Filipiye 1 - Ɓwaatiye New Testament

¹ Hinə Bulus ka Timoti kɨse da Yesu Ma Həmɨnpwa a Yaɓwarən. Hinə dɨ wunakəwnə hwun myee da Yesu Ma Həmɨnpwa a Yaɓwarən 'ye a vor Filipi, kat ka mi kpan-kpani vəni hiwtə 'ye dɨ jin ji-kottə ka mbiɗitɨ mi kpan-kpanyee kat a pukəngrən dɨ gwadərən jin ɓwaare.

² Maa wuladəha ka ɗolte dɨ haka Həmɨnpwa Baagəm ka Həmɨmiye Yesu Ma Həmɨnpwa a Yaɓwarən, a nza ɓwaa kəwnə.

Usəkətə ka hiwtə gə le da mi Filipi

³ Nagi goɗi na ɗyanga kəwnə, na dɨ ɗa Həmɨnpwa usəkətə.

⁴ Hɨn kana dɨ ɗa hiwtə gə le dəwnə kat, na dɨ ɗatɨrə ka hanɨngtə

⁵ gə wule pena hwuna vi dɨ tiyatə a vor hiwatə ka ləmə feme da Həmɨnpwa a hakəwnə dɨma ɓəgəng.

⁶ Ndi Həmɨnpwa ma tiya lyentɨ pepete a hubosəwnə, hɨn leyə mbak-mbak atɨ ndi ɓa pɨrə humwa kaarə baa a tɨlə fərə shita Yesu Ma Həmɨnpwa a Yaɓwarən.

⁷ Ɓə kana na gə ka wule hɨmnanə a nəngəwnə kat gə hwune a vor huboshi. Gə nagi a vor gbərəwe, naasə nagi na kangə a dɨ takale a dɨmdə na a nə ləmə fema nə, hwun kat hwune ɓwaa ke a vor humwate Həmɨnpwa a və miye gə lyentɨnə.

⁸ Həmɨnpwa leyə atɨ hɨne dɨ ɗa hɨmnəngəwnə ka wule mwohaa Yesu Ma Həmɨnpwa a Yaɓwarən a vi.

⁹ Hiwtɨ de nə atɨ a mwoha dəwnə a pɨrə humwa a kuɓukə vor lele ka nitə naa sa a vor ɓotə,

¹⁰ gə hwuna nggɨl sa wula pɨri kat, gə hwuna gə shet-shet taa mgbaalə səhasə kəwnə baa a tɨlə fərə shita Ma Həmɨnpwa a Yaɓwarən.

¹¹ Sə mgban hwun ɓa naa ka wule nzaa pepete dɨ haka Yesu Ma Həmɨnpwa a Yaɓwarən gə hwuna nza ka lyentɨ pepete ɓa shi ka Həmɨnpwa ka fukatə ka ɓondiha.

Ləmə feme da Həmɨnpwa a pɨrə humwa gə gbərəwa Bulus a gə vorsən

¹² Ji-nuwo a vor kottə, hɨnə dɨ mwi hwuna leyə atɨ tənəte na pɨrə vorsə ɗɨkə ləmə feme da Həmɨnpwa pɨrə humwa.

¹³ Angɨn nə ɗɨki ji-pakawate a voti ta hama Roma kat, ka mbiɗitɨ ɓwaare kat a leyə atɨ gə le da Ma Həmɨnpwa a Yaɓwarən mya ɗɨkdi a gbərəwe.

¹⁴ Gəkɨlə gbərəwye mya puki, hakpanə ji-kottə a ɗɨm maase ka gbənzɨmtə a vor Həmɨmiye ta bwe le da Həmɨnpwa bwang taa kala də.

^15-17 Diyalə imi a dɨ hiwa ka le da Ma Həmɨnpwa a Yaɓwarən ka jiwne ka kwakaɗɨkatə, təna dɨ hiwa ka ləngɨn gə mwo nəne aa ka diyale. Təna dɨ kana atɨ tən ɓa nggale lə hase gə hɨne a vor gbərəwe. Imi mgban təna dɨ hiwa ka ləngɨn ka hubo pepetə, təna dɨ ɗaasə a vor mwoha ka lee sate atɨ Həmɨnpwa nə nzaa di ganə gə na takale a dɨmdə na a nə ləmə feme.

¹⁸ Ɓə nda mɨnə də? Sə kpanadə nə atɨ, nagi gə kwakaɗɨkatə təna dɨ woyo a hiwa ka le da Həmɨnpwa, nagi ka hubo pepetə mgban, nagi a ndo tɨfə, Ma Həmɨnpwa a Yaɓwarən nə təna hiwa kan. Gə-angɨn hɨnə ka hanɨngtə. Ka twai hɨn ɓa pɨrə humwa ka ɗa hanɨngtə,

¹⁹ gə hɨn leyə atɨ dɨ ha hiwtɨ dəwnə ka gwadəha da Pita Yesu Ma Həmɨnpwa a Yaɓwarən, shee bəngri kat ɓa virwo a mbədi.

²⁰ Hɨnə dɨ kula dɨ bədə myenshi kɨr-kɨr atɨ sopye aa dɨ gi, angɨn ɓa ɗɨkdi na gə ka gbənzɨmtə nagi ndo fərə, gə mye ta ndukodə Ma Həmɨnpwa a Yaɓwarən dɨ ha nzashi, nagi a vor we, naasə ka myentə na gə.

²¹ Nzashi a vɨratə nzaa Ma Həmɨnpwa a Yaɓwarən nə na nza, nagi na mbɨrə mgban sə pepeyə a hake.

²² Na hɨn pɨrə humwa ka nzatə a vɨratə a vor sɨtɨnə, lyentɨ pepeti hɨn ɓa pɨrə humwa ka ɗaasə. Gəngnə hɨn taa lee sa hɨn ɓa nggɨlə waka shinə dɨ kpeyə.

²³ Hɨnə kangə wakatə, sa pɨrinə atɨ na mbɨrə a muɗə haka Ma Həmɨnpwa a Yaɓwarən gə-angɨn nə pɨri kat,

²⁴ shezə ɓa nda pɨrəwnə mgban na nza ganə a vɨratə a vor sɨtɨnə, a pɨrə humwa ka gwasəwnə.

²⁵ Gə hɨn lee angɨn mbak-mbak, hɨn leyə mgban atɨ hɨn taa dɨ mbɨri ɓəgəng, hɨnə ɓa gə ɓwaa kəwnə kat gə hwuna pɨrə humwa a nduko vor mwadiyale ka hanɨngtə.

²⁶ Gə hɨn kana mɨna a nza kəwnə, angɨn ɓa ɗɨkdə hanɨngtə dəwnə a haka Yesu Ma Həmɨnpwa a Yaɓwarən ngga naa gə le de.

²⁷ Nagiya angɨn ɓa gə, zə nzam pepe ka ɓwaare kat ɓətɨya ləmə feme da Ma Həmɨnpwa a Yaɓwarən a dɨ mwo kəwnə. Ɗam sə, gə na hɨn shi ɓa nəwnə, nagi kɨlə na dɨ kɨl ləngəwnə a haa ɓongətə, na leyə atɨ hwun kangə dwat, səɗə-yedye dəwnə shi hiɗə dɨ ɓəri, dɨ pɨrə humwa a kwa-hiɗə a vor mwadiyale gə le da ləmə fema nə.

²⁸ Ɓe kala aa gəwnə nagi kəng-kəng ka myee dɨ kanggəwnə. Gəkɨlə angɨn bɨlə bwang atɨ tən ɓa yerə ɓaa, hɨnggəwnə hwun ɓa mbə. Shinə kat dɨ haka Həmɨnpwa tən ɓa dɨma.

²⁹ Humwate mya vəwnə aa gələ hwuna mwadiyale ka Ma Həmɨnpwa a Yaɓwarən nə ɓəmbə, shezə gə hwuna sop tənətə gə le dan.

³⁰ Gə hwunə a vor tyenglənge ɓətɨ hɨnggi, a wule itɨnə hwuna kɨlə atɨ na gə vorsə baa ɓəgəng.