Luka 18 - Ɓwaatiye New Testament

Byelə səɗe a nə ɗa hiwtə anəsə

¹ Yesu a ɗa lagbe dan a byelə səɗə gəkɨlə təna leyə atɨ ɓə kana tən tawa ɗa hiwtə anəsə, taa piyatidə ɓe tənaa ɓwa.

² Nda sarən, “A itɨ vɨrati, a nzə-ɓashiti nee də, ndaawa ndukodə Həmɨnpwa, ndaawa salə ama mgban.

³ A vor vɨratɨngɨn mgban itɨ nggamsati nee də. Metɨngɨn a duwa shi haka nzə-ɓashitɨngɨn mba-dɨ-mba ka nyitə, ngga san, ‘Ɓashiyimi ka diyale a wakashi ka nzə-nyaagi.’

⁴ “Ɓə ɓongə kote shi haka nzə-ɓashitɨngɨn, a kwamətə nda kwo gwate ɓa gwadə. Ndi ɓe səɗə ka yedingɨn, a kpawtə nda sa, ‘Nagi taawa ndukodə Həmɨnpwa, taawa salə ama mgban,

⁵ kat ka angɨn gəkɨlə kpasanə metɨnə a dɨ kpashi mba-dɨ-mba, na ɓashiyərə ka diyale gəkɨlə na piyagərə.’ ”

⁶ Də Yesu həmɨmiye a sa, “Hwun kɨl la nzə-ɓashitɨ hasa a boyo, ɗam ɗyangale a nə sa nda boyo dɨ bee!

⁷ Ɓə Həmɨnpwa mgban, ndaa dɨ gwadə myee dan 'ye nda taɗa, a 'ye dɨ ɗan hiwtə dɨ tuwon mba-dɨ-mba tukotə ka fəre? Ndi ɓa nza a ɗakarən ɗəng a ɓongə ndaa dɨ gwadərən?

⁸ Na dɨ səwnə ndi ɓa maɗə tan-tan a vərən sa kat təna dɨ mwo hakan. Kat ka angɨn a fəra hɨn Nze da Ɓwaara ɓa mɨna a vɨratə kan, hɨn ɓa sɨ ɗɨm myee ka mwadiyale a hubosərən?”

Byelə səɗe a nə nzə-Farisa ka nzə-luu taa shemtə

⁹ Yesu a ɗarən byelə səɗe a nə wule myee dɨ nggur nəngrən ɓətɨ tənə mi fyemye pɨrgə ɓwaare kat, tən ta ushi myee mbiɗi.

¹⁰ Nda sarən, “A fərə imi kpe a zə Shafe a Urshelima gəkɨlə təna ɗa hiwtə. Ma hiɗə nə Farisa, kpeyəsən nzə-luu taa shemti.

¹¹ Nzə-Farisangɨn a maɗə a kangə shant a haa mye ɓa nan də, nda ɗa hiwtə a sa atɨ, ‘Həmɨnpwa hɨn ɗəw usəkətə gəkɨlə hɨn tam ɓətɨ mbiɗiti ɓwaare a myee mahoryi, ka ji-ɗa səhase, ka sharye. Hɨn tam mgban ɓətɨ wule nzə-luu taa shemtɨrə.

¹² Na duwa gonə a laka kpe a vor bətə tukolukpe a pɨrgə ite hiwatə a kənə. Nagi ndo sə na ɗɨmə kat na dɨ takan a nggur hiɗə dɨ vor bəw a shikan a Shafe gə na vu.’

¹³ “Hɨnggə nzə-luu taa shemtɨngɨn, nda kangə ɓong-ɓong, ndaa nggwama atɨ nda bɨladə nəngɨn a haka ɓwaare. Ndaa maddə nəngɨn a pwa, nda tidə nəngɨn a njiya ta kpɨrip nzɨmsən ka hyatane, ta sa, ‘Kək! Həmɨnpwa, gwadi ɗa purushi, hɨn nzə-ɗa səhasə.’

¹⁴ “Diyalə na dɨ boyownə, ma hiɗə a nzə-luu taa shemtɨngɨn, sɨnə ma Həmɨnpwa a nggutən ma pepeyə ite nda dɨ muɗə hwoɗye, a pɨrgə nzə-Farisangɨn. Gəkɨlə ma nggur nəngɨn kat mya hyatan, ma mgban hyata nəngɨn kat mya fukadən.”

Yesu ka ji-kurkurye

¹⁵ Ɓwaare a shi ka ji-kurkurye kat ka ji-kpalamye a haka Yesu gə nda parən a ɗɨkərən fukatə. Ite lagbe dan a naa mingɨn təna gɨratɨrən.

¹⁶ Yesu a sa, atɨ a mya shi ka jingɨn a hakan. Nda sa lagbe dan atɨ, “Ɗakamə ji-kurkurye a təna shi hake, ɓe hwunaa omtɨrən, gəkɨlə həmne da Həmɨnpwa hɨnggə myee ɓətɨ jinə nə.

¹⁷ Diyalə na dɨ boyownə, ma kat aa luu həmne da Həmɨnpwa ɓətɨ nzə-ɓyeləngə, ndaa dɨ ga pɨrə vor həmnəngɨn.”

Makpanə nzə-gɨnətə

¹⁸ Ama kɨr-kɨrə da Yawude a ɗiyə Yesu atɨ, “Nzə-kəndəshe ma feme, mɨnə na ɗa na ɓə ɗɨm myente kaaru-kaaru?”

¹⁹ Yesu a san, “Mɨnə ɗa hye ɓə wari atɨ hɨn ma fema? Taa ama femə də, pɨrgə Həmɨnpwa hiɗə kal-kal.

²⁰ Hye lee gɨrahaa Həmɨnpwa a və Musa, ‘Ɓe ɗa sharawne, ɓe ɓɨl we, ɓe hɨri, ɓe kər-jeronye. Hye ndukodə baagu ka nuwogu.’”

²¹ Mangɨn a sa Yesu atɨ, “Hɨn koddə gɨrahangɨn kat ka swaɗəshi baa ɓəgəng.”

²² Ite Yesu a kɨl la nda boyo, nda san atɨ, “Se hiɗə ɓəmbə hye ɗongən. Muɗi wudə hye ɗərdə shee hye gə kaarən kat, hye ɓyana ji-poritə taangɨn, hye ɓa ɗɨm gɨnətə a vor pwa. Hye shea mɨna a kwaɗe.”

²³ Ite mangɨn a kɨl la Yesu a boyo, nda twaka kɨr-kɨr a virwo a muɗə gəkɨlə ndi nzə-gɨnəti kɨr-kɨr.

²⁴ Yesu a nidən ɓə twaka, nda sa, “Ɓa gəə sə oti nzə-gɨnətə a pɨrə həmne da Həmɨnpwa.

²⁵ Ka ite atɨ nzə-gɨnətə a pɨrə həmne da Həmɨnpwa, ɓa gə lukwaptə pupuluk ngga pɨrə dɨ gwo lerɨme.”

²⁶ Ɓwaaree kangə hangɨn, ite təna kɨl ləngɨn, təna ɗiyəsə atɨ, “Kək! Ɓə wonə a vor vɨratɨnə ɓa ɗɨm mbəta?”

²⁷ Yesu a sarən, “Sa ɓwaare aa mban a ɗa, a haka Həmɨnpwa sɨne pupuluk.”

²⁸ Bitrus a san, “Zə niyi, hin ɗaka shee kat hinə dɨ koɗu!”

²⁹ Yesu a san, “Ka diyale na dɨ səwnə, ma kat ɓa ɗaka hwodan, mesən, ji-nuwogən, yə sɨnggən, ka jingɨn gə həmne da Həmɨnpwa,

³⁰ mangɨn ɓa ɗɨm shee hananang ɓəgəng a vɨratɨnə, ka mɨni myente kaaru-kaaru a nzate ɓaga shi.”

Yesu a mɨna kəndə wule wa ɓa kɨttən

³¹ Yesu a wa lagbe dan bəw a mbiɗi-kpe a gyenge a sarən, “Hɨm nə dɨ wudəmə Urshelima, ləməgyee kpalyee kaaɗəng a doro a na hɨn Nze da Ɓwaara ɓa naa kat.

³² Mye ɓa vədi a tɨfə myee aa Yawude, tən ɓa sharti, tən ɓa dɨtti, a təfi nawye, a byengri, təna shea ɓɨlti.

³³ A mwaakɨnə bətə mgban, hɨn ɓa maggə we ka myentə.”

³⁴ Lagbe dan aa lee asə dɨ vor ləməgyee nda dɨ boyo, naarə ləməgingɨn a ɓogərən, tənaa lee ləngɨn.

Yesu a wana dii a welə

³⁵ Ite Yesu ka myee nda dɨ muɗə kaarən a tɨlə gbyel ka vɨra Jeriko, nda pa a welə, sɨne nza kwaka tɨfe dɨ nyitshe.

³⁶ Weləngɨn a kɨla ɓwaare hananang dɨ byeli pɨri, nda ɗi le, “Mɨnə dɨ ɓwaha ɓə?”

³⁷ Mya luwa a san atɨ, “Yesu dɨ Nazarat nə dɨ pɨri.”

³⁸ A hangɨn nda maddə kormɨngɨn a pwa ta waha, “Yesu, nze da Dawuda, ɗa purushi gwadi.”

³⁹ Tən mirə a humwa dɨ muɗi ɓwaa ka Yesu a gɨrarən a san atɨ a nda gbə kwaamɨngɨn a ɗaka waha. Nda shea maddə kormɨngɨn a pwa ta wagaha, “Nze da Dawuda, ɗa purushi gwadi.”

⁴⁰ Yesu a kangə, nda boyə ɓwaare a mya kɨsən kada a shikan. Ite nda tɨla, Yesu a ɗiyən,

⁴¹ “Mɨnə hye dɨ mwo atɨ na ɗəw?” Nda luwa a san, “Həmɨmiye, hɨne dɨ mwi atɨ na ɗɨm naa haa.”

⁴² Yesu a san, “Wana diinga hye ɗɨm naa haa. Weltə mbə gu, mwadiyale dəw mbəda.”

⁴³ A hangɨn tee gbyel, diingɨn a wonə, nda koɗərən ta ndukodə Həmɨnpwa. Myee naa mangɨn mgban a ɓondi Həmɨnpwa.