1 Timoti 2 - Ɓwaatiye New Testament

Fyel-kwakye a nə ɗa hiwtə

¹ A kwamətə hɨnə dɨ gɨrarəwnə atɨ nagi ndo ma kat a kangə a nyisə ka hiwtə a tuwo Həmɨnpwa gə le da nagi ndo ma. Hwuna nyisən gə nda gwadərən, hwuna ɗa usəkətə gə le darən,

² gə həmye kat ka myee kɨt njiya, gə mya nzam ka ɗoltə ka kala Həmɨnpwa a vor ɗəmɗəmtə.

³ Wule ɗatɨngɨn nee pepe, sə hanɨngti a haka Həmɨnpwa Nzə-mbəsəm.

⁴ Gəkɨlə mwota Həmɨnpwa nə atɨ ɓwaare kat a ɗɨm mbətə a lee diyale.

⁵ Həmɨnpwa nə hiɗə, nzə-pɨrə waka Həmɨnpwa ka mbiɗitɨ ɓwaare kat nə hiɗə, sɨnə Yesu Ma Həmɨnpwa a Yaɓwarən, ndi ka nənəngɨn ɓwaara,

⁶ sɨnə mwa vədə nəngɨn gə nda luwa mbiɗitɨ ɓwaare kat. Anə nə takala Həmɨnpwa a və mi vɨratə a fəra kana.

⁷ Səngɨn nə ɗa, mya nggɨlti kpa-lagbe gə hiwatə ka ləmə feme da Həmɨnpwa. Diyalə na dɨ boyownə, aa jeronyi na dɨ kəsəwnə. Ka diyale hɨn nzə-kəndəshi diyalə a haka myee aa Yawude.

⁸ Gə-angɨn, na dɨ boyə ɓwaare kat atɨ, nagi a ndo haa təna gə kat, tən ta ɗa hiwtə ta maddə tyefi ɗəmɗəmye darən a pwa, aa ka muune, aa ka ndəlsətə a wakaasə.

⁹ Hɨnə dɨ səwnə atɨ, a mandye a kalashe pepe, wule sɨɓwete nzasə kaarən. Təna ɗa fawne, ɓe fawnəngɨn ka ɗaa showone aa wudə a sargyele, a wule a mye ɓa gbəwdə nggɨrngɨme, dyamse ka shi hal-halye kat a showone ka kala-sɨɓwetee ka taa kɨr-kɨr.

¹⁰ Ndɨka mandye a kɨt nəngrən, tən ta ɗa sa pepe ɓətɨ myee dɨ koɗə Həmɨnpwa dɨ kalan-gbəətə.

¹¹ Ɓə wula nagi ndo meti a ɗyegənshe shetətət ɗəng ka hyatane.

¹² Hɨn taa mwo sate atɨ metə a kangə nə morye a kəndəshe, ɓe nggaa gə ka gətə a nə morye, ndɨka ngga nza ɗəng kwaamɨngrə sɨp.

¹³ Gəkɨlə Adamu nə Həmɨnpwa a tiya dɨmasən a kwamətə mya ɓə shea dɨmaadə Hawawu.

¹⁴ Aa Adamu nə Shetan a vwakarən, metə nə mya vwakatɨrə ngga ɗa səhase.

¹⁵ Kat ka angɨn metə ɓa ɗɨm mbətə dɨ haka jee nggi ɓa mwasa anda nggi pɨrə humwa ka mwadiyale ka mwoha ka nzaa ɗəmɗəmtə ka kɨt ne.