Luka 24 - Ɓwaatiye New Testament

Matta Yesu gə taane

¹ A fərə tiya lyentə da Yawude, mandingɨn a maɗə ka haa dung-dung a nggur maare ka shi ɨhɨng-ɨhɨngye təna ɗa gə təna dɨ bəsə wo Yesu, a muɗə taane.

² Ite təna tɨlə hangɨn, təna niyə mye mgbəngtəngdə kaɓa farate a kwaamɨ taanəngɨn.

³ Ite təna pɨrə taane a gonggorə faratə, tənaa naa sɨtɨ Həmɨmiye Yesu a haa mya bədən də.

⁴ Təna kangə hangɨn haagərən tukut le ta ɓwarən, də a hangɨn təna nza naa ɓwaare kpe ka sɨɓwetɨ kungye dɨ ɓɨra hal-hal.

⁵ Kala a gə mandingɨn, təna shelətə a tedə nyemingrən a njiya, mingɨn a ɗiyərən, “Ɓə ya hwuna dɨ ɨl ma ka myentə a waka wogye?

⁶ Ndi tamdə ga, ɓə maggə we. Ɗyangam ka la nda boyownə ite sɨne a hakəwnə a Galili.

⁷ Nda səwnə atɨ, ‘Ɓə nza mbak-mbak shingɨn inə kat a ɗa. Mye ɓa ɗərdi hɨn Nze da Ɓwaara mye ɓa vədi a tɨfə mi hashe, tən ɓa ɓɨdɨmdi a gbalti, beetɨ bətə mwaakɨn mgban hɨn ɓa maggə we ka myentə.’ ”

⁸ Də a hangɨn təna shea ɗyanga ka la Yesu a boyərən.

⁹ Təna ɗaka taane a mɨnə hwoɗye a dɨ boyə lagbe dan 'ye mbiɗi bəw a mbiɗi-hiɗə ləməgingɨn, ka mbiɗitɨ myee dɨ koɗə Yesu kat.

¹⁰ Mandyee wudə taanəngɨn tənə yə Maryamu dɨ Magdala, ka Juwana ka Maryamu nuwogə Yakubu, ka i mandi. Təna sɨ boyə kpe-lagbe da Yesu shee ɗa.

¹¹ Kpe-lagbengɨn aa mwaka la mandingɨn a boyərən, təna nggur ləngɨn ləmə ɓayə.

¹² Kat ka angɨn Bitrus a maɗə ka taɗa a muɗə taane. Nda dɨ badə nəngɨn a yəngə taane, nda naa foowe nee gbəwo haa hiɗə. Nda mɨnə ta ndəli ka ləngɨn.

Lagbe kpe a nə tɨfə Imawus

¹³ A fərəngɨn mgban imi kpe dɨ vorsərən a maɗə a dɨ muɗə itɨ vɨrati mya dɨ wa atɨ Imawus, kote kwi kpaksak ɓa ɗa meltə tukolukpe dɨ Urshelima.

¹⁴ Ite təne a nə tɨfe dɨ muɗi, təna tiya byele a nə shee kat ɗa a Urshelima a vor bətɨngɨn.

¹⁵ Təne a nə byele ka sə a nə tɨfe, Yesu asɨ parən, təna kpapə ta muɗi.

¹⁶ Tən mingɨn Həmɨnpwa a kupadə kwa-hubosərən tənaa leyə atɨ sɨnə.

¹⁷ Yesu a ɗiyərən, “Lə mɨnə hwuna ɗɨmə a dɨ boyə nə tɨfe ɓə?” Le a ɓwarən təna virwo a kangə ɗəng-ɗəng ka humwa twakatə.

¹⁸ Ma hiɗə dɨ vorsərən mya dɨ wa atɨ Kɨlopas a ɗiyə Yesu, “Hyenə hiɗə ome a vor Urshelima ma? Tee ɓə lee shee ɗa a vor bətɨna?”

¹⁹ Yesu a ɗiyərən, “A ndo shi?” Təna san, “A wule sa bəng Yesu anə dɨ vɨra Nazarat. Sɨnə kaɓa kpalə kɨr-kɨra dɨ ɗa səkushipe ka byelə gətə a humwa Həmɨnpwa ka ɓwaare kat.

²⁰ Kɨsehəmi kpan-kpanye ka həmi njiya dam a kɨsə a vədən, mya ɓashiyən ɓashi we a shea ɓɨdɨmdən.

²¹ Zə niyi, she sɨnə ma hina dɨ bə myensenə a nəngɨn atɨ sɨnə ɓa luwa Israila gə kɨsawne. A vor bətə mwaakɨn tee pɨri shingɨn a ɗa kat.

²² Aa la nə ɓəmbə, i mandi a wakasenə a mɨna venə ndəle. Təna maɗə ka haa dung-dung a zə taane,

²³ tənaa naa sɨtɨ Yesu. Təna mɨna asɨ boyenə atɨ təna naa malyenye, a 'ye boyərən atɨ Yesu nee ka myentə.

²⁴ Imi dɨ vorsenə mgban a wudə taane a pa ləngɨn ɓətɨya mandingɨn a boyo, Yesu ka nənəngɨn tənaa nan.”

²⁵ Yesu a ɗiyərən, “Mɨnə ɗa kwa-hubosəwnə aɓə kupaa she ya? Baa ɓəgəng hubosəwnə aa banga a tɨfe, hwunaa mwaka ləməgye kpalye a boyə vor Malɨmtɨ Ɗəmɗəmta?

²⁶ Giɓə kpalye səwnə atɨ mbak-mbak Ma Həmɨnpwa a Yaɓwarən ɓa sop tənətə ka shingɨn kat, nda ɓə ga shea pɨrə vor fukatɨ dan?”

²⁷ Yesu a shea nggura dimsə ləməgingɨn a tiya ka Musa zənə ləməgyee kpalye a doro, nda shea bɨlərən kpəshi la kat Malɨmtɨ Ɗəmɗəmtə a boyə nəngɨn, ndi Yesu.

²⁸ Ite təna tɨlə gbyel ka vɨrate mingɨn a dɨ muɗə də, Yesu a ɗa ɓətɨ ndi ɓa pɨrə a muɗə a haa.

²⁹ Təna nyisən a sa, “Wa bəə hakenə, gəkɨlə fəre poro kpalam.” A hangɨn Yesu a ɗɨrə a koɗərən a hwoɗye.

³⁰ Ite təna nza a ɓɨdɨmə ɓa zɨmshe, Yesu a nggur buroditə, nda ɗa Həmɨnpwa usəkətə, nda takarə a ɓyanarən.

³¹ Də a hangɨn diingrən a shea wonə, təna leyə atɨ sɨnə, də mgban nda kipgərən.

³² Təna ɗiyəsə, “Ɓə ya ite nda dɨ byelə kam a nə tɨfe nzɨmsəm aa moɗəm a bɨləm naarə ləməgye mya doro vor Malɨmtɨ Ɗəmɗəmta?”

³³ A hangɨn ɗəng təna mɨna maɗa a kɨsa tɨfe a mɨnə Urshelima. Təna pa mbiɗitɨ lagberə bəw a mbiɗi-hiɗə a hwoɗye, təne peyi ka mbiɗitɨ myee mwadiyale ka Yesu.

³⁴ Myee a vor hwoɗye a sarən atɨ, “Ka diyale Həmɨmiye maɗə ka myentə, ɓə dɨma ka Siman.”

³⁵ Minə kpe mɨna dɨ Imawus a pɨra bwelə sa təna nan a nə tɨfe ite təne dɨ muɗi, ka ite təna shea leyə atɨ Yesu nə, ndi ta nggur buroditə a ɓyanarən.

Yesu a dɨma ka lagbe dan

³⁶ Təne a vor byele she a nə ləngɨn, ndi Yesu ka nənəngɨn a kangə wakasərən a sarən, “Maa ɗolta Həmɨnpwa a nza ɓwaa kəwnə!”

³⁷ Le a ɓwarən, kala a gərən, haagərən ɓətɨ kpiriti təna naarə.

³⁸ Nda ɗiyərən, “Ɓə ya le a ɓownə ka kala, mɨnə ɗa hwuna ɓə dɨ ɗa ndəle?

³⁹ Niyəmdə tyefi ka mbwayi, soɓwo hɨnə. Zəm pemi, gə hwun leyə atɨ kpiritə tamdə ka sɨtə ka oolye ɓətɨ hwuna dɨ nee kaarən.”

⁴⁰ Ite Yesu ɓe boyo sə nda bɨlərən tyefingɨn ka mbwayingɨn.

⁴¹ Gəkɨlə hanɨngte lagbe dan a ɗa, peyi kat ka ndəle, tənaa mwadiyale atɨ Yesu nə. Nda ɓə ɗiyərən, “Hwunə ka sɨzɨmtə ganə ma?”

⁴² Təna vən vaakə uutə.

⁴³ Nda luwo a tuulə diingrən kat.

⁴⁴ Də Yesu a sarən, “Di ləngɨn a na boyownə ite hɨne ɓwaa kəwnə, atɨ shee kat mya doro a vor ɓashita Musa ka Kpalye ka Dyemshe, mbak-mbak ɓa naa.”

⁴⁵ Nda wuna kwa-hubosərən gəkɨlə təna lee naarə shee mya doro vor Malɨmtɨ Ɗəmɗəmtə.

⁴⁶ Nda mɨna sarən, “Di ləngɨn a mya doro vor Malɨmtə atɨ, ‘Ma Həmɨnpwa a Yaɓwarən ɓa tənə nda ɓə mbɨrə, a mwaakɨnə bətə mgban ndi ɓa maggə we.

⁴⁷ Beetɨ angɨn a vor kwakɨngɨn mye ɓa hiwa mi vɨratə kat ləmə mbəha gə təna por-njiya, mya nggurərəngə səhase darən. Dɨ Urshelima mya tiya bwe ləməgingɨn.’

⁴⁸ Hwunə myee naa shingɨn ka diingəwnə, hwunə mgban ɓa takaləngɨn a haka ɓwaare kat.

⁴⁹ Hɨn kana muɗə, hɨn ɓa lyanəwnə she ka Pitɨ Ɗəmɗəmtə ɓətɨ Baagi a vəwnə kwaame a nəngrə. Kulam a vor Urshelima, baa fəra mye ɓa jangəwnə də gəta Pitɨngɨn dɨ pwa də.”

Yesu maɗə muɗə pwa

⁵⁰ Dɨ bee Yesu a dɨmə ka lagbe dan a zə gbyel ka Betani, nda maddə tyefingɨn a pwa a ɗɨkərən fukatə.

⁵¹ Sɨne a vor ɗɨktə dɨ ɗɨkərən fukatə, nda ɗakarən a maɗə pwa.

⁵² Təna kalan-gbəətə, a mɨnə Urshelima ka hanɨngtə kɨr-kɨr.

⁵³ Fərə-fərə təne a vor Kwa-Shafe dɨ ɓondi Həmɨnpwa.