LEVITICUS 1 - Bawm Common Language Bible Version

Duah Hep Mi Bâwlnâk

¹ LALPA nih Mosi chu LALPA umnâk Puanin ah mi a kawh le,

² Israel tla nih bâwlnâk an ap tikah an zûl ding mi dân tla a pêk. Mi âuzawng nih bâwlnâk ah ran a ap chun a ranrual lakah mi kêl mawh dawrâ mawh pakhat a ap ding asi.

³ A ranrual lakah mi duahphung thil ap ah pakhat a ap chun sâwi ding umlo mi chawchal a put ding asi. LALPA nih rem a ti ding hen LALPA umnâk Puanin tualmâi ah a hawng put ding asi.

⁴ Chu minung nih chun chaw lû ah a kut a thâng lai le, a sual thiangtir ding hen bâwlnâk ah rem ti piak asi lai.

⁵ Chunah chun chawchal chu a thah lai le, Aron thlâk bâwlpu tla nih a thisen chu LALPA sinah an ap lai le, Puanin mâika ah mi mâichâm kî pali chu an theh lai.

⁶ Ran chu a vun a lîk lai le, a chan lai le,

⁷ bâwlpu nih mâichâm tlûnah thing a pawng lai le, a duah lai.

⁸ Chu mei lakah ran a savo tla chu an paih lai, a lû leh a thâu tla khawm.

⁹ A sungril tla, a kê tla a ṭawl lai le, bâwlnâk ah bâwlpu nih mâichâm tlûnah a duah hep lai. Chu eiphung ap mi rim nih chun LALPA chu a lawmhtir.

¹⁰ Mi nih a dawrâ mawh kêl mawh pakhat bâwlnâk ah a ap mi chu, a mipa simsâwinâk umlo mi asi ding asi.

¹¹ Marlei kâng mâichâm sîrah a thah lai le, bâwlpu nih a thî a lâk lai le, mâichâm kî pali lakah a theh lai.

¹² A chan dih hep tikah bâwlpu nih chun a ektê hen a lû leh a thâu telhsih hen mei lakah a paih ding asi.

¹³ A sungril leh a kê chu a ṭâwl lai le, bâwlpu nih mâichâm tlûnah bâwlnâk LALPA sinah ap hen a duah hep lai. Chu eiphung ap mi rim nih LALPA chu a lawmhtir asi.

¹⁴ Mi nih vâ duahphung thil ap ah a ap chun, vaṭhu mawh lâilêng mawh asi ding asi.

¹⁵ Bâwlpu nih mâichâm ah a pêk lai le, a ngâwng a merh phak lai le, a lû chu mâichâm ah a duah lai. A thî chu mâichâm sîrah a luangtir lai.

¹⁶ A chawkpaw leh a zeizawng chu mâichâm sîr saklei kângah vachâm lawnhnâk ah a lawnh ving lai.

¹⁷ A thla ah a tleih lai le, a pum chu a ek lai le, a thla chu sâm lo hen mâichâm ah duah hep ding asi. Chu eiphung ap mi rim nih LALPA chu a lawmhtir.