Afise 5 - Ɓwaatiye New Testament

¹ Gə-angɨn koɗəmə mbwayi Həmɨnpwa, hwuna gə ɓətɨ ndi, gəkɨlə hwunə je dan 'ye nda dɨ mwotɨrən.

² Nzam ka mwoha ɓətɨya Ma Həmɨnpwa a Yaɓwarən a mworəm baa a vədə nəngɨn gə le dam a hama ka myensən wule hamate hanɨngə Həmɨnpwa kaarə ɓətɨ pomə ɨhɨng-ɨhɨngə.

³ Ɓe hwunaa mwa mya kɨl a lə dɨ hakəwnə a zə lə sharawne nagi kəng-kəng, ka nagi ndo wule nzaa gunamti, naasə mgban nzaa omshe, gə shingɨn aa kana ka myee Həmɨnpwa a vomiyərən.

⁴ Sə mgban hwuna təkəsə ka wule byelə hasa dɨ vədə sopye, ka byelə wake, ka wule nzɨ-urotɨ gunamtə sɨnə byelə tukute, wule shingɨn kat ɓe myaa parən a wakasəwnə. Shezə a moonə shingɨn, hwun ta ɗa Həmɨnpwa usəkətə.

⁵ Gə hwuna leyə mbak-mbak atɨ, ma dɨ ɗa sharawne ka nzaa gunamtə ka omshe, ndi nzə-koɗə pɨle. Wule mangɨn aa dɨ ɗɨm moone a vor həmne da Həmɨnpwa ka Ma Həmɨnpwa a Yaɓwarən.

⁶ Ɓe hwunaa mwa ama a vwakarəwnə ka byelə ɓaye, gə wule shingɨn a dɨ shi ka ɓwaare ka yedi-kɨtta Həmɨnpwa, a wule myee aawa koddən.

⁷ Gə ləngɨn, ɓe hwunaa mwa a pedə nəngəwnə ka wule mingɨn.

⁸ Gə kɨnɨnɨng hwune kuliti, shezə ɓəgəng hwun ɓɨrti ɓwaa ka Həmɨmiye. Hwuna nza ɓətɨ mi ɓɨrti.

⁹ (Gəkɨlə mbwotɨ ɓɨrtə nə wulatə ka pepetə ka diyale.)

¹⁰ Ɓərəm ɗyegənəm, hwun ta kana wule shee haa dɨ nɨngə Həmɨmiye kaarən.

¹¹ Ɓe hwunaa pɨrdə nəngəwnə a vor lyentɨ ɓaate mya dɨ ɗa a vor kulitə, ndɨka hwuna mgbaatɨrən bwang,

¹² gəkɨlə sɨ sopi mya tiyaa bwe wule sa ji-ɗongə koddə Həmɨnpwa a dɨ ɗa a haa ɓotə.

¹³ Gə shingɨn kat mye kana mgbaatɨrən a dɨmaadərən bwang a ɓɨrtə, ɓwaare ɓa naarən,

¹⁴ gə ɓɨrtə nə dɨ dɨmaadə nagi ndo sə bwang. Səngɨn nə ɗa mya sa atɨ, “Hye ma dɨ shini, viɗiya maggə we, Ma Həmɨnpwa a Yaɓwarən ɓa ɓɨrə a takada.”

¹⁵ Gə ləngɨn hwuna ham sɨsəwnə ka nzaa vɨratə, ɓe hwunaa ɗashe ɓətɨ dəɗi, nzam ka lele.

¹⁶ Hwun ta ɗa lyentə pepe ka humwate kat Həmɨnpwa a vəwnə gə vɨraa wanetɨnə aa wula.

¹⁷ Gə-angɨn ɓe hwunaa nza ɓətɨ dəɗi, hwun ta lee sa Həmɨmiye a dɨ kana.

¹⁸ Ɓe hwunaa sop vwe nda gəwnə a zə kəwnə a kɨttə. Shezə hwuna naa ka Pitɨ Ɗəmɗəmtə nggi ta koɗi kəwnə.

¹⁹ Hwun ta byeli ka sə dɨ vor kormi Malɨmtɨ Dyemshe ka dyemshi ɓondiha, ka mbiɗitɨ dyemshee a vor pitə. Hwun ta gəə dyemshe a ɓondi Həmɨmiye ka hubosəwnə kat.

²⁰ Hwun ta ɗa Həmɨnpwa Baatə usəkətə mba-dɨ-mba a nə nagi ndo sə kat a vor kwakɨ Həmɨmiye dam Yesu Ma Həmɨnpwa a Yaɓwarən.

²¹ Vəmdə nəngəwnə a hakasə dɨ ha ndukodə Ma Həmɨnpwa a Yaɓwarən.

Mandi hwoɗye ka moryingrən

²² Mandye hwun ta vədə nəngəwnə a haka moryingəwnə ɓətɨ hwuna dɨ ɗa Həmɨmiye,

²³ gə mure nə həmɨ-hwoɗye a nə metə ɓətɨya ndi Ma Həmɨnpwa a Yaɓwarən nə a nə petɨ ji-kottə kat, tənə sɨsən, sɨnə Nzə-mbəsərən.

²⁴ Ɓətɨya petɨ ji-kottə a dɨ vədə nəngrən a haka Ma Həmɨnpwa a Yaɓwarən, sə mgban kana mandye a vədə nəngrən a haka moryingrən a vor nagi ndo sə.

²⁵ Hwun morye mgban hwun ta mwo mandingəwnə ɓətɨya Ma Həmɨnpwa a Yaɓwarən a mwo petɨ ji-kottə kat a və myensən gə le darə,

²⁶ gə nda vomiyərə dɨ ha le da Həmɨnpwa, nggagə mwa-mwa dɨ ha suɓwatə ka haɓye.

²⁷ Nda shi ka petɨ ji-kottə a hakan ɓətɨ ngajatɨ pepeti, taa nyawiti kaarə, shet-shet taa mgbaalə səhasə də.

²⁸ Sə mgban kana morye a mwo mandingrən ɓətɨ təna dɨ mwo sɨsərən, gə ma kat dɨ mwo mesən, nəngɨn nə nda dɨ mwo.

²⁹ Gə taa ndəng ama də a ɓa kwo sɨsən, gə nagi ndo ma a dɨ zɨmdə sɨsən, a nidə pepe ɓətɨya Ma Həmɨnpwa a Yaɓwarən a dɨ ɗa ka petɨ ji-kottə.

³⁰ Gə hɨm nə kat gyengi sɨsən.

³¹ “Gə-angɨn mure ɓa ɗaka baagən ka nuwogən, a peyə ka mesən gə tən dɨ kpeyə təna peyə a gəə sɨtə hiɗə.”

³² Kaɓa diyalə kɨr-kɨrə anə Həmɨnpwa a ɓodən, sɨnə a nə na dɨ boyownə le a nəngɨn a nə Ma Həmɨnpwa a Yaɓwarən ka petɨ ji-kottə.

³³ Kat ka angɨn, hwun morye hɨnə dɨ səwnə atɨ, nagi ndo ma a mwo mesən ɓətɨ nda dɨ mwo nəngɨn, metə mgban a ndukodə murəngrə.