Luka 15 - Ɓwaatiye New Testament

Byelə səɗe a nə mbagate kipi

¹ Ji-luu taa shemtə ka tataryi ɓwaare a peyə a takadə Yesu ta kɨltən.

² Də Farise ka ji-lee kəndə ɓashita Musa a nggwonshe ta sa atɨ, “Zə namə manə peyi ka tataryi ɓwaare dɨ zɨmshe.”

³ Yesu a ɗarən byelə səɗe nda sa atɨ,

⁴ “Wonə a vorsəwnə ka mbage haru, hiɗə dɨ vorsərən a kipə. Ndaa dɨ ɗaka irə bəwtə dombiɗə a mbiɗi-dombiɗə a haa zəmtə a wudə a ɨl itɨrə kipi a ɗɨmatɨra?

⁵ Hye kana naarə mgban, hye ɓa nggura ka hanɨngtə a wuranga,

⁶ a muɗa a hwoɗye. Hye payaa yə ndewegu ka ji-vɨnəgu kat, hye sarən atɨ, ‘Mya ɗam hanɨngtə gə hɨn naa mbagatɨ de ite kipi.’

⁷ Sə mgban mya ɗa hanɨngtə gaarə a vor pwa a nə ɓwaara hiɗə a por-njiya ka səhase dan, a pɨrgə mirə bəwtə dombiɗə a mbiɗi dombiɗə a mi fyemye 'ye aa por-njiya.

Byelə səɗe a nə taa nggɨrngɨma kipi

⁸ “Ɓə mgban wonə mete taa nggɨrngɨme hiɗə dɨ vor bəw kana kipgərə, nggaa dɨ fin ɗiye a kɨsadə tikɨle, a fegə vor hwoɗye pepe a ɨl taangɨn a nan?

⁹ Na nggi nan, nggi ɓa waga yə gyenəgərə ka ji-vɨnəgərə təna paya kat. Nggi ɓa sarən atɨ, ‘Gwamdi ɗa hanɨngtə gə taa de a kipi hɨn nan.’

¹⁰ Sə mgban Həmɨnpwa ka malyenye dan irə gaarə a vor pwa a dɨ ɗa hanɨngtə gələ ma hiɗə a por-njiya ka səhase dan.”

Byelə səɗe a nə nza kipi

¹¹ Yesu a pɨrə humwa ka byele, nda sa atɨ, “Ama nə də ka ji-morye kpe.

¹² Ma swaɗe a sa baagən atɨ, ‘Baa, gɨnəte hye gə kaarə, zə vi basa de ɓəgəng.’ Baagən a takarən a gɨnətə.

¹³ Aa ɗɨm bətə, nzə-ma swaɗe a luu gɨnətɨ dan kat, a pedə taangɨn a dɨmə a muɗə itɨ vɨrati ɓong-ɓong, a kɨɗa gɨnətɨ dan kat, a woyo ɓaye ka nzaa tukuttə.

¹⁴ Ndi ɓe kɨɗa gɨnətɨ dan kat mbəə, myatə a shea fuka a bətɨ hangɨn kɨr-kɨr. Myatə ta gən, nda tiya tənətə.

¹⁵ Nda maɗə a wudə ɨl lyentə a haka ama a vɨratɨngɨn. Nda vən jin gusune gə ndi ta vərən sɨzɨmtə.

¹⁶ Myatə ɓə gən yang, nda mwo atɨ nda zɨm sɨzɨmta gusune, a ɓə taa ndəng ma də ɓa vən sɨzɨmtə.

¹⁷ “Nda nza a səɗə ka yedingɨn a mɨna a nəngɨn pepe, nda sa, ‘Zə niyəm, a baagi nə ka mi somye dɨ ɗan lyentə hananang, dɨ zɨmshe ɓaa a mbiɗarən, she hɨnə ganə dɨ mbɨri ka myatə!

¹⁸ Ndɨka na maɗə a muɗə hwoɗye a haka baagi. Na san atɨ, baa, hɨn ɗa Həmɨnpwa səhase, hɨn ɗəwnə səhase mgban.

¹⁹ Ɓe myaa yə wari atɨ hɨnə nzəngəwnə gəkɨlə taa kəni. Ndɨka hwuna mɨndi ɓətɨ hiɗə dɨ vor mi somyee dɨ ɗəwnə lyentə.’

²⁰ Nda maɗə a nggur tɨfə hwoɗye ɓa mɨnə haka baagən. “A haa ɓongətə, baagən a niyə a nan dɨ shi, lə nzəngɨn a orən kɨr-kɨr, nda giɓə a jiprən a kpɨriprən ka mwoha ka hɨmne.

²¹ “Nzəngɨn a san, ‘Baa, hɨn ɗa Həmɨnpwa səhase, hɨn ɗəwnə səhase mgban. Ɓe myaa yə wari atɨ hɨnə nzəngəwnə gəkɨlə taa kəni.’

²² “Də baagən a mgbɨmrən, a sa kɨse dan 'ye dɨ dan lyentə a vor hwoɗye atɨ, ‘Maɗəm tan-tan. Ngguram rukute kamən, hwuna ɗɨkən sɨgyeltə a gyelsən, hwuna dəmən hwanye a mbwayingɨn.

²³ Kɨsam gbinda naaka a vor hwoɗye hwuna ɓɨlə, mya zɨməm a ɗam hanɨngtə,

²⁴ gəkɨlə nze de a na kana atɨ ɓə mbɨrə, sɨnə ka myentə, hɨn kana atɨ ɓə kipə, sɨnə ɓə mɨna.’ Də təna tiya ɗa hanɨngtə.

²⁵ “Mye nee a vor hanɨngtə, ɓə ndi nzə-gbakaye sɨndə a gaashe, ndi ɓe maɗa dɨ muɗa a hwoɗye, nda kɨla kormi sɨtəwtə ka dyemshe a hwodarən.

²⁶ Ite nda tɨla gbyel ka hwoɗye, nda wa hiɗə dɨ vor kɨse da baagən a ɗiyən lə sa mya dɨ ɗa a vor hwoɗye.

²⁷ Mya san, ‘Mufanga a kipi, sɨnə mɨna, baagu a bɨlən gbinda naake, gə mɨnate nda mɨna ka myentə ka sɨtɨ dwattə.’

²⁸ “Jibiye a ɗa muune, a kwo pɨrtə a hwoɗye. Baagən a dɨmə a dɨ pan, a nyisən gə nda pɨrə hwoɗye.

²⁹ Nda sa baagən atɨ, ‘Zə niyi kyawatə ka kyawatə, hɨnə dɨ ɗəwnə kɨsawne. Taa ndaga kwownə lyentə, kat ka itɨngɨn nagi nzə-bogərə kpamləmənti, hwunaa ndaga vi gə hina zɨmə a ɗa hanɨngtə ka yə ndewegi.

³⁰ She nzəngəwnə, a dɨɗə ɓaya woyi byengdə gɨnətɨ dəwnə a nə kadawe nda ɓə mɨna, shee sɨnə a hwuna ɓɨlən naake!’

³¹ “Baagən a san, ‘Hii nzə-twaye de! Aa myenə kəw ga a vor hwoɗye fərə-fərə ma? Dii sa na gə kan kat hɨngguna.

³² Kat ka angɨn ɓə kana mya ɗa hanɨngtə gəkɨlə mufanga a mbɨri, mɨna ka myentə supo, nda kipə, ɓə dɨma.’ ”