2 Timoti 4 - Ɓwaatiye New Testament

¹ Timoti, hɨnə dɨ lama kəw a humwa Həmɨnpwa ka Yesu Ma Həmɨnpwa a Yaɓwarən ndi ma ɓa mɨna a vɨratə gə nda ɓashiyə wogye ka myee ka myentə a nza də həmne dan.

² Zə hyawa ka le da Həmɨnpwa nagi hye ɗɨm humwatə nagi tee ɗɨm humwatə. Hye gɨra ɓwaare təna ɗadə wesərən, hye ta gɨratɨrən a nə səhase darən, gwadərən təna kangə dwat. Lyeni ka mbasɨtə kɨr-kɨr hye ta kəndəshe hamama.

³ Gə fəre nee dɨ shi a ite ɓwaare aa diyə mɨna mwo kɨl diyale a nə shee mya dɨ kənərən a nə koɗə Həmɨnpwa. Tən ɓa woyo ta gbəwo haka wule myee ɓa kənərən wule shee kwakingrən a dɨ mwo kɨltə.

⁴ Tən ɓa gbyanga kwakingrən gə diyala mya dɨ boyərən, təna shea virwo a sardə kwakingrən a nə gbaamiye.

⁵ Hɨnggu hye bədə myensa a nə nagi ndawulasə, hye ɓwamosowe a vor tənətə, hye ta hiwa ka ləmə feme da Həmɨnpwa, hye ɗa lyentɨ dəw ite Həmɨnpwa a wara wasə pepe.

⁶ Gəngnə hɨnə ɓətɨ ma mya hama kan, fərə omotɨ ɗaka vɨratə de kənə.

⁷ Hɨn kangə dwat ɓərə ɗa lyenta Həmɨnpwa pepe mbəə tɨlə kpawtə, a nə kottɨngɨn na kangə baa supo.

⁸ Ɓəgəng hɨnə ka moona mya bidən, sɨnə moona Yesu Həmɨmiye nzə-ɓashitɨ tikɨse ɓa və myee tikɨs. Aa hɨnə hiɗə ɓəmbə mye ɓa vi moonəngɨn, kat ka myee mwadiyale ka mɨnata Yesu a vɨratə.

Ləməgi kpawtə

⁹ Zə ɓəri wa a hake tan-tan,

¹⁰ Dimas ɗake muɗə Tasalonika gə mwo sɨ vɨratə. Kɨrisen mgban muɗə Galatiya, Titus ndə a Dalmatiya,

¹¹ Luka nə ɓəmbə mbiɗi a hake. Kɨsa ka Markus hwuna kpapa a shi hake gə sɨnə ma dɨ gwadi a vor lyentɨnə Həmɨnpwa a wari wasə.

¹² Hɨn lyen Tikikus a Afisus.

¹³ Hye kana ɓa shi, hye nggure ka ɓarawtɨ tale de ite na ɗakarə a haka Karabus a vor vɨra Tɨros. Hye pware ka malɨmye de ɓətɨ tən malɨmi sɨlare.

¹⁴ Kɨlaa mya wa atɨ Alezanda ɗe səhase. Həmɨnpwa ɓa kənənəngɨn ka wule səhasa nda ɗe.

¹⁵ Hye mgban kɨt nanga ka Alezanda hye bəgən myenti gəkɨlə sɨnə dɨ kanggəm kɨr-kɨr a nə ləmə fema mya dɨ hiwa kan.

¹⁶ Ite mya kangdi a vɨnə ɓashitə, a tiyatɨ ɓashitə, taa ama də koɗi, ɓwaare kat a təkəsə ke a ɗake dɨsəri. Hiwtɨ de nə atɨ, ɓe Həmɨnpwa aa ɓashidərən ka angɨn.

¹⁷ Kat ka angɨn, Həmɨnpwa aa ɗake, nda nyerədi gə na hiwa ka le dan gə myee aa Yawude kat a ɗɨmə a kɨl ləməgye dan. Həmɨnpwa nə mbədi gə kwaamɨ tokomye a tən mi hashe.

¹⁸ Həmɨnpwa ɓa mbədi gə tɨfə mi hashe ka kanatɨ darən kat, ndi ɓa zə ke a həmne dan a vor pwa. Hɨnggə Həmɨnpwa nə fukatə kaaru-kaaru. Amin.

Wunakaha kpawtə

¹⁹ Hye wunaka Bɨriskila ka Akila kat ka mi hwoda Onisifarus.

²⁰ Arastus ndə a vor vɨra Korintiya, ndi Trofimus mgban sɨndə bi ka sɨtɨ ootə na ɗakan a vor vɨra Militus.

²¹ Ɓəri dwat tɨla ganə a hake hangɨratə aɓə shi. Yubulus nə dɨ wunakəw ka ndi Pudens ka Linus ka Kɨlawdiya kat ka mbiɗitɨ ji-kottə.

²² Timoti, maa Yesu Həmɨmiye a koɗə ka pisa a nza ɓwaa kəw. Maa wuladəha a nza ɓwaa kəwnə kat hwun ji-kottə.