1 Timoti 4 - Ɓwaatiye New Testament

Kəndəshi jeronye

¹ Mbak-mbak Pitɨ Ɗəmɗəmtə boyo bwang atɨ, fəre nə ɓaga shi a kpawtə, imi ɓa ɗaka mwadiyale a koɗə pitɨ vwakaha ka wule shee pɨle ji-dwatə a dɨ kəndərən.

² Wule kəndəshingɨn hɨnggə ji-vwakaha ka ji-jeronyi ɓayi, tənə wule myee Nzə-tɨmbɨrha a gbə kwa-hubosərən taa səɗə-yedi pepeyə kaarən.

³ Wule mingɨn nə dɨ kərə ɓwaare ngajawne, tənə dɨ kərə ɓwaare zɨm wule i sɨzɨmti. A sɨzɨmte kat Həmɨnpwa a ɗa gəkɨlə ɓwaare a luwo a zɨmə ka usəkətə, a wule myee ka mwadiyale kaarən a myee lee diyale.

⁴ Gə nagi ndo sə kat a Həmɨnpwa a ɗarən a dɨmaadən a vɨratə, sɨne pepe taa asə də mya kworən atɨ nda hasə, anda mye luu səngɨn ka usəkətə.

⁵ Gəkɨlə sa Həmɨnpwa a vədən kat mye mɨndən ɗəmɗəm ka ləməgye da Həmɨnpwa ka hiwtə.

⁶ Hye kana bɨlə ji-kottə shinə kat, angɨn bɨldən atɨ hye kɨsa tikɨsə, a hɨnggə Yesu Ma Həmɨnpwa a Yaɓwarən, a wule kɨsa mya saarən pepe a vor mwadiyale, ka ləməgi diyale da Həmɨnpwa, a 'ye hye luwo a dɨ koɗərən.

⁷ Təkəsə ka ɗashi kulitə kat ka wule gbaamitɨ byelə ɓaye da mandyee iira. Ɓəri kɨt sɨsa hye ta gɨra nanga gə hye nza ɗəmɗəm.

⁸ Mye leyə atɨ humurdə sɨtə nee pepe shezə koɗə Həmɨnpwa ka ɗəmɗəmtə pɨri ka fukatə kat, gəkɨlə nzaa ɗəmɗəmtɨngɨn nə dɨ gwadə ɓwaare təna bədə myensərən a haka Həmɨnpwa a nzatɨnə ɓəgəng ka itɨrə ɓaga shi.

⁹ Ləmanə diyalə, sɨnə a kana nagi ndo ma a luwo:

¹⁰ Hin bədə myensenə a haka Həmɨnpwate ka myentə, sɨnə Nzə-mbəha da ɓwaare kat baashe myee mwakan. Səngɨn nə ɗa mgban hina dɨ lyenə a dɨ ɓərə kɨr-kɨr.

¹¹ Kangyi dwat gɨra ɓwaare kənərən shinə.

¹² Ɓe mwa ama a ushira atɨ gə hye nzə-matti. Bɨlərən sa kana dɨ ha byele dəw, dɨ ha wesa, dɨ ha mwoha, dɨ ha mwadiyale ka nzaa pepetə,

¹³ baa zə fəra na shikan. Ɗɨkdə nanga hye ta bələ ɓwaare Malɨmtɨ Ɗəmɗəmtə bwang, hye ta hiwa ɓwaare ka ləməgye da Həmɨnpwa, hye ta kənərənshe.

¹⁴ Ɓe wozo ka wule gəte Həmɨnpwa a vu, a ite hye ɗɨmə dɨ ha kpaltə a vor ləməgye da Həmɨnpwa ite mi kpan-kpani kottə a poku tefingrən a ɗəw hiwtə.

¹⁵ Bədə myensa ka diyale a nə shingɨn, vədə nanga kat ka hubosa hiɗə a vor lyentɨngɨn gəkɨlə nagi ndo ma a naa pɨrə humwatɨ dəw.

¹⁶ Zə nidə wesa, hye ta bədə myensa a nə shee hye dɨ kəndərən. Kangyi dwat pɨrə humwa a vor le da Həmɨnpwa gəkɨlə hye kana ɗaasə, hye ɓa mbədə myensa kat ka tən myee dɨ kɨlta.