Afise 6 - Ɓwaatiye New Testament

Je ka yə sɨnggərən

¹ Hwun je, hwun ta koddə yə sɨnggəwnə gə hwunə hɨnggə Həmɨmiye, angɨn nə sa kana.

² “Hye ndukodə baagu ka nuwogu.” Sɨnə gɨraha kwaməte mya vədə ka kɨləsətə –

³ “gələ nzaasəwnə a vɨratə a wula, myensəwnə mgban a gɨrə.”

⁴ Hwun yə baagə je mgban, ɓe hwunaawa ngama yedi jingəwnə, shezə hwun ta dɨkarən ta kənərən wule shee kana, a maddərən pepe a tɨfe da Həmɨnpwa.

Kɨse ka həmingrən

⁵ Hwun kɨse, hwun ta koddə yə həmingəwnə inə a vor vɨratə ta ndukodərən ka hubosəwnə hiɗə ɓətɨ hwun ɓa koddə Ma Həmɨnpwa a Yaɓwarən.

⁶ Ndukomdərən aa gəkɨlə hwuna dɨ naa diingrən gə hanɨngərən kəwnə. Hwuna lyenə ɓətɨ hwunə kɨse da Ma Həmɨnpwa a Yaɓwarən a 'ye dɨ koddə kanata Həmɨnpwa ka tikɨstə ka hubosərən hiɗə.

⁷ Hwuna ɗa lyentɨ dəwnə ka hɨmne, ɓətɨ Həmɨmiye nə hwuna dɨ ɗan aa ɓwaara.

⁸ Hwun ta leyi atɨ, nagi ndo ma a dɨ ɗa lyentɨ dan pepe, Həmɨmiye ɓa vən moone dan, nagi mangɨn kɨsa nagi aa kɨsa.

⁹ Sə mgban hwun həmi kɨse, hwun ta ɗarən wule sa pepe. Ɓe hwunaa ɗarən sɨmwarashe gə hwuna vərən kala, gəkɨlə hwun leyə atɨ hwun kaarən kat hwunəə ka Həmɨ-hwoɗye gaarə a vor pwa, ndaawa bɨldə som-somtə.

Yenta Həmɨnpwa

¹⁰ A kpawtə kat luwom dwattə dɨ haka Həmɨmiye ka gbaktɨ nyerətə dan.

¹¹ Pɨrəmə yentɨ sɨ nyata Həmɨnpwa gə hwuna kanggə kuta da Nzə-tɨmbɨrha.

¹² Gə ɓəranə dam, aa i hara ka zaambə, shezə nyatɨngɨn nə ka myee nza nə pwatɨ pərɓye a pɨle hashe, ka həmye darən 'ye dɨ ɗa həmnə vɨraa kulitɨnə.

¹³ Gə-angɨn, kalam shi nyatə da Həmɨnpwa gə fərə hasəngɨn kana kənə, hwuna kanggərən. Beetɨ angɨn kat, hwuna kang gwaale.

¹⁴ Kangəm gwaale, shingəm hinwe a kada-mgbangəwnə, sɨnə diyale da Həmɨnpwa. Kam sɨmpa, sɨnə nzaa pepetə.

¹⁵ Hwuna dəm hwanye, tənə nzaa ɗolte ləmə feme a dɨ shikan, kaarən hwun ɓa gə ka ɓwesɨtɨ nyatə.

¹⁶ Mɨni ɓə, hwuna kɨt kɨrme, sɨnə mwadiyale, kan hwun ɓa mbər ɗiyə nggəlmbyee ma hase a dɨ ɗwangəwnə.

¹⁷ Hwuna kup mbulo sɨtaa, sɨnə mbəha dəwnə, hwuna nggur sungwa Pitə, sɨnə ləme da Həmɨnpwa.

¹⁸ Hwun ta ɗa zərgi hiwtə ta nyishi mba-dɨ-mba a vor gəta Pitə. Bəmdə myensəwnə a nə lanə, hwuna nza ka ɗaasɨtə ka ɓwamosowe, hwun ta ɗa hiwtə gə le da myee Həmɨnpwa a vomiyərən kat.

¹⁹ Hwun ta ɗe hiwtə mgban, gə nagi goɗi na byelə, Həmɨnpwa a vi wule ləməgyee hɨn ɓawa boyo ka gbənzɨmtə gə na dɨmaadə kpəshi ləmə feme dan,

²⁰ gəkɨlə ləngɨn nə na gəə nzə-tɨfə a moonə Ma Həmɨnpwa a Yaɓwarən a vor gbərəwa nə a Roma. Hwuna gwadi ka hiwtə gə na ɗɨm gətə a bwe le da Həmɨnpwa a kwatɨfa kana ka gbənzɨmtə.

Wunakaha kpawtə

²¹ Ndi Tikikus nduwongəm nzə-kotte hina mworən kɨr-kɨr ma dɨ ɗa Həmɨmiye kɨsawne ka tikɨstə, ndi ɓa boyownə nagi ndo sə kat gə hwuna lee sa na gə vorsən ka sa na dɨ ɗa.

²² Səngɨn ɗa na dɨ lyentən a hakəwnə gə hwuna lee gəəsenə ndi mgban nda nyerədəwnə.

²³ Maa ɗoltə a nza ɓwaa kəwnə ji-nuwo, maa mwoha ɓwaa ka mwadiyala dɨ haka Həmɨnpwa Baatə ka Həmɨmiye Yesu Ma Həmɨnpwa a Yaɓwarən a nza ɓwaa kəwnə mgban.

²⁴ Maa wuladəha da Həmɨnpwa a nza ka myee kat dɨ mwo Həmɨmiye dam Yesu Ma Həmɨnpwa a Yaɓwarən ka wule mwoha aa dɨ mbəə.