Luka 10 - Ɓwaatiye New Testament

Yesu a mɨna lyen i lagbe bəwtə tukolukpe a mbiɗi-kpe

¹ Beetɨ shinə kat, Yesu Həmɨmiye a nggɨl i lagbe bəwtə tukolukpe a mbiɗi-kpe a lyentɨrən kpe-kpe gə təna luwon kwamətə a zə vɨre som-som 'ye nda mwo atɨ nda zə də.

² Nda sarən, “Lyentɨ ngguragə shi hawtə gə kaake nə kpan, gələ shi hawtə naa kən nggurati mya ngguragərən gə kaake, shezə ji-lyentə aa furo. Zə nyisəmə həmɨmiye ndi həmɨ gaashe, gə nda lyanashe ka ji-lyentə a vor gaashe dan.

³ Wudəm, hɨnə dɨ lyentəwnə ɓətɨ ji-mbage a vor alehawye.

⁴ Ɓe hwunaa nggur pititə, nagi zambɨramə, ɓe hwunaa por i hwanyi, ɓe hwunaa pɨrə wunakaha a nə tɨfe.

⁵ “Nagi a ndo hwoɗi hwuna pɨrə, tiyam wunakaha ka satə atɨ, ‘Naa ɗolta Həmɨnpwa a nza ɓwaa kəwnə mi hwoɗinə.’

⁶ Anda myee a hwoɗingɨn lurəwnə gə hiwte hwuna ɗarən, ɗoltə ɓa janga a nəngrən. Anda tənaa lurəwnə mgban hiwtɨ dəwnə aa dɨ gwadərən, nggi ɓa mɨna kəwnə.

⁷ Hwoɗyee hwuna pɨrədə, nzam də, zɨməm sa təna vəwnə, hwuna sop sa kat təna vəwnə, nzə-lyentə kana nda ɗɨm moonə lyentɨ dan. Ɓe hwunaa woyi ta taka a nza hwoɗəgye som-som.

⁸ “Nagi a ndo vɨrati hwuna zə, mye kana lurəwnə, zɨməm sa kat təna vəwnə.

⁹ Dɨməmdə ootə gə sɨtɨ ɓwaare hwun ta sarən atɨ, ‘Həmne da Həmɨnpwa shi gbyel kəwnə.’

¹⁰ Nagi a ndo vɨrati mgban hwuna pɨrə mingɨn aa lurəwnə. Dɨməmə wake hwodarən a nə təfəgye. Hwuna sarən atɨ,

¹¹ ‘Hinə dɨ kpɨwgə bɨr-bɨrə vɨratɨ dəwnə a hina poro mbwayingenə, gəkɨlə kɨɗa ɓe hwunaa sa atɨ myaa boyownə. Kat ka angɨn, leyəm atɨ həmne da Həmɨnpwa shi gbyel.’

¹² Hɨnə dɨ boyownə atɨ, a fərə ɓashitə, ndɨka ɓashite a nə mi Sodom a nə hɨnggəwnə.

¹³ “Sə oti kəwnə kwe mi Korazin, sə oti kəwnə mgban hwun mi Betesda. Gəkɨlə wule shikoshopye mya ɗa a vorsəwnə a mye nda ɗa wule ingɨn a waka mi Taya ka Sidon, giɓa atɨ kɨnɨnɨng tən nda kala shigone a shiyakɨshe ka fitə ɗiye a nəngrən gə təna bɨldə por-njiya darən.

¹⁴ A fərə ɓashitə, ndɨka ɓashite a nə mi Taya ka Sidon a nə hɨnggəwnə.

¹⁵ Ɓə hwun mi Kafanawum mgban, hwuna dɨ niyə ɓətɨ Həmɨnpwa ɓa fukadəwnə a pwa ma? Ə'ə! Di ndi ɓa jengdəwnə a njiya kpalame.”

¹⁶ Yesu a virwo haka lagbe dan a sarən atɨ, “Ma kɨltəwnə kat ɓə kɨlti, ma kworəwnə mgban ɓə kwori, ma kwori ɓə kwo Baagi a lyanari.”

Mɨnata lagbe bəwtə tukolukpe a mbiɗi-kpe

¹⁷ Tən lagberə bəwtə tukolukpe a mbiɗi-kpe, a mɨna ka hanɨngtə. Təna san, “Həmɨmiye, kat ka pɨle ji-dwatə, tən koddenə gə kwakɨnga.”

¹⁸ Nda sarən, “Hɨn naa Shetan dɨ fuka dɨ pwa ɓətɨ wuɗiltɨ mgbarati.

¹⁹ A vor kwaka hwun ɓa mwagə rokonye ka gyeɗənye, hwun ɓa gbaagə gəta nzə-nyaagəwnə Shetan, asə aa dɨ gəwnə.

²⁰ Kat ka angɨn, ɓe hwunaa ɗa hanɨngtə gə pɨle ji-dwatə a koddəwnə, na hanɨngəwnə gə atɨ gələ mye dor kwakingəwnə gaarə a vor pwa.”

Yesu a ɗa hanɨngtə

²¹ A vor bətɨngɨn Yesu a ɗa hanɨngtə kɨr-kɨr, a vor gəta Pitɨ Ɗəmɗəmtə nda sa, “Hɨnə dɨ nduko da kwe Baa, Həmɨmiye hye ma ɗa pwa ka njiya, gəkɨlə hye ɓodə shinə gə haka ji-lele ka myee ka kuta. Hye shea bɨlə myee aa lee asə ɓətɨ ji-kurkuryi. Sə gən Baa, gələ mwosa nə.

²² “Baagi ɗake a nagi ndo sə kat. Taa ndəng ma lee Nze pɨrgə Baatə ɓəmbə. Taa ndəng ma lee Baatə mgban pɨrgə Nzəngɨn ɓəmbə, ka myee nzəngɨn a nggɨlə gə nda bɨlərən Baatɨngɨn təna leerən.”

²³ Yesu ɓe tawa ka lagbe dan nda sarən, “Hwunə myee Həmɨnpwa a wulakəwnə gə diingəwnə a naa shinə.

²⁴ Hɨnə dɨ boyownə, kpalye ka həmye hananang kula ka hɨmne gə təna naa shee hwuna dɨ naarən tənaa naarən, gə təna kɨl la hwuna dɨ kɨlə, shezə tənaa kɨlə.”

Wonə nzə-vɨnəgi

²⁵ Myene də tee, a nzə-lee kəndə ɓashita Musati a shi haka Yesu gə nda kanarən, nda ɗiyən, “Nzə-kəndəshe, mɨnə kana na ɗa na ɓə ɗɨm myente kaaru-kaaru?”

²⁶ Yesu a luwa a ɗiyən, “Nda a shiya mya doro ɓashita Musa? Hye nda dɨ bələ leetɨ dəw ya?”

²⁷ Mangɨn a luwa a san, “Ɓashita Musa a sa atɨ, ‘Hye mwo Həmɨmiye Həmɨnpwatɨ dəw ka hubosa kat, ka myensa kat, ka nyerəsa kat, ka ɗyangale dəw kat.’ Hye mɨna, ‘Mwo nzə-vɨnəgu ɓətɨ hye mwo nanga.’”

²⁸ Yesu a san, “La hye boyo, sə gən, zə ɗaasə hye ɓa ɗɨm myentə.”

²⁹ Mangɨn leyə atɨ Yesu takrən ka byele, nda ɓərə gə nda ɗɨm nəngɨn, nda ɓə ɗiyə Yesu, “Ɓə nda wonə nzə-vɨnəgi?”

³⁰ Yesu a luwan ka byelə səɗe atɨ, “Ama a dɨma dɨ Urshelima ɓa jengə Jeriko, nda peyə ka mahərye təna lyebrən a porgən shee kat, a muɗə a ɗakan zaaza.

³¹ A kɨsahəmə da Yawude a nggura tɨfəngɨn asɨ pan bə nə tɨfe, nda darə a pɨr sɨnggən a muɗə.

³² Sə mgban a nzə-gwaha ka lyentə a Shafe a tɨla asɨ pan bi, nda mɨna darə a pɨr sɨnggən a muɗə.

³³ Mɨni ɓə a murə Samariyati a nggura tɨfəngɨn nda sɨ pa mangɨn nee bi, nda nidən a ɗa purusən.

³⁴ Nda gwadən a feyən gə ɓokye ka haɓi inabitə ka maare, a ɓoyən ɓokingɨn ka shibashe, nda nggutən a nzadən a nə mbɨrsətɨ dan, a zəkan a haa jangata omye, gə mya nidən.

³⁵ Haa ɓe kɨɗa, nda dɨmdə taa nggɨrngɨme kpe a və mura dɨ nidə haa jangata omingɨn. Nda san, ‘Pɨrə humwa ka nisən, na hye kɨɗa a taa pɨrgə a nə na vu, hɨn kana mɨna na mɨnudən kat.’ ”

³⁶ Yesu a shea ɗiyə nzə-lee kəndə ɓashitɨngɨn atɨ, “A vor myee dɨ mwaakɨnə, wonə hye dɨ niyə sɨnə nzə-vɨnəgə ma fukə tɨfə mahərye?”

³⁷ Nzə-lee kəndə ɓashitɨngɨn a luwa a sa Yesu atɨ, “Ma ɗa purusən gwadən nə nzə-vɨnəgən.” Yesu a san, “Sə gən zə wudə hye ta ɗaasə mgban.”

Yesu a hwoda Marta ka Maryamu

³⁸ Ite Yesu ka lagbe dan nee a nə tɨfe dɨ muɗi, təna tɨla a i vɨraa ɓyeləngti, də təna pa i meti mya wa atɨ Marta ngga luutɨrən a hwodarə pepe.

³⁹ Marta nə ka mwafɨtə mya wa atɨ Maryamu. Maryamu asɨ nza humwa Yesu ta kɨl ləməgyee nda dɨ boyo.

⁴⁰ Marta ɓe ɓwaa ka pərəsəte ngga dɨ pərəsə ka lyentɨ hwoɗye, ngga shi haka Yesu a san, “Həmɨmiye, le aa ɓow ka nzate mwafɨri a nza a ɗake ka lyentə, ɓətɨ hye ɓa sarə atɨ ngga maɗa a gwadi ma?”

⁴¹ Həmɨmiye Yesu a luwa a sara, “A Marta, kɨli kwe Marta, hye tənə a nə shee hananang.

⁴² Zə niyi, dii se hiɗə nə kana ɓwaara a ɨlə vɨratɨna. Sɨnə a Maryamu a nggɨlə a dɨ ɗarən. Taa ndəng sə də ɓa takarə ka sa ngga nggɨlə.”