuke, hye vyeddə ndwambe gə hye kasa vaakye.”

⁵ Siman a luwa a san, “Həmɨ-hwoɗye, hin liya kəɗə tuko-tuko, hinaa kɨr asə. Gələ la hye boyo gəngnə hɨn ɓa mɨna vyeddə ndwambe ɓə.”

⁶ Ite ta ɗaasə, təna kər vaakye kɨr-kɨr ɓətɨ ndwambe ɓa sərə.

⁷ Təna maddə kormingrən a waga ji-kəɗəngərən 'ye dɨ kəɗə gyenge gə təna shi asɨ gwadərən, təna shi asɨ naadə koombye ka vaakye ɓətɨ koombye ɓa ɗyemə.

⁸ Naya Siman Bitrus ɓe naa ləngɨn, nda gyerə humwa Yesu a san, “Həmɨmiye, təkəsə ke, hye leyə atɨ hɨn nzə-ɗa səhasə.”

⁹ Gə kala gə Siman ka ji-kəɗəngən ka wule vaaki kɨr-kɨrye təna kəsə,

¹⁰ yə ji-kəɗəngən, ɓətɨ Yakubu ka Yohana je da Zabadi, a ndələ mgban. Də Yesu a sa Siman, “Ɓe kala aa gu, gəkɨlə a humwa ɓwaare hye ɓawa nggala aa vaaki.”

¹¹ Də təna fwawa koombe darən a nggɨrdərən a kwakatə a nə tiye. Təna ɗaka shingɨn kat a koɗə Yesu.

Yesu a dɨmdə dagde dɨ sɨtɨ ama

¹² A fərə Yesu a pɨrə i vɨrati, ama a dagde a kɨɗa sɨsən a shi hakan. Ite nda naa Yesu, nda gyerə a tidə humwasən ta nyisən atɨ, “Həmɨmiye, na hye mwa, hye nee ka gətə hye suɓwagi gə dagdenə.”

¹³ Yesu a ɗifdə tɨfəngɨn a pan, a san atɨ, “Hɨn mwa, zə gi shet-shet.” Də a hangɨn dagde a dɨmgə sɨsən.

¹⁴ Yesu a fyel-kwakingɨn atɨ, “Ɓe boyə ama alə a nə sa na ɗəw. Zə wudə hye bɨlə kɨsahəme sɨsa, gə nda bɨlə ɓwaare kat təna leyə atɨ dagde dəw mbəə kat. Beetɨ angɨn hye hama ɓətɨ ɓashita Musa a boyo.”

¹⁵ Kat ka fyelte Yesu a fyel-kwakingɨn atɨ ɓe ndaa bwe ləngɨn ama kɨlə, le a kwa mbəgə hee kat. Gə ləngɨn ɓwaare hananang a shi gə təna kɨl la Yesu a dɨ boyo, gə nda dɨmərən də ootə.

¹⁶ Shezə kat ka angɨn Yesu a duwa ɗaka ɓwaare a dɨmə a muɗə a haa dɨsərən gə nda hiwo.

Yesu a gwadə ama ka ootɨ ndongtə

¹⁷ A fərə, ite Yesu nee dɨ kəndəshe, Farise ka ji-lee kəndə ɓashita Musa 'ye dɨma dɨ vɨre som-som a vor njiya Galili ka Yawudiya ka Urshelima mgban, a paya a nza haa Yesu a dɨ kəndəshe də. Gəta Həmɨnpwa nee ɓwaa kan gə nda maddə ji-ootə.

¹⁸ Də imi a nggura ama ka ootɨ ndongtə a nə kpəkləkye, təna ɓərə ɓa pɨrə kan a hwoɗye a haka Yesu.

¹⁹ Shezə gə fure da ɓwaare, tənaa ɗɨm haa pɨrtə, təna ɓə nggɨrə nə vɨne a wunhaa a jangadə ma ka ootɨ ndongtɨngɨn a waka ɓwaare gbyel a humwa Yesu.

²⁰ Ite Yesu ɓe naa mwadiyale darən, nda sa ma ka ootɨ ndongtɨngɨn atɨ, “Ndewe, mye nggurugə səhase dəw.”

²¹ Də Farise a hangɨn ka ji-lee kəndə ɓashita Musa ɓe kɨl la Yesu a boyo, təna ɗyengle ta ɗiyəsə, “Wonə nda ma ka byelə waka, dɨ kɨɗa kwakɨ Həmɨnpwa, nda wonə ɓa ngguro ɓwaara gə səhase a pɨrgə Həmɨnpwa ɓəmbə?”

²² Yesu ɓə lee la a hubosərən, gə-angɨn nda ɗiyərən, “Ɓə ya hwuna nza a dɨ ndələ ka ləməngɨn a hubosəwnə?

²³ Ndoɗinə pupuluki pɨri, mya sa atɨ, ‘Mye nggurugə səhase dəw’ ma? Naasə mgban, mya san atɨ, ‘Maɗi, woyi muɗi’?

²⁴ Gə hwuna leyə atɨ Nze da Ɓwaara nee ka gətə nda nggurgə səhase ganə a vor vɨratə.” Yesu a virwo a sa ma ka ootɨ ndongtɨngɨn atɨ, “Hɨnə dɨ səw, maɗi nggur sɨbətɨ dəw, muɗə hwoɗye.”

²⁵ Ma ka ootɨ ndongtɨngɨn a maɗə tan-tan a kangəə humwaasərən kat, a nggur sɨbətɨ dan a kɨt tɨfə hwoɗye, ta ɓondi Həmɨnpwa.

²⁶ Myee a hangɨn kat a ɗa ndəle təna ndukodə Həmɨnpwa. Kala a gərən, tən ta sa atɨ, “Hin naa səkushipe supo!”

Yesu a wa Levi

²⁷ Beetɨ angɨn Yesu woyo dɨ pɨri, nda naa a nzə-luu taa shemti a mya dɨ wa atɨ Levi sɨne nza kwaamɨ lyentɨ dan. Nda san atɨ, “Kwaɗe.”

²⁸ Levi a ɗaka shee kat a maɗə a koɗən a gəə lagba dan.

²⁹ Beetɨ angɨn Levi a ɗa sɨzɨmtə kɨr-kɨr gələ ndi ɓa wa Yesu a zɨm sɨlangsətə a hwodan. Ji-luu taa shemtə hananang ka i tataryi ɓwaare a shi a nza a ɓɨdɨmə a zɨmshe mgban.

³⁰ Ite Farise ka i ji-lee kəndə ɓashita Musa 'ye a vorsəngrən ɓe naa ləngɨn, təna nggwonə lagbe da Yesu shee, təna sa, “Gələ mɨnə hwuna dɨ zɨmshe ka ji-luu taa shemtə ka i tataryi ɓwaare?”

³¹ Yesu ɓe kɨl ləngɨn, nda luwa a sarən, “Myee dwat aa dɨ zə haka nzə-ɓwatə, ji-ootə nə ɓəmbə dɨ zə mgba nggume.

³² Hɨn taa shi vɨratə gə na waga myee dɨ nggur nəngrən ɓətɨ tən ji-ɗa səfemə, na shi gə ji-ɗa səhase gə təna por-njiya.”

Mya ɗiyə Yesu le a nə nggur gone

³³ Imi a nggwonə Yesu shee, tən ta sa atɨ, “Lagbe da Yohana a duwa ɗa hiwtə ka gone, sə mgban lagbe da Farise a dɨ ɗa. Hɨnggə lagbe dəw zɨmshi ka soɓwe ɗəng anəsə.”

³⁴ Yesu a sarən, “Ɓə ya omyee shi hwoɗi ləke ɓa mɨna gona? Tənaa dɨ gonə anda ngaja nee nza ɓwaa kaarən.

³⁵ Fəre ɓa shi a fəra mya kɨt ngajangɨn də, a fərəngɨn tən ɓa ɗaka zɨmshe a gonə.”

³⁶ Nda boyərən byelə səɗe a sarən, “Taa ndəng ama ɓa nggur sɨ baasə hwele a mbaka a nə rukutə iire. Kwaamɨ baasə hwele ɓa nggəl rukutə iirəngɨn a sɨran nda tawo, sɨrtɨngɨn ɓa mɨna hasə.

³⁷ Taa ama də mgban ɓa nggur vwo kwata dɨ huba a pukə vor səgi iire, ma kat ɗaasə, vwe ɓa huba a fala səgi iirəngɨn, vwe a kəji njiya.

³⁸ Di mya duwa pukdə vwo kwate a səgi hwele.

³⁹ Taa ama də mgban ɓa kɨla vwo kwate a mɨna sop vwa aa huba, ndi ɓa sa atɨ, ‘Vwo kwate nə wula pɨri.’ ”