Luka 23 - Ɓwaatiye New Testament

Yesu a humwaa yə Hiridus ka Bilatus

¹ Də a hangɨn peta ji-shalale darən kat, təna maɗə a kɨttən a zəkan a haka Bilatus nggwamnatɨ Yawudiya.

² Tən ɓe shikan a haka Bilatus, təna shea maɗə ta ɗəkən ləməgye som-som, tən ta sa atɨ, “Hina pan sɨne dɨ kɨɗa njiya, nda dɨ sa ɓwaare atɨ ɓe tənaa yə mbwa Kaisar, həmə kpanə Roma taa shemtə. Nda mɨna sa atɨ ndi ka nənəngɨn həmə, sɨnə Ma Həmɨnpwa a Yaɓwarən.”

³ Bilatus a ɗiyə Yesu atɨ, “Hyenə həme da Yawude ma?” Yesu a luwa a san atɨ, “Hye boyo ka nənanga.”

⁴ Bilatus a maddə kormɨngɨn, a boyə kɨsehəmi kpan-kpanye ka təkə-təkətɨ myee shi kat atɨ, “Taa pa manə ka alə hasə, a la kən ɓashiti mya ɓashiyən.”

⁵ Tən kat, təna maddə kormingrən a pwa ta sa atɨ, “Sɨnə dɨ ngama hubo ɓwaare, dɨ tukuta haa gə nda maddə nyatə ka wule kəndəshe dan, 'ye mbəgə hee kat a vor Yawudiya ka Galili, ɓəgəng ɓə tɨla ganə.”

⁶ Ite Bilatus a kɨl ləməgingɨn 'ye mya boyə, nda ɗiyərən, “Mangɨn dɨ vor njiya Galili gən ma?”

⁷ Ite Bilatus a kɨlə atɨ Yesu nə dɨ vor njiya Galili, a vor njiya da həmɨn Hiridus, nda lyenshe ka Yesu a hakan, itɨngɨn mgban Hiridus nee a vor Urshelima.

⁸ Ite Hiridus a naa Yesu, haa a nɨngən kɨr-kɨr gəkɨlə ɓə ɓongə sɨne dɨ ɨli gə nda naa Yesu, gə ɓə kɨl lə zərgi səkushipa Yesu a ɗa. Gə-angɨn mgban sɨne dɨ hɨma atɨ təna peyə gə Yesu a ɗa i zərgi səkushipə a diisən.

⁹ Hiridus ta naa Yesu nda ɗiyən ləməgye som-som. Shezə Yesu aa luwa a bwe alə.

¹⁰ Kɨsehəmi kpan-kpanye ka ji-lee kəndə ɓashita Musa nee kangə hangɨn dɨ kər-jeronye a nəngɨn.

¹¹ Ndi Hiridus ka ji-pakawatɨ dan a dɨttən ta wakan. Təna shea kan wule rukute da həmye, təna mɨndən a haka Bilatus.

¹² A fərəngɨn yə Hiridus ka Bilatus a gəə ndewoyi ka sə, gə ɓə ɓongə byele aawa pedərən, təna nzagəsə ji-nyaati.

¹³ Bilatus a waga kɨsehəmi kpan-kpanye ka mi kpanye darən kat ka ɓwaaree a hangɨn təna paya.

¹⁴ Nda sarən, “Hwuna shike ka manə, pasa wule ma dɨ ɗa sɨkpakye, pedə ɓwaare ngama hubosərən gə nyatə a maɗə vor njiya. Hɨn warən ɗiyən le ndəltən kat a diingəwnə, taa pan ka alə hasə ɓətɨ wule a hwuna boyə nəngɨn.

¹⁵ Hiridus mgban aa pan ka alə hasə. Gə-angɨn nda mɨnadən a hake, gə ndaa ɗa asə a ɓa ɗɨkə mya ɓɨltən.

¹⁶ Gə-angɨn, na byengrən a ɗakan nda muɗə.”

¹⁸ Də tən kat təna maddə kormingrən a kwa-hiɗə, tən ta sa atɨ, “A mya muɗə ka ma a ɓɨlə! A mya parenə awa Barabas nda muɗə.”

¹⁹ Ndi Barabas tɨngɨn mya ɗɨkdən a gbərəwe gəkɨlə nda pedə ɓwaare təna maddə nyatə a Urshelima. Nda mɨna ɓɨl ama ɓə.

²⁰ Bilatus a mɨna ɓərə ɗɨm a bwe le kaarən gəkɨlə təna mwa nda ɗaka Yesu nda muɗə.

²¹ Ɓwaare kat a kwo le. Tən ta gəəshe atɨ, “A mya ɓɨdɨmdən a gbaltən! A mya ɓɨdɨmdən a gbaltən!”

²² Bilatus a boyərən le a nyisərən a laka mwaakɨn, nda ɗiyərən, “Gəkɨlə mɨnə hwuna dɨ mwo atɨ mya ɓɨltən? Ndawula səhasə nda ɗa? Hɨn taa pan ka alə a ɓa ɗɨkə mya ɓɨltən. Gə-angɨn hɨn ɓa byengrən a ɗakan nda muɗə.”

²³ Ɓwaare a maddə kormingrən a pwa, tən ta sa atɨ, “A mya ɓɨdɨmdən.” Kwo le darən a gbaagə maasə Bilatus.

²⁴ Gə-angɨn nda ɗarən sa təna dɨ mwo, nda ɓashiyə Yesu ɓashitɨ we.

²⁵ Bilatus a pararən awa Barabas a mya gbən a gbərəwe gə nda maddə nyatə, ka mɨni ɓɨl we. Nda vərən Yesu gə təna ɓɨdɨmdən.

Mya ɓɨdɨmdə Yesu

²⁶ Ite təna kɨr Yesu a dɨ ləkədən ɓa dɨ ɓɨdɨmdən, təna peyə ka ama mya dɨ wa atɨ Siman a dɨ Sireni, sɨne dɨ mɨnagə itɨ vɨrati. Ji-gyelmbutə a bɨlən mbamtə a ɗɨkdən nda nggur kada ɓɨdɨmta Yesu ta koɗən kan a beesən.

²⁷ Ɓwaare hananang a koɗə beetɨ Yesu, ka mandye a vor ɓwaarengɨn tən ta təwi ka hɨritə ta lyeb nzɨmsərən.

²⁸ Yesu a virwa, a sa mandingɨn atɨ, “Hwun mandi Urshelima, ɓe hwunaa təwo ta kehee gə le de ɓəmbə, hwuna təwo gə nəngəwnə ka jingəwnə.

²⁹ Fəre nee dɨ shi, a fərəngɨn hwun ɓa sa atɨ, ‘Sə pepeyə ka mandyee jenyi, a 'ye aa ga ɗɨm wape ka 'ye aa ga shawadə je!’

³⁰ A fərəngɨn, “ ‘Ɓwaare ɓa sa mogye atɨ, “Fwakam a nəngenə!” Tən ɓa sa hee mgbənye, “Kopomenə.” ’

³¹ Anda wule shingɨn a dɨ ɗa yang ɓəgəng, a ite kada nee ɓak-ɓak, ka jibe a sɨsən, ɓə ya ɓa gə ndi kana kpama?”

³² Mya kər i ji-ɗa sɨkpaki kpe a dɨ ləkədərən ɓa dɨmə kaarən dɨ vor Urshelima gə mya ɓələ a haa mye ɓa ɓɨl Yesu də.

³³ Ite təna tɨla a haa mgbənga mya dɨ wa atɨ Kpəəkəne, a hangɨn mya ɓɨdɨmdə Yesu a gbaltən a waka ji-ɗa sɨkpakingɨn. Hiɗə a tɨfə zɨməngən, hiɗə a tɨfə lyekɗe.

³⁴ Yesu a sa, “Baa, nggurərəngə səhase darən, gəkɨlə tənaa lee sa təna dɨ ɗa.” Ji-gyelmbutə mgban a pa-bara a nə sɨɓwetɨ dan.

³⁵ Ɓwaare kat a kangə ta nidən. Mi kpanye darən a shartən, təna fɨlə ka kyeɗəke, tən ta sa atɨ, “Nda mbədə imi, ɓa nda mbədə nəngɨn anda sɨnə Ma Həmɨnpwa a Yaɓwarən a ma Həmɨnpwa a nggɨltən.”

³⁶ Ji-gyelmbutə mgban a shartən, təna vən vwo gbaange,

³⁷ təna san atɨ, “Anda hyenə həme da Yawude, zə mbədə nanga.”

³⁸ Mya dorshe a ɗɨkə pwa a nəngɨn atɨ, “manə sɨnə həme da yawude.”

³⁹ Hiɗə dɨ vor ji-ɗa sɨkpakingɨn 'ye mya galinga darən a pwa gbyel ka Yesu a ɗaa Yesu atɨ, “A hye sa atɨ hyenə Ma Həmɨnpwa a Yaɓwarən yee? Ɓa hye mbədə nanga ka hin mgban.”

⁴⁰ Kpeyəsən a dɨkan a san, “Teewa gəə kala Həmɨnpwa ma? A hyenə ka wule ɓashitɨngɨn a kwaamɨ we ɓətɨ ndi.

⁴¹ Hye leyə atɨ gə ɗa sɨkpakye dam mya ɓɨdɨmdəm. Hɨnggə ma, ndaa ɗa a səhasə.”

⁴² Mangɨn ɓe boyo shee, nda sa Yesu atɨ, “Yesu ɗyanga ke, hye kana pɨrə həmne dəw.”

⁴³ Yesu a luwa a san, “Diyalə na dɨ səw, supo hye ɓa gəə ɓwaa ke gaarə a haa kaanda da Həmɨnpwa.”

We da Yesu

⁴⁴ Itɨngɨn fəre nggɨra dɨ ɓɨri, kulitə a nzaa kɨsə a gbəə hangɨn kat baa mbwayi fəre mwaakɨn,

⁴⁵ fəre aa yə ɓɨrə. Səpate a vor Shafe a sɨrə a təkə kpe.

⁴⁶ Yesu a maddə kormɨngɨn a waha bərəng, “Baa, a vor tɨfanga na dɨ ɗaka myenshi.” Ndi ɓe boyo shee mbəə, nda fuwa pitɨ kpawtə dan.

⁴⁷ Gyana nyate kangə hangɨn ɓe na sa dɨ ɗa ɗatɨngɨn, nda ndukodə Həmɨnpwa a sa atɨ, “Diyalə, manə ma femə taa səhasə kan.”

⁴⁸ Myee paya sɨ kanyi dɨ naa sa ɗa kat ka diingrən, təna ɗaka hangɨn a muɗə hwoɗye, ta lyeb nzəmingrən ka yedi-kɨttə.

⁴⁹ Myee kat mgban leerən ndi Yesu, kat ka mandye kwaɗan dɨ Galili, təna kangə haa ɓongətə ta nidə shee dɨ ɗa.

Ɗɨk wo Yesu

⁵⁰ Ama nə də kwakɨngɨn nə Yusufu dɨ vɨraa Aramatiya a njiya Yawudiya, sɨnə hiɗə dɨ vor peta mi kpan-kpani ji-shalale, ma femə pepe.

⁵¹ Ndi ndaa mwaka wule shee ndeyingɨn a dɨ ɗa Yesu, ɓə ɓongə sine dɨ kula shita həmne da Həmɨnpwa.

⁵² Nda wudə haka Bilatus a nyisən gə nda nggur wo Yesu a ɗɨkə.

⁵³ Nda jangadə sɨtɨngɨn gə kada ɓɨdɨmtə, a vutə ka foowo pepeye, a ɗɨkə vor taana mya ɗa a gonggoro faratə a myaa ndaga ɗɨkdə wo ama də.

⁵⁴ Fərəngɨn tufə bəti, kaade ɗa ɓwaare nee dɨ pedə shee gə haa kana kɨɗa fərə piyati.

⁵⁵ Tən mandye shi ka yə Yesu dɨ Galili a koɗə Yusufu gə təna naa haa mya ɗɨk Yesu də ka bəsən.

⁵⁶ Beetɨ angɨn, təna mɨnə hwoɗye gə təna dɨ ɗa maare ka shi ɨhɨng-ɨhɨngye mya bəsə we. Gɨraha da Musa a sa atɨ myaa dɨ ɗa lyentə a fərə piyatɨ da Yawude. Sə mgban təna koɗə kormi gɨrahangɨn a piya.