Luka 4 - Ɓwaatiye New Testament

Nzə-tɨmbɨrha a kana Yesu ka kadawe

¹ Beetɨ ite mye ɗa Yesu batisɨmatə a gbɨnuwo Urdun, Pitɨ Ɗəmɗəmta Həmɨnpwa nee ɓwaa kan, Pitɨngɨn nə zəkan a kaake.

² Bətə bəwtə fwat Shetan Nzə-tɨmbɨrha ndi həme da pɨle ji-dwatə nee dɨ kanarən. A vor bətɨngɨn kat ndaa zɨmshe. Gə-angɨn myatə a gən kɨr-kɨr.

³ Də Nzə-tɨmbɨrha a san, “Anda hyenə Nze da Həmɨnpwa, byeli ka faraa maa nda gəə buroditi.”

⁴ Yesu a luwa a san atɨ, “Mye doro vor Malɨmtɨ Ɗəmɗəmtə atɨ, ‘Aa ka buroditə ɓəmbə ɓwaara ɓa nza ka myentə.’ ”

⁵ Beetɨ angɨn Nzə-tɨmbɨrha a zə ka Yesu a nə haa gbyalatə, də a hangɨn nda bɨlən həmnə vɨrate kat.

⁶ Nda sa Yesu atɨ, “Piltɨ vɨratə kat ka fukasə hɨn ɓa vu, hɨnggi nə mye vitɨrən a tɨfa gə na və ma na dɨ mwo.

⁷ Gə-angɨn na vu shingɨn hye kana kale-gbəətə.”

⁸ Yesu a san atɨ, “Malɨmtɨ Ɗəmɗəmta Həmɨnpwa sa atɨ, ‘Ndi Həmɨmiye a Həmɨnpwatɨ dəw nə hiɗə hye ɓa kalan-gbəətə, sɨnə ɓəmbə hye ɓa koddən.’”

⁹ Də Nzə-tɨmbɨrha a mɨnaa zəkan a vor Urshelima, nda kangdən a nə fintɨ Shafe, nda san, “Anda hyenə Nze da Həmɨnpwa, saragə haa hye kangədə.

¹⁰ Gə mye doro vor Malɨmtɨ Ɗəmɗəmtə atɨ, “ ‘Ndi ɓa ɗɨkdə malyenye dan təna kɨtta pepe.

¹¹ Tən ɓa mbalta a pwa gə ɓe fukə njiya mbwayinga a lyeb fara.’”

¹² Yesu a luwa a san atɨ, “Malɨmtɨ Ɗəmɗəmta Həmɨnpwa sa atɨ, ‘Ɓe kana ndi Həmɨmiye a Həmɨnpwatɨ dəw.’”

¹³ Naya Nzə-tɨmbɨrha ɓe kana Yesu dɨ təfəgye som-som kat mbəə, nda ɗakan a muɗə ta kula a fərə.

Yesu a mɨnə Galili

¹⁴ Beetɨ angɨn Yesu a mɨnə vor njiya Galili, gəta Pita Həmɨnpwa nee ɓwaa kan, le dan a ngguro a mbəgə hee.

¹⁵ Nda tiya ta kəndəshe a vəni kəndəshe da Yawude, ɓwaare kat ta ɓondirən.

Mya kwo Yesu a Nazarat

¹⁶ Yesu a zə vɨrasən Nazarat, a haa nda ndukodə. A fərə piyatɨ da Yawude, nda pɨrə vɨnə kəndəshe darən ɓətɨ nda duwa ɗa. Ite ndi ɓe maɗə kangə ɓa bəlshe,

¹⁷ mya vən malɨmta kpale Ishaya a i sɨlara mya dɨ tɨfɨɗə. Nda pararə a pilarə, nda niyə a na haa ndi ɓa bələ. Nda tiya bəlshe atɨ,

¹⁸ “Pitɨ da Həmɨnpwa nə ke, gə ndi yaɓwari gə na hiwa ji-poritə lə feme da Həmɨnpwa. Nda lyanari gə na hiwa myee nza vor gbərəwe atɨ, kɨsawne mbəə, myee weli mgban diingrən ɓa wonə, myee a vor tənətə mgban a ɗɨm piyatə,

¹⁹ nda lama ka sate atɨ fərə mbəha da Həmɨnpwa shi.”

²⁰ Nda tɨfɨggə malɨmtə a və ma dɨ nidə vɨnə kəndəshe a dɨ nza. Ɓwaare kat a pukən diingrən.

²¹ Nda tiya satə sarən atɨ, “Supo ləməgyee hwuna kɨlə na bələ vor malɨmtə naa.”

²² Də a hangɨn ɓwaare a tiya byele ta humwa Yesu, tən ta ɗa ndəle ka wule kormi fyeme dɨ dɨma dɨ kwaamɨngɨn. Təna sa, “Aa nze da Yusufu nə a ma?”

²³ Yesu a sarən, “Hɨn leyə atɨ hwun ɓa boyi la ɓwaare a mbadən səɗə atɨ, ‘Nzə-ɓwatə a ɓwaa nəngɨn ka nggume dan.’ Sə mgban hwuna dɨ boyi atɨ naa gwadə vɨrashi Nazarat ɓətɨ na gwadəha a Kafanawum.”

²⁴ Nda sarən, “Diyalə mya mbadən səɗə atɨ kpale tam ka fukatə a vɨrasən.

²⁵ Sə mgban a nzata kpala mya wa atɨ Iliya nggamse nee də hananang a vor Israila a ite haa a kpamə gə ɓoole aa njima a vor wantə mwaakɨn ka gbɨle, myatə a fuka kɨr-kɨr a vor njiyangɨn.

²⁶ Kat ka angɨn myaa lyen Iliya a haka iti nggamsati a vor Israila, shezə a haka nggamsate a Zarefat a vor njiya Sidon mya lyentən.

²⁷ Sə mgban, a nzata kpala mya wa atɨ Ilisha, ji-dagde nee furi-furi a vor Israila, kat ka angɨn myaa dɨmdə dagde dɨ sɨtɨ ama a vor Israila, Naaman nə ɓəmbə, dɨ njiya Siriya.”

²⁸ Myee kat a vɨnə kəndəshe ɓe kɨl ləngɨn, təna naa pas ka muune.

²⁹ Təna maɗə a omrən gə vor vɨnə kəndəshe a dɨmdən gə vor vɨratɨngɨn. Ta nggəltən a zəkan a haa mgbənge a beetɨ vɨratɨngɨn gə təna ləkədən a goha.

³⁰ A hangɨn Yesu a woyo wakasərən a dɨmə a muɗə.

Yesu a dɨmdə pɨla nzə-dwatə

³¹ Beetɨ itɨngɨn, Yesu a pɨrə a muɗə a haa som a Kafanawum a vor njiya Galili. A fərə piyatɨ da Yawude nda pɨrə vɨnə kəndəshe ta kənərənshe.

³² Təna ɗa ndəle ka wule Kənshe dan, gə a vor kəndəshe dan nda bɨlərən atɨ sɨnə ka gətə.

³³ A vor vɨnə kəndəshingɨn, ama nə də ka pɨla nzə-dwatə kan. Mangɨn a maddə kormɨngɨn a wa kawahəme a sa,

³⁴ “Ə'əi! Yesu dɨ Nazarat, mɨnə pedəm kəw hye ɓə shi ɓa tənəə denə? Di hɨn leera, hyenə Ma ɗəmɗəme da Həmɨnpwa.”

³⁵ Yesu a mgbaltən a gɨrarən, a san atɨ, “Gbə kwaamɨnga. Dɨmgə sɨsən!” Pɨla nzə-dwatɨngɨn a ɗongdə mangɨn a njiya a humwa ɓwaare kat, nda ɓə shee dɨmə a ɗakan asə aa gən.

³⁶ Ɓwaaree a hangɨn kat a ɗa ndəle, tən ta ɗiyəsə atɨ, “Ndo wule kəndəshinə 'ye? Ka gətə ka nyerətə nda dɨ gɨra pɨle ji-dwatə a dɨmdərən gə sɨtɨ ɓwaare.”

³⁷ Gə ləngɨn le da Yesu a ngguro a mbəgə njiya hangɨn kat.

Yesu a ngguro ɓwaare hananang gə ootə

³⁸ Yesu a ɗaka vɨnə kəndəshingɨn a muɗə hwoda shewtɨ Siman. Nda dɨ parə kote bi ka ootɨ haɓi kpalamye, təna nyisən a nda gwadə.

³⁹ Nda kangə nəngrə a dɨmdə ootɨngɨn, a hangɨn ngga maɗə dwat a vərən sɨzɨmtə.

⁴⁰ Ka kaade, fəre ɓe poro kpalam, mya payadə myee ka zərgi ootə som-som a shikarən a haka Yesu, nda parən hyeɗə-hyeɗə ka tɨfəngɨn, təna piyagə ootɨngɨn kat.

⁴¹ Sə mgban pɨle ji-dwatə a dɨmgə sɨtɨ ɓwaare hananang ka kawahəme a kwaamɨngrən, tən ta sa atɨ, “Hyenə Nze da Həmɨnpwa.” Də Yesu a gɨra ji-dwatɨngɨn a kərərən byele, gə tən leerən atɨ sɨnə Ma Həmɨnpwa a Yaɓwarən.

⁴² Ka haa kɨɗatə Yesu a maɗə dɨsərən a muɗə haa taa ama də. Ɓwaare a dɨmə a muɗə ɨlsən. Ite tən ɓe pan, tənaa mwa təna ɗakan nda muɗə a haa.

⁴³ Nda sarən, “Ɓə nza mbak-mbak na wudə ehee mgban a hiwa ka ləmə feme a nə həmne da Həmɨnpwa. Gə ləngɨn Həmɨnpwa a lyanari.”

⁴⁴ Gə-angɨn Yesu a pɨrə humwa ta hiwa ka lə feme da Həmɨnpwa a vəni kəndəshe a njiya Yawudiya.