Luka 21 - Ɓwaatiye New Testament

Həmte nggamsatə a vədə

¹ Yesu a maddə diingɨn a naa ji-gɨnətə dɨ ɗɨkdə kaɓa taa a vor kpaa luu həmtə a vor Kwa-Shafe.

² Nda naa itɨ meti nggamsati nji-poriti mgban dɨ ɗɨkdə penetə kpe a hangɨn.

³ Nda sa atɨ, “Diyalə na dɨ boyownə, sa nggamsate a vədən pɨrgə hɨnggə myee mbiɗi kat.

⁴ Gəkɨlə minə kat a nggɨla ɓyeləng dɨ vor gɨnətɨ darən a vədən həmti. Shezə nggamsate taa asə kaarə, kat ka poritə darə ngga nggura nzɨ sa ngga gə kan gə nzaa vɨratə a vədən.”

Sɨgbəshi kpawtɨ vɨratə

⁵ Imi dɨ vor lagbe dan a nidə vor Kwa-Shafe ta humwa faree mya nwoshe kaarən, ka fawna mya ɗa a sɨtɨ Shafəngɨn ka shee ɓwaare a vədərən gə le da Həmɨnpwa. Yesu a sarən,

⁶ “Aa hwun naa farengɨn 'ye kat, fəre nee dɨ shi, nagi farati hiɗə aa dɨ mbiɗi a kangə nə itə, mya fəl sɨbonggye haa a bəə həlkəkət.”

⁷ Imi a ɗiyən, “Nzə-kəndəshe, goɗinə shingɨn ɓa ɗa ɓə? Mɨnə sɨgbəshi shingɨn?”

⁸ Nda luwa a sarən, “Bəmdə myensəwnə, ɓe ama aa vwakarəwnə. Gəkɨlə ɓwaare hananang ɓa shi a vor kwaka, tən ɓa sa atɨ, ‘Hɨnə Ma Həmɨnpwa a Yaɓwarən,’ tən ɓa mɨnaa sa atɨ, ‘Kpawtə fəre ɓa dɨ tɨla.’ Ɓe hwunaa mwakarən a koɗərən.

⁹ Hwun kana kɨlə atɨ, vɨratɨnə ka vɨratɨrə nee dɨ pa-kawatə ka sə, nyatə maɗə waka ɓwaare, ɓe kala aa gəwnə. Gə ɓə nza mbak-mbak wule shingɨn kat a ɗa. Kat ka angɨn kpawtɨ fəre aa dɨ nza a shi ɗəng.”

¹⁰ Nda mɨna sarən, “Ɓwaare dɨ njiya som-som ɓa markasə, həmye ɓa ndɨlkasə, myatə ɓa fuka,

¹¹ Njiya ɓa humuro hee som-som, myatə ɓa fuka, ootə ɓa pɨra. Shee ɓa ɗɨkdə ɓwaare təna gəə kala ka zərgi səkushipə gbake ɓa dɨma a vor pwa.

¹² “Sə kwaməte ɓa bəngrəwnə nə, mye ɓa tənəə dəwnə, mye ɓa kəttəwnə a gbəwnə a gbərəwe. Mye ɓa ɓashidəwnə a vəni kəndəshe, mye ɓa zə kəwnə a humwa həmye ka yə nggwamne gə ɓashitə, kat gə le de.

¹³ Gə ləngɨn hwun ɓa ɗɨm humwatə hwuna takale a na a fərəngɨn.

¹⁴ Bəmdə myensəwnə ɓe hwunaa ɗyengle gə la hwun ɓa boyo.

¹⁵ Gə a fərəngɨn hɨn ɓa vəwnə lele ka la hwun ɓa boyo, ji-nyaagəwnə aa dɨ kanggəwnə a mbəwnə ka byelə a nə la hwun ɓa boyo.

¹⁶ Nagi yə sɨnggəwnə ɓa kworəwnə, yə ji-nuwogəwnə ka myee dəwnə ka yə ndewegəwnə kat. Tən ɓa dɨmə kəwnə a mgbarəwnə a haa bwange a ɓəl imi dɨ vorsəwnə.

¹⁷ Ɓwaare kat ɓa kwo nəngəwnə gə le de.

¹⁸ Gə-angɨn asə aa dɨ gəwnə, nagi showo nəngəwnə nə asə aa dɨ gən nda yerə ɓaa.

¹⁹ Ma kanyi dwat ndaa gbəkəyə, ɓa ɗɨm myente kaaru-kaaru.

²⁰ “Hwun kana naa ji-pakawatə shi ka nyatə, takadə Urshelima, hwuna leyə atɨ hɨnggə Urshelima ɓa dɨ mbəə.

²¹ A fərəngɨn, myee a vor njiya Yawudiya, a təna gyeɓə a nggɨrə nə mogye. Myee mgban a vor Urshelima, a təna gyeɓə a dɨmə. Mirə mgban a kaake ɓe tənaa yə gyaɓa a mɨna dɨ hwoɗye.

²² Gə fərəngɨnə fərə yedi-kɨtta Həmɨnpwa ɓətɨya kpalye a doro vor Malɨmtɨ Ɗəmɗəmtə ɓa naa.

²³ Kək! A fərəngɨn sɨtɨ mandye ka wape ɓa otɨrən, sə mgban ka 'ye ka ji-kpalamye dɨ shəw dərən. Ɓwaare ɓa tənə kɨr-kɨr a fərəngɨn a nagi ndo haa, gəkɨlə Həmɨnpwa ɗa yedi-kɨttə ka myee dan.

²⁴ Mya ɓəl imi ka sungwa, imi mgban mya muɗə kaarən a vɨre som-som a kɨsawne. Myee aa lee Həmɨnpwa ɓa woyo nə Urshelima baa a zə fəra gətɨ darən ɓa mbədə.

Mɨnata Nze da Ɓwaara

²⁵ “Zərgi səkushipe ɓa ɗa a nə fəre, ka likɨtə, ka tyekəlye. Ɓwaare vɨratə kat ɓa pɨrə vor tukuttə gə hawa dɨ tawa ka karame a nə gbɨnuwtɨ sɨkorən, ka ɗogoli hawa dɨ maɗa ka haɓye dɨ nə gbɨnuwongɨn.

²⁶ Kala ɓa gə ɓwaare baa tən ta mbərhe gə sa ɓa ɗa, gəkɨlə gətɨ vɨratə ɓa humuro, tyekəlye ɓa fwaka dɨ pwa.

²⁷ A fərəngɨn də tən ɓa shea nee hɨn Nze da Ɓwaara dɨ janga dɨ vor pərɓye ka gətə ka fukatɨ gbaktə.

²⁸ Hwun kana naa shingɨn tiya dɨ ɗa, kangəm kpəkəkə, hwuna maddə nəngəwnə a pwa, gəkɨlə mbə səwnə tɨla.”

Byelə səɗe a nə kada nggwale

²⁹ Nda ɗarən zərgi le a sarən, “Niyəmdə kada nggwale ka mbiɗitɨ kade kat.

³⁰ Kade kana tiya manatə, hwuna leyə atɨ ɓoole janga.

³¹ Sə mgban hwun kana naa sɨgbəshi shingɨn, hwuna leyə atɨ həmne da Həmɨnpwa ɓa dɨ tɨla.

³² “Diyalə na dɨ boyownə, imi a vɨra wanetɨnə aa dɨ mbərə a pɨrə ɓaa anda shinə na boyo kat aa ɗa kat.

³³ Pwa ka njiya ɓa pɨrə, shezə ləməgye de aa dɨ ga pɨrə ɓaa.

Fyel-kwakye a nə nzaa gɨratə

³⁴ “Bəmdə myensəwnə, hwuna ɗyangale ɓe hwunaa pɨrə ɨlshi vɨratə ka soɓwe ta kpashi ka ɗyengle a nə shi vɨratɨnə, baa fərəngɨn a shi hwunaa leyə, pasa ma mya kɨsə penge.

³⁵ Gəkɨlə sə fərəngɨn ɓa shi nə myee kat a vor vɨratə.

³⁶ Nzam ka ɗaasɨtə, hwun ta gɨra ta hiwi gə hwuna mbəgə sa ɓa ɗa a fərəngɨn, gə hwuna mba kangtə a humwashi Hɨn Nze da Ɓwaara.”

³⁷ Fərə-fərə Yesu nee a vor Kwa-Shafe dɨ kəndəshe, ka kaade nda dɨ dɨmə a zə nə Motɨ Kade Zetun, də nda dɨ bə baa haa a kɨɗa.

³⁸ Ɓwaare a dɨ dɨma ka haa kpit-kpit a paya a Kwa-Shafe gə təna kɨltən.