DANIAL 7 - Bawm Common Language Bible Version

DANIAL NIH LANGHNÂK A MUH MI A SIMHFIANGNÂK Thilnung Pali Danial Muhnâk

¹ Babulon lalchem Belsazar a lal kum a kum khatnâk ah zân ah langhnâk ka muh,

² chu zân ah ka mang ah ka muh mi ka rîn mi chu hi tla hi asi: Thli chu mun kip thawk hen a hawng râng le, tisumsumriat chu a hawng sêm.

³ Tisumsumriat thawk hen sarâng lianpi pali an hawng suak le, anna bang lo hep.

⁴ Pakhat chu chakeibaknei hâwi asi, sikhawmsele mû hâwi hen thlâ a nei, ka zauh ko liauah a thlâ tla â thlêr hep. Chu sarâng chu châwi ving hen a um le, minung hâwi hen a dîrtir, churawhchun minung thinlung a sinah pêk hen a um.

⁵ Sarâng panihnâk chu vawm hâwi asi le, a dunglei kê hen a dîr. A hâ karah nâkruh pathum a um, aw-hâu nih a sinah, “Kal le, sa na chelh rî hen ei,” a ti.

⁶ Ka zauh ko liauah sarâng dang a hawng nawlh, keitê hâwi asi, a kêng leiah va thlâ hâwi pali a nei le, lû pali a nei, thuneihnâk nei tak mi hâwi hen a lang.

⁷ Ka zauh ko liauah sarâng palinâk a hawng lang, thungâi thil a ti kho le, ṭihnung a kâi, a thîr hâ lian tak hen a sa seh tla a sâm dep le, a lamhbêk, a dang tla bang lo tak hen ki parâ a nei.

⁸ Chu ki tla chu ka ngiat liauah, chu ki tla thawk hen a kitê a hawng chawrh, chu ki tla lakah mi ki thum chu a khiak rel, chu ki nih chun minung mit leh kâ a nei le, puar tak hen â khâwng.

A Um Kumza Ding Mi Langhnâk

⁹ Ka zauh ko liauah laltophah a hawng toh, laltophah tlûnah um kumza mi chu a to, a nipuan chu vûr hâwi a vâr le, a sam chu samul thiang mi hâwi asi. A laltophah chu mei kari chângpah tlûnah toh hen a um le, meialh lian tak asi le,

¹⁰ chu thawk hen chun mei tiva a hawng suak, mi sâng tam tak nih a rian an ṭuan piak le, mi nuaikhat a mâika ah an dîr, lâirêlnâk chu dawmh asi le, lasuibu tla an kêu.

¹¹ Ka zauh ko liauah chu keitê chu â sawr hen â khâwng lemang rih, ka zauh ko liauah sarâng palinâk chu thah hen a um le, a ruak chu meialh lakah an lawnh le, a vei dep.

¹² Sarâng dang pali khawm an thiltikhonâk lâk piak vima hen a um le, sikhawmsele, tik ruat ri chu nung rih ding hen ruat an si.

¹³ Chu zân ah langhnâk lakah chun, minung hâwi lek mi ka muh, sûm tuam buk hen ka leiah a hawng le, nung kumza mi leikângah a va kal le, a sinah a va a pêk.

¹⁴ Phun zawzawng leh chi zawzawng leh hawlh zawzawng nih a rian an ṭuannâk ding hen a sinah thuneihnâk leh lal thiltikhonâk an pêk, a thuneihnâk leh a ram chu zungzâl tiang hen dawngh a nei lai lo.

Langhnâk Simhfiangnâk

¹⁵ Langhnâk ka muh mi nih ka thinlung a purh khit le, ka thinlung a nawk thlo.

¹⁶ A dîr mi tla lakah pakhat sinah chubang zawzawng chu hawng ka simhfiang ding hen ka deih, churawhchun anih nih a umzia chu hawng ka simh.

¹⁷ Anih nih, “Hi sarâng pali lian tak hi tual tlûnah lalram pali a hawng um ding mi chu asi.

¹⁸ Chungnungchem Pathian mi tla nih lal thiltikhonâk anna ting kumza lai rawh,” a ti.

¹⁹ Churawhchun, sarâng palinâk a dang tla hen â bang lo mi sarâng ṭihnungkâi tak, dâr tin leh thîr hâ a nei mi hen a sa seh a sâm le, a lamhbêk mi thu tla chu tam dauh theih ding ka duh.

²⁰ Chun, a lû ah mi ki parâ leh a nehnûnah ki khat a hawng chawrh mi nih ki thum a thlawngh. Mit leh kâ a nei le, zûm tak hen â khâwng. A dang zawzawng ngâk hen ṭihnung a kâi.

²¹ Ka zauh ko liauah chu ki nih chun Pathian mi tla a do le, a neh na.

²² A nung kumza mi chu a hawng le, Pathian mi tla sunhsaknâk ruangah lâirêlnâk thu a hawng sim. Pathian mi tla nih lal thiltikhonâk anna ting ding mi tik a hawng tlung rawh.

²³ Simhfiangnâk ka tawng mi chu hi hi asi: Sarâng pali tla chu lalram pali tual tlûnah a hawng um ding mi chu asi. Tual pumpi chu a mântîr hen a lamhbêk lai.

²⁴ Ki parâ chu lal parâ, chu lalram lakah lâirêltu ding chu an si. Churawhchun, lal dang pakhat a hawng lang lai le; a tîr a mi tla hen anna dang ving lai le, anih nih lal pathum tla a neh na lai.

²⁵ Anih nih Pathian rokual kalh hen thu a sim lai le, Pathian mi tla a nehsawh na lai. Anih nih an phung dân leh kût ni tla dangtîr a tum lai le, kum thum leh a khing chu Pathian mi tla chu amah thuneihnâk tangah an um lai.

²⁶ Churawhchun, vân ah mi lâirêlnâk a hawng um lai le, chu nih chun a thiltikhonâk chu a lâk piak lai le, a veih dep lai.

²⁷ Tual tlûnah lalram zawzawng rokualnâk leh thiltikhonâk chu Pathian mi rokual tla sinah pêk asi lai rawh. Lal thiltikhonâk anna ting mi chu a dawng lai lo rawh le, tual tlûnah lâirêltu zawzawng nih an rian an ṭuan piak na hen an thu an ngâi lai rawh,” a ti.

²⁸ Chu chu thu dawnghnâk asi: Dâng rê hen ṭhih hen ka um mi chu, ka thinlung ah ka kil ko.