Luka 20 - Ɓwaatiye New Testament

Ndəle a nə gəta Yesu

¹ A fərə ɓə, Yesu nee dɨ kənə ɓwaare lə feme da Həmɨnpwa a Kwa-Shafe, kɨsehəmi kpan-kpanye ka ji-lee kəndə ɓashita Musa ka mi kpan-kpanye da Yawude a shi hakan.

² Təna ɗiyən, “Boyenə pee, ka ndo gəti hye dɨ ɗa shee hye dɨ ɗa, wonə dɨ ɓoyu mgba hye ɓə dɨ ɗa shingɨn?”

³ Nda sarən, “Hɨn mgban hɨnə ɓa ɗiyəwnə le. Boyi mi,

⁴ ɓətɨ gəte Yohana a dɨ ɗa batisɨmatə kaarə ɓwa, dɨ pwa nda ɗɨma, naasə mgban dɨ haka ɓwaare ganə a vɨratə nda ɗɨma?”

⁵ Təna nidə ləngɨn a wakasərən, a boyəsə atɨ, “Hɨm kana san atɨ, ‘Dɨ pwa,’ ndi ɓa ɗiyəm atɨ, ‘Ɓə mɨnə ɗa hɨm aa ɓə mwakan?’

⁶ Hɨm kana san atɨ, ‘Dɨ haka ɓwaare ganə a vɨratə,’ ɓwaare kat ɓa kalarəm ka fare, gəkɨlə ɓwaarengɨn mwa atɨ Yohana kpalə diyalə.”

⁷ Gə-angɨn təna sa Yesu atɨ, “Hinaa lee ma ɓoyo Yohana mgba nda ɓə dɨ ɗa batisɨmatə.”

⁸ Yesu a sarən, “Hɨn mgban taa dɨ boyownə ma vi gəte na dɨ ɗa lyentɨnə kaarə.”

Byelə səɗe a nə ji-nidə gaashe

⁹ Nda pɨrə humwa a boyə ɓwaare byelə səɗa nə atɨ, “Ama a ka kaanda, a nggub kade zɨmtə a vor kaandangɨn. Nda shea və i ji-hawti gə tən ta niyən dərən. Nda muɗə a haa a dɨ ɓwanga də.

¹⁰ Ite kade a mbwo a kən zɨmti, həmɨ gaashingɨn a lyen kɨsa dan gə mya vən mbwotɨ kadengɨn. Təna kɨt kɨsangɨn a mya lyentən a lyebə a kərən, nda muɗə ka tyefingɨn dɨ payya tənaa vən asə.

¹¹ Də həmɨ gaashingɨn a mɨna lyen ama dɨ vor kɨse dan. Təna mɨna kɨt mangɨn a lyebə, a vən sopye a omrən nda muɗə dɨ payya ɓə.

¹² Də nda mɨna lyen ma mwaakɨnətə ɓə. Təna mɨna lyebə a ɗəkən ɓokye, a ɗongdən a beetɨ kaanda.

¹³ “Də həmɨ gaashingɨn a ɗiyə nəngɨn atɨ, ‘Ɓə mɨnə mbiɗi na ɗa gəngna? Mbam ɗəng, hɨn lee sa na ɗa, hɨn ɓa lyen nze de hiɗə kal-kal a na dɨ mworən, ndəng ta kwa naa fukasən.’

¹⁴ “Ite ji-hawtɨngɨn a naa nze da həmɨ gaashingɨn a ɓa mɨnə shee sɨne dɨ shi, təna shalasə le a nəngɨn, təna sa atɨ, ‘Sɨnə ɓaga mɨnə gaashinə. A mya ɓɨləmrən gələ gaashinə a gəə hɨnggəm nə.’

¹⁵ Təna ɗongdən a beetɨ kaanda a ɓɨltən.” Yesu a ɗiyə, “Ɓə mɨnə hwuna dɨ niyə həmɨ gaashingɨn ɓa ɗa ka mingɨn?

¹⁶ Ndi ɓa shi a ɓəl mingɨn kat, nda və imi somi gaashingɨn.” Myee kanyi dɨ kɨl la Yesu a dɨ boyo a sa atɨ, “Naa Həmɨnpwa a nggurgə angɨn.”

¹⁷ Yesu a nidərən kat a goyi diingrən a sa, “Ɓə naarə la mya doro vor Malɨmtɨ Ɗəmɗəmtə nee a shiya? “ ‘Faraa ji-nwoshe a kworən, sɨnə mya shea kwak mgba-vɨne kan’?

¹⁸ Ma fukə nə faratɨnə, mangɨn ɓa ɓeyə nyatak-nyatak, ma mgban faratɨngɨn a fukə nəngɨn, mangɨn ɓa myana ɓətɨ humboti.”

¹⁹ Kɨsehəmi kpan-kpanye ka ji-lee kəndə ɓashita Musa ɓe kɨl ləngɨn, təna ɓərə ɓa kɨttən a hangɨn gə tən leyə atɨ a nəngrən nda ɗa zərgi ləngɨn. Shezə kala nee gərən, gə tən kana pan mbiɗitɨ ɓwaare ɓa nya gə le dan.

Mbwa Kaisar taa shemtə

²⁰ Təna kpəkən dye ta kəsən kaake, təna lyen imi a hakan. Tən mgban myee mya lyenə, təna ɗa ɓətɨ tən mi twayi. Gələ təna koɗən ka kuta a ngaarən ka byele a kɨttən a nə la kat nda boyo, gə təna ɗɨmə a vədən a haka nggwamnatɨ Roma.

²¹ Mingɨn 'ye dɨ kəsən kaake a ɗiyən le ka kuta atɨ, “Nzə-kəndəshe, hin leyə atɨ ka diyale hye dɨ bwe sa kana. Hye dɨ kəndə sa kana mgban, teewa bɨldə mwonəha mgban. Hye dɨ kənə ɓwaare təna nzaa-nzate kana a humwa Həmɨnpwa ka diyale.

²² Gə-angɨn, ɓashitɨ dam sa atɨ ɓə kana hina mbwa Kaisar hama kpanə Roma taa shemtə ma? Anda aa sə mgban hye boyenə.”

²³ Ɓə leyə atɨ ngaati təna ngaarən. Nda ɓə sarən,

²⁴ “Bɨlimi taa da mi Roma pe. Ɓə fyemi wonə ka kwakɨ wonə a nə taangɨn?” Təna san atɨ, “Fyemi Kaisar nə ka kwakɨngɨn.”

²⁵ Nda sarən mgban atɨ, “Gə-angɨn vəmə Kaisar sa hɨnggə Kaisar nə, hwuna və Həmɨnpwa mgban sa hɨnggə Həmɨnpwa nə.”

²⁶ Tənaa mban a kɨsə vor la nda boyo a furo ɓwaare. Le a ɓwarən ka la nda mɨnərəndən, təna kangə kping.

Ɗi le a nə mattə gə taane ka nzaa hwoɗye

²⁷ Beetɨ angɨn imi dɨ vor Saduke mgban, a myee sa atɨ taayə mɨni matti də gə we ka myentə, a shi haka Yesu a ɗiyən le.

²⁸ Təna san, “Nzə-kəndəshe, Musa a dorenə a vor ɓashitɨ dan atɨ jibiyə ma kana mbɨrə a ɗaka mesən taa nzə də, ɓə nza mbak-mbak mufəngɨn a ɗɨm metɨngɨn a nza kaarə gəkɨlə nda mwasa jibiyəngɨn je.

²⁹ Ɓə ya lanə ɓa gə, i ji-moryi nə də tukolukpe a kwaɗasətɨ darən. Ma kwamətə a mbɨrə a ɗaka mesən ndaa mwasa je kaarə.

³⁰ Kpeyə mufe mgban a mɨnə metɨngɨn, ndi mgban ndaa mɨna mwasa kaarə.

³¹ Mwaakɨnə mufe a mɨnərə ɓə, tənaa mwasa. She tən kat tukolukpe təna nza kaarə, a mbərə kat tənaa mwasa kaarə.

³² A kpawtə kat metɨngɨn asɨ mbɨrə.

³³ Ɓə gəte tən kana maggə we a kpawtɨ fəre kat ka metɨngɨn, wonə a vorsərən ɓa ɗɨmtɨrə ngga gəə mesən na, giɓə tən kat nza kaarə?”

³⁴ Yesu a sarən, “Ɓəgəng a vor vɨratə, ɓwaare a dɨ ɗɨmsə a nzaa hwoɗye.

³⁵ A nzate ɓaga shi, myee kana təna pɨrə nzatɨrə kana maggə taane, tənaa dɨ ɗɨmsə, gəkɨlə gaarə taa nzaa hwoɗi də,

³⁶ mingɨn aa diyə mbərə. Tənə ɓa gə ɓətɨ malyenye da Həmɨnpwa, gəkɨlə tənə je da Həmɨnpwa 'ye ka myentə kaaru-kaaru.

³⁷ Ɓə a shiya hwun ɓa sa? Aɓə Musa boyo bwang atɨ wogye nee dɨ maɗi. Gə a vor Malɨmtə, a ite Həmɨnpwa a byelə kan dɨ vor kaaka nzɨ-kadatə a ləwo ka ɗiye də, nda sa Musa atɨ, ‘Hɨnə Həmɨnpwata Ibɨraim, Həmɨnpwata Ishaku, Həmɨnpwata Yakubu.’

³⁸ Həmɨnpwatɨngɨn, aa hɨnggə wogi, ndi hɨnggə myee ka myentə nə. Gə a hakan, mingɨn kat təne ka myentə.”

³⁹ Imi dɨ vor ji-lee kəndə ɓashita Musa a luwa a san atɨ, “Nzə-kəndəshe, la hye boyo nee pepe, sə gən.”

⁴⁰ Ama mgban aa yə mɨna mwamdiya a shi hakan a ɗiyən a lə ɗɨm.

Ɓə Ma Həmɨnpwa a Yaɓwarən nə nze da wona?

⁴¹ Yesu a sarən, “Ɓə gə mɨnə ɓwaare a dɨ sa atɨ Ma Həmɨnpwa a Yaɓwarən Nze da Dawuda nə ya?

⁴² Aɓə ndi Dawuda ka nəngɨn nda sa a vor Malɨmtɨ Dyemshe atɨ, “ ‘Həmɨmiye Baatə a sa Həmɨmiye de atɨ, “Zə nza tɨfə zɨməngi

⁴³ baa na ɗɨkdə ji-nyaagu təna fokə njiya hye mwagərən ka mbwayinga.” ’

⁴⁴ Aɓə həmɨn Dawuda a warən atɨ sɨnə ‘Həmɨmiye,’ ɓə ya ndi ɓa mɨna gəə sɨnə nze da Dawuda ɓə?”

Yesu a gbaliyadə ji-lee kəndə ɓashita Musa

⁴⁵ Ite ɓwaare kat nee a vor kɨl la Yesu a dɨ boyo, nda sa lagbe dan atɨ,

⁴⁶ “Bəmdə myensəwnə ka ji-lee kəndə ɓashita Musa. Tənə myee dɨ mwo wetə a vor rokoti kpan-kpanye, a vor lumotə təna dɨ mwo atɨ ɓwaare a gyerə a wunakarən. A vəni kəndəshe mgban təna dɨ mwo nzatə a humwa ɓwaare, ka hee nzatɨ fukatə a haa mya peyə də gə sɨlangsətə.

⁴⁷ Tənə myee dɨ tɨmbɨr nggamse mandye, mbɨrtɨrən lugərən shee. Təna shea kangə ta ɗa hiwtə gɨrə-gɨrə gə təna gbiyadə səhase darən. Wule myee, Həmɨnpwa ɓa ɗarən sə otə kɨr-kɨr.”