Afise 2 - Ɓwaatiye New Testament

Həmɨnpwa vəm myentə a vor Ma Həmɨnpwa a Yaɓwarən

¹ Kɨnɨnɨng hwunə ɓətɨ wogi a vor pitə gəkɨlə ɗongə koddə le dəwnə ka səhase.

² Hwuna dɨ ɗa shi hashe ɓətɨya mbiɗitɨ mi vɨratə a dɨ ɗa, ta koddə həme da pɨlee a hawe. Sɨnə pite dɨ lyeni kaarən tən wule myee aawa koddə ləməgye da Həmɨnpwa.

³ Hɨm kat hɨm gə nzamə waka wule mingɨn ta koddə kadawo sɨtə, ta ɗa wule shee sɨtə a dɨ mwo kat ka ɗyangalə hase. Ɓətɨ mbiɗitɨ ɓwaare, mya nzamə pukə yedi-kɨtta Həmɨnpwa gə səhase dam.

⁴ Shezə ɓəgəng ndi Həmɨnpwa ma ka purutə kɨr-kɨr, gə mwoha kɨr-kɨre dan shi hakam,

⁵ nda vəm myentə ɓwaa ka Ma Həmɨnpwa a Yaɓwarən kat ka ite hɨm nə ɓətɨ wogi gəkɨlə ɗongə koddə le dan. Dɨ ha wuladəha dan nda mbədəwnə.

⁶ Həmɨnpwa mgban a maddəm ka myentə gə we ɓwaa ka Ma Həmɨnpwa a Yaɓwarən. Nda nzadəm a vor pwa ɓwaa ka Yesu Ma Həmɨnpwa a Yaɓwarən,

⁷ gə a vor nzatɨnə ɓəgəng baa zə nzate ɓaga shi nda bɨldə wuladəha dan a kɨr-kɨr, a taa a də tɨlkan. Wule a nda bɨləm fyemtə dan dɨ haka Yesu Ma Həmɨnpwa a Yaɓwarən.

⁸ Gə dɨ wuladəha da Həmɨnpwa nda mbədəwnə dɨ ha mwadiyale, aa hwunə mban ɗɨmi, Həmɨnpwa nə wulakəwnə,

⁹ aa gə lyentə, gə-angɨn ɓe ama aa məndaranye.

¹⁰ Gə hɨm nə lyenta Həmɨnpwa, nda gəədəm mi hweli dɨ haka Yesu Ma Həmɨnpwa a Yaɓwarən gə mya ɗam lyentɨ pepetə a ite Həmɨnpwa a nzadə kɨnɨnɨng gə mya ɗamtɨrə.

Pedə ne a vor Ma Həmɨnpwa a Yaɓwarən

¹¹ Gə-angɨn ɗyangam atɨ hwun myee myaa mwasarəwnə Yawude, tən Yawude 'ye mya jengdərən a lakəwne a dɨ warəwnə atɨ myee myaa jengdərən a lakəwne, a lakəwna mya ɗarən a sɨtə ka tyefi ɓwaara.

¹² Ɗyangam atɨ a nzate pɨri hwun tam ɓwaa ka Ma Həmɨnpwa a Yaɓwarən. Hwunə omi hwun tam a vor mi Israila, taa asə pedəwnə ka ləmə kɨləsəta Həmɨnpwa ka myee dan ka la mya boyo a nzadən, taa asə də hwun ɓa bədə myensəwnə a nəngɨn, gə hwun tam ɓwaa ka Həmɨnpwa a vɨratɨnə.

¹³ Shezə hwun myee ɓong-ɓong ka Həmɨnpwa, ɓəgəng a vor Yesu Ma Həmɨnpwa a Yaɓwarən mye gɨsa dəwnə gbyel a haka Həmɨnpwa dɨ haka zaambə Ma Həmɨnpwa a Yaɓwarən.

¹⁴ Gə sɨnə ɗoltɨ dam, ndi ma pedərən kpe təna gə hiɗə, nda kɨɗa kaanda kwonəsəte taka waka ji-nyatə hɨm a peyə a gəm hiɗə.

¹⁵ Dɨ ha we dan nda nggurgə ɓashita Musa ka gɨraha darə gə nda dɨmaadə ma hwele hiɗə dɨ vor mi kpeyingɨn a pɨradə nzaa ɗoltə.

¹⁶ A sɨtɨ hiɗətɨngɨn nda shi ka kɨləsətə a waka ji-nyaatɨngɨn dɨ kpeyə. Nda nggurgə kwonəsətɨngɨn dɨ ha we dan a nə kada ɓɨdɨmtə.

¹⁷ Nda shi a hiwa ka ləməgi ɗoltə a hakəwnə hwun myee a itɨngɨn hwune ɓong-ɓong, ka minə gbyel ganə.

¹⁸ Gə dɨ hakan mya peyəm kat a ɗɨməm humwatə a pɨrə humwa Baatə dɨ ha Pitə hiɗə.

¹⁹ Gə ləngɨn ɓəgəng hwunaa yə omi, aa mi somi, hwun gəə ji-hwoɗəti ɓwaa ka myee da Həmɨnpwa.

²⁰ Hwunə mya nworəwnə a nə mgba-vɨnə kpe-lagbe ka kpalye ɓwaa ka Yesu Ma Həmɨnpwa a Yaɓwarən. Sɨnə farate mya kwak mgba-vɨne kaarə.

²¹ Sɨnə pedə vɨnəngɨn kɨshi, nwoshingɨn a gbyala a gəə Shafə ɗəmɗəmə gə le da Həmɨmiye.

²² Sə mgban ɓwaa kan mya dɨ nworəwnə gə hwuna gəə haa nzata Həmɨnpwa nə dɨ haka Pitɨ dan.