Diya 1 - Ɓwaatiye New Testament

Mgbaalə dor malɨmtɨnə

¹ Malɨmtɨnə i diya dɨ haka Yesu Ma Həmɨnpwa a Yaɓwarən. A diyaa Həmɨnpwa a vən gə nda bɨlə kɨse dan shee mbak-mbak Həmɨnpwa ɓa ɗatɨrən aa ka ɓongtə. Yesu a ɗɨkə təna lee shingɨn dɨ ha lyanate nda lyana malyenye dan shi haka kɨsa dan Yohana.

² Ndi Yohana sɨnə takale bwang a nə shee kat mya wunən diya nda naarən, a tən ləməgye da Həmɨnpwa. Ləməgingɨn nə 'ye Yesu Ma Həmɨnpwa a Yaɓwarən a takale a nəngrən mgban.

³ Həmɨnpwa ɗan sə pepeye ndi ma ɓawa bəl ləməgi kpalte a vor malɨmtɨnə. Sə mgban Həmɨnpwa ɗarən sə pepeye a tən myee kat ɓawa kɨlə, a ɗɨkdə ləməgingɨn a hubosərən a lyenə kaarən, gəkɨlə aa dɨ ɓongə shee mya doro vorsə ɓa naa.

Wunakaha

⁴ Wunakaha dɨ haka Yohana. Zə haka vəni hiwtɨnə tukolukpe a njiya Asiya. Maa wuladəha ka ɗoltə a nza ɓwaa kəwnə dɨ haka Həmɨnpwate kɨnɨnɨng, sɨnə ɓəgəng, sɨnə ɓaga shi, ka mɨni dɨ haka piyinə tukolukpe a humwa ruutɨ dan,

⁵ ka mɨni dɨ haka Yesu Ma Həmɨnpwa a Yaɓwarən. Sɨnə nzə-takale ka tikɨstə, nzə-kwaməte maggə we, sɨnə həme a nə həminə a vɨratə. Sɨnə mworəm dɨmaadəm gə kɨsawnə səhase dam dɨ ha kəjidə zaambəngɨn,

⁶ nda gəədəm kɨsehəmi a hwoɗi həmne 'ye ɓawa lyenə Həmɨnpwatɨ dan ka Baagən. Maa fukatə ka gətə a gəə hɨnggən nə kaaru-kaaru! Amin.

⁷ Zə niyəm sɨndə dɨ shi a vor pərɓye, nagi ndo diiti ɓa nan, kat ka tən myee zubrən ka kufe. Mi vɨratə kat ɓa kehee gə le dan. Nagi gə-angɨn naa a nzasə kaaru-kaaru! Amin.

⁸ Həmɨnpwa, a Həmɨmiye a sa atɨ, “Hɨnə tiyatə, hɨnə kpawtə.” Sɨnə kɨnɨnɨng, mɨni sɨnə ɓəgəng, mɨni sɨnə ɓaga shi, ndi Həmɨ gətə kat.

Ama a pasa nze da ɓwaara

⁹ Hɨnə Yohana, nzə-nuwogəwnə a vor kottə, a vor mbasɨtə ka kɨr sɨtə a vor tənətə, angɨn hɨnggəm nə a vor Yesu. Ite hɨne a nə luute mya wa atɨ Patmos gəkɨlə ləməgye da Həmɨnpwa ka takale bwang a nə Yesu.

¹⁰ A fərə hiwtə, Pitə a ngguti, na kɨla kaɓa korme ɓətɨ ɓomo a beeshi,

¹¹ dɨ sa atɨ, “Dorshee kat hye naarən a vor malɨmtɨ sɨlara mya dɨ tɨfɨɗə. Hye lyenshe kaarən a haka vəni hiwtɨnə tukolukpe, tənə yə: Afisus, Sɨmarina, Pargaamu, Tiyatira, Sardis, Filadelfiya ka Lawudisiya.”

¹² Na virwo gə na naa korma dɨ byeli ke. Ite na virwa, na naa ji-dwe dyamse tukolukpe 'ye mya dɨ kangdə tyekəlye a nəngrən.

¹³ A waka ji-dwengɨn na naa asə “pasa nze da ɓwaara,” ɓarawtɨ dan nə gɨrə-gɨrə, saltɨ dyamsə mya pukə basa nzɨmsən.

¹⁴ Shewo nəngɨn nə kung pwat-pwat ɓətɨ bukə, diingɨn nə ɓətɨ jeemi ɗiyə dɨ ləwi,

¹⁵ mbwayingɨn nə ɓətɨ dyamsə kpalama dɨ ɓɨra a vor ɗiyə kɨlatə, kormɨngɨn nə ɓətɨ tuwatɨ haɓi taɗaha.

¹⁶ A tɨfə zɨməngə mangɨn, nda kɨr tyekəli pwatə tukolukpe, sungwa ka kwaame kpe mwa-mwa a dɨma dɨ kwaamɨngɨn. Humwasən nə dɨ ɓɨra hal-hal ɓətɨ fərə.

¹⁷ Ite na nan, na fukə mbwayingɨn ɓətɨ wo. Də nda ɗifadə tɨfə zɨməngən a bi, nda sa atɨ, “Ɓe kalaa gu. Hɨnə tiyatə, hɨnə kpawtə.

¹⁸ Hɨnə ma ka myentə, na mbɨrə, zə ɓə niyi hɨnə ka myentə kaaru-kaaru! Mɨni ɓə hɨnə ka gətə a nə we ka vɨrata won.

¹⁹ “Gə-angɨn, zə dorshee hye naarən, a shee dɨ ɗa ɓəgəng ka 'ye ɓaga ɗa.

²⁰ Kpəshi la a nə tyekəlirə tukolukpe a 'ye hye naarən a tɨfə zɨməngi, ɗɨkənə ji-dwe dyamsa tukolukpe mya dɨ kangdə tyekəlye a nəngrən nə yang: Tyekəlirə tukolukpe, tənə malyenyee dɨ nidə vəni hiwte tukolukpe. Tən ji-dwe kangdə tyekəlye tukolukpe mgban, tənə vəni hiwte tukolukpe.”