1 Timoti 3 - Ɓwaatiye New Testament

Majenye da Həmɨnpwa ka ji-gwasərən

¹ Ləmanə diyalə atɨ, ma kat dɨ hɨmagə lyentɨ nidə myee da Həmɨnpwa, mangɨn hɨmagə lyentɨ pepetə.

² Ɓə nza mbak-mbak ma atɨ sɨnə ma dɨ jin ji-kottə, a gəə ma tikɨsə, nda gə ka metə hiɗə, nda kɨt sɨsən a gə ka fukatə, nda gəə nzə-luu ɓwaare a gwadərən, nda gəə wule ma ɓa mba kəntə kənə ɓwaare shee.

³ Ɓe ndaa gəə nzə-sop vwo, ɓe ndaa gəə nzə-nyati ka ɓwaare, a nda gəə ma ɓuk-ɓukkə, ɓe ndaa gəə nzə-məntəməti, ɓe ndaa gəə nzə-mwo taa.

⁴ Mbak-mbak nda nidə hwodan pepe ta gwadə jingɨn, jingɨn a rantən ta koddən a fukadən ka tikɨstə.

⁵ Gə anda ma aa mba mi vor hwodan a kɨsə a nidərən pepe, ɓə ya ndi ɓa mba myee dɨ koɗə Həmɨnpwa a nidərən?

⁶ Ɓe ndaa gəə wule ma aa nda ɓongə vor kottə nə, naasə ndi ɓa pɨrə vor kadawe a fukə vor ɓashite mya kangdə gə Nzə-tɨmbɨrha.

⁷ Ɓə kana wakasən ka myee som a haa bwange a gə pepe gə ɓe ndaa pɨrə ɗashi sopye a kɨsə penge da Nzə-tɨmbɨrha.

⁸ Sə mgban tən myee dɨ gwadən jin ɓwaare, təna gə ka diksɨktə, ɓe tənaa gəə ji-kwakpeyə, ɓe tənaa pɨrə sop vwe, ɓe tənaa ɗɨkdə nəngrən a om taa.

⁹ Mbak-mbak təna kangə dwat ka diyale a tɨfə kottə ka səɗə-yedi pepeye.

¹⁰ Wule mingɨn, ɓə wula mya kanatɨrən a tən ɓə tikɨs, a myaa ɗɨmgərən lə hase, mya ɓə ɗakarən təna gəə ji-gwaha ka jin ɓwaare.

¹¹ Sə mgban mandingrən a gə ka diksɨktə a wule 'ye kana mya ndukodərən, ɓe tənaa woyo ta kɨɗa ɓwaare ka kwaamɨngrən. Tən ta kɨt sɨsərən a gə ka mbasɨtə, a wule mandyee mye ɓa naarən ka tikɨstə a nə nagi ndo sə.

¹² Naa nzə-gwaha ka jin ɓwaare a gə ka metə hiɗə, nda kɨt hwodan ka jingɨn a nidərən pepe.

¹³ Gə wule myee dɨ ɗa lyentɨ darən pepe, təna dɨ ɗɨmə nəngrən kwakə pepeye, təna dɨ byelə nə mwadiyale darən ka Yesu Ma Həmɨnpwa a Yaɓwarən ka gbənzɨmtə.

¹⁴ Hɨnə dɨ hɨma atɨ aa dɨ ɓongə hɨn ɓa shi hakəw, kat ka angɨn na kwa dɨ doru malɨmtɨnə a dɨ kənu sa kana hye ɗa.

¹⁵ Gə a hɨn taa zə gbyel, hye kənə ɓwaare wule sa kana tən tawa ɗa a kottə a tɨfe da Həmɨnpwa. Tənə myee da Həmɨnpwate ka myentə, tənə rɨmpe, tənə mya kwak mgba-vɨnə diyale kaarən.

¹⁶ Taa ndələ də ka sate atɨ, diyalə sa a haa ɓotə a wule a Həmɨnpwa a bɨldən a nə kottɨ dam nə kɨr-kɨr. Sɨnə dɨma dɨ vor pwa pɨra a vor vɨratə ka sɨtə ɓwaara. Pitɨ Ɗəmɗəmtə bɨldən diyalə, malyene a nan, mye hiwa ka ləməgi mbəha dan mbəgə hee kat, mye mwadiyale kan ganə a vɨratə, mye nggutən ka fukatə ɓə muɗə vor pwa.