Luka 17 - Ɓwaatiye New Testament

Yesu a kənə lagbe dan shee a nə səhase ka nggurgə səhase

¹ Yesu a sa lagbe dan, “Myaa dɨ ɗongə shee ɓa ɗɨkdə ɓwaara a ɗa səhase, shezə sə oti ka ma ɓa gəə mgbaalə səhasəngɨn.

² Wule mangɨn, ɓa pɨrən mya ɓoyən tɨmtə a wurangɨn a ɗiman a vor gbɨnuwtɨ sɨkorən, ka ite nda ɗɨkdə nzə-ɓyelənge a ɗa səhase.

³ Gə-angɨn, nzam ka ɗaasɨtə. “Kpeyəsa kana ɗəw səhase, gɨrarən, ndi kana por-njiya, nggurən gən.

⁴ Ndi kana ɗəw səhase a laka tukolukpe a fəre hiɗə, ndi kana nyisu a laka tukolukpe atɨ, ‘Hɨn poru-njiya,’ nggurəngə səhasəngɨn.”

⁵ Kpe-lagbe dan a san, Həmɨmiye, “Zə nyerədə mwadiyale denə.”

⁶ Yesu Həmɨmiye a luwa a sarən, “Hwun kana gə ka mwadiyale nagi kəng-kəng ɓətɨ daasə bagalə, hwun ɓa mba bwetə a boyə kaɓa kada kpanaa ɓətɨ jiike atɨ, ‘Muɗa hye kangə vor gbɨnuwtɨ sɨkorən,’ kadangɨn ɓa koddə korminga.

⁷ “Na hye nee ka kɨsa dɨ ɗəw lyentə a gaashe, naasə mgban mbage nda dɨ jinu a kaake, ndi kana mɨna a hwoɗye, hye ɓa san atɨ, ‘Zə wa tan-tan nza piya hye zɨmshe’?

⁸ Ə'ə! Ndaa dɨ san atɨ, ‘Zə ɗe sɨzɨmtɨ kaade hye sɨ vi, hɨn kana zɨmshe a mbəə, hye shea ɗa hɨnggu a zɨma’?

⁹ Ndi ɓa kangə ta ɗa kɨsangɨn usəkətə gəkɨlə nda ɗa lyentɨ dan?

¹⁰ Sə mgban hwun kana ɗa sa mya ɗɨkdəwnə atɨ a hwuna ɗa, ɓə kana hwuna sa atɨ, ‘Hin kɨse ɓəmbə, lyente mya ɗɨkdenə atɨ a hina ɗa, kotə mbak-mbak hina ɗa.’ ”

Yesu a dɨmdə dagde dɨ sɨtɨ imi bəw

¹¹ Ite Yesu nee dɨ muɗə Urshelima, nda koɗə dɨ ɓoro-njiya waka Samariya ka Galili.

¹² Nda tɨla gbyel ka itɨ vɨraa ɓyeləngti, sɨne dɨ pɨrə vor vɨratɨngɨn, nda peyə ka ji-dagde bəw təne kangə haɓongətə.

¹³ Təna maddə kormingrən a waha bərəng, “Yesu Həmɨ-hwoɗye, zə ɗa purusenə.”

¹⁴ Yesu a nidərən a sa, “Zə wudəmə haka kɨsehəmye da Yawude, hwuna bɨlərən sɨsəwnə təna, pyeltəwnə kat.” Təne a nə tɨfe dɨ muɗi dagde a dɨmgə sɨsərən, təna gə shet-shet.

¹⁵ Manə hiɗə dɨ vorsərən, ndi ɓe niyə dagde dɨmə ɓə piya, nda mɨna ka beesən a haa Yesu a gə də nda maddə kormɨngɨn ta ɓondi Həmɨnpwa.

¹⁶ Nda shi a fukə mbwayi Yesu ta ɗan usəkətə. Mangɨn nəə nzə-Samariyati.

¹⁷ Yesu a ɗiyə, “A ɓwaare bəw mya dɨmərən də dagde ma? Ɓə a ndo haa gə myee mbiɗi dombiɗa?

¹⁸ Taa ama də mgban ɓa mɨna asɨ humwa Həmɨnpwa a ndukodən, rumanə nə ɓəmba?”

¹⁹ Yesu a san, “Zə maɗi muɗi, mwadiyale dəw vu sɨtɨ dwattə.”

Shita həmne da Həmɨnpwa

²⁰ Ite i Farise a ɗiyən lə fəra həmne da Həmɨnpwa ɓa shikan, Yesu a sarən, “Di həmne da Həmɨnpwa aa dɨ shi bwang hwun ta nan ka diingəwna.

²¹ Ɓwaare mgban aa dɨ nza ɗəng ta sa atɨ, ‘Niyəm sɨnə ganə!’ Naasə ‘Niyəm sɨndə gaarə!’ Səɓo həmne da Həmɨnpwa nə a wakasəwnə.”

²² Nda mɨna sa lagbe dan, “Fəre nee dɨ shi, hwun ɓa hɨma atɨ giɓa hwuna naa fəra hɨn Nze da Ɓwaara ɓa mɨnakan, shezə hwunaa dɨ naa fərəngɨn.

²³ Ɓwaare ɓa maɗə ta səwnə atɨ, ‘Niyəm sɨndə gaarə!’ Naasə ‘Niyəm sɨnə ganə!’ Ɓe hwunaa maɗə ta gyeɓi ta mbəgə hee ɓaa, atɨ hwun ɓa ɨltən.

²⁴ Gəkɨlə shitɨ de hɨn Nze da Ɓwaara, ɓa gə ɓətɨ wuɗilta mgbarati a pwa, a nggi kana wuɗilə a gyenganə, ngga muɗə kiɗar a fukə gyengaarə.

²⁵ A kwamətə hɨn ɓa tənə kɨr-kɨr, mi wanetɨnə ɓa kwori.

²⁶ “Naya a gə kaaɗəng a nzata Nuhu, sə mgban ɓa gə a fəra hɨn Nze da Ɓwaara ɓa mɨna a vɨratə kan.

²⁷ Ɓwaare a pɨrə zəmshe ka soɓwe, tən ta ɗəməsə mandye baa tənaa yə lee fəra Nuhu a pɨrə koombote nda ɗa. Haɓye a shi pəltə a bəə, təna soɓwo a mbərə kat.

²⁸ “Sə mgban a nzata Lutu. Ɓwaare a nza ɗəng ta zɨməsəshe, ta soɓwi, ta ɗəri a ɗərdərən, ta hawi ta nwoshe,

²⁹ baa tənaa yə lee fəra Lutu a dɨmgə vor vɨratɨ Sodom də. Də ɗiye ka kundɨrə kyanatə a janga dɨ pwa ka jeemingɨn a njemə nəngrən, təna hyenə a mbərə kat.

³⁰ “Sə mgban ɓa gə a fəra hɨn Nze da Ɓwaara ɓa mɨna a vɨratə kan.

³¹ A fərəngɨn ma kat a nə vɨne ɓe ndaa yə mɨna a pɨrə hwodan atɨ ɓa nggur asə nda ɓə giɓə a dɨmə. Ma mgban gaarə a gaashe dan, ɓe ndaa yə viriwa atɨ ɓa nggur asə nda ɓə giɓə.

³² Hwuna ɗyanga ka sa bəng metɨ Lutu.

³³ Ma kat ɓəri atɨ ɓa kəpdə myensən, ɓa ɗongərə, ma mgban ɗongə myensən, ndi ɓa kəpdə.

³⁴ Hɨnə dɨ səwnə a tukotɨngɨn ɓwaare kpe ɓa pukə dingɨltə ta sheni, mya nggur ma hiɗə a ɗaka hiɗə.

³⁵ Mandye kpe mgban ɓa kopo ta sɨda a mgbe-təmye, mya nggur mate hiɗə a ɗaka hiɗə.”

³⁷ Lagbe dan a ɗiyən atɨ, “Həmɨmiye, a ndo haa shingɨn ɓa ɗa?” Nda sarən atɨ, “Haa wo duwe a bə də, də mgban nzəkɨlikitə ɓa peyə.”