2 Timoti 2 - Ɓwaatiye New Testament

¹ Hye nze de Timoti, kanyi dwat a vor wuladəha gə le da Yesu Ma Həmɨnpwa a Yaɓwarən.

² Wule ləməgyee kat hye kɨlə na kangə humwa ɓwaare hananang a boyo, zə kənə myee hye mwakarən ləməgingɨn, a wule myee tikɨs ka leetə kaarən, a myee ɓa mba kəntə kənə imi.

³ Ɓwamosowanga a vor tənətɨnə ɓətɨ gyana nzə-gyelmbuti da Yesu Ma Həmɨnpwa a Yaɓwarən.

⁴ Kat nzə-pakawate mya nggutən gə pakawatə, ndaa dɨ mɨna asɨ pedə nəngɨn a gə ɓətɨ mbiɗitɨ ɓwaare. Ndi ɓa ɓərə gə haa a nɨngə ma nggutən a lyentə.

⁵ Sə mgban ma dɨ vwapa taɗa ka imi, aa dɨ ɗɨm moonə taɗa dan anda ndaa koddə təfəgi taɗangɨn.

⁶ Ma mgban nzə-hawtɨ tikɨsə, ɓə kana sɨnə ma kwaməte ɓa tiya kɨla shi hawtɨngɨn.

⁷ Səɗi ka yedinga a nə ləməgyee na dɨ boyu, gə Həmɨnpwa ɓa gwada hye lee shingɨn kat.

⁸ Hye ɗyanga ka Yesu Ma Həmɨnpwa a Yaɓwarən ndi ma Həmɨnpwa a maddən gə we ka myentə, sɨnə ma dɨma dɨ kwirə Dawuda. Angɨn nə ləmə fema na dɨ hiwa kan.

⁹ Gəkɨlə ləmə feməngɨn a na dɨ boyo nə ɗɨki mya puki gbərəwe, na nza vor gbərəwe ɓətɨ hɨn kaɓa nzə-ɗa sɨkpaki. Shezə le da Həmɨnpwa myaa mban a pukən gbərəwe.

¹⁰ Səngɨn nə ɗa mgban na dɨ ɓwamosowa ka nagi ndo wule tənəti, gələ myee Həmɨnpwa a taɗə a ɗɨm mbətə ka myente kaaru-kaaru ka fukatə ite aa dɨ mbəə dɨ haka Yesu Ma Həmɨnpwa a Yaɓwarən.

¹¹ Ləməginə mya boyo diyalə atɨ, Hɨm kana mbərəm ɓwaa ka Yesu Ma Həmɨnpwa a Yaɓwarən, hɨm mgban mya maɗəmgə we ka myentə ɓwaa kan.

¹² Hɨm kana ɓwamoswongəm, hɨm ɓa pɨrəmə vor həmne da Həmɨnpwa ɓwaa ka Yesu Ma Həmɨnpwa a Yaɓwarən. Hɨm kana kwomrən a məntəməsən mgban, ndi mgban ɓa kworəm a məntəməsəm.

¹³ Hɨm kana ɗongə tikɨstə, ndi ɓa pɨrə humwa a vor tikɨstə gəkɨlə sɨnə diyale, ndaa dɨ mba məntəmə nəngɨn.

Nzə-lyente Həmɨnpwa a mwakan

¹⁴ Timoti, zə pɨrə humwa hye ta ɗyanga ji-kottə wule ləməginə. Hye fyel-kwakingrən a humwa Həmɨnpwa gə təna ɗaka ɓayasətə a nə wule i ləməgi, gə wule ləməgingɨn aa dɨ gwadəha, kɨɗati wule ləməgingɨn a dɨ kɨɗa myee dɨ kɨli.

¹⁵ Zə vədə nanga a haka Həmɨnpwa ɓətɨ ma Həmɨnpwa a mwakan a nggɨlə, a wule nzə-lyenta Həmɨnpwa a aa dɨ ɗa sopi bwe le da Həmɨnpwa, nda kəndə le da Həmɨnpwa twa ka diyale.

¹⁶ Təkəsə ka wule byelə ɓaya aa hɨnggə ji-kotti, gəkɨlə myee dɨ pɨrə wule ləməgingɨn a dɨ ɗeegə tɨfə diyale da Həmɨnpwa.

¹⁷ Wule shee təna dɨ kəndərən nə ɓa fɨlə a mbəgə hee ɓətɨ ɓokə hasə. Myee dɨ kəndə wule shingɨn nə yə Himinaya ka Filitus.

¹⁸ Tənə myee ɗaka diyale dɨ boyə ɓwaare atɨ, mattə gə taane ka myentə shi sɨ pɨrə, tənə dɨ kɨɗa mwadiyale da imi.

¹⁹ Kat ka angɨn, le da Həmɨnpwa nə ɓətɨ mgba-vɨna mya kwakə nə faratə nyerə-nyerə kanyi dwat. Asə aa dɨ humurdən, mye vomiyən ka le da Həmɨnpwa atɨ, “Həmɨnpwa lee myee hɨnggən nə,” ka mɨni ite atɨ, “Nagi ndo ma wadə kwakɨ Yesu Həmɨmiye ka diyale, mbak-mbak mangɨn ɓa təkəsə ka ɗa səhase.”

²⁰ A vor hwoɗi kpanye mye ɓa pa wule shee mya dɨ lyenə kaarən som-som, a vor shi-lyentɨngɨn mya ɗa 'ye ka dyamse, 'ye mgban ka nggɨrngɨme, 'ye nə də mya fyeɗə ka kada, 'ye mya nwo ka soɓwe. I shi-lyenti mya ɗatɨrən gə lyentɨ tikɨstə, 'ye mgban gə lyentɨ kpamləmɨntə.

²¹ Wule ma dɨ kɨt sɨsən ɗəmɗəm ndaa dɨ ɗa wule shi hashirə, sɨnə ɓa gəə wule shi-lyente mya vomiyərən gə le da Həmɨ-hwoɗye ɓəmbə, təne nza gə lyentɨ tikɨstə.

²² Timoti, təkəsə ka kadawo swaɗətə, hye virwo a koɗə sa tikɨs, ka mwadiyale ka mwoha ka nzaa ɗoltə ɓwaa ka mbiɗitɨ ji-kotte dɨ hiwo Həmɨnpwa ka hubosərən shet-shet.

²³ Ɓe asə aa peda ka məntəmətɨ ɓaatə a wule ite taa naarə kaarə, giɓə hye leyə atɨ, wule ləməgingɨn a dɨ shi ka ɓayasətə.

²⁴ Aa kana kɨsa da Həmɨnpwa a pɨrə məntəmətə ka ɓwaare, ndɨka nda gwadə ɓwaare, nda gəə wule ma ɓawa mba kəntə kənə ɓwaare shee nə ka mbasɨtə.

²⁵ Myee dɨ kanggən, nda koɗərən rikɨkɨt a kənərənshe. Ndəng Həmɨnpwa ɓa gwadərən təna por-njiya a mɨna asɨ lee diyale a koɗən,

²⁶ a dɨmə ite tən ɓa mɨna a ɗa səɗə-yedye, təna ɓərə a dɨmgə penge da Shetan ndi ma ngaatɨrən kəshi gə təna koɗən.