ZEKARIA 14 - Bawm Common Language Bible Version

Jerusalem Leh Phun Tla

¹ Lâirêlnâk ah LALPA a to ding ni a nâi rawh. Jerusalem chu râwk hen a um lai le, an thil lâk tla chu ṭhenh zâr hen a um lai.

² Jerusalem do ding hen phun zawzawng LALPA nih a pumh na lai. Khuapi chu lâk hen a um lai le, in tla an rawk lai le, nunau tla an tleihrêm na lai. Mi khingkhuai chu sal ah put hen an um lai le, a dang lam chu khuapi mi kalpi an si lai lo.

³ A lânah a do na mi hâwi hen LALPA chu a suak lai le, phun tla a do na lai.

⁴ Chu tikah chun Jerusalem saklei oliv tlâng tlûnah a dîr lai. Churawhchun, oliv tlâng chu saklei leh thlanglei tivakuam kâu tak nih a phel phawk lai. A tlâng khingkhuai chu marlei kângah a khing dang chu simlei kângah a ṭhial lai.

⁵ Chu tlâng panih tivakuam a ṭhen phawknâk hen nan suak lai. Juda lal Uziah san ah lî ninh liauah an thlâk natu an tek mi hâwi hen nan tek lai. LALPA ka Pathian chu a vânmifial tla zawzawng put hen an hawng lai.

⁶ Chu tikah chun daih mawh vûr khal mawh

⁷ mûinâk rerêng a um lai lo. Zân khawm ah a chêu kumza lai rawh. Chu a hawng tlung ding chu LALPA sin cho ah theih asi.

⁸ Chu ni a hawng tlung tikah chun, tî thar chu Jerusalem thawk hen a hawng luang lai le, a khingkhuai chu Tipi Thi ah a luang lai le, a khingkhuai dang chu Mediteranian ah a luang lai. A fûr a ṭhâl hen zeiliau zawng ah a luang kumza lai.

⁹ Churawhchun, LALPA chu tual pumpi tlûnah lal asi lai le, mikip nih amah chu an sawnh lai le, a min an theih dân â bang rang lai.

¹⁰ Marlei mi Geba thawk hen simlei mi Rimon tiang hen chu ram bial zawzawng chu râwn dep hen siam asi lai. Jerusalem chu a kiangkam ah mi ram zawzawng tlûnlei sâng takah a um lai. Chu khuapi nih chun Benjamin kulh kawtkâ thawk hen a lânah mi kulh kawtkâ umnâk leh Hananel in sâng thawk hen lal uain sûrnâk ram ah kulh ki ram mi kawtkâ tiang a luah lai.

¹¹ Chunah chun mi tla him tak hen an um lai le, siat leh râwknâk zeikhawm ṭih ding a um lai lo rawh.

¹² LALPA nih Jerusalem dotu phun zawzawng tlûnah râi ṭihnungkâi a tlungtir lai. An taksa dam ko hen an thû lai le, an mit leh an lei khawm a thû ver lai.

¹³ Chu tikah chun LALPA nih thungâi a nawktir na lai le, lâu hen mikip nih an kiangah mi an deih hen an do na lai.

¹⁴ Juda mi tla nih Jerusalem vêng ding hen an do na lai. Phun tla neih zawzawng, ngûn, tangka, leh ni leh puan cherkhet an lâk lai.

¹⁵ An mêlma tla umnâk mun a mi rang tla, sanatung hâwi mi tla, sangâwngsâu tla, sanatung leh ran zawzawng tlûn khawm ah râi a tlung ber lai.

¹⁶ Churawhchun, Jerusalem dotu phun lakah a thibang tla chu kum siar hen LALPA Zeizawng tikho chu sawnh ding hen leh Bâsâ Kût mang ding hen chunah chun an kal lai.

¹⁷ Zei phun tal LALPA Zeizawng tikho sawnh ding êltu chu an ram ah ruah a sûr lai lo.

¹⁸ Aigupta mi nih chu Bâsâ Kût chu mang ding a duh lo chun kal ding duh lo phun kip tlûnah râi LALPA nih a tlungtir mi hâwi an tawng lai.

¹⁹ Chu chu Bâsâ Kût mang duhlotu tla Aigupta tlûnah leh phundang tla tlûnah rêpnâk tlung ding mi chu asi.

²⁰ Rang kêng tlûn tonâk lak tiang ah, “LALPA SINAH PÊK MI” ti thu â rîn lai. LALPA Biakin ah suangnâk bêl chu mâichâm kiangah mi mâihûm hâwi a thenhlimh lai.

²¹ Jerusalem ah suangnâk bêl zawzawng leh Juda ram ah mi suangnâk bêl zawzawng LALPA Zeizawng tikho sawnhnâk ah mang mi vial chu a dangtê hen thlei ding asi lai. Mi nih bâwlnâk ah an ap mi suangnâk ah mang ding asi. Chu tikah chun, LALPA Zeizawng tikho Biakin ah sawlehtu rêng an um lai lo rawh.