Luka 11 - Ɓwaatiye New Testament

Hiwte Yesu a kənə lagbe dan

¹ A fərə Yesu a ɗɨmə a muɗə a haa gə nda ɗa hiwtə. Ndi ɓe ɗa hiwtə mbə, hiɗə dɨ vor Lagbe dan a nyisən, “Həmɨmiye, zə kənenə ɗa hiwtə ɓətɨ Yohana a kənə Lagbe dan.”

² Nda sarən, “Hwun kana ɓa ɗa hiwtə hwuna sa atɨ, “ ‘Baatə, maa kwakɨ ɗəmɗəme dəw a ɗɨm fukatə, həmne dəw a shi.

³ Venə sɨzɨmte hin ɓa zɨmə supo.

⁴ Hye nggurenə gə səhase denə, gə hin mgban hina dɨ ngguro nagi ndo ma gə səhase dan a nda ɗenə. Ɓe ɗakenə hina pɨrə vor kadawe.’ ”

⁵ Nda sarən, “Wonə a vorsəwnə ka ndewete hye ɓa maɗə a wudə hakan ka vor tukotə a san atɨ, ‘Ndewe, gwadi ka goɓoryi buroditə mwaakɨn,

⁶ a omo nə shike ka tukongnə, ndeweginə. Taa ɗɨm sa hɨn ɓa vən nda zɨmə ɓəgəng.’

⁷ “Ndewete a vɨne a luwa a san atɨ, ‘Ɗake ɗəng ɓe yə kɨɗa yedi, hɨn pɨrə vɨne ka je de, hin gbəə kwaamɨ vɨne gbangɨrən, taa dɨ mba mattə a vu asə.’ ”

⁸ Yesu a sa, “Nagi ma bə vɨne aa salə gwasən gələ ndi ndeweti, kat ka angɨn gə kangte ndewegən a kangə a dɨ kwal-haa anəsə-anəsə, ndi ɓa maɗə a vən sa kat nda dɨ mwo.

⁹ “Gə-angɨn na dɨ səwnə atɨ: Nyisəm, mya vəwnə. Ɨləm, hwun ɓa ɗɨmə. Kwaləm haa, mya wunəwnə a kwa-haa.

¹⁰ Gələ ma nyishi kat, mye ɓa vən, ma ɨli, ɓa ɗɨmə, ma kwal-haa, mye ɓa wunan a kwa-haa.

¹¹ “Wonə baate a vorsəwnə a nzəngɨn ɓa nyisən vaake, nda kang nzə-mgbəndye a vən?

¹² Wonə mgban nzəngɨn ɓa nyisən ɗulo ɗeke, nda kang giɗingətə a vən?

¹³ Aa dɨ gə sə. A hwun myee ji-ɗa səhasə, hwuna lee vəte hwun ɓa və jingəwnə shi-pepeye. Ɓə ya Baagəwnə arə a vor pwa, a ma pɨrgəwnə ka ɗa səfeme, ɓa ɗa nda ɓə ɗongə vəte ɓa vəwnə Pitɨ Ɗəmɗəmtə a hwun myee dɨ nyisən?”

Yesu ka Belzabub

¹⁴ A fərə Yesu a dɨmdə nzə-dwatə dɨ sɨtɨ ama, a ma nzə-dwatə a ɗɨkdən ndaawa byelə. Pɨla nzə-dwatə ɓe dɨmə, mangɨn a tiya byele, ɓwaare kat a ɗa ndəle.

¹⁵ Imi a vorsərən a sa atɨ, “Kaiya! Ka gəta Belzabub həme da pɨle ji-dwatə nda dɨ dɨmdə pɨle ji-dwatə gə sɨtɨ ɓwaare.”

¹⁶ Imi mgban a kanarən təna san atɨ nda bɨlərən a səkushipə dɨ pwa, gə təna mwa atɨ dɨ haka Həmɨnpwa nda shi.

¹⁷ Yesu ɓə lee la a hubosərən, nda sarən atɨ, “Kat həmna ndɨlkasə təki kpe, aa dɨ kangə. Sə mgban hwoɗyee kat ndɨlkasə təki kpe, hwoɗingɨn aa dɨ kangə tən ɓa fukə.

¹⁸ Aɓə Shetan kana ndɨlə a dɨ nya ka nəngɨn ta dɨmdə pɨle ji-dwatə, ya həmne dan ɓa ɗa nda kangə? Ɓə ya hwuna sa atɨ ka gəta Belzabub həme da pɨle ji-dwatə na dɨ dɨmdə pɨle ji-dwatə gə sɨtɨ ɓwaare?

¹⁹ Shezə anda ka gəta Belzabub na dɨ dɨmdə pɨle ji-dwatə dɨ sɨtɨ ɓwaare, ɓə myee dəwnə mgban? Ka gəta wonə təna dɨ dɨmdə pɨle ji-dwatə dɨ sɨtɨ ɓwaare? Gə-angɨn, myee dəwnə 'ye dɨ dɨmdə pɨle ji-dwatə mgban ɓa ɓashiyəwnə a nə ləməgyee hwuna dɨ boyo.

²⁰ Hɨn, anda ka gəta Həmɨnpwa na dɨ dɨmdə pɨle ji-dwatə gə sɨtɨ ɓwaare, həmne da Həmɨnpwa shi hakəwnə.

²¹ “Di Shetan nə ɓətɨ gbinda a pɨrə shi nyatə ɗa murowne kanyi dɨ gɨra hwodan, gə ɓe asə aa gəə gɨnətɨ dan.

²² Hye kana niyə mgban ma pɨrgən ka gbindawne kat ka murowne kana pɨra a vor hwoɗye, ndi ɓa kɨt gbinda hwoɗingɨn a ɓoyə a parangə sɨ nyatɨ dan 'ye nda mwakarən, nda por sɨkule.

²³ “Di ma kat tam ɓwaa ke nzə-kwo na nə, ma mgban aawa gwadi pedə shee a haa hiɗə, vyata mangɨn a dɨ vyatarən.

²⁴ “Pɨla nzə-dwatə kana dɨmgə sɨtɨ ɓwaara, nda dɨ pərəsə a vor ɓaawe a hee kpamtə ta ɨl ma ndi ɓa ɗɨm haa a sɨsən a pɨrə a nza a piyadə. Ndi kana niyə ndaa ɗɨm haa nzatə, ndi ɓa sa, ‘Ndɨka na mɨnə hwoɗyee a sɨtɨ ma na dɨmagən.’

²⁵ Ndi kana mɨna asɨ pa hwoɗingɨn mye fegərən ɗadərən pepe taa asə a vorsərən,

²⁶ pɨla nzə-dwatɨngɨn ɓa mɨnə a pwara i ji-dwati tukolukpe 'ye hashi pɨrgən. Təna pɨra a nza sɨtɨ mangɨn a ɗa hwoɗye də. Kpawtɨ nzata mangɨn a dɨ hasə a pɨrgə i kwamətə.”

²⁷ Yesu nee a vor bwe ləməginə, i meti a maddə kormɨngrə a sa atɨ, “Kək! Həmɨnpwa ɗa nuwogu ite mwasara, shewda sə pepeye.”

²⁸ Yesu a luwa a sa, “Myee pɨri ka pepeta Həmɨnpwa nə myee dɨ kɨl le da Həmɨnpwa təna koddən.”

Ɓwaare nee dɨ ɨl sɨgbəshe

²⁹ Ite ɓwaare paya dɨ ləki, Yesu a sarən, “Hwun mi wanetɨnə ɓwaare hashe ji-ɗa səhase. Hwun mba nyittə nee atɨ na bɨləwnə sɨgbəshe dɨ haka Həmɨnpwa. Taa i sɨgbəshi də na bɨləwnə a pɨrgə wule a da Yunana.

³⁰ Ɓətɨ a bəng Yunana a gəə sɨgbəshi a haka mi Nineva, sə mgban hɨn Nze da Ɓwaara ɓa gəə sɨgbəshi a haka mi wanetɨnə.

³¹ A fərə ɓashitə, hwun mi wanetɨnə, hwun kana kangə humwa Həmɨnpwa ka həmte shi dɨ basa ɓayang, nggi ɓa mbəwnə ka ɓashitə gəkɨlə ngga nggura tɨfe ɓong-ɓong gələ ngga sɨ kɨl kormi lele da həmɨn Solomon. Supo ma pɨrgə həmɨn Solomon nə kangə wakasəwnə.

³² Sə mgban a fərə ɓashitə, mi Nineva kana kangə kəwnə a humwa Həmɨnpwa, tən ɓa mbəwnə ka ɓashitə, gəkɨlə təna kɨl kormi Yunana a por-njiya ka səhase darən. Ɓəgəng ma pɨrgə Yunana ka fukatə nə kangə wakasəwnə.

Tikɨlə sɨtə

³³ “Di taa ndəng ma də a ɓa kɨsadə tikɨle a ɓodən, naasə nda nggur kpaa a kupon. A haa mgbənge mya dɨ kangdə tikɨləngɨn gəkɨlə ma kat pɨra a vor hwoɗingɨn nda naa haa ka ɓɨrtɨngɨn.

³⁴ Tikɨlə sɨtɨ ɓwaara nə diingɨn. Diinga kana naa haa pepe, sɨsa kat ɓa ɗɨm ɓɨrtə. Hye kana niyə se a ɓow a diinga mgban, sɨsa kat ɓa gəə kuliti.

³⁵ Bədə myensa ɓe ɓɨrte a sɨsa aa gəə kuliti.

³⁶ Gə-angɨn hye kana niyə sɨsa kat kana gə ka ɓɨrtə, taa a haa a sɨsa ɓa gə ka kulitə. Angɨn nə ɓətɨ ɓɨrtɨ tikɨla takadə ma.”

Yesu a dɨka Farise ka ji-lee kəndə ɓashita Musa

³⁷ Ite Yesu a bwe ləməginə a mbəə, ama dɨ vor Farise a warən a zɨmshe a hwodan. Nda pɨrə hwoɗingɨn a nza haa zɨmshe.

³⁸ Nzə-Farisangɨn a bəə diisən a niyə Yesu aa ɗa sɨkwalə suɓwa tyefye da Yawude nda ɓə nzaa zɨmshe, le a ɓwan.

³⁹ Də Yesu Həmɨmiye a san, “Hwun Farise, hwuna dɨ suɓwagə beetɨ kpee ka dwe, hwuna shea ɗaka vorsərən ka ryektə, shezə vor hubosəwnə nə naa pas ka omshe, ka kwakaɗɨkatə.

⁴⁰ Hwun dəɗye! Ma ɗa beetɨ kpaa ɓwaa, aa sɨnə mgban ɗa vorsən ma?

⁴¹ Ɗakamə nzɨmwe, gwamdə ji-poritə ka sa a vor kpee dəwnə, gə hwuna gə shet-shet a humwa Həmɨnpwa.

⁴² “Kək kwe Farise! Hwun kana taw mbwale, ka gɨrətə, ka ndaambe, ka bamta ka mbiɗiti jibe kat, hwuna dɨ takarən a nggɨl hiɗə dɨ vor bəw a və Həmɨnpwa. Shezə hwuna ɗaka mwo Həmɨnpwa ka koddə ɓwaare a kwatɨfa kana. Gə-angɨn sə oti kəwnə! Ɓə kana hwuna mwo Həmɨnpwa a koddə ɓwaare a kwatɨfa kana, hwuna pɨrə humwa mgban ta ɗa mbiɗitɨ shingɨn.

⁴³ “Sə oti kəwnə kwe Farise! Gə hwuna dɨ mwo hee nzatɨ kpan-kpanye a humwa ɓwaare a vəni kəndəshe. A vor lumotə mgban hwuna mwo atɨ mya wunakəwnə a gyerə njiya.

⁴⁴ “Sə oti kəwnə kwe Farise! Hwunəə ɓətɨ taanə peyi kpangɗing ka njiya mya liɓa, ɓwaare a dɨ woyo nəngrən, tənaa leyə atɨ təne dɨ takɨma nəngrən.”

⁴⁵ A nzə-lee kəndə ɓashita Musa a luwa a sa Yesu atɨ, “Nzə-kəndəshe, ləməgyee hye dɨ boyo, dɨɗə hye dɨ dɨttenə a dɨ genə wak.”

⁴⁶ Yesu a san, “Sə oti kəwnə mgban kwe myee lee kəndə ɓashita Musa! Gə hwuna dɨ ɓwe sɨtɨre dɨksɨksɨk 'ye ɓwaare aa dɨ mbarən a ngguro, hwuna mbolərən a nəngrən. Shezə hwun ka nənəngəwnə hwunaa ɗa asə gə hwuna gwadərən nggur shingɨn.

⁴⁷ “Mɨni ɓə hwuna dɨ fukadə kpalye a kang fare a nyemye. Shezə tənə kpalyee yə jigəwnə a ɓələ kaaɗəng.

⁴⁸ Gə-angɨn hwun bɨlə bwang atɨ hwun mwaka sa yə jigəwnə a ɗa, ka ite təna ɓəl kpalingɨn, hwun mgban hwuna shea kangə ta kang fare a nyemye. Sə oti kəwnə!

⁴⁹ Gəkɨlə angɨn Həmɨnpwa a vor lele dan nda sa, ‘Hɨn ɓa lyenərənshe ka kpalye ka kpe-lagbe. Tən ɓa ɓəl imi dɨ vorsərən, imi mgban təna tənəə dərən.’

⁵⁰ Gələ angɨn Həmɨnpwa ɓa ɓashiyəwnə hwun mi wanetɨnə gəkɨlə zaambə kpalyee mya ɓələ dɨ fəra Həmɨnpwa a kwak vɨratə kan dɨmə fəranə supo.

⁵¹ Kpalyee mya ɓələ nə peyi ka Habila dɨmə nzata Zakariya a mya ɓɨlə Kwa-Shafe gbyel ka kɨritɨ vədə hamatə. Diyalə na dɨ boyownə, Həmɨnpwa ɓa ɓashiyəwnə hwun mi wanetɨnə gə shingɨn kat.

⁵² “Sə oti kəwnə hwun myee lee kəndə ɓashita Musa! Gəkɨlə hwuna gbəə tɨfə lee ləməgye da Həmɨnpwa. Hwunaa pɨrə, hwunaa ɗaka myee dɨ mwo pɨrtə təna pɨrə.”

⁵³ Ite Yesu a dɨ ɗaka hangɨn, ji-lee kəndə ɓashita Musa ka Farise a naa pas ka muune a nə ləməgingɨn. Gə-angɨn təna ndəltən ka ləməgye hananang,

⁵⁴ gəkɨlə ndi kana luwa təna ɗɨmgən le.