1 Timoti 6 - Ɓwaatiye New Testament

Gɨraha a nə kɨse

¹ Ji-kotte a vor kɨsawne kat, a təna ɗyanga ka yə həmingrən a fukadərən pepe gə ɓe myaa kɨɗa kwakɨ Həmɨnpwa a shartən kat ka le dan a hina kənəwnə.

² Tən kɨsee yə həmingrən a mwadiyale a pɨrə kottə, ɓe tənaa ushi yə həmingrən atɨ gəkɨlə təna peyə kaarən hiɗə a gəə ji-kotti. Ɓa wula təna ɗa yə həmingrən kɨsawne pepe, gəkɨlə myee təna dɨ ɗarən lyentə, ji-kotti mi fyemi a hakarən. Wule shinə nə kana hye kəndərən a kangə nə ləngɨn.

Mwo taa

³ Ma kwo lanə dɨ kəndə i shi som, ndaa mwaka ləməgi twaye Həmɨmiye Yesu Ma Həmɨnpwa a Yaɓwarən a kəndərən a nə koɗə Həmɨnpwa a tɨfa kana.

⁴ Wule ma kwi, sɨne ka ndukodə ne, ndaa lee asə. Mangɨn nzə-məntəməti ka ndəlsətə a nə wule ləməgyee dɨ nggala jiwne ka ɓayasətə ka byelə hase ka ɗongə mwatə ka sə,

⁵ kat ka nyatə anəsə a waka wule myee ka ɗyangalə hase a hubosərən, ka myee taa diyalə kaarən. A wule myee dɨ niyi ɓətɨ koɗə Həmɨnpwa kwatɨfə ɗɨm gɨnəti ka taa.

⁶ Shezə koɗə Həmɨnpwa ka mbasɨtə ka usəkətə a nə wule sa ma a ɗɨmə nzaasən a vɨratə, a haka wule mangɨn, kottə nee pepe.

⁷ Gə myaa pɨram ka asə a vɨratə, sə mgban myaa dɨ dɨməmgə vɨratə ka asə.

⁸ Anda mye ɗɨməm sɨzɨmtə ka sɨɓwetə, shingɨn kənə miye she.

⁹ Tən myee dɨ mwi atɨ təna gə ka gɨnətə, tənə dɨ fokə vor kadawe a kɨsə penge kat ka dɨɗəwne ka wule omshee dɨ kɨɗa ɓwaara, tənə dɨ ɓɨla də ɓwaare a vor tənətə təna yerə ɓaa.

¹⁰ Gəkɨlə mwo taa sɨnə kwirə nagi ndawula səhasə. I ɓwaare 'ye dɨ ɗa hɨmnə ɗɨm taa, ɗeegə tɨfə kottə, pɨrə kaake kɨɗa nəngrən ka tənətə som-som.

Gɨraha da Bulus zə haka Timoti

¹¹ Hye ma da Həmɨnpwa, gibgə wule shee ɗakarən, ɓe nza gunam, giɓi koɗə mgba sa pepe ka nzaa pepetə a vor kottə ka mwadiyale ka mwoha ka mbasɨtə ka ɓuk-ɓuktə.

¹² Kangyi dwat hye ta ɓərə vor kottə, ɗa lyenta Həmɨnpwa ka diyale. Hye kɨt ləmə myente kaaru-kaaru pɨp, a ite Həmɨnpwa a wara wasə a fəra hye kangə humwa ɓwaare hananang a bɨldə mwadiyale dəw.

¹³ Hɨnə dɨ lama kəw a humwa Həmɨnpwa ndi ma dɨ və nagi ndo sə myentə ka Yesu Ma Həmɨnpwa a Yaɓwarən ndi ma ite nda kangə humwa Pontus Bilatus a bwe diyalə le da Həmɨnpwa,

¹⁴ atɨ hye koɗə gɨrahangɨn, ɓe wozo ka ləngɨn a gəədən ɓaa, hye ɗa lyentə kan baa zə fəra Həmɨmiye Yesu Ma Həmɨnpwa a Yaɓwarən ɓa mɨnadə.

¹⁵ Həmɨnpwa nə ka pepetə, sɨnə hiɗə kal-kal ka gətə kat. Sɨnə Həme da həmye, sɨnə Həmɨmiye kat a nə nagi ndo ma. Yesu ɓa mɨna a fəra Həmɨnpwa kana kan.

¹⁶ Həmɨnpwa hiɗə taa mbati kan, sɨnə a vor ɓɨrte ama aa dɨ sɨkatɨrə, taa ndəng ma gi nan, taa ndəng ma də ɓa mba naatə a nan. Sɨnə ka fukatə ka gətə kaaru-kaaru. Amin.

¹⁷ Hye fyel-kwaki ji-gɨnətə a vɨraa wanetɨnə, ɓe tənaa ndukodə nəngrən ka ɗashi mwarashe, ɓe tənaa bədə myensərən a nə gɨnətə a wule ite aawa kanga. Ndɨka təna bədə myensərən a haka Həmɨnpwa ndi ma dɨ vəm nagi ndo sə kɨr-kɨr gə hanɨngəm.

¹⁸ Boyərən a təna wula ka ɓwaare a gwadərən ka gɨnətɨ darən.

¹⁹ Dɨ wule gwahangɨn tən ɓa peyə nəngrən də gɨnətə a vor pwa gəkɨlə kpawtɨ fəre təna ɗɨm myentɨ diyale a ite aa dɨ mbəə.

²⁰ Timoti, nidə sa Həmɨnpwa a vu, hye kɨsə pepe. Təkəsə ka byelə ɓaye kat ka lelə ɓaya dɨ ɗɨkdə ɓwaare təna kwo le da Həmɨnpwa.

²¹ Wule ləngɨn nə imi a koɗən a dɨ kəndən, dɨ ha wule ləngɨn təna ɗeyə a ɗaka kottə. Maa wuladəha da Həmɨnpwa a nza ɓwaa kəw.