EXODUS 35 - Bawm Common Language Bible Version

Dinhni Rangah Dân

¹ Mosi nih Israel mi zapi chu munkhat ah a pumh ver na le, an sinah, “Hi hi LALPA nih ti ding hen thu an pêk na mi chu asi:

² Ni ruk nanmah rianṭuannâk ding nan nei, sikhawmsele, a ni sarih ni chu zarh ding mi Dinhnâk ni zahkâi, LALPA, keimah sinah ap mi chu asi. Âuzawng nih chu ni ah rian a ṭuan chun thah ding asi.

³ Nan in sungkhur khawm ah mei nan tih ding asi lo,” a ti.

Puanin Thenhlimh Apnâk

⁴ Mosi nih Israel mi zapi zawzawng sinah, “Hi hi LALPA thupêk chu asi:

⁵ LALPA sinah thil apnâk nei ule, mikip nih mah thinlung thawk dân hâwi vima hen ngûn, tangkasa, dâr;

⁶ puan mangṭhia, dumpâwl, senduk, samul lasen, kêl mul puan;

⁷ dawrâ vun rawng sen lakah thlâk mi, a vun a ṭha mi, thingrî thing;

⁸ meichêu hâng, rimthâw thuh ding leh rimthâwttirtu rangah;

⁹ karnelian leh lungmantam chu Bâwlpu Lalchem a ṭângbêk lakah mi ephod thenhlimh lakah thlaih ding mi hawng ap u.

LALPA Umnâk Puanin Rang Ding Mi Thil Tla

¹⁰ “Nan lakah rianṭuantu zungthiam tla chu LALPA nih thu an pêk na mi zawzawng siam ding hen hawng na sele;

¹¹ Puanin a khuhnâk leh a lênglei khuhnâk, a banhnâk tla, a kâwpmi tung tla, a talkhang, a tung tla, a tohnâk tla;

¹² Thudântuk Bâwm, a zawnhnâk thingtluan, a sinh leh a puanzâr;

¹³ dawhkân, a zawnhnâk thingtluan leh a thuamthil dang zawzawng, Pathian sinah ap mi sangtlêp,

¹⁴ cherhtu ding ah meichêu leh a thuamthil; meichêu leh a hâng;

¹⁵ rimthâw duahnâk mâichâm leh a zawnhnâk thingtluan, thuh ding mi sariak rimthâw, Puanin tualmâi puanzâr;

¹⁶ bâwlnâk duahnâk ding mâichâm, dâr lên, a zawnhnâk thingtluan leh a thuamthil zawzawng, khawlh ṭâwlnâk mâihûm leh a tohnâk;

¹⁷ a khârnâk ding puanzâr, a tung leh a tohnâk; a tualmâi puanzâr khârnâk;

¹⁸ puanin kilhnâk leh rirual, a khâr;

¹⁹ Aron leh a fapa tla Mun Thenhlimh ah an kal tikah ruk ding mi bâwlpu thuam rokual tla,” a ti.

Mi Zapi Tla Nih Thil Ap An Hawng Put Mi

²⁰ Israel mi zapi tla chu an ṭiak rawh.

²¹ Mi kip thinlung duhnâk nei mi vial nih LALPA umnâk Puanin siam ding hen LALPA sinah thilpêk an hawng put. Pathian sawnhnâk ah herh ding mi thil zawzawng leh bâwlpu thuam siamnâk ding mi zawzawng an hawng put.

²² Mi âuzawng nunau khawm mipa khawm a duhtu zawng nih pin tla, nabeh tla, pizung tla, ṭhî tla leh ngûn chikip tla chu LALPA sinah an hawng put le, an ap rawh.

²³ Âuzawng nih, puan mangṭhia, dumpâwl, senduk, samul lasen, kêl mul puan, dawrâ chal vun rawng sen ah thlâk mi mawh savun ṭha mi zât an hawng put.

²⁴ Âuzawng thawh khotu nih chun tangkasa, dâr tla LALPA sinah ap ding an hawng put, thingrî thing neitu zawng nih zeilak tal ah mang ding hen an hawng put.

²⁵ Nunau zungthiam zawzawng nih puan nêm lazâi leh lazâi dumpâwl, senduk leh samul lasen an siam mi tla chu an hawng put.

²⁶ Dawrâ mul hen lazâi an siam mi khawm.

²⁷ Ruitu tla khawm nih karnelian leh lungmantam tla ṭângbêk lakah mi ephod thenhlimh lakah thlaih ding mi an hawng put.

²⁸ Rimthâw leh meichêu hâng, thuh ding mi sariak leh rimthâwttirtu rimthâw tla an hawng put.

²⁹ Israel mi tla, LALPA nih Mosi sinah thu a pêk mi rianṭuannâk ding ah an thilpêk tla LALPA sinah an hawng put.

LALPA Umnâk Puanin Siamtu Mi Zungthiam Tla

³⁰ Mosi nih Israel mi tla sinah, “LALPA nih Juda phun lakah mi Uri fapa Bezalel, Hur tupa a thîm.

³¹ Pathian nih a thiltikhonâk zung thiamnâk, tikhonâk leh thil chi kip siam thiamnâk a pêk,

³² zeizawng ti dân thiamnâk leh ngûn tla, tangkasa leh dâr leikâng rianṭuan thiamnâk tla.

³³ Lungmantam bêk ding mi nek thiamnâk, thing ker dân tla, thil dang zeizawng siam thiamnâk a pêk.

³⁴ LALPA nih amah leh Dan phun ah mi, Ahisamak fapa Oholiab sinah an thiamnâk midang sîntir khonâk a pêk na.

³⁵ An sinah chun rianṭuan zât kip thiamnâk a pêk na, rîn thiamnâk, theihthiamnâk, puan mangṭhia tah thiamnâk, dumpâwl, senduk, samul lasen leh puan dang tla khawm tah thiamnâk a pêk. Rianṭuan dân chi kip an ti kho hen theihthiamnâk an nei.