2 Timoti 3 - Ɓwaatiye New Testament

Kənshe a nə kpawtɨ fəre

¹ Bədə myensa a nə lanə, leyi mbak-mbak atɨ fəre ɓaga shi a kpawtə, nzatə a vɨratə ɓa oo kɨr-kɨr.

² Ɓwaare ɓa pɨrə mwo nənəngrən. Tən ɓa gəə ji-mwo taa ka nggorkonye ka ndukodə nə. Tən ɓa gəə ji-byelə hasə, tənaa yə kɨlə yə sɨnggərən le, taa usəkəti a kwaamɨngrən, taa ɗəmɗəmti kaarən,

³ taa mwoha kaarən. Tənaawa ngguro ɓwaare gə səhase darən. Ji-kɨɗa kwakə, tən taa kɨt sɨti kaarən, ji-ɗa sɨkpaki ka puk-sɨkunge, tənaawa mwo sa pepe.

⁴ Tənə ka kuta hase kaarən ka hərəngtə ka məndaranye, ji-mwo sɨti ka fyemtə pɨrgə mwo Həmɨnpwa,

⁵ hye ɓa naarən ɓətɨ ji-kotti, kat ka angɨn təne məntəmə gəta Həmɨnpwa. Hye təkəsə ka wule mingɨn.

⁶ Wule mingɨn nə dɨ goɗəki pɨrə vor hwoda ɓwaare gə təna vwaka wule mandye aa lele, gə təna verəwdərən gə tɨfe da Həmɨnpwa dɨ ha kadawe ka mwo shi vɨratə hashi-hashi.

⁷ Təne dɨ ɗyegənshe mba-dɨ-mba, kat ka angɨn yedingrən aa banga a tɨfə diyale.

⁸ Ɓətɨya Janis ka Jambiris a marka Musa a kanggən a kwo le dan, sə mgban wule mingɨn a dɨ ɗɨkə ɓwaare a ɗeyə a ɗaka diyale. Tənə wule myee nəngrən kat ka kwa-hubosərən a təkə, kottɨ darən a gəə i ɓaati.

⁹ Wule mingɨn aa dɨ pɨrə humwa, ɓətɨ wule yə Janis ka Jambiris, gəkɨlə səhase darən ɓa dɨma a haa bwange bwang ɓwaare kat a leyə.

Kpawtɨ gɨraha da Bulus zə haka Timoti

¹⁰ Hɨnggu hye lee shee kat na kəndərən. Hye lee weshi ka wule hubote na gə kaarə ka mwadiyale de, kat ka mwoha de ka ɓwamosowe de a vor tənətə.

¹¹ Hye lee wule sɨmwarashe mya ɗe ka tənətɨ de som-som ka wule shee bəngri a Antiyok ka Ikoniyom ka Listɨra ka ɓwamosowe de a vor tənətə. Kat ka angɨn Həmɨnpwa a dɨmdi gə vor shingɨn.

¹² Nagi ndo ma kat a ɓa koɗə tɨfe da Yesu Ma Həmɨnpwa a Yaɓwarən pepe, mye ɓa tənəə dən.

¹³ Mi hashe mgban, kat ka ji-vwakaha ɓa kadɨ kaake a vor ɗa səhase tən ta vwaka ɓwaare, mye ta vwakatɨrən mgban.

¹⁴ Hɨnggu zə pɨrə humwa hye ta koddə shee hye ɗyegənə a mwakarən, gəkɨlə hye lee wule myee hye ɗyegənshingɨn dɨ hakarən,

¹⁵ a ite hyene ka swaɗəsa. Hye lee Malɨmtɨ Ɗəmɗəmta Həmɨnpwa, a ite ɓa kənu tɨfə ɗɨm mbətə dɨ ha mwadiyale ka Yesu Ma Həmɨnpwa a Yaɓwarən.

¹⁶ Ləməgyee a vor Malɨmtɨ Ɗəmɗəmtə pita Həmɨnpwa nə. Nda vədərən gə təna kənə ɓwaare shee, a gɨratɨrən, a ɗadərən, a bɨlərən nzaa-pepetə.

¹⁷ Myee da Həmɨnpwa a ɗɨm shee ɓa gwadərən təna ɗa lyenta Həmɨnpwa pepe.