Ibɨraniye 1 - Ɓwaatiye New Testament

Nze da Həmɨnpwa pɨrgə malyenye ɓong-ɓong ka fukatə

¹ Kɨnɨnɨng Həmɨnpwa a byelə ka yə jigəm dɨ kwaamɨ kpalye dan a nzatə som-som ka kwatəfəgi byele som-som.

² Gəngnə, a kpawtɨ nzatɨnə, Həmɨnpwa a byelə kam dɨ haka nzəngɨn a nda ɗɨkdən gə nda mɨnə shee kat. Sɨnə ma Həmɨnpwa a sɨra vɨratə dɨ hakan mgban.

³ Nzəngɨn nə ɓɨrtɨ fukate Həmɨnpwa a gə kaarə kat, sɨnə bɨldə Həmɨnpwa ɓətɨya nda gə. Dɨ ha gətɨ ləməgye dan nagi ndo sə kat a Həmɨnpwa a ɗarən a nza. Beetɨ ite nda wunə ɓwaare kwatɨfə suɓwagə səhase, nda muɗə a dɨ nza tɨfə zɨməngə Həmɨnpwa Ma ka gbaktɨ fukatə kat gaarə a vor pwa.

⁴ Gə-angɨn Həmɨnpwa a vən fukate pɨrgə hɨnggə malyenye, ɓətɨya kwakaa Həmɨnpwa a vən a pɨrgə hɨnggərən ka fukatə.

⁵ Nda wonə a vor malyenye ma Həmɨnpwa a san atɨ, “Hyenə nze de, supo hɨn boyo bwang hɨn gəə hɨnə Baagu”? Mɨni ɓə, “Hɨn ɓa gəə hɨnə Baagən, nda gəə sɨnə nze de”?

⁶ Mɨni ɓə, ite Həmɨnpwa a shi ka nzə-kwamətɨ dan a vɨratə, nda ɗɨkdə malyenye dan mbak-mbak təna kalan-gbəətə.

⁷ Ite Həmɨnpwa a dɨ bwe le a nə malyenye, nda sa atɨ, “Nda mɨndə malyenye dan təna gə ɓətɨ hawo tuwati, kɨse dan mgban ɓətɨ jeemi ɗiyə.”

⁸ Shezə a nə nze dan, nda san, “Hyenə Həmɨnpwa, ruutɨ dəw ɓa nza kaaru-kaaru, ka gaaratɨ həmne dəw hye ɓa jin ɓwaare ka pepetə.

⁹ Hye dɨ mwo shi-pepeye, a kwo shi hashe. Gə-angɨn Həmɨnpwa, a Həmɨnpwatɨ dəw a nduko da a pɨrgə ndeyinga, dɨ ha maarə hanɨngte nda puku a nanga.”

¹⁰ Nda mɨna sa, “Hye Həmɨnpwa Həmɨmiye, hyenə kwak vɨratə a tiyatə, pwa mgban hyenə ɗatɨrə ka tɨfanga.

¹¹ Shingɨn kat ɓa kɨɗə a pɨrə ɓaa, shezə hye ɓa nza kaaru-kaaru, shingɨn ɓa iira a liyə ɓətɨ sɨɓweti.

¹² Hye ɓa tɨfɨttɨrən ɓətɨ shiyakɨshi rukutə, a nggəddərən ɓətɨ sɨɓweti. Shezə hye tee dɨ nggəɗi, kyawasa mgban taa mbati kaarə.”

¹³ Nda wonə a vor malyenye ma Həmɨnpwa a ga san atɨ, “Zə nza tɨfə zɨməngi baa na ɗɨkdə ji-nyaagu təna fokə njiya a poki mbwayinga hye mwagərən”?

¹⁴ Tən malyeningɨn ɓwaa, aa piti 'ye Həmɨnpwa a dɨ lyentɨrən təna ɗa ɓwaare lyentə a myee ɓa ɗɨm mbəta?