Afise 3 - Ɓwaatiye New Testament

Bulus nzə-hiwatə a haka myee aa Yawude

¹ Səngɨn ɗa hɨn Bulus na dɨ ɗa Həmɨnpwa hiwtə. Hɨn nzə-gbərəwo gə le dəwnə hwun myee aa Yawude gə na dɨ koɗə Yesu Ma Həmɨnpwa a Yaɓwarən.

² Ndəng hwun kɨl lə wule lyentɨ fyemte Həmɨnpwa a vi dɨ ha wulate nda wula ke gə le dəwnə,

³ ɓətɨya nda bɨli kpəshe dɨ ha diyaa nda wuni, na leyə sə mgban na dorownə shingɨn gbɨlɨm.

⁴ Hwun kana bəl malɨmtɨnə, hwun ɓa lee la na gə kan a nə kpəshi la a nə Ma Həmɨnpwa a Yaɓwarən,

⁵ a la Həmɨnpwa aa dɨmaadən bwang a nzata myee pɨri. Sɨnə ɓəgəng Pitɨ Ɗəmɗəmtə a dɨmaadən bwang a bɨlə kpe-lagbee Həmɨnpwa a vomiyərən kat ka kpalye dan.

⁶ Kpəshi ləngɨn nə atɨ, dɨ ha ləmə feme, myee aa Yawude ɗɨmə mɨnə shee ɓwaa ka Yawude. Tən gəə mi sɨtə hiɗəti dɨ luu moonə la Həmɨnpwa a boyo a nzadən ɓwaa ka Yawude dɨ haka Yesu Ma Həmɨnpwa a Yaɓwarən.

⁷ Na gəə kɨsa ləmə fema nə dɨ ha wuladəha da Həmɨnpwa ite nda vi dɨ ha lyenta gətɨ dan.

⁸ Nagi a nə sate atɨ hɨn taa tɨlka ma kəng-kənge a waka myee Həmɨnpwa a vomiyərən, kat ka angɨn nda gwadi a vi gətɨ dan gə na hiwa ka ləmə feme dan a haka myee aa Yawude a nə wule gbaktɨ gɨnəta Ma Həmɨnpwa a Yaɓwarən ite pɨrgə maasə lee ta ɓwaare.

⁹ Həmɨnpwa a ɗa nagi ndo sə kat a nggɨlti gə hɨn ta hiwa ka ləngɨn a dɨma nagi ndo ma də kpəshi ləngɨn bwang a nə sa Həmɨnpwa a kana a haa ɓotə a nzate pɨri.

¹⁰ Mwota Həmɨnpwa nə ɓəgəng atɨ nda lyenə dɨ haka ji-kottə a bɨldə zərgi lele dan a haka həmye, ka gəte myaawa naarə a vor pwa.

¹¹ Sa nda kana a ite myaa nda kwak vɨratə nə anə, nda naadən dɨ vor lyenta Yesu Ma Həmɨnpwa a Yaɓwarən, ndi Həmɨmiye dam.

¹² Dɨ hakan, ka mwatə kan gɨɗən, mya gbənzɨmtə a pɨrə haka Həmɨnpwa pɨraɗaw taa kala də.

¹³ Gə ləngɨn na dɨ nyisəwnə atɨ, ɓe sɨsəwnə aa kpalagəwnə gə wule tənəte na pɨrədə gə le dəwnə. Gə-angɨn nə ɓa shikəwnə ka fukatə.

Hiwtə gə mi Afisus

¹⁴ Səngɨn nə ɗa na dɨ gyerə nə ɗyegi a humwa Baatə ta ɗan hiwtə,

¹⁵ dɨ hakan təkə-təkətɨ zərgi ɓwaaree a vɨratə ka nagi ndo ma a vor pwa a ɗɨm nzatə.

¹⁶ Hiwtɨ de nə atɨ dɨ vor gbaktɨ gɨnətɨ da Həmɨnpwa, nda gwadəwnə a nyerədəwnə ka gətɨ dan dɨ haka Pitɨ dan ite a hubosəwnə.

¹⁷ Sə mgban Ma Həmɨnpwa a Yaɓwarən a nza vor hubosəwnə dɨ ha mwadiyale. Hiwtɨ de nə mgban atɨ, hwuna hwoldə kworyingəwnə kuɓuɓuk a kangə dwat a vor mwoha.

¹⁸ Gə hwun ɓwaa ka myee Həmɨnpwa a vomiyərən kat, a mba leetə a leyə twa wule mwoha da Ma Həmɨnpwa a Yaɓwarən ka pilsən ka gɨrəsən ka gbyalasən ka kuɓuksən.

¹⁹ Hwuna mba leetə a lee wule mwohangɨn, a wule a pɨrgə maasə lee ta ɓwaara, gə hwuna gə ɓətɨya Həmɨnpwa a gə taa asə ɓa nggɨlə.

²⁰ Hɨnggə Həmɨnpwa nə ɓondiha, sɨnə ma dɨ ɗa nagi ndo sə a pɨrgə nyittɨ dam ɓong-ɓong nagi a vor ɗyengle, ɓətɨya gətɨ dan a dɨ lyenə vorsəm.

²¹ Hɨnggən nə fukatə a waka ji-kottə a nagi ndo nzati dɨ haka Yesu Ma Həmɨnpwa a Yaɓwarən, kaaru-kaaru! Amin.