1 Timoti 5 - Ɓwaatiye New Testament

Gɨraha a nə nggamse ka mi kpan-kpanye

¹ Ɓe gɨra wule ma kpangu a kiwatə hashi-hashi, byeli kan rikɨkɨt, hye nyerədən a gwadən ɓətɨ baagunə. Sə mgban hye kɨt ji-mattɨ morye pepe a nidərən ɓətɨ mwafenganə,

² hye nidə mi kpan-kpani mandye ka fukatɨ darən ɓətɨ nuwoyi a hakəw, hye nidə ji-mandye a ndukodərən ɓətɨ mwafenganə, hye nidərən pepe ka ɗəmɗəmtə.

³ Hye ta ɗyanga ka nggamse mandye a wule 'ye taa ama kaarən ɓa gwadərən, nidərən pepe ɓe tənaa ɗongə asə.

⁴ Wule nggamsate ka je kaarə naasə mgban ji-zeye, ɓə wula tən ta gwadə. Tən kana ɗaasə, tən mbwa yə sɨnggərən gə wule ɓwate təna ɓwa kaarən ka swaɗəsərən. Angɨn sə hanɨngti a haka Həmɨnpwa.

⁵ Wule nggamsate kana mya ɗyanga kaarə nə mate nza dɨsərə taa ama kaarə, kotə mate mɨndə hubosə kat a haka Həmɨnpwa dɨ ɗan hiwtə tukotə ka fəre dɨ nyisən taa piyati də gə nda gwadə.

⁶ Shezə nggamsate a vor nzaa ɓaatə ka mwo shi vɨratə, kotɨnə ɓətɨ kwa-wo dɨ woyi a vɨratə.

⁷ Boyə ɓwaare ləməginə kənərənshe gə ɓe myaa ɗɨmə a bwelə hase a nəngrən.

⁸ Ma kat kwo gwadə myee dan, a yə sɨnggən, kat ka myee a sɨsən, wule mangɨn aa nzə-kotti, ndɨka nzə-koɗə pɨle a nə wule mangɨn.

⁹ Nggamsate mye ɓa bəltɨrə a vor nggamse kotə ite kyawasə a tɨlə bəwtə tukoltaka a ite kɨt nəngrən a vor nzaa hwodarə.

¹⁰ A mate mya leetɨrə ka lyentɨ pepetə a ite gɨra jingrə a daatɨfə pepeye, ngga dɨ luu omye, ngga dɨ gwadə myee a vor tənətə a wule mate mɨndə hubosə kat gə ɗa lyentɨ pepetə. Wule matɨngɨn nə mye ɓa bələ vor nggamse.

¹¹ Wule nggamse mandyee aa nda iira, ɓe myaa bəltɨrən a vor nggamse mandye, gəkɨlə wule ingɨn kadawo morye kana maɗə sɨsərən a pɨrgə maasərən, təna dɨ ɗaka kangte təna kangə humwa Həmɨnpwa a ɗaka lyentɨ da Ma Həmɨnpwa a Yaɓwarən a ɨl nzaa hwoɗye ka mure.

¹² Wulerən nə dɨ nggala ɓashitə a nəngrən gə təna ɗaka wule la təna kangə a boyo atɨ tən ɓa ɗa.

¹³ Aa angɨn nə ɓəmbə, təna dɨ pɨrə nzaa ɓaatə tən ta woyi ɓaa a mbəgə hwoda ɓwaare. Aa liya wule nzaa ɓaatɨngɨn nə ɓəmbə, tənə ka kwaamɨ lamha kaarən dɨ woyi pɨrdə kwaamɨngrən a le da imi, tən ta byeli ɓaa a nə wule ləməgyee tənaa leyə, a wule ləməgyee aa kana təna boyo.

¹⁴ Gə-angɨn, hɨnə dɨ boyə nggamse mandyee aa nda iira atɨ, ndɨka tən ta nzaa hwoɗye a mwasa je a nidə wetɨ darən, gə ɓe tənaa və nzə-kwo nəngrən Shetan humwatə nda kɨɗa kwakɨ ji-kottə.

¹⁵ Ka diyale imi virwo mbəə dɨ koɗə Shetan.

¹⁶ Anda itɨ meti nə də a mate nji-kotti ka nggamse mandye 'ye ngga dɨ nidərən, a ngga pɨrə humwa ta gwadərən ɓe myaa ɗaka sɨtɨrəngɨn dɨksɨk a nə ji-kottə. Angɨn ɓa gwadə ji-kottə mgban gə təna ɗɨm humwatə a gwadə nggamse mandyee kana mya gwadərən a 'ye taa ama kaarən.

¹⁷ Wule mi kpan-kpanyee dɨ gwadəha ka lyentə a vor kottə kɨr-kɨr, baashe wule 'ye dɨ hiwa ka ləmə feme da Həmɨnpwa dɨ kənə ɓwaare shee, ɓə kana mya vərən moone a kpapa.

¹⁸ Gəkɨlə le da Həmɨnpwa a boyo atɨ, “Naake kana dɨ bulashe a kpərətə, ɓe ɗɨkən darga a kwaamɨngɨn.” Sə mgban, “Ɓwaaree dɨ lyeni ɓə kana mya mbwarən moone darən.”

¹⁹ Ləməgyee mya gomu kaarən a nə ma kpan, ɓe ɗa lyentə ka ləməgingɨn, zə kula a hye kɨl ləməgingɨn dɨ kwaamɨ ɓwaare kpe naasə mwaakɨn.

²⁰ Wule ma kpana dɨ ɗa səhase, gɨrarən, fyel-kwakingɨn a humwa ɓwaare kat, gə myee mbiɗi a gɨra nəngrən a ɗadə kangsərən.

²¹ Hɨnə dɨ lama kəw a humwa Həmɨnpwa ka Yesu Ma Həmɨnpwa a Yaɓwarən ka malyenye da Həmɨnpwa 'ye nda nggɨlə, koɗə shee na kənu, ɓe bɨldə som-somtə, ɓe bɨldə mwonəha.

²² Ɓe hərəngə pukdə tyefinga a nə ama gə hye ɗɨkdən a lyentə. Ɓe mwa a pedə nanga ka səhase da ama, kɨt nanga hye nza ɗəmɗəm.

²³ Ɓeyə sop haɓi ɓaye ɓəmbə, hye tawa saɓwa haɓi inabitə ɓyeləng a kwa-nggume gə nda gwada a ootɨ yedinga 'ye dɨ maɗa kəw mba-dɨ-mba.

²⁴ Səhase da imi nee bə haa bwange bwang dɨ kula ɓashitee bə nəngrən, hɨnggə imi mgban nee a haa ɓotə dɨ koɗərən ɓuk-ɓuk ɓaga dɨma bwang.

²⁵ Sə mgban lyentɨ pepeta imi nee a haa bwange bwang, nagi ite mya ɗatɨrə a haa ɓotə nə nggaa dɨ yerə haa ɓotə kaaru-kaaru, nggi ɓa dɨma a haa bwange bwang.