HOSEA 2 - Bawm Common Language Bible Version

¹ Churuangah na hâwi Israel mi,”Ammia’’ (Pathian Mi tla) leh “LALPA nih a dâwt mi tla,” chu kawh na.

Gomer Zumhkâilonâk leh Israel Zumhkâilonâk

² Ka fa tla, nan nu chu ka nupi silo rawh hen kei khawm a pasal silo rawh khawmsele a rangah ngiar u. Ṭângdang hawng ka pawmtâk mi leh â zuar mi chu bâng rawh ding hen ngiar u.

³ Chu hâwi hen a lêt duh lo chun a suak liau mi hâwitê hen takkaro siding hen a nipuan ka lît piak awt. Ramkaro leh ram châr hâwi hen ka siam lai le, tîhâl hen a thi lai.

^4-5 A fa le lak khawm ah khuaruatnâk ka nei lai lo, ningzak theihlo hen â zuar mi fa tla an si. Amah ngelchel nih, “Hawng ka dâwttu tla sinah ka kal lai le, anih nih buh leh tî, samul puan leh puannêm, oliv sariak leh uain an hawng ka pêk lai,” a ti.

⁶ Churuangah a lampi kham ding hen bualingnei hen dâi ka sak lai le, kulh dâi ka siam awt.

⁷ A duh na mi tla chu a ṭhâwl na lai le, sikhawmsele tleih ding hen a tawng na lai lo, a hâwl na lai le, sikhawmsele a tawng na lai lo. Churawhchun, “Ka pasal masa sinah ka kîr nawlh lai le, tu mi tla ngâk hen ka rangah a ṭha dauh lai,” a ti lai.

⁸ Buh, uain, oliv sariak leh tangka leh ngûn tla Baal sawnhnâk rangah a mang mi pêktu kei chu hawng ka theih rerêng lo.

⁹ Churuangah buh leh uain, samul puan leh puannêm tla vurh leh aih ding ah ka pêk mi chu fângzûn tikah ka suh lai le, ka lâk piak ving awt.

¹⁰ A duh na mi mâika ah takkaro hen a nipuan ka lît piak lai le, âukhawm nih ka thiltikhonâk lakah mi chu an hum kho lai lo.

¹¹ A puaituah ni tla zawzawng, thla thar kût leh kum siar kût tla, Dinhni ulhnâk tla leh phung leikângah tawngpumhnâk a siam mi tla ka dawngtir lai.

¹² Anmah nâwl zulh ding hen amah duhtu tla nih an pêk mi grep leh theipi tla chu ka veih lai. A grep dûm leh a thing thei dûm chu ramkaro hâwi hen ka siam lai le, ramsa tla nih an veih dep lai.

¹³ Keimah hawng ka philh hen Baal sinah rimthâw duah hen lungmantam hen â thuam le, amah duh mi tla a ṭhâwl na mi man ruangah ka rêp awt. LALPA nih a sim mi asi.

LALPA Nih A Mi Tla A Dâwt Na Nâk

¹⁴ Churuangah, ramkaro ah ka kalpi nawlh na lai le, chunahchun dâwtnâk thu hen amah chu ka neh lai rawh.

¹⁵ Grep dûm a nei mi lungumnâk inkhâr Nawknâk Vakuam ah ka siam mi chu a sinah ka pêk nawlh lai. A nungâk liauah Aigupta ram thawk hen a hawng liauah a ti mi hâwi hen hawng ka sâng lai rawh.

¹⁶ Churawhchun, ka pasal hawng ka ti nawlh lai rawh le, a Baal hâwi hen hawng ka ruat lai lo rawh.

¹⁷ Baal min rerêng ka simtir lai lo rawh.

¹⁸ Chu tikah chun ramsa leh va zawzawng tla hen thudântuknâk ka siam lai le, churawhchun, ka mi tla rangah nganfâk an pêk lai lo rawh. Tuknâk râlthuam tla ram lakah mi chu ka lawnh phin lai rawh le, nâmsâu leh chanhtiang tla khawm, ka mi tla chu thlangam leh him tak hen ka umtir na lai rawh.

¹⁹ Israel, nupi ah ka nan siam lai; na lakah dik leh zumhkâi hen ka um lai. Ka dâwtnâk dawnglo leh khuaruatnâk ka nan muhtir lai le, ka tâ na si kumza lai rawh.

²⁰ Ka thutiam chu ka kil kumza lai le, an theihtir lai; nang khawm nih LALPA na ka ti lai rawh.

^21-22 Chu tikah ka mi Israel tla thlachamnâk chu ka sâng lai rawh.” Tual tlûnah ruah ka sûrtir lai le, tual nih fâng tla, grep tla leh oliv a suah lai.

²³ Ka mi tla chu ram lakah ka birtir lai le, sul-le-lam tluang tak hen ka siam na lai rawh. “Dâwtlo” an si mi chu, ka dâwtnâk ka zauhtir na lai le, “Ka mi tla ansi lo” an ti mi tla chu “Ka mi tla nan si,” ka ti lai. Annih nih, “Kan Pathian na si,” an ti lai.