Luka 2 - Ɓwaatiye New Testament

Mwasa Yesu

¹ Mye nee də, a vor bətɨngɨn, a nzata həmə kpanə Roma a mya wa atɨ Kaisar Agustus, nda hiwa a vor njiya Roma kat, atɨ a mya bəl ɓwaare kat.

² Kotə hiwatɨ kwamətə a nzata Koriniyus nggwamnatɨ Siriya.

³ Ɓwaare kat, nagi ndo ma a muɗə vɨrasən gə myaa bəltən.

⁴ Sə mgban Yusufu a maɗə a ɗaka Nazarat a vor njiya Galili a muɗə Betalami ite a vor njiya Yawudiya, gə mya bəltən a Betalami, a vɨraa mwasa həmɨn Dawuda. Gə ndi Yusufu sɨnə dɨ kada baagə yə Dawuda.

⁵ Nda muɗə ka Maryamu, ite nda tiyagərə ɓa dɨmə, itɨngɨn waptɨ darə kən mwasati.

⁶ Ite təne də shee a vor Betalami, yedi mwasatə a markarə,

⁷ də Maryamu a mwasa nzə-kwamətə darə. Ngga vuttən a takrən ka sɨbaashe a bədən a nə kaaka a vor koombote mya dɨ və sɨgɨrtə shee də. Gə taa haa jangati kaarən a hwoɗi omye.

Malyene a janga ka ji-jinshe

⁸ Ka tukote mya mwasa Yesu də, ji-jinshe nee a vor kaakə Betalami dɨ gɨra doomi mbage darən.

⁹ A hangɨn malyene da Həmɨnpwa a janga ka ji-jinshe, ɓɨrta Həmɨnpwa a takadərən, kala a gərən.

¹⁰ Malyene a sarən, “Ɓe kala aa gəwnə. Ləmə femə ka hanɨngti na shikəwnə kan, a la haa ɓa nɨngəwnə kan ka mbiɗiti ɓwaare kat.

¹¹ Supo a vor vɨratɨnə da Dawuda, myee mwasəwnə Nzə-mbəha. Sɨnə Ma Həmɨnpwa a Yaɓwarən, sɨnə Həmɨmiye.

¹² Ɗate hwun ɓa ɗa hwuna leerən nə yang: Hwun ɓa pa nzə-kpalame nə mya vuttən a takrən ka sɨbaashe a bədən a nə kaaka a vor koombote mya dɨ və sɨgɨrtə shee də.”

¹³ Də a hangɨn təkə-təkətɨ i malyeni a janga dɨ pwa a pa malyena nə, tən ta ɓondi Həmɨnpwa a kalan-gbəətə, tən ta sa atɨ,

¹⁴ “Fukatə kat hɨnggə Həmɨnpwa arə a vor pwa nə. Ɗolta Həmɨnpwa kotɨnə ga a haka minə a vɨratə, a myee haa a dɨ nɨngə Həmɨnpwa kaarən.”

¹⁵ Naya malyenye a ɗaka ji-jinshe a mɨnə pwa, ji-jinshe a boyəsə atɨ, “Ndɨka mya zəmə vor Betalami gə mya naa sa ɗa, ka la Həmɨnpwa a boyəm.”

¹⁶ Təna maɗə tan-tan, a zə a pa Maryamu ka Yusufu, təna naa nzə-kpalaməngɨn a nə kaaka a vor koombote mya dɨ və sɨgɨrtə shee də.

¹⁷ Ite ji-jinshe ɓe naa Yesu, təna boyə yə sɨnggən ka mbiɗiti ɓwaare kat, sa təna nan, ka la malyene a boyə nə Yesu.

¹⁸ Myee kat kɨl la ji-jinshe a boyo a ndələ ka ləngɨn.

¹⁹ Hɨnggə Maryamu, ngga kɨr ləməgingɨn ta verəwdərən a hubosə, nggi ta ndəli ka naarə ləməgingɨn.

²⁰ Ji-jinshe a mɨnə haa nzaasərən, tən ta ndukodə Həmɨnpwa ta ɓondirən gə shee təna naarən ka ləməgyee təna kɨlə ɓətɨya malyene a boyərən.

²¹ Beetɨ bətə fwa-fwat, yə sɨnggə Yesu a ɗa sa ɓashite Həmɨnpwa a və Musa a nə lakəwne. Təna ɗɨkə nze kwake atɨ Yesu. Sɨnə kwaka malyene a ɗɨkə nze ite nuwogən nee ka wapsən.

Mye bɨladə Yesu a Shafe

²² Ite bəte mya ɓiyə gə kwalə mwasatə kənə, Maryamu ka Yusufu a koɗə la ɓashite Həmɨnpwa a və Musa a boyə nə sa nuwotə ɓa ɗa ka nzəngrə beetɨ mwasatə. Gə-angɨn təna zə ka Yesu a Shafe a Urshelima gə təna bɨladən a haka Həmɨnpwa.

²³ Gəkɨlə ɓashita Həmɨnpwa a sa atɨ, “Anda nzə-kwaməte metə a mwasa nzə-muro, nggi ɓa zəkan a ɗifə Həmɨnpwa.”

²⁴ Sə mgban ɓashita Həmɨnpwa a sa atɨ, mbak-mbak yə sɨnggə nze a vədə həmtɨ, ji-guguyi kaake kpe, naasə mgban ji-guguyi gɨrtə kpe. Sə mgban yə Maryamu ka Yusufu a ɗa.

²⁵ A fərəngɨn ama nə də a vor Urshelima mya wa atɨ Simiyon, ma pepeyə ka kala Həmɨnpwa a hubosən. A nzaasən, sɨne dɨ kula fəra Həmɨnpwa ɓa shi ka mi Israila ka Nzə-mbəha də. Pitɨ Ɗəmɗəmtə nee dɨ koɗi kan.

²⁶ Pitə liya boyən atɨ, ndi ɓa naa Ma Həmɨnpwa a Yaɓwarən, a Nzə-mbəha da Həmɨnpwa, nda ɓə mbɨrə.

²⁷ A fərəngɨn Pitɨ Ɗəmɗəmtə a boyə Simiyon atɨ a nda zə Shafe. Maryamu ka Yusufu mgban shi ka Yesu a Kwa-Shafe gə təna bɨladən a haka Həmɨnpwa ɓətɨ ɓashita Həmɨnpwa a və Musa a boyo.

²⁸ A hangɨn Simiyon a ɗifdə tɨfəngɨn a luu nze. Nda ɓondi Həmɨnpwa ta sa atɨ,

²⁹ “Hye Həmɨmiye Magbake, zə ɗaka kɨsa dəw a nda ɗaka vɨratə a muɗə ka hanɨngtə ɓətɨya hye boyo.

³⁰ Hɨn naa Nzə-mbəhaa ka dii,

³¹ hye vədən gə nda mbədə myee dəw, ka mbiɗitɨ mi vɨratə kat.

³² Sɨnə ɓɨrte ɓa bɨldə Həmɨnpwa a haka myee aa leerən, sɨnə fukata myee dəw, a mi Israila.”

³³ Yə sɨnggə Yesu a ndələ ka ləməgye Simiyon a boyo.

³⁴ Simiyon a lama kaarən pepe. Nda sa Maryamu atɨ, “Gəkɨlə le da nzanga ɓwaare hananang a vor Israila ɓa pawo a fokə, ɓa ɗɨkdə imi mgban təna kangə dwat a ɗɨm mbətə. Imi hananang ɓa kworən, sɨnə ɓətɨ sɨgbəshi la ɓwaare a kwo tənaa mwakan.

³⁵ Maryamu, kwote mye ɓa kwo nzanga ɓa shikəw ka səɗə-yedye hashi-hashi, ka yedi-kɨttɨ mwasasən. Yedi-kɨttɨngɨn ɓa pasa ma mya zubrən ka sungwa. Sɨnə ɓa ɗɨkə mya mba la a hubo ɓwaare a dɨmaadən a haa bwange bwang.”

³⁶ Itɨngɨn mgban kpalte mya dɨ wa atɨ Hanatu nee a Shafe. Kotə njita Fanuwel, dɨ kwirə Asha, matɨ kpantɨ iirati. Ngga nzaa hwoɗye ite kote rikiti, aa ɓongə, beetɨ kyawatə tukolukpe murəngrə a mbɨrə.

³⁷ Ngga nzaa nggamsawne kyawatə bəwtə fwa-fwat a mbiɗi-fwat. A vor kyawatɨngɨn kat, kote a Shafe mba-dɨ-mba, tukotə ka fəre. Ngga dɨ kala Həmɨnpwa gbəətə, ka hiwtə, ka gone.

³⁸ Ite Simiyon nee dɨ lama ka Maryamu ka Yusufu, Hanatu a pɨra a tiya ɓondi Həmɨnpwa. Nggi ta bwe le a nə Yesu ka myee dɨ kula fəra Urshelima ɓa ɗɨm nəngrə də ka gwadəha da Ma Həmɨnpwa a Yaɓwarən.

³⁹ Beetɨ ite Maryamu ka Yusufu ɗa sa kat ɓashita Həmɨnpwa a boyo, təna mɨnə Nazarat vɨraa nzaasərən a vor Galili.

⁴⁰ Yesu a pɨrə humwa ta nduko. Ndi ta la ka lele, gwadəha da Həmɨnpwa mgban nee ɓwaa kan.

Yesu ka mi kpan-kpani ji-lee kəndəshe a Shafe

⁴¹ Wanə-wanə, yə sɨnggə Yesu a dɨ zə Urshelima gə kwalə Lawuttə, a ite mi Israila a dɨmagə kɨsawne gə njiya Ijip.

⁴² Beetɨ ite Yesu a ɗa kyawatə bəw a mbiɗi-kpe, yə sɨnggən a zəkan a Urshelima gə Kwaləngɨn.

⁴³ Mye ɓe ɗa kwalə Lawuttɨngɨn mbəə, yə sɨnggən a kɨsa tɨfe ta muɗə hwoɗye, tənaa leyə atɨ tən ɗaka Yesu a bee a vor Urshelima.

⁴⁴ Təna woyo a ɗa bətə hiɗə təne dɨ kana atɨ Yesu nee a vor ɓwaaree dɨ muɗa. Ite təna niyə tənaa nan, təna tiya ɨlsən a vor mi leetə ka yə ndeweye.

⁴⁵ Tən ɓe woyo ɨltən dɨ ɗi le tənaa nan, təna ɓə mɨnə vor Urshelima ta ɨltən də.

⁴⁶ Beetɨ bətə mwaakɨn, təna pan a vor Shafe, sɨne nza waka mi kpan-kpani ji-lee kəndəshe, dɨ sa kwakingɨn dɨ kɨl la təna dɨ boyo, ndi ta ɗiyərən ləməgye mgban.

⁴⁷ Tən myee a hangɨn kat ta ɗa ndəle ka wule lele dan ka ləməgyee dɨ dɨma dɨ kwaamɨngɨn.

⁴⁸ Ite yə sɨnggən a pan a Shafe, təna ɗa ndəle kɨr-kɨr. Nuwogən a ɗiyən, “Nze de, mɨnə ɗa hye ɓə ɗenə yang? Hɨn ka baagu hina pɨrə ɨlsa a mbəgə hee ka yedi-kɨttə kɨr-kɨr gə hinaa nəw!”

⁴⁹ Nda ɗiyərən, “Mɨnə ɗa hwun ɓa ɓə ɨlti? Hwuna leyə atɨ ɓə kana na gə vor hwoda Baagi?”

⁵⁰ Tənaa lee naarə la nda dɨ boyo.

⁵¹ Nda koɗərən təna mɨnə Nazarat. Nda pɨrə humwa ta koddə yə sɨnggən. Nggi nuwogən mgban ngga kɨr ləməgingɨn ta səɗə nəngrən a hubosə.

⁵² Yesu a pɨrə humwa ta nduko ka lele, ta ɗɨm humwa-shengtə dɨ haka Həmɨnpwa ka ɓwaare.