Luka 22 - Ɓwaatiye New Testament

Yawuda mwa ɓa vədə Yesu

¹ A vor bətɨngɨn ite sɨlangsətɨ Zɨm Burodite taa maɗə kaarə (ite mya wa atɨ sɨkwalə Lawuttə) ɓe sɨka,

² kɨsehəmi kpan-kpanye ka ji-lee kəndə ɓashita Musa a ɨl tɨfa tən ɓa koɗən gə təna kɨt Yesu a ɓɨlə haa ɓotə. Shezə kala mwanate ɓwaare ɓa maddə gə le dan a dɨ gərən.

³ Də Shetan a pɨrə hubo Yawuda dɨ Iskariyoti hiɗə dɨ vor lagbe da Yesu 'ye bəw a mbiɗi-kpe.

⁴ Yawuda a maɗə ɗəng a wudə haka kɨsehəmi kpan-kpanye ka nggɨraa dɨ gɨra Shafe. Təna peyə a shalale a nə ɗate tən ɓa ɗa nda vərən Yesu gə təna kɨsə a ɓɨlə.

⁵ Təna ɗa hanɨngtə ka ite Yawuda a mwa ɓa vərən Yesu, təna mwa mgban ɓa vən taa.

⁶ Yawuda a tiya ɨl təfəgi ɗate ndi ɓa ɗa gə nda vədə Yesu a haa ɓotə a haa təkə-təkətɨ ɓwaare aa ləkə də.

Yesu a zɨm sɨzɨmtɨ kwalə Lawuttə ka lagbe dan

⁷ Ite fərə sɨlangsətɨ Zɨm Burodite taa maɗə kaarə a kənə, a fəra mya dɨ hama ka ji-mbage də gə sɨkwalə Lawuttə,

⁸ Yesu a lyen Bitrus ka Yohana, nda sarən, “Wudəm ɗamdə haa mya peyəm a zɨməmshi kwalə Lawuttə də.”

⁹ Təna ɗiyən, “Ndo hanə hye dɨ mwo hina dɨ ɗadən?”

¹⁰ Nda sarən, “Niyəm, hwun kana pɨrə vor vɨratɨngɨn, hwun ɓa peyə ka ama ka kyeɗəwtɨ haɓye. Koɗəmə mangɨn wudəmə hwoɗyee nda pɨrədə,

¹¹ hwuna boyə Həmɨ-hwoɗingɨn atɨ, ‘Nzə-kəndəshe nə dɨ ɗi le atɨ: A ndo haa gə vɨnə jangata omye, a haa hɨn ɓa zɨm sɨzɨmtɨ kwalə Lawuttə də ka lagbe de?’

¹² Ndi ɓa bɨləwnə vɨnə pwatə kpan, mye ɗadən pepe. Hwuna ɗadə hangɨn gə zɨm shingɨn.”

¹³ Təna muɗə, a pa shingɨn kat ɓətɨ Yesu a boyərən. Sə mgban təna ɗadə hangɨn gə zɨmshi sɨkwaləngɨn.

¹⁴ A haa zɨm shingɨn, Yesu ka kpe-lagbe dan a dɨ nza a ɓɨdɨmə haa zɨmshe.

¹⁵ Nda sarən, “Ka hɨmne na shi gə na zɨm sɨzɨmtɨ kwalə Lawuttɨnə kəwnə a mbəə na ɓə pɨrə tənətə.

¹⁶ Gə-angɨn na dɨ səwnə, taa diyə ga zɨm wule sɨzɨmtɨnə baa, fəra naarə sɨkwalə Lawuttə ɓa naa kan gaarə a vor həmne da Həmɨnpwa.”

¹⁷ Ndi ɓe bwe le she mbəə, nda nggur kpaa sopshe, nda ɗa hiwtə ka usəkətə a sarən, “Luwom hwuna ɓyana a wakasəwnə a soɓwo.

¹⁸ Hɨnə dɨ səwnə, taa diyə ga sop mbwotɨ kada inabitɨnə ɓə, baa fəra həmne da Həmɨnpwa ɓa shikan.”

¹⁹ Beetɨ angɨn nda nggur buroditə, nda ɗa Həmɨnpwa usəkətə, nda takarə a vərən kat. Nda sarən, “Sɨshi nə ingnə ite na vədə gə le dəwnə. Hwun ta ɗaasə gə hwun tawa ɗyanga ke.”

²⁰ Sə mgban, beetɨ ite tən zɨmshe mbəə kat, nda mɨna nggur kpaa sopshe a sarən, “Kpaanə na dɨ ɗifəwnə, kɨləsətɨ hwelti ite mya ɗa ka zaamba, a hɨn ɓa kəjidən gə le dəwnə.

²¹ Shezə ma ɓa ɗərdi, sɨnə ganə a hanə nza dɨ zɨmshe ke.

²² Hɨn Nze da Ɓwaara ɓa mbɨrə ɓətɨya Həmɨnpwa a boyo. Kək! Sə oti koyo ka mangɨn a ɓa ɗərdi.”

²³ Tən ta ɗiyəsə a wakasərən atɨ, “Wonə mangɨn a wakasəm, a ma ɓa ɗa wule sa?”

²⁴ Ndəlsətə a maɗə wakasərən a nə wonə magbake a vorsərən.

²⁵ Yesu a sarən, “Hwun leyə atɨ a vor vɨratɨnə həmye a duwa ɗa həmne ka mbamtə a nə ɓwaare, sə mgban myee ka gətə a dɨ bɨlə ɓwaare ɓətɨ tən mi twayi.

²⁶ Shezə aa kana hwuna ɗaasə. Ɓə kana ma atɨ sɨnə magbake a vorsəwnə, nda gə ɓətɨ sɨnə ma swaɗe. Ma mgban ka həmne, nda gə ɓətɨ kɨsa.

²⁷ Na ɗiyə atɨ ɓwaa, wonə pɨri ka gbaktə ɓə? Ma nza ɗəng mya dɨ ɗa sɨzɨmtə a nggura a vən a haa zɨmshe nə ma, naasə mgban ma dɨ verəwi ɗa sɨzɨmtə na? Dii ma nza mya ɗa sɨzɨmtə a nggura a vən a haa zɨmshe nə magbake. Zə niyəm hɨnə a vorsəwnə ɓətɨ nzə-hwoɗi dɨ ɗəwnə lyentə.

²⁸ Hwunə myee kanyi ɓwaa ke a vor tənətɨ de.

²⁹ Gə-angɨn mgban hɨnə dɨ vəwnə həmne ɓətɨya Baagi gaarə a vor pwa a vi.

³⁰ Hwun ɓa zɨmshe ke, hwuna soɓwo ke a vor həmne de. Nagi ndo ma a vorsəwnə ɓa nza nə ruutə a ɓashiyə kworyi mi Israila tən bəw a mbiɗi-kpe kat.”

³¹ Yesu a sa, “Siman, a Siman, zə niyi! Shetan ɨlə gə nda shara gəwnə, ɓətɨ mya dɨ bula zumwe a shara a dɨmdə shifətə ka takɨɗe.

³² Zə niyi Siman! Hɨn ɗa hiwtə gə le dəw, gə ɓe fukə. Shezə na hye fukə, hye kana maɗə a por-njiya, a mɨna ka mwadiyale, hye nyerədə mbiɗitɨ ji-nuwogu.”

³³ Bitrus a luwa a san, “Həmɨmiye, hɨn mwa ɓa koɗu. Nagi a vor gbərəwe ka we hye pɨrə, taa dɨ mɨna gu, hɨne ɓwaa kəw.”

³⁴ Yesu a san, “Bitrus, ɗekə kwamətə ta wa, hye ɓa məntəmə lee shi a laka mwaakɨn haa aɓə kɨɗa.”

³⁵ Yesu a ɗiyə lagbe dan atɨ, “Ɓətɨ ite na lyentəwnə a fərarə ta pititi də, taa zambɨramə də, hwunaa por i hwanyi, hwun ɗongə asə ma?” Təna san atɨ, “Ə'ə, hinaa ɗongə asə.”

³⁶ Yesu a sarən, “Ɓəgəng ma ka pititə a nda nggura ka taa a vorsən, ma ka zambɨrame mgban, a nda dɨm omotə ka zambɨrame dan, ma taa sungwa kan, a nda ɗərdə rukute dan a ɗər sungwa hiɗə.

³⁷ Hɨnə dɨ səwnə, la mya doro na, a vor Malɨmtɨ Ɗəmɗəmtə atɨ, ‘Sɨnə mya bəltən a vor ji-ɗa sɨkpakye,’ gəngnə mgban ləngɨn ɓa dɨ naa.”

³⁸ Lagbe dan a san, “Həmɨmiye, zə niyi, sungwe nə kpe.” Nda sarən, “Ɓə kənə she.”

Yesu a ɗa hiwtə a nə Motɨ Kade Zetun

³⁹ Yesu a dɨmə a zə nə Motɨ Kade Zetun ka lagbe dan a beesən, ɓətɨ nda duwa ɗa.

⁴⁰ Ite tən ɓe tɨlə də, nda sarən, “Ɗam hiwtə gəkɨlə ɓe hwunaa pɨrə vor kanaha.”

⁴¹ Nda gɨrgə lagbe dan, a muɗə humwa ɓyeləng, nda gyerə a ɗa hiwtə.

⁴² Nda sa atɨ, “Baa, na hye mwa, hye nggurigə kpaa tənətɨnə hɨn ɓa soɓwo. Kat ka angɨn, ɓe koɗə kanatɨ de, koɗə hɨnggu.”

⁴³ Malyene a janga dɨ pwa, a gwadən, a nyerədən.

⁴⁴ Gəkɨlə sɨne a vor tənətə kɨr-kɨr, gə-angɨn nda mɨna ɗa hiwtə dwat, ruwasən ta tyanga dɨ sɨsən ɓətɨ zaambə.

⁴⁵ Ite Yesu a maggə haa nda gyerə a dɨ ɗa hiwtə də, nda mɨnə haka lagbe dan a parən təne dɨ sheni, gəkɨlə sɨsərən kpalagərən gə yedi-kɨttə.

⁴⁶ Nda ɗiyərən, “Ɓə ya hwuna pukə a dɨ shena? Maɗəm, ɗam hiwtə gəkɨlə ɓe hwunaa pɨrə vor kanaha da Nzə-tɨmbɨrha.”

Mye kɨt Yesu

⁴⁷ Ite sɨne a vor byele ka lagbe dan, ɓwaare hananang a shi hakarən, ka ndi Yawuda, hiɗə dɨ vor lagbe dan, sɨnə luwa mingɨn kwamətə jipa Yesu dɨ wunakan ka shawa bwaka.

⁴⁸ Yesu a ɗiyən, “Yawuda, ka shew bwaka hye ɓa vədi hɨn Nze da Ɓwaara?”

⁴⁹ Ite lagbe da Yesu a naa sa dɨ muɗi, təna ɗiyən, “Həmɨmiye, a hina dər sungwe denə a tiya nyatə kaarən?”

⁵⁰ Hiɗə dɨ vorsən a viriwdə sungwa dan dɨ haka kɨsa da Kɨsahəmə kpane a saggə kwakɨngɨn a zɨme a dɨmdən vat.

⁵¹ Yesu a sa, “Ɓe hwunaa yə nya, ɓə kənə she.” Nda pa kwakɨngɨn ɓoke a mbəə.

⁵² Yesu a sa kɨsehəmi kpan-kpanye, ka ji-gɨra Shafe, kat ka mi kpan-kpanyee shi ɓa kɨttən atɨ, “Ɓə ya hwuna ɓə shi ɓa kɨtti ka sungwe ka gbɨlasakye ɓətɨ hɨn makpanə da ji-ɗa sɨkpaki?

⁵³ Giɓə fərə-fərə hɨne ɓwaa kəwnə a Kwa-Shafe, hwunaa ɗe asə. Fəre dəwnə nə supo, həmnə kulitə nee lyeni.”

Bitrus a məntəmə Yesu

⁵⁴ A hangɨn təna kɨttən a ləkədən, a zəkan a hwoda Kɨsahəmə kpane. Bitrus a koɗən, ndi ta kər mbwayingɨn dɨ haa ɓongətə.

⁵⁵ Ite mya kɨsadə ɗiye a vor hwoɗye a dɨ yinə, Bitrus mgban a shi asɨ nza hangɨn.

⁵⁶ Itɨ nji-kɨsati, ite dɨ ɗa lyentə a vor hwoɗingɨn, a naa Bitrus a kwa-ɗiye gə ɓɨrtɨ ɗiyəngɨn. Ngga mɨna nidən pepe, ngga sa, “Manə təne ɓwaa kan.”

⁵⁷ Bitrus a məntəmə la ngga boyo a sa, “Metə, taa leerən.”

⁵⁸ Beetɨ angɨn aa ɓongə, ama nee kanyi də ɓə, nda nidə Bitrus a san, “Hye, hyene hiɗə dɨ vorsərən.” Bitrus a luwa a san, “Hayu, hɨn tam a vorsərən.”

⁵⁹ Aa ɓongə, ama a mɨna shi ɓə, a mɨn-magba a sa atɨ, “Manə, sɨne ɓwaa kan gə ndi nzə-Galiliti.”

⁶⁰ Bitrus a mɨna məntəmətə a sa, “Maarə taa lee la hye dɨ boyo.” A hangɨn, Bitrus nee a vor byele ɗeke a wa.

⁶¹ Həmɨmiye Yesu a ɓiya a nidə Bitrus a goyi diingɨn. Də Bitrus a ɗyanga ka la Yesu a boyən, “Ɗekə kwamətə ta wa, hye ɓa məntəmə lee shi a laka mwaakɨn haa aɓə kɨɗa.”

⁶² Bitrus a dɨmə haa bwange a fɨl kawatə kɨr-kɨr ka kehee.

⁶³ Myee kɨsa Yesu dɨ nidən a tiya ta shartən ta dɨttən, tən ta lyebrən.

⁶⁴ Təna ɓwe diingɨn, tən ta san atɨ, “Zə kpali, hye kənenə ma lyebra.”

⁶⁵ Tən ta boyən ləməgi hashe som-som.

Yesu a humwaa peta ji-shalale da Yawude

⁶⁶ Ka haa kɨɗatə, mi kpan-kpanye kat ka kɨsehəmi kpan-kpanye darən ka ji-lee kəndə ɓashita Musa, təna paya kat, mya shi ka Yesu a humwasarən.

⁶⁷ Təna san, “Anda hyenə Ma Həmɨnpwa a Yaɓwarən a lyana, boyenə pee.” Yesu a sarən, “Nagi na boyownə, hwunaa dɨ mwake.

⁶⁸ Hɨn kana ɗiyəwnə le mgban, hwunaa dɨ mwa a mɨnedən.

⁶⁹ Dɨ fəranə supo, hwun ɓa ne hɨn Nze da Ɓwaara hɨne nza tɨfə zɨməngə Həmɨnpwa, ma ka gətə kat.”

⁷⁰ Təna ɗiyən, “Hye sa atɨ, hyenə Nze da Həmɨnpwa?” Nda sarən, “La hwuna boyo atɨ hɨnə Nze da Həmɨnpwa, sə gən.”

⁷¹ Təna boyəsə kat atɨ, “Ɓə lə mɨnə mbiɗi mya kɨləmə hakan ɗɨm? Mye kat kɨləm la nda boyo ka kwaamɨngɨn.”